1. Dɛn na ɛsɛ sɛ yɛyɛ na sɛ Yehowa da no ba a, yɛanya nkwa?

 SƐ Bible ka “Yehowa da” a, ɛkyerɛ bere a Yehowa bɛsɛe n’atamfo na wagye n’asomfo nkwa. Tete no, ɛtɔ da a na Yehowa twe aman bi aso. (Yes. 13:1, 6; Hes. 13:5; Sef. 1:8) Yɛn bere yi so no, “Yehowa da” no befi ase bere a wiase atumfo atow ahyɛ Babilon Kɛse no so no, na ɛbɛkɔ akowie Armagedon ko no mu. Sɛ yebenya nkwa saa “da” no a, ɛnnɛ na ɛsɛ sɛ yesiesie yɛn ho. Yesu kyerɛkyerɛe sɛ ɛnyɛ sɛ yesiesie yɛn ho ma “ahohiahia kɛse” no a na yɛawie. Ɔkaa nso sɛ ‘yɛnyɛ krado,’ kyerɛ sɛ, yɛmma Yehowa da no ntena yɛn adwene mu.—Mat. 24:21; Luka 12:40.

2. Dɛn nti na Tesalonikafo nhoma a edi kan no betumi aboa yɛn?

² Krataa a edi kan a Onyankopɔn honhom maa ɔsomafo Paul kyerɛw kɔmaa Tesalonikafo no, ɔde mfatoho ahorow bi dii dwuma de boaa Kristofo sɛnea ɛbɛyɛ a wɔbesiesie wɔn ho ama Yehowa da kɛse a ɔde bebu atɛn no. Bere a na Paul reka saa asɛm no, na onim sɛ ɛnyɛ saa bere no ara na Yehowa da no bɛba. (2 Tes. 2:1-3) Nanso ɔhyɛɛ ne nuanom nkuran sɛ wɔnsiesie wɔn ho mma saa da no te sɛ nea na ɛreba da a edi hɔ no ara; yɛn nso, saa afotu no betumi aboa yɛn. Momma yɛnhwɛ nkyerɛkyerɛmu a ɔde mae wɔ nea edidi so yi ho: (1) ɔkwan a Yehowa da no bɛfa so aba, (2) wɔn a wɔrennya nkwa saa da no, ne (3) sɛnea yebesiesie yɛn ho ama saa da no na yɛanya nkwa.

3. Sɛn na Yehowa da no bɛba te sɛ nea ɔkorɔmfo ba anadwo no? (Hwɛ mfoni no nso.)

³ Ɛbɛba “te sɛ nea ɔkorɔmfo ba anadwo no.” (1 Tes. 5:2) Mfatoho mmiɛnsa a Paul de kyerɛkyerɛɛ ɔkwan a Yehowa  da no bɛfa so aba mu no, wei ne nea edi kan. Sɛ akorɔmfo rekowia ade a, wɔtaa yɛ no ntɛm, na wɔkɔ anadwo sɛnea ɛbɛyɛ a nkurɔfo renhu wɔn. Yehowa da no nso bɛba mpofirim bere a nnipa dodow no ara ani nna. Nokware Kristofo mpo, sɛnea nsɛm no besisi ntɛmntɛm no, ebia ɛbɛyɛ yɛn nwanwa. Nanso yɛn de, yɛnte sɛ abɔnefo a wɔbɛsɛe wɔn no; yebenya nkwa.

4. Ɔkwan bɛn so na Yehowa da no te sɛ awo mu yaw?

⁴ “Sɛnea awo mu yaw ba ɔbea a ɔnyem so.” (1 Tes. 5:3) Ɔpemfo rentumi nkyerɛ bere pɔtee a awo bɛka no. Nanso onim sɛ ɛnyɛ dɛn ara a ɔbɛwo. Sɛ ɔpemfo awo du so a, ɛda adi sɛ awo no bɛka no mpofirim, na ɔbɛte yaw ara kosi sɛ ɔbɛwo. Yɛn nso, yennim da ne dɔn a Yehowa da no befi ase. Nanso, yenim paa sɛ Yehowa da no bɛba, na atemmu a ɔde bɛba abɔnefo so no bɛba prɛko pɛ, na wɔrentumi nguan.

5. Ɔkwan bɛn so na ahohiahia kɛse no te sɛ adekyee hann?

⁵ Te sɛ adekyee hann. Paul mfatoho a ɛtɔ so mmiɛnsa no, ɔsan kaa akorɔmfo a wɔwia ade anadwo ho asɛm. Nanso ɛha yi de, asɛ na Paul de Yehowa da no retoto adekyee hann ho. (1 Tes. 5:4) Akorɔmfo a wɔbɔ korɔno anadwo no, ɛtɔ da a, wɔn adwene wɔ nea wɔrekowia no so ara ma wɔn ani bɛba wɔn ho so no, na bere atia wɔn. Wobɛhwɛ na adekyee hann apue wɔn so mpofirim ama nkurɔfo ahu wɔn. Sɛnea adekyee hann ma akorɔmfo ho da hɔ no, saa ara na wɔn a wɔkɔ so yɛ sum mu nnwuma no, ahohiahia kɛse no bɛma wɔn ho ada hɔ. Yɛn de, yɛrensuasua wɔn; yɛbɛkwati suban a Yehowa ani nnye ho, na yɛakɔ so ‘ayɛ papa, ayɛ adetrenee, na yɛadi nokware wɔ biribiara mu.’ (Efe. 5:8-12) Ɛno akyi no, Paul de mfatoho  mmienu bi a edi nsɛ kaa wɔn a wɔrennya nkwa no ho asɛm.

6. Adɛn nti na yebetumi aka sɛ nnipa dodow no ara adeda? (1 Tesalonikafo 5:6, 7)

⁶ “Wɔn a wɔda.” (Kenkan 1 Tesalonikafo 5:6, 7.) Yehowa da no ba a, wɔn a wɔrennya nkwa no, Paul de wɔn totoo wɔn a wɔada ho. Wɔnnim nea ɛrekɔ so, na wɔnhu sɛ bere rekɔ. Enti sɛ asɛnkɛse bi si a, wɔnhu na wɔayɛ ho biribi. Ɛnnɛ, nnipa dodow no ara adeda wɔ honhom mu. (Rom. 11:8) Adanse a ɛkyerɛ sɛ yɛte “awiei mmere” no mu, na ɛrenkyɛ koraa ahohiahia kɛse no bɛba no, wɔnnye nni. Nsɛm akɛseakɛse a ɛresisi wɔ wiase no betumi ama ebinom ani so atetew wɔn na wɔakyerɛ Ahenni no ho asɛm a yɛka no ho anigye kakra. Nanso sɛ́ anka wɔbɛwɛn no, wɔn mu bebree san da. Wɔn a wɔgye di sɛ da bi bɛba a Yehowa bebu atɛn no, wɔn mu bi wɔ hɔ a, ɛyɛ wɔn sɛ ennya mmae. (2 Pet. 3:3, 4) Nanso, yenim sɛ Onyankopɔn afotu a ɛne sɛ yɛnkɔ so nwɛn no, ade rekye a ade resa nyinaa, ɛho hia paa sɛ yetie.

7. Wɔn a Onyankopɔn bo befuw wɔn no, ɔkwan bɛn so na wɔte sɛ wɔn a wɔabow nsã?

⁷ “Wɔn a wɔbow nsã.” Wɔn a Onyankopɔn bo befuw wɔn no, ɔsomafo Paul de wɔn totoo asabofo ho. Sɛ obi bow nsã a, ɛyɛ den sɛ obehu nea ɛrekɔ so, na onsisi gyinae pa. Saa ara na abɔnefo nso te; wɔntie Onyankopɔn kɔkɔbɔ. Ɔbra a wɔbɔ no de wɔn bɛkɔ ɔsɛe mu. Nanso Kristofo de, wɔtu yɛn fo sɛ yɛmma yɛn ani nna hɔ. (1 Tes. 5:6) Bible ho ɔbenfo bi ka sɛ, nea anidahɔ kyerɛ ne sɛ, “yɛde adwene a emu da hɔ bɛtɔ yɛn bo ase asese biribi asusuw ho ɔkwan pa so na aboa yɛn ma yɛasi gyinae pa.” Adɛn nti na ɛsɛ sɛ yɛma yɛn adwene mu da hɔ? Sɛnea ɛbɛyɛ a amanyɔsɛm ne nsɛmnsɛm a ɛrekɔ so wɔ wiase no renwiawia yɛn. Bere a Yehowa da no rebɛn no, hyɛ a nkurɔfo hyɛ yɛn sɛ yɛmfa yɛn ho mfɔrefɔre nsɛm a ɛtete saa mu no, wɔbemia mu. Nanso sɛnea yɛbɛyɛ yɛn ade no, ɛnsɛ sɛ ɛyɛ yɛn dadwen. Onyankopɔn honhom betumi aboa yɛn ma yɛanya ntoboase na yɛde adwene a emu da hɔ asisi gyinae pa.—Luka 12:11, 12.

8. Nea ɛbɛboa yɛn ma yɛawɛn na yɛn ani ada hɔ no, ɔkwan bɛn so na 1 Tesalonikafo 5:8 ka ho asɛm? (Hwɛ mfoni no nso.)

⁸ “Yɛnhyɛ . . . nkatabo, na yɛnhyɛ . . . dade kyɛw.” Ɔsomafo Paul kaa sɛ yɛte sɛ asogyafo a wɔn ani da hɔ a wɔasiesie wɔn ho ama ɔko. (Kenkan 1 Tesalonikafo 5:8.) Sogyani de, ɛsɛ sɛ ɔyɛ krado bere nyinaa na sɛ ntɔkwaw ba a, watumi ako. Yɛn nso, saa ara na yɛn tebea no te. Ɛsɛ sɛ yɛhyɛ gyidi ne ɔdɔ nkatabo ne nkwagye anidaso dade kyɛw de kyerɛ sɛ yɛasiesie yɛn ho ama Yehowa da no. Yɛyɛ saa a, ebetumi aboa yɛn paa.

9. Sɛn na yɛn gyidi bɔ yɛn ho ban?

⁹ Ná nkatabo bɔ sogyani koma ho ban. Yɛn nso, gyidi ne ɔdɔ bɔ yɛn koma ho ban. Saa suban mmienu yi bɛboa yɛn ma yɛakɔ so asom Onyankopɔn na yɛadi Yesu akyi. Gyidi ma yenya awerɛhyem sɛ, sɛ yɛde yɛn koma nyinaa hwehwɛ Yehowa a, obetua yɛn ka. (Heb. 11:6) Sɛ yehyia ɔhaw mpo a, gyidi bɛboa yɛn ma yɛakɔ so abata yɛn Kannifo Yesu ho. Yɛn bere yi so no, ɛmfa ho ɔsɔretia anaa sikasɛm mu ahokyere a anuanom binom hyiae no, wɔkɔɔ so dii nokware. Sɛ yesuasua wɔn a, ɛbɛhyɛ yɛn gyidi den ma yɛatumi agyina asetena mu haw ano. Sɛ yesuasua wɔn a wɔtwitwaa nneɛma so sɛnea  ɛbɛyɛ a wɔde Ahenni no bedi kan a, ɛbɛboa yɛn na yɛn ani ammere sika ne nneɛma. b

10. Ɔdɔ a yɛwɔ ma Onyankopɔn ne yɛn yɔnko nipa no, ɛboa yɛn ma yɛyɛ dɛn?

¹⁰ Ɔdɔ nso ho hia paa na ama yɛakɔ so awɛn na yɛama yɛn ani ada hɔ. (Mat. 22:37-39) Ɔdɔ a yɛwɔ ma Onyankopɔn no boa yɛn ma yemia yɛn ani ka asɛmpa no ɛmfa ho sɛ ebetumi akɔfa ɔhaw abrɛ yɛn no. (2 Tim. 1:7, 8) Esiane sɛ yɛdɔ wɔn a wɔnsom Yehowa no nti, yɛkɔ so ka asɛmpa no, na yɛyere yɛn ho yɛ yɛn asaasesin mu adwuma; yɛfa tɛlefon ne nkrataakyerɛw so mpo di adanse. Yɛmpa abaw, efisɛ yɛwɔ anidaso sɛ wɔn a yɛka asɛmpa no kyerɛ wɔn no, daakye wɔn mu bi bɛsesa na wɔafi ase ayɛ adepa.—Hes. 18:27, 28.

11. Sɛn na ɔdɔ a yɛwɔ ma yɛn nuanom Kristofo boa yɛn? (1 Tesalonikafo 5:11)

¹¹ Yɛdɔ yɛn nuanom Kristofo nso. ‘Yɛhyehyɛ yɛn ho nkuran na yɛhyehyɛ yɛn ho den’ de kyerɛ sɛ yɛdodɔ yɛn ho. (Kenkan 1 Tesalonikafo 5:11.) Yɛte sɛ asogyafo a obiara boa ne yɔnko wɔ akono, enti yɛhyehyɛ yɛn ho nkuran. Ɛwom, sɛ ɔko gyina mu a, sogyani bi betumi apira ne yɔnko a n’ani nna, nanso ɛnyɛ ade a ɔbɛhyɛ da sɛ ɔrepira no. Yɛn nso, yɛrenhyɛ da sɛ yɛrepira yɛn nuanom da, anaa bɔne a wɔayɛ yɛn no yɛbɛyɛ wɔn bi atua ka. (1 Tes. 5:13, 15) Afei nso, yɛde obu ma wɔn a wɔdi asafo no anim de kyerɛ sɛ yɛdɔ wɔn. (1 Tes. 5:12) Bere a Paul kyerɛw saa krataa yi, na Tesalonikafo asafo no nnya nnii afe. Ɛbɛyɛ sɛ na mmarima a wɔdi nneɛma anim no nni suahu pii, na ebetumi aba sɛ na wɔdi mfomso. Ne nyinaa akyi no, na ɛfata sɛ wɔde obu ma wɔn. Sɛ ahohiahia kɛse no fi ase a, ebia ebehia sɛ yɛde yɛn ho to yɛn asafo mu mpanyimfo so hwehwɛ akwankyerɛ sen sɛnea yɛyɛ no mprempren. Saa bere no, ebia yɛrentumi ne wiase nyinaa adwumayɛbea ti anaa Betel nni nkitaho; enti saa bere yi na ɛho hia paa sɛ yɛdɔ asafo mu mpanyimfo na yebu wɔn. Sɛ ɛdan sɛ boɔ  koraa a, momma yɛmma yɛn ani nna hɔ, mommma yɛmmfa yɛn adwene nnsi wɔn sintɔ so, mmom momma yenhu sɛ, Yehowa nam Kristo so rekyerɛ saa mmarima anokwafo yi kwan.

12. Ɔkwan bɛn so na anidaso a yɛwɔ no bɔ yɛn adwene ho ban?

¹² Sɛnea na dade kyɛw bɔ sogyani ti ho ban no, saa ara na yɛn nkwagye anidaso no nso bɔ yɛn adwene ho ban. Sɛ yɛwɔ anidaso a emu yɛ den a, yebehu sɛ nneɛma a ɛwɔ wiase no yɛ adehunu. (Filip. 3:8) Anidaso a yɛwɔ no boa yɛn ma yenya ntoboase, na ɛma yɛn adwene mu da hɔ. Wallace ne Laurinda a wɔsom wɔ Afrika no hui sɛ saa asɛm no yɛ nokware. Nnawɔtwe mmiɛnsa ntam no, Wallace papa wui, ɛnna Laurinda nso maame wui. COVID-19 nsanyare no nti, wɔn mu biara antumi ankɔ ne nkyi ankɔhwɛ n’abusuafo. Wallace kyerɛwee sɛ: “Owusɔre anidaso no boa me ma mede m’adwene bu sɛnea wɔn asetena bɛyɛ bere a wɔanyan wɔn aba wiase foforo no mu no, na ɛnyɛ sɛnea na wɔte ansa na wɔrewu no. Sɛ wɔn wu no besi me tirim ma awerɛhow hyɛ me so a, saa anidaso no ma me koma tɔ me yam.”

13. Dɛn na yebetumi ayɛ na yɛanya honhom kronkron?

¹³ “Munnnum honhom no gya no.” (1 Tes. 5:19) Paul kaa sɛ honhom kronkron te sɛ ogya a ɛredɛw wɔ yɛn mu. Sɛ Onyankopɔn honhom wɔ yɛn so a, ɛboa yɛn ma yɛde nsi ne ahokeka yɛ adetrenee, na ɛkanyan yɛn ma yɛyɛ Yehowa adwuma. (Rom. 12:11) Dɛn na yebetumi ayɛ na yɛanya honhom kronkron? Yebetumi abɔ mpae asrɛ, asua Onyankopɔn asɛm a ɔma wɔde ne honhom kyerɛwee no, na yɛne n’ahyehyɛde a honhom kyerɛ no kwan no abɔ. Yɛyɛ saa a, ɛbɛboa yɛn ama yɛasow “honhom no aba” no.—Gal. 5:22, 23.

14. Dɛn na ɛsɛ sɛ yɛkwati na yɛakɔ so anya Onyankopɔn honhom? (Hwɛ mfoni no nso.)

¹⁴ Sɛ Onyankopɔn de ne honhom no ma yɛn a, ɛsɛ sɛ yɛhwɛ yiye na ‘yɛannum honhom no gya no.’ Wɔn a wɔdwen adwempa na wɔn abrabɔ ho tew no, wɔn na Onyankopɔn de ne honhom ma wɔn.  Sɛ yɛkɔ so dwinnwen ɔbra fĩ ho anaa yebu brabɔne a, Onyankopɔn beyi ne honhom afi yɛn so. (1 Tes. 4:7, 8) Afei nso, sɛ yɛpɛ sɛ yɛkɔ so nya honhom kronkron a, ɛnsɛ sɛ ‘yebu nkɔmhyɛ animtiaa.’ (1 Tes. 5:20) Ɛha yi, “nkɔmhyɛ” gyina hɔ ma nsɛm a Onyankopɔn nam ne honhom so de ma yɛn; ebi fa Yehowa da no ne awiei mmere a yɛte mu yi ho. Ɛnsɛ sɛ yɛto yɛn adwenem sɛ Yehowa da no wɔ akyirikyiri, na yenya adwene sɛ Armagedon remma wɔ yɛn bere yi so. Mmom, da biara ɛsɛ sɛ yɛbɔ bra pa, na yɛyere yɛn ho de ‘onyamesom pa tena ase’ de kyerɛ sɛ yɛrehwɛ Yehowa da no kwan denneennen.—2 Pet. 3:11, 12.

15. Dɛn na yebetumi ayɛ na atosɛm ne ahonhommɔne nkyerɛkyerɛ annaadaa yɛn? (1 Tesalonikafo 5:21)

¹⁵ Ɛrenkyɛ koraa, Onyankopɔn atamfo bɛka sɛ: “Yɛwɔ asomdwoe ne ahotɔ!” (1 Tes. 5:3) Atosɛm a efi ahonhommɔne hɔ bɛbɔ apete wiase, na adaadaa nnipa dodow no ara. (Adi. 16:13, 14) Yɛn nso ɛ? Sɛ ‘yɛhwehwɛ nneɛma nyinaa mu anaa yɛsɔ hwɛ sɛ ɛyɛ nokware’ a, obiara rentumi nnaadaa yɛn. (Kenkan 1 Tesalonikafo 5:21.) Greek asɛmfua a wɔkyerɛɛ ase ‘monhwehwɛ mu nhwɛ sɛ ɛyɛ nokware’ no, na wɔde ka sɛnea wɔsɔ nneɛma bi te sɛ sika kɔkɔɔ ne dwetɛ hwɛ ho asɛm. Enti, sɛ yɛte asɛm bi anaa yɛkan asɛm bi a, ehia sɛ yɛhwehwɛ mu hwɛ sɛ ɛyɛ nokware anaa. Ná ehia sɛ Tesalonikafo no yɛ saa; yɛn nso, bere a ahohiahia kɛse no rebobɔ ba no, ebehia paa sɛ yɛyɛ saa. Sɛ́ anka yebegye biribiara a afoforo bɛka adi no, ɛsɛ sɛ yɛde nhumu yɛ adwuma; nea yɛte anaa yɛkenkan no, ɛsɛ sɛ yɛde toto nea Bible ne Yehowa ahyehyɛde no ka ho hwɛ. Yɛyɛ saa a, atosɛm a efi ahonhommɔne hɔ biara rennaadaa yɛn.—Mmeb. 14:15; 1 Tim. 4:1.

16. Anidaso a enni huammɔ bɛn na yɛwɔ, na dɛn na yɛasi yɛn bo sɛ yɛbɛyɛ?

¹⁶ Yenim sɛ Onyankopɔn asomfo benya wɔn ti adidi mu wɔ ahohiahia kɛse no mu. Nanso, yɛn mu biara nnim nea ebesi ɔkyena. (Yak. 4:14) Ne nyinaa mu no, sɛ yɛde yɛn ani kann betwa ahohiahia kɛse no oo, sɛ yebewu ansa na aba oo, sɛ yɛkɔ so di Yehowa nokware a, ɔbɛma yɛn daa nkwa. Wɔn a wɔasra wɔn no bɛkɔ akɔka Kristo ho wɔ soro. Nguan foforo no nso bɛtena paradise asaase so. Momma yɛn nyinaa mfa yɛn ani nsi yɛn anidaso a enni huammɔ no so, na yensiesie yɛn ho mma Yehowa da no!