Nsɛmmisa a Efi Akenkanfo Hɔ
Asɛm a ɛwɔ Dwom 12:7 no, Wiase Foforo Nkyerɛase no ka sɛ ɛfa “mmɔborɔwa” a wɔn ho asɛm wɔ nkyekyɛm 5 no ho. Nanso adɛn nti na ebia ebinom bɛka sɛ saa asɛm no fa “Yehowa nsɛm” a ɛwɔ nkyekyɛm 6 no ho?
Dwom 12 no mu nsɛm ma yehu sɛ, asɛm a ɛwɔ nkyekyɛm 7 no fa nnipa ho.
Sɛ yɛhwɛ Dwom 12:1-4 a, ɛhɔ ka sɛ “anokwafo ayera wɔ nnipa mu.” Afei ma yɛnhwɛ Dwom 12:5-7 no mu nsɛm.
“‘Mmɔborɔwa a wɔhyɛ no so,
Ne ohiani apinisi nti,
Mɛsɔre akeka me ho,’ Yehowa na ose.
‘Megye wɔn afi wɔn a wobu wɔn animtiaa no nsam.’
Yehowa nsɛm ho tew;
Ɛte sɛ dwetɛ a wɔayiyi mu wɔ ogya fononoo mu, nea wɔapa mu mpɛn ason.
O Yehowa, wobɛhwɛ wɔn so;
Wobɛbɔ wɔn mu biara ho ban daa afi awo ntoatoaso yi ho.”
Nkyekyɛm 5 no ka nea Yehowa bɛyɛ ama “mmɔborɔwa.” Ɛka sɛ, obegye wɔn.
Nkyekyɛm 6 nso ka sɛ, “Yehowa nsɛm ho tew, ɛte sɛ dwetɛ a wɔayiyi mu.” Nokware Kristofo nyinaa gye saa asɛm yi tom.—Dw. 18:30; 119:140.
Afei hwɛ Dwom 12:7. Ɛhɔ ka sɛ: “O Yehowa, wobɛhwɛ wɔn so; wobɛbɔ wɔn mu biara ho ban daa afi awo ntoatoaso yi ho.” Asɛmfua “wɔn” no gyina hɔ ma dɛn?
Esiane sɛ nkyekyɛm 6 no ka biribi fa “Yehowa nsɛm” ho nti, ebia ebinom bɛka sɛ esiane sɛ nkyekyɛm 7 a ɛtoa so no ka sɛ wobɛhwɛ “wɔn” so nti, ɛkyerɛ sɛ Onyankopɔn bɛhwɛ n’Asɛm no so. Yenim sɛ atamfo abɔ mmɔden sɛ wɔbɛbara Bible no na wɔasɛe no, nanso ne nyinaa akyi no Yehowa abɔ ho ban.—Yes. 40:8; 1 Pet. 1:25.
Nanso, asɛm a ɛwɔ nkyekyɛm 5 no nso yɛ nokware. “Mmɔborɔwa” ne wɔn a ‘wɔhyɛ wɔn so’ no, Yehowa boa wɔn na ogye wɔn, na ɔbɛkɔ so ara ayɛ saa ama wɔn.—Hiob 36:15; Dw. 6:4; 31:1, 2; 54:7; 145:20.
Ɛnde, asɛmfua “wɔn” a ɛwɔ nkyekyɛm 7 no gyina hɔ ma dɛn?
Dwom 12 no mu nsɛm ma yehu sɛ, “wɔn” no gyina hɔ ma nnipa.
Yɛhwɛ Dwom 12:1, 2 a, yehu sɛ Dawid kaa “anokwafo” a ɛbɛyɛ sɛ abɔnefo twaa wɔn nkontompo ho asɛm. Afei yɛhwɛ nkyekyɛm 3 a, yehu biribi wɔ hɔ a ɛkyerɛ sɛ Yehowa bɛsɛe wɔn a etwa nkontompo. Enti saa dwom yi mu nsɛm ma yehu sɛ, yebetumi anya Onyankopɔn mu awerɛhyem sɛ obetwitwa agye ne nkurɔfo, efisɛ ne nsɛm ho tew.
Enti nea Dwom 12:7 reka ne sɛ, mmɔborɔwafo a wɔahu amane wɔ abɔnefo nsam no, Yehowa bɛhwɛ “wɔn” so na wabɔ wɔn ho ban.
Asɛmfua a yɛakyerɛ ase “wɔn” wɔ Dwom 12:7 no, sɛ wohwɛ Hebri Kyerɛwnsɛm a Masoretefo yɛɛ no tete no mu a, ɛno ara na wɔde dii dwuma. Yɛhwɛ Greek Septuagint no mu a, ɛde asɛmfua “yɛn” di dwuma mprenu wɔ Dwom 12:7. Wei ma yehu sɛ mmɔborɔwafo ne wɔn a ‘wɔhyɛ wɔn so’ a wɔyɛ anokwafo no, wɔn ho asɛm na na ɛreka. Nkyekyɛm 7 no reba awiei no, ɛkaa sɛ Yehowa bɛbɔ anokwafo ‘no mu biara’ ho ban “afi awo ntoatoaso yi ho”; kyerɛ sɛ, nnipa a wɔbɔ gye ɔbrabɔne so no, Yehowa bɛbɔ anokwafo no ho ban afi wɔn ho. (Dw. 12:7, 8) Hebri Kyerɛwnsɛm a wɔakyerɛ ase kɔ Aram kasa mu no, sɛ wohwɛ Dwom 12:7 ne fa a edi kan no a, ɛde asɛmfua “wɔn” di dwuma wɔ hɔ. Ɛka sɛ: “O AWURADE, wobɛhwɛ atreneefo so, wobɛbɔ wɔn ho ban afi awo ntoatoaso bɔne yi ho daa.” Wei nso yɛ adanse a ɛkyerɛ sɛ, Dwom 12:7 no mfa Onyankopɔn nsɛm ho.
Wei nti, kyerɛwsɛm yi ma “anokwafo” nya anidaso sɛ, Onyankopɔn bɛkeka ne ho na watwitwa agye wɔn.
