Wohuu ahina bi a adi mfe 3,000 wɔ afe 2012 mu. Ná ahina no abubu, nanso ɛmaa nhwehwɛmufo ani gyei paa. Dɛn na na ɛyɛ soronko wɔ saa ahina no ho? Ɛnyɛ ahina asinasin no na na ɛyɛ soronko, na mmom nkyerɛwee a na ɛwɔ ho no.

Bere a akyiri yi, wɔn a wotutu fam hwehwɛ tetefo nneɛma mu kekaa ahina no asinasin sisii anim no, wotumi huu nea tete Kanaanfo nkyerɛwee a na wɔakyerɛw agu ahina no ho no kyerɛ. Nkyerɛwee no kenkan sɛ: “Eshba’al Ben Beda’,” kyerɛ sɛ, “Beda ba, Esbaal.” Wei ne bere a edi kan a wɔn a wotutu fam hwehwɛ tetefo nneɛma mu ahu sɛ wɔakyerɛw saa din no agu tete nneɛma bi ho.

Bible ka Esbaal foforo bi ho asɛm. Ná ɔyɛ Ɔhene Saul mmabarima no mu baako. (1 Be. 8:33; 9:39) Ɔbenfo Yosef Garfinkel ka wɔn a wotutu fam hwehwɛ tetefo nneɛma mu a wohuu ahina no ho. Ɔkae sɛ: “Ɛyɛ nwonwa sɛ edin Esbaal a ɛwɔ Bible mu, na seesei wɔn a wotutu fam hwehwɛ tetefo nneɛma mu nso akohu no, Ɔhene Dawid bere so nkutoo na nnipa a wɔde saa din no too wɔn no nyinaa tenae.” Ebinom susuw sɛ Ɔhene Dawid bere so nkutoo na na wɔto saa din. Wei yɛ adanse foforo a wɔn a wotutu fam hwehwɛ tetefo nneɛma mu akohu a ɛfoa asɛm bi a ɛwɔ Bible mu so.

Bible no fã bi wɔ hɔ a, edin Esbaal no, wɔkyerɛw no “Is-Boset.” Wɔde “Boset” sii “baal” ananmu. (2 Sam. 2:10) Adɛn ntia? Nhwehwɛmufo ka sɛ: “Ɛbɛyɛ sɛ Samuel nhoma a ɛto so mmienu no kyerɛwfo no hyɛɛ da na wamfa edin Esbaal anni dwuma. Nea enti a ɛbɛyɛ sɛ wamfa saa din no anni dwuma ne sɛ, na ɛma Israelfo no adwene kɔ Kanaanfo ahum nyame Baal so. Nanso, wɔkoraa edin no ankasa so . . . wɔ Beresosɛm Nhoma no mu.”