1. Dɛn na anuanom mmerante tumi yɛ?

ANUANOM mmerante, nneɛma pii na mubetumi ayɛ de aboa asafo no. Sɛ ɛba ahoɔden a, mo mu bebree si pi si ta. (Mmeb. 20:29) Na yɛannya mo wɔ asafo no mu a, anka yɛbɛyɛ dɛn! Sɛ woyɛ aberante a, ebia w’ani da so sɛ wɔbɛyɛ wo asafo mu somfo. Nanso ebia ɛbɛyɛ wo sɛ ebinom hu wo sɛ wusua dodo anaa wunni asetena mu suahu biara, ɛno nti wɔrentumi mfa adwuma a ɛho hia nhyɛ wo nsa. Ɛwom, ebia wunnyinii papa, nanso seesei nneɛma bi wɔ hɔ a wubetumi ayɛ na ama asafo a wowom no mufo anya wo mu awerɛhyem na wɔabu wo.

2. Dɛn na yebesusuw ho wɔ adesua yi mu?

² Adesua yi mu no, yɛbɛhwɛ Ɔhene Dawid abrabɔ mu nsɛm. Afei nso yɛbɛhwɛ Yuda ahemfo mmienu abrabɔ mu nsɛm kakra; ahemfo no ne Asa ne Yehosafat. Yɛbɛhwɛ ɔhaw a saa mmarima mmiɛnsa yi faa mu ne nea wɔyɛe wɔ ho, na yɛahwɛ nea anuanom mmerante betumi asua afi nea wɔyɛe no mu.

3. Ade baako bɛn na mmerante betumi ayɛ de aboa wɔn a wɔn ani afi wɔ asafo no mu no?

³ Bere a na Dawid yɛ aberante no, osuaa nneɛma bi a na nkurɔfo hu no sɛ mfaso wɔ so. Biribiara kyerɛ sɛ na ɔne Yehowa  adamfofa ho hia no paa. Osuaa sankubɔ yiye, na ɔde saa ɔdom akyɛde no boaa Saul, ɔhene a na Onyankopɔn apaw no no. (1 Sam. 16:16, 23) Mmerante, mowɔ nimdeɛ bi a mubetumi de aboa asafo no mufo anaa? Mo mu bebree wɔ bi. Ebia moahu sɛ, sɛ moboa wɔn a wɔn ani afi ma wotumi de wɔn tablɛt anaa ɛlɛtrɔnik mfiri sua ade anaa wɔde kɔ asafo nhyiam a, ɛma wɔn ani gye paa. Esiane sɛ munim ɛlɛtrɔnik mfiri mu nti, mubetumi aboa wɔn a wɔn ani afi no paa.

4. Suban bɛn na na ɛwɔ Dawid ho a ɛsɛ sɛ mmerante nso nya bi? (Hwɛ mfoni a ɛwɔ Ɔwɛn-Aban yi anim no.)

⁴ Dawid abrabɔ mu no, na n’ani da fam na na ɔmfa n’adwuma nni agorɔ. Wo de hwɛ, bere a na ɔyɛ aberante no, ɔyeree ne ho hwɛɛ ne papa nguan. Ná adwuma no yɛ hu. Akyiri yi, Dawid kyerɛkyerɛɛ mu kyerɛɛ Ɔhene Saul sɛ: “Ná w’akoa rehwɛ ne papa nguan, na gyata bɛkyeree oguammaa fii nguankuw no mu, na sisi nso bɛkyeree bi. Na mitiw no kɔbɔɔ no, na miyii no fii n’anom.” (1 Sam. 17:34, 35) Ná Dawid te nka sɛ nguan no hyɛ ne nsa, na ɛsɛ sɛ ɔhwɛ wɔn yiye, enti ɔde akokoduru ko gyee wɔn. Mmerante betumi asuasua Dawid, na wɔayɛ adwuma biara a wɔde bɛma wɔn no yiye.

5. Sɛnea Dwom 25:14 kyerɛ no, ade a ɛho hia paa bɛn na anuanom mmerante betumi ayɛ?

⁵ Bere a na Dawid yɛ aberante no, ɔne Yehowa faa adamfo denneennen. Ɛnyɛ Dawid akokoduru anaa sɛnea na onim sankubɔ no na na ehia. Mmom nea na ehia paa ne ayɔnkofa a na ɛwɔ ɔne Yehowa ntam no. Ná Yehowa yɛ Dawid Nyankopɔn, na na ɔsan yɛ n’Adamfo, na ɔyɛ n’Adamfo paa. (Kenkan Dwom 25:14.) Anuanom mmerante, ade a ɛho hia paa a mubetumi ayɛ ne sɛ mo ne mo Agya a ɔwɔ soro no bɛfa adamfo denneennen. Moyɛ saa a, asafo no betumi de dwumadi foforo ahyehyɛ mo nsa.

6. Ná ebinom bu Dawid sɛn?

⁶ Ade baako a na ɛhaw Dawid ne sɛ, na ebinom bu no sɛ onnyinii, na na ebinom nso bu no sɛ ɔnyɛ n’adwuma yiye. Bere a Dawid kaa sɛ ɔne Goliat bɛko no sei, Ɔhene Saul yɛe ara sɛ obebu n’abam. Ɔka kyerɛɛ no sɛ: “Woyɛ aberantewa” anaa wusua. (1 Sam. 17:31-33) Ná Dawid ankasa nua adi kan aka akyerɛ no sɛ ɔnyɛ n’adwuma yiye. (1 Sam. 17:26-30) Nanso Yehowa de, na  ommu Dawid sɛ osua anaa ɔnyɛ n’adwuma yiye. Ná onim Dawid yiye. Esiane sɛ Dawid de ne werɛ hyɛɛ n’Adamfo Yehowa mu nti, ɔmaa no ahoɔden ma otumi kum Goliat.​—1 Sam. 17:45, 48-51.

7. Dɛn na wubetumi asua afi Dawid asɛm no mu?

⁷ Dɛn na wubetumi asua afi Dawid asɛm no mu? Yesua sɛ, ɛsɛ sɛ yenya abotare. Nnipa a wonim wo fi wo mmofraase no, ebia ebegye bere na wɔahu sɛ seesei de woanyin. Yehowa de, sɛnea wote wɔ nnipa ani so no, nya awerɛhyem sɛ ɛnyɛ saa na ohu wo. Onim wo yiye na onim nea wubetumi ayɛ nso. (1 Sam. 16:7) Enti hyɛ wo ne Onyankopɔn ayɔnkofa no mu den. Nea ɛmaa Dawid ne Onyankopɔn faa adamfo denneennen ne sɛ, ɔtɔɔ ne bo ase hwɛɛ nneɛma a Yehowa abɔ. Dawid dwinnwen nneɛma a Onyankopɔn abɔ no ho kɔɔ akyiri, na wei ma osuaa nneɛma pii faa Ɔbɔadeɛ no ho. (Dw. 8:3, 4; 139:14; Rom. 1:20) Ade foforo a wubetumi ayɛ ne sɛ wobɛsrɛ Yehowa sɛ ɔnhyɛ wo den. Yɛnhwɛ nhwɛso yi. Esiane sɛ woyɛ Yehowa Danseni nti, ɛyɛ a wo sukuufo no bi serew wo anaa? Sɛ saa a, ɛnde bɔ Yehowa mpae sɛ ɔmmoa wo na woatumi agyina saa ɔhaw yi ano. Afei nso, afotu a wunya fi n’Asɛm mu, ne asafo nhoma ne video ahorow mu no, fa yɛ adwuma. Bere biara a wubehu sɛ Yehowa aboa wo ama woafa ɔhaw bi mu no, wubenya ne mu awerɛhyem kɛse. Bio nso sɛ asafo no mufo hu sɛ wode wo ho to Yehowa so a, ɛbɛma wɔanya wo mu awerɛhyem.

8-9. Dɛn na ɛboaa Dawid ma onyaa abotare twɛnee ara kosii sɛ wosii no hene? Dɛn na anuanom mmerante betumi asua afi Dawid hɔ?

⁸ Yɛnhwɛ ɔhaw foforo a Dawid faa mu. Bere a wɔsraa Dawid sɛ ɔbɛyɛ ɔhene no, na ɛsɛ sɛ ɔtwɛn mfe pii ansa na wɔde no asi ade so sɛ Yuda hene. (1 Sam. 16:13; 2 Sam. 2:3, 4) Bere a ɔretwɛn no, dɛn na ɛboaa no ma onyaa abotare? Dawid amma n’abam ammu, mmom ɔde n’adwene sii nea obetumi ayɛ so. Yɛhwɛ bere a Dawid guan kɔtenaa Filistifo asase so sei a, ɔde saa bere no ne Israel atamfo koe. Ɔyɛɛ saa de bɔɔ Yuda asase no ahye ho ban.​—1 Sam. 27:1-12.

⁹ Dɛn na anuanom mmerante betumi asua afi Dawid asɛm no mu? Monyɛ nea mubetumi biara mfa nsom mo nuanom. Yɛnhwɛ onua bi a wɔfrɛ no Ricardo. * Odii bɛyɛ mfe du na ɔde sii n’ani so sɛ ɔbɛyɛ daa kwampaefo, nanso mpanyimfo no ka kyerɛɛ no sɛ ɔntwɛn kakra. Ricardo ampa abaw na wamfa wɔn ho abufuw. Mmom ɔyeree ne ho yɛɛ asɛnka adwuma no pii. Ɔka sɛ: “Sɛ mehwɛ m’akyi a, na mitumi hu sɛ ɛsɛ sɛ mekeka me ho wɔ asɛnka adwuma no mu. Sɛ obi kyerɛ asɛm no ho anigye a, na mehwɛ sɛ mɛsan akɔ ne nkyɛn, na na mehwɛ sɛ nea me ne no rekosua no, madi kan asua. Mitumi mpo yɛɛ Bible adesua baako. Bere a mede bere pii yɛɛ asɛnka adwuma no, ɛma minyaa akokoduru paa.” Seesei Ricardo yɛ daa kwampaefo a ne ho akokwaw ne asafo mu somfo.

10. Bere bi, dɛn na Dawid yɛe ansa na ɔresi gyinae kɛse bi?

¹⁰ Yɛnhwɛ biribi foforo a esii wɔ Dawid abrabɔ mu. Bere a Dawid ne ne mmarima kɔbɔɔ wɔn ho aguaa wɔ Filistifo asase so no, da bi, wogyaw wɔn yerenom ne wɔn mma hɔ kɔɔ ɔko. Bere a wɔkɔe no, atamfo bɛfom wɔn nneɛma, na wɔfaa wɔn yerenom ne wɔn mma kɔe. Anka Dawid betumi anya adwene sɛ esiane sɛ waben wɔ akodi mu nti, nea ɛbɛyɛ biara obetumi afa kwan bi so akogye wɔn yerenom ne wɔn mma, nanso wanyɛ  saa. Mmom ɔsrɛɛ Yehowa sɛ ɔnkyerɛ no nea ɔnyɛ. Ɔsɔfo bi a ɔde Abiatar boaa Dawid ma obisaa Yehowa sɛ: “Mintiw afowfo yi anaa?” Yehowa ka kyerɛɛ Dawid sɛ ɔnkɔ, na ɔmaa no awerɛhyem sɛ obedi nkonim. (1 Sam. 30:7-10) Dɛn na wubetumi asua afi saa asɛm no mu?

11. Dɛn na wubetumi ayɛ ansa na woasi gyinae?

¹¹ Sɛ worebesi gyinae a, bisa ebinom adwene. Wo ne w’awofo nnwen ho. Sɛ wo ne asafo mu mpanyimfo a wɔwɔ suahu nso ka ho asɛm a, wobetumi ama wo afotu pa. Yehowa wɔ mpanyimfo no mu awerɛhyem na wo nso wubetumi anya wɔn mu awerɛhyem. Yehowa bu wɔn sɛ wɔyɛ “akyɛde” ma asafo no. (Efe. 4:8) Sɛ wusuasua wɔn gyidi na wutie afotu pa a wɔde ma wo no a, ɛbɛboa wo. Afei momma yɛnhwɛ nea yebetumi asua afi Ɔhene Asa hɔ.

12. Bere a Ɔhene Asa bedii ade no, suban pa bɛn na na ɛwɔ ne ho?

¹² Ɔhene Asa mmeranteberem mu no, na ɔbrɛ ne ho ase, na na ɔwɔ akokoduru. Yɛhwɛ bere a obedii ne papa Abia ade no a, ofii ase tuu abosonsom ase wɔ asase no so. Afei nso, “ɔka kyerɛɛ Yuda sɛ wɔnhwehwɛ Yehowa, wɔn agyanom Nyankopɔn no, na wonni ne mmara nsɛm ne n’ahyɛde so.” (2 Be. 14:1-7) Bere a Etiopiani Sera de asraafo 1,000,000 baa Yuda man so no, Asa yɛɛ ade paa; ɔsrɛɛ Yehowa sɛ ɔmmoa no. Ɔkaa sɛ: “O Yehowa, ɛnyɛ den mma wo sɛ wobɛboa nnipa, sɛ́ wɔdɔɔso anaa wonni ahoɔden. O Yehowa yɛn Nyankopɔn, boa yɛn, na wo so na yɛde yɛn ani ato.” Saa nyansasɛm a Asa kae yi ma yehu sɛ na ɔwɔ awerɛhyem paa sɛ Yehowa betumi agye ɔne ne nkurɔfo. Asa de ne ho too n’Agya a ɔwɔ soro no so, enti “Yehowa dii Etiopiafo so nkonim.”​—2 Be. 14:8-12.

13. Akyiri yi, dɛn na ɛtoo Asa, na adɛn ntia?

¹³ Asraafo 1,000,000 a wɔbaa Asa so no, na ɛnyɛ asɛm ketewa, nanso esiane sɛ Asa de ne ho too Yehowa so nti, odii nkonim. Awerɛhosɛm ne sɛ, bere a asɛm ketewa bi too no no, wanhwehwɛ Yehowa akwankyerɛ. Bere a Israel hene Baasa otirimɔdenfo no hunahunaa Asa no, ɔkɔɔ Siria hene nkyɛn sɛ ɔmmoa no. Saa gyinae a osii no kɔfaa asɛnkɛse bae! Yehowa maa ne diyifo Hanani ka kyerɛɛ Asa sɛ: “Sɛ́ wode wo  ho ato Siria hene so na woamfa wo ho anto Yehowa, wo Nyankopɔn so nti, Siria hene asraafodɔm no afi wo nsa.” Nea ɛbae ne sɛ, efi saa bere no, akodi ampa Asa abrabɔ mu da. (2 Be. 16:7, 9; 1 Ahe. 15:32) Dɛn na yesua fi mu?

14. Ɛbɛyɛ dɛn na woatumi de wo ho ato Yehowa so, na sɛnea 1 Timoteo 4:12 kyerɛ no, sɛ woyɛ saa a, dɛn na ebefi mu aba?

¹⁴ Kɔ so brɛ wo ho ase, na kɔ so fa wo ho to Yehowa so. Bere a wobɔɔ asu no, wokyerɛe sɛ wugye Yehowa di paa na wode wo ho to no so. Yehowa nso ani gyei sɛ ɔmaa wo kwan ma wobɛkaa N’abusua no ho. Seesei nea ehia paa ne sɛ wobɛkɔ so de wo ho ato Yehowa so. Sɛ ɛba sɛ woresi gyinae wɔ nneɛma a ɛho hia paa ho a, ɛyɛ a ɛnyɛ den sɛ wode wo ho bɛto Yehowa so. Na sɛ woresi nneɛma foforo nso ho gyinae ɛ? Sɛ woresisi gyinae a, nneɛma bi te sɛ nea wode begyigye w’ani, adwuma a wobɛyɛ, ne botae a wode besisi w’ani so wɔ abrabɔ mu mpo, ehia paa sɛ wode wo ho to Yehowa so. Mfa wo ho nto wo ara wo nyansa so. Hwehwɛ Bible mu nnyinasosɛm a ɛfa w’asɛm no ho, na fa yɛ adwuma. (Mmeb. 3:5, 6) Sɛ woyɛ saa a, wobɛma Yehowa ani agye, na asafo a wowom no mufo nso benya wo mu awerɛhyem.​—Kenkan 1 Timoteo 4:12.

15. Asɛm a ɛwɔ 2 Beresosɛm 18:1-3; 19:2 no ma yehu sɛ Ɔhene Yehosafat dii mfomso. Ɛyɛ mfomso bɛn?

¹⁵ Sɛnea yɛn nyinaa di mfomso no, wo nso woyɛ nipa, enti ɛtɔ da a wubedi mfomso. Nanso mma wei nnsiw wo kwan, yɛ nea wubetumi biara wɔ Yehowa som mu. Hwɛ Ɔhene Yehosafat asɛm yi. Ná ɔwɔ suban pa bebree. Bere a ɔyɛ aberante no, ‘ɔhwehwɛɛ ne papa Nyankopɔn, na ɔnantew ne mmara nsɛm mu.’ Afei nso, ɔsomaa ne mmapɔmma sɛ wɔnkɔ Yuda nkurow nyinaa mu nkɔkyerɛkyerɛ wɔn Yehowa akwan. (2 Be. 17:4, 7) Koma pa a na Yehosafat wɔ nyinaa akyi no, ɛnyɛ da biara na na otumi si gyinae pa. Gyinae bɔne bi a Yehosafat sii nti, Yehowa diyifo bi kaa n’anim. (Kenkan 2 Beresosɛm 18:1-3; 19:2.) Dɛn na wubetumi asua afi saa asɛm no mu?

16. Dɛn na wubetumi asua afi Rajeev asɛm no mu?

¹⁶ Tie afotu na fa yɛ adwuma. Ɛyɛ den ma mmerante pii sɛ wɔde Yehowa som bedi kan wɔ wɔn abrabɔ mu. Ebia saa na wo nso wote.  Sɛ ɛte saa mpo a, mma w’abam mmmu. Hwɛ yɛn nua aberante bi a ne din de Rajeev asɛm no. Ɔkaa nea esii wɔ n’abrabɔ mu bere a na ɔyɛ aberante no. Ɔkaa sɛ: “Ɛtɔ da a na minhu nea mereyɛ wɔ abrabɔ mu. Sɛnea mmerante pii pɛ agokansi ne anigye no, saa na na me nso mete. Enti na asafo nhyiam ne asɛnka ho nhia me papa.” Dɛn na ɛboaa Rajeev? Asafo mu panyin bi a ɔpɛ n’asɛm tuu no fo. Rajeev ka sɛ, “Ɔboaa me ma medwenee asɛm a ɛwɔ 1 Timoteo 4:8 no ho, na mihuu sɛnea mede aba a ɛwɔ mu no bɛyɛ adwuma.” Rajeev brɛɛ ne ho ase de afotu no yɛɛ adwuma, na ɛma ohuu nea ehia paa sɛ ɔyɛ wɔ abrabɔ mu. Ɔtoaa n’asɛm no so sɛ, “Meyɛɛ m’adwene sɛ mɛma Yehowa som ahia me asen biribi foforo biara na mede botae asisi m’ani so wɔ ne som mu.” Ekowiee sɛn? Rajeev ka sɛ: “Mede afotu no yɛɛ adwuma no, mfe kakra bi akyi na mebɛyɛɛ asafo mu somfo.”

17. Mmerante a mosom Yehowa, wɔn a wɔn ani afi no hu mo sɛn?

¹⁷ Mmerante a mo ne wɔn a wɔn ani afi de mmati koro resom Yehowa no, moda wɔn koma so paa! (Sef. 3:9) Nsi ne ahokeka a mode som, ne ahoɔden ne anigye a mode yɛ adwuma a wɔde ahyɛ mo nsa no, ɛma wɔn ani gye paa. Wonni mo ho agorɔ koraa!​—1 Yoh. 2:14.

18. Sɛnea Mmebusɛm 27:11 kyerɛ no, sɛn na Yehowa hu mmerante a wɔresom no no?

¹⁸ Anuanom mmerante, mommma mo werɛ mmfi da sɛ Yehowa wɔ mo mu awerɛhyem. Ɔka too hɔ sɛ, nna a edi akyiri mu no, mmerante asafodɔm betu wɔn ho ama koraa. (Dw. 110:1-3) Onim sɛ modɔ no, na mopɛ sɛ moyɛ nea mubetumi nyinaa de som no. Enti woyɛ aberante a, nya afoforo ho abotare, na wo ara nso nya abotare. Sɛ wudi mfomso a, nteɛso ne ntetee a wɔde bɛma wo no, gye tom na hu no sɛ efi Yehowa hɔ. (Heb. 12:6) Yere wo ho yɛ adwuma biara a wɔde bɛhyɛ wo nsa. Biribiara a woyɛ mu no, nea ehia paa ne sɛ, wobɛma w’Agya a ɔwɔ soro no koma atɔ ne yam.​—Kenkan Mmebusɛm 27:11.