Sɛ obi anto ne bo ase ankenkan asɛm yi a, anhwɛ a, saa na ɔbɛka. Nanso saa kyerɛwnsɛm yi ka mmarima mmienu a wɔn nyinaa de Mefiboset ho asɛm, na yɛhwɛ nea esii no a, yebetumi asua biribi afi mu.

Ná Israel hene Saul wɔ mma mmarima baason ne mma mmea baanu. Ná Saul babarima panyin ne Yonatan. Akyiri yi, ɔhene no ne ne mpena Rispa woo ɔbabarima, na ɔtoo no din Mefiboset. Yonatan nso, na ɔwɔ ɔbabarima a ne din de Mefiboset. Wei kyerɛ sɛ, na Ɔhene Saul wɔ ɔbabarima a ne din de Mefiboset ne banana a ɔno nso de Mefiboset.

Bere bi, Gibeonfo a na wɔte Israelfo mu no, Ɔhene Saul tuu n’ani sii wɔn so sɛ ɔbɛtɔre wɔn ase. Ɛda adi sɛ okunkum wɔn mu bebree. Ná ɛnyɛ ne kwan so koraa. Adɛn ntia? Efisɛ, Yosua bere so tɔnn na mpanyimfo a wɔwɔ Israel ne Gibeonfo yɛɛ asomdwoe apam.—Yos. 9:3-27.

Ɔhene Saul bere so nyinaa, na apam no da so yɛ adwuma. Nanso ɔhene no buu n’ani guu apam no so yɛe sɛ ɔbɛtɔre Gibeonfo no ase. Nea Saul yɛe no maa ‘ɔne ne fi dii mogya ho fɔ.’ (2 Sam. 21:1) Akyiri yi a Dawid bɛyɛɛ ɔhene no, Gibeonfo a wonyaa wɔn ti didii mu no kɔkaa adebɔne a Saul de yɛɛ wɔn no ho asɛm kyerɛɛ no. Atirimɔdensɛm a Saul dii no, Dawid bisaa wɔn nea ɔnyɛ mfa mpata wɔn na ama Yehowa ahyira asaase no. Gibeonfo no anka sɛ ɔmma wɔn sika, mmom, wɔkaa sɛ ɔbarima a “ɔbɔɔ pɔw sɛ ɔbɛhyew yɛn ase” no, wɔmfa ne mma baason mmra mma wonkum wɔn. (Num. 35:30, 31) Dawid yɛɛ wɔn abisade no maa wɔn.—2 Sam. 21:2-6.

Saa bere no, na Saul ne Yonatan awu wɔ akono, nanso na Yonatan ba Mefiboset te ase. Akwanhyia bi a onyae wɔ ne mmofraase nti, ɔbɛyɛɛ obubuafo, na anyamransɛm a ne nanabarima dii no, na ɔnka ho. Ná Dawid ne Yonatan adi kan ayɛ ayɔnkofa apam. Ná Yonatan asefo a ne ba Mefiboset ka ho benya apam yi so mfaso. (1 Sam. 18:1; 20:42) Kyerɛwtohɔ no ka sɛ: “Ntam a Dawid ne Saul ba Yonatan kae wɔ Yehowa anim nti, ɔhene huu Saul ba Yonatan ba Mefiboset mmɔbɔ.”—2 Sam. 21:7.

Ne nyinaa akyi no, Dawid yɛɛ Gibeonfo no adesrɛ maa wɔn. Ɔde Saul mma mmarima baanu ne ne mmanana baanum maa wɔn. Ne mma mmarima no, na wɔn mu baako din de Mefiboset. (2 Sam. 21:8, 9) Nea Dawid yɛe no nti, mogya ho fɔ a na asaase no adi no fii hɔ.

Saa asɛm yi nyɛ abakɔsɛm bi kɛkɛ; yebetumi asua biribi afi mu. Ná Onyankopɔn mmara aka no pefee sɛ: “Ɛnsɛ sɛ wɔhwɛ agyanom bɔne ho kum wɔn mma.” (Deut. 24:16) Saul mma mmarima baanu ne ne mmanana baanum no, sɛ na wɔn ho nni asɛm a, anka Yehowa amma wɔankum wɔn. Saa mmara no ara kaa sɛ: “Obiara bɔne ho na wonkum no.” Bere a Saul yɛe sɛ ɔbɛtɔre Gibeonfo no ase no, ɛbɛyɛ sɛ na n’asefo baason a wokum wɔn no nim ho bi. Ɛno nti, saa nnipa baason no nyaa wɔn bɔne so akatua.

Saa asɛm yi ma yehu sɛ, sɛ obi ka sɛ, ɔno de, nea wɔkaa sɛ ɔnyɛ ara na ɔyɛe a, ɛnkyerɛ sɛ asodi biara nna no so. Abebusɛm bi a nyansa wom ka sɛ: “Ma w’anammɔn kwan nyɛ toromtorom, na w’akwan nyinaa besi pi.”—Mmeb. 4:24-27; Efe. 5:15.