Agyede afɔre a Yesu de ne mogya tuae no, ɛno nko ara na ebetumi ama yɛanya bɔnefakyɛ. (Efe. 1:7) Nanso Bible ka sɛ: ‘Onyankopɔn abotare nti, ɔde bɔne a wɔyɛe tete no kyɛe,’ kyerɛ sɛ, bɔne a wɔyɛe ansa na Yesu retua agyede no. (Rom. 3:25) Ɛnde, ɛbɛyɛ dɛn na Yehowa atumi ayɛ saa na bere koro no ara wafata sɛ Onyankopɔn a obu atɛntrenee?

Yehowa hyɛɛ bɔ sɛ ɔbɛma ‘aseni’ bi abegye Adam asefo a wɔgye no di no. Bere a Yehowa hyɛɛ saa bɔ no, n’ani so de, ɛte sɛ nea na watua agyede no ara ne sa. (Gen. 3:15; 22:18) Ná Onyankopɔn gye di paa sɛ, bere a wahyɛ no so a, ne Dɔba koro no befi ne pɛ mu abetua agyede no. (Gal. 4:4; Heb. 10:​7-10) Bere a Yesu wɔ asaase so a na onnya ntuaa agyede no, Yehowa maa no tumi a obetumi de bɔne akyɛ. Ɔde wɔn a wɔwɔ ne mu gyidi no bɔne kyɛɛ wɔn, efisɛ na onim sɛ n’afɔre no bɛpopa wɔn bɔne.—Mat. 9:​2-6.