1, 2. (a) Yɛn nuanom bi kɔ so ka asɛmpa no wɔ nsasesin a nkurɔfo ntaa ntie asɛm no mu. Adɛn nti na wei betumi ahyɛ yɛn nkuran? (Hwɛ mfoni a ɛwɔ adesua yi mfiase no.) (b) Dɛn na Yesu ka faa asɛnka adwuma a ɔyɛe wɔ “n’ankasa kurom” ho? (Hwɛ ase hɔ asɛm no.)

SERGIO NE OLINDA yɛ awarefo a wɔyɛ akwampaefo; wɔte United States. Wɔadi mfe 80 ne akyiri. Nnansa yi wɔn nan tutu wɔn, enti nantew ayɛ den ama wɔn pa ara. Nanso anɔpa biara, wɔnantew kɔ abɔnten so baabi a nnipa di akɔneaba. Ɛbɛbɔ nnɔnson no, na wɔwɔ hɔ. Wɔayɛ saa mfe pii. Baabi a wɔkɔ no bɛn bɔs gyinabea bi, na wɔde yɛn Bible ho nhoma ma nkurɔfo a wɔretwam. Nnipa dodow no ara ntwa wɔn ani mpo nhwɛ awarefo no, nanso womfi hɔ, na wɔserew kyerɛ nkurɔfo a wotwa wɔn ani hwɛ wɔn no. Ɛbɔ awia dumienu a, wɔnantew nkakrankakra kɔ fie. Ade kye a, ɛbɛbɔ anɔpa nnɔnson no, na wɔasan aba hɔ. Saa awarefo anokwafo yi akɔ so aka Ahenni no ho asɛm no wɔ hɔ nnansia nnawɔtwe biara, wɔyɛ saa afe mũ no nyinaa.

² Anuanom mmarima ne mmea anokwafo pii te sɛ Sergio ne Olinda. Wɔaka asɛmpa no mfe pii wɔ wɔn mpɔtam ɛmfa ho sɛ nkurɔfo ntaa ntie asɛm no. Sɛ saa na w’asasesin te a, yɛkamfo  wo pa ara sɛ wode boasetɔ akɔ so aka asɛm no. * Animia a wode resom Yehowa no hyɛ anuanom pii nkuran; wɔn a wɔde mfe pii ayɛ asɛnka adwuma no mpo ka ho. Hwɛ nea amansin so ahwɛfo bi aka: “Sɛ me ne anuanom anokwafo a wɔte saa kɔ asɛnka a, wɔn nhwɛso hyɛ me den.” “Wɔn nokwaredi hyɛ me nkuran ma mekɔ so nya akokoduru de yɛ asɛnka adwuma no.” “Wɔn nhwɛso ka me koma pa ara.”

3. Nsɛmmisa mmiɛnsa bɛn na yebesusuw ho, na adɛn ntia?

³ Nea ɛbɛhyɛ yɛn den ama yɛakɔ so ayɛ asɛnka adwuma a Yesu de hyɛɛ yɛn nsa no, yɛbɛhwɛ nsɛmmisa mmiɛnsa bi ho mmuae. Nsɛmmisa no ni: Adɛn nti na ɛtɔ da a yɛn abam betumi abu? Yɛbɛyɛ dɛn akɔ so asow aba? Dɛn na ɛbɛboa yɛn ama yɛakɔ so de boasetɔ asow aba?

4. (a) Bere a Yudafo dodow no ara antie asɛmpa a Paulo kae no, ɛkaa no sɛn? (b) Adɛn nti na Paulo tee nka saa?

⁴ Sɛ woaka asɛmpa no wɔ nsasesin a nkurɔfo ntaa ntie asɛmpa no mu ama w’abam abu pɛn a, ɛnde wubehu sɛnea ɔsomafo Paulo tee nka. Paulo de bɛyɛ mfe pɔrepɔre 30 na ɛyɛɛ asɛnka adwuma no, na ɔboaa nnipa pii ma wɔbɛyɛɛ Kristo asuafo. (Aso. 14:21; 2 Kor. 3:2, 3) Ne nyinaa akyi no, wantumi ammoa Yudafo pii amma wɔammɛyɛ nokware Kristofo. Mmom, wɔn mu dodow no ara antie Paulo, na ebinom mpo taa no. (Aso. 14:19; 17:1, 4, 5, 13) Asɛmpa no a Yudafo no antie no kaa Paulo sɛn? Ɔkaa no pefee sɛ: “Mereka nokware wɔ Kristo mu; . . . midi awerɛhow kɛse ne yaw a ennyae da wɔ me koma mu.” (Rom. 9:1-3) Adɛn nti na Paulo tee nka saa? Ná asɛnka adwuma no da ne koma so. Nea ɛma ɔkaa asɛmpa no kyerɛɛ Yudafo no ne sɛ, na odwen wɔn ho pa ara. Enti ɛyɛɛ Paulo yaw sɛ Yudafo no annye Onyankopɔn mmɔborɔhunu antom.

5. (a) Dɛn na ɛkanyan yɛn ma yɛka asɛmpa no kyerɛ afoforo? (b) Ɛtɔ da na yɛn abam bu a, adɛn nti na ɛnyɛ nwonwa?

⁵ Sɛnea Paulo yɛe no, yɛn nso yedwen nkurɔfo ho pa ara nti na yɛka asɛmpa no kyerɛ wɔn. (Mat. 22:39; 1 Kor. 11:1) Adɛn ntia? Nea yɛn ankasa yɛahu nti, yenim sɛ sɛ obi yɛ n’adwene sɛ ɔbɛsom Yehowa a, obenya nhyira pii. Sɛ yedwen nkurɔfo a wɔwɔ yɛn asasesin mu ho a, yɛka wɔ yɛn tirim sɛ, ‘Yɛn yam a anka yɛatumi aboa wɔn ama wɔahu sɛ wɔrehwere biribi!’ Enti, yɛkɔ so hyɛ wɔn nkuran sɛ wonsua Yehowa ne nea wabɔ ne tirim sɛ ɔbɛyɛ ama adesamma no ho nokwasɛm. Sɛ yɛbɛka a, yɛka kyerɛ wɔn a yɛreka asɛmpa no akyerɛ wɔn no sɛ: ‘Yɛde akyɛde fɛfɛɛfɛ bi rebrɛ mo. Yɛsrɛ mo, munnye.’ Enti sɛ nkurɔfo annye saa akyɛde no a, ɛnyɛ nwonwa sɛ yebetumi adi ‘yaw wɔ yɛn koma mu.’ Sɛ yɛte nka saa a, ɛnkyerɛ sɛ yenni gyidi, na mmom ɛkyerɛ sɛ asɛnka adwuma no da yɛn koma so. Enti ɛwom sɛ ɛtɔ da a yɛn abam bu de, nanso yɛkɔ so ka asɛmpa no. Elena ayɛ akwampae adwuma bɛboro mfe 25. Ɔka sɛ: “Asɛnka adwuma no yɛ me den. Nanso, adwuma foforo biara nni hɔ a mede bɛsesa saa adwuma yi.” Yɛn mu pii ne no bɛyɛ adwene.

6. Asɛmmisa bɛn na yebesusuw ho, na yɛbɛyɛ dɛn anya ho mmuae?

⁶ Ɛmfa ho baabi a yɛka asɛmpa no, adɛn nti na yebetumi anya awerɛhyem sɛ ebetumi asow aba? Nea ɛbɛyɛ na yɛanya saa asɛmmisa no ho mmuae no, momma yɛnhwɛ mfatoho mmienu bi a Yesu mae. Ɔde mfatoho no kyerɛe sɛ ehia sɛ ‘yɛsow  aba.’ (Mat. 13:23) Nea edi kan no fa bobe ho.

7. (a) “Okuafo no” gyina hɔ ma hena? “Bobe no” gyina hɔ ma hena? “Baa no” gyina hɔ ma henanom? (b) Asɛmmisa bɛn na yebenya ho mmuae?

⁷ Kenkan Yohane 15:1-5, 8. Hwɛ nea Yesu ka kyerɛɛ n’asomafo no: “Nea ɛhyɛ m’Agya anuonyam ne sɛ mobɛkɔ so asow aba pii na moada mo ho adi sɛ m’asuafo.” Yesu kaa sɛ “okuafo no” ne Yehowa, ɔno Yesu ne “nokware bobe no,” ɛnna n’asuafo no ne “baa no.” * Ɛnde, dɛn ne aba a ehia sɛ Kristo akyidifo sow no? Mfatoho yi mu no, Yesu ankyerɛ ade pɔtee a egyina hɔ ma aba no, nanso ɔkyerɛɛ biribi titiriw bi a ɛboa yɛn ma yenya saa asɛmmisa no ho mmuae.

8. (a) Mfatoho yi mu no, adɛn nti na yɛrentumi nka sɛ aba no gyina hɔ ma asuafo foforo? (b) Nea Yehowa ka sɛ yɛnyɛ biara no, ɛte sɛn?

⁸ Yesu kaa n’Agya ho asɛm sɛ: “Baa biara a ɛwɔ me ho a ɛnsow aba no, oyi fi hɔ.” Nea ɛkyerɛ ne sɛ, sɛ yɛsow aba nko ara a na Yehowa bu yɛn sɛ n’asomfo. (Mat. 13:23; 21:43) Enti, mfatoho yi mu no, yɛrentumi nka sɛ aba a ɛsɛ sɛ Kristoni biara sow no gyina hɔ ma wɔn a yenya hokwan boa wɔn ma wɔbɛyɛ asuafo foforo. (Mat. 28:19) Sɛ ɛte saa a, ɛnde Adansefo anokwafo a wɔka asɛm no wɔ asasesin a nkurɔfo ntaa ntie asɛmpa no mu ma enti wontumi mmoa afoforo mma wɔmmɛyɛ asuafo no, ɛbɛkyerɛ sɛ wɔte sɛ baa a ɛnsow aba a Yesu kaa ho asɛm wɔ ne mfatoho no mu no. Nanso, ɛnyɛ papa koraa sɛ yebenya adwene a ɛte saa! Adɛn ntia? Efisɛ yɛrentumi nhyɛ afoforo sɛ wɔmmɛyɛ asuafo. Yehowa dɔ yɛn, enti biribi a yɛrentumi nyɛ no, ɔrenka sɛ ɛno nti yɛnyɛ n’asomfo. Biribiara a Yehowa ka sɛ yɛnyɛ no, ɛyɛ biribi a yebetumi ayɛ.—Deut. 30:11-14.

9. (a) Adwuma bɛn na yɛyɛ a, ɛkyerɛ sɛ yɛresow aba? (b) Mfatoho bɛn na yebesusuw ho, na adɛn ntia?

⁹ Ɛnde, dɛn ne aba a ɛsɛ sɛ yɛsow no? Yehu sɛ aba no gyina hɔ ma adwuma a yɛn mu biara betumi ayɛ. Adwuma bɛn na yɛyɛ a, ɛkyerɛ sɛ ‘yɛresow aba’? Ɛno ne Onyankopɔn Ahenni ho asɛmpaka adwuma no. * (Mat. 24:14) Yesu mfatoho a ɛfa ogufo ho no si wei so dua. Momma yɛnhwɛ mfatoho a ɛto so mmienu yi.

10. (a) Mfatoho yi mu no, aba no ne asase no gyina hɔ ma dɛn? (b) Dɛn na awi anaa ayuo bɛtem sow?

¹⁰ Kenkan Luka 8:5-8, 11-15. Ogufo ho mfatoho no mu no, aba no ne “Onyankopɔn asɛm,” anaa Ahenni no ho asɛm no. Asase no gyina hɔ ma nnipa koma. Aba a ekoguu asase pa mu no gyee ntini, efifii, na eyii awi anaa ayuo bɛtem. Afei “ɛsow aba mmɔho ɔha.” Nanso aba bɛn na awi bɛtem sow? Ɛsow awi mmɛtem nketenkete anaa? Dabi, ɛsow aba foforo, na akyiri yi saa aba no nso tumi sow mmɛtem. Mfatoho yi mu no, aba baako sow aba ɔha. Saa mfatoho no fa yɛn asɛnka adwuma no ho sɛn?

11. (a) Ogufo ho mfatoho no fa yɛn asɛnka adwuma no ho sɛn? (b) Sɛn na yɛsow Ahenni aba foforo?

¹¹ Yɛnyɛ ntotoho bi. Yɛmfa no sɛ mfe bi a atwam no, Adansefo bi anaa yɛn awofo a wɔyɛ Kristofo kaa Ahenni ho asɛm no kyerɛɛ yɛn. Bere a wohui sɛ Ahenni no ho asɛm a wogui agye ntini wɔ yɛn koma mu no, wɔn ani gyei pa ara. Sɛnea asase pa a Yesu kaa ho asɛm wɔ ne mfatoho no mu koraa aba no so no, saa  ara na yɛn nso yegyee asɛm no toom na yekuraa mu. Ɛno nti, Ahenni no ho asɛm a wogui no gyee ntini na enyinii. Sɛ yɛbɛka a, enyin yii awi bɛtem, na bere rekɔ so no, bere soe sɛ ɛsow aba. Awi bɛtem sow aba foforo na ɛnyɛ awi bɛtem foforo, saa ara na yɛn nso yɛsow Ahenni aba foforo na ɛnyɛ asuafo foforo. * Sɛn na yɛsow Ahenni aba foforo? Bere biara a yɛbɛka Ahenni no ho asɛm no, sɛ yɛbɛka a, na yɛrepete aba a woguu no yɛn koma mu no ara bi. (Luka 6:45; 8:1) Enti saa mfatoho yi ma yehu sɛ, bere tenten a yɛkɔ so ka Ahenni no ho asɛm no, na yɛde ‘boasetɔ resow aba.’

12. (a) Yesu mfatoho a ɛfa bobe ne ogufo ho no, dɛn na yebetumi asua afi mu? (b) Nea woasua afi mu no, ɛka wo sɛn?

¹² Yesu mfatoho a ɛfa bobe ne ogufo ho no, dɛn na yebetumi asua afi mu? Ɛboa yɛn ma yehu sɛ ɛnyɛ sɛ nkurɔfo a wɔwɔ yɛn asasesin mu tie asɛmpa no a ɛnna ɛkyerɛ sɛ yɛresow aba. Mmom, sɛ yɛkɔ so ka asɛm no a, ɛnna ɛkyerɛ sɛ yɛresow aba. Paulo kaa asɛm bi a ɛte saa. Ɔkaa sɛ: “Wɔn mu biara benya n’ankasa akatua sɛnea n’ankasa adwuma te.” (1 Kor. 3:8) Adwuma a obi yɛ na onya ho akatua, na ɛnyɛ nea efi saa adwuma no mu ba na onya ho akatua. Matilda de mfe 20 ayɛ akwampae adwuma. Ɔka sɛ: “M’ani agye sɛ mahu sɛ adwuma a yɛyɛ no, Yehowa tua yɛn ka.”

13, 14. Sɛnea Romafo 10:1, 2 ma yehu no, wɔn a wɔantie Ahenni no ho asɛmpa no, adɛn nti na Paulo annyae wɔn akyi di?

¹³ Dɛn na ɛbɛboa yɛn ama yɛakɔ so de boasetɔ asow aba? Sɛnea yɛahu no, esiane sɛ Yudafo no antie Ahenni no ho asɛm no nti, Paulo abam bui. Ɛno mpo no, wannyae wɔn akyi di. Hwɛ nea ɔkae wɔ krataa a ɔkyerɛw kɔmaa Kristofo a na wɔwɔ Roma no mu. Ɔkaa sɛnea na ɔte nka wɔ saa Yudafo no ho sɛ: “Nokwasɛm ne sɛ, nea me koma pɛ, ne m’adesrɛ a mede to Onyankopɔn anim ma wɔn ne sɛ wobenya nkwa. Efisɛ midi wɔn adanse sɛ wɔwɔ Onyankopɔn ho nnamyɛ de, nanso  ɛnyɛ nokware nimdeɛ mu.” (Rom. 10:1, 2) Dɛn na Paulo kyerɛe sɛ ɛno na ɛma ɔkɔɔ so kaa asɛm no?

¹⁴ Nea edi kan, Paulo kyerɛɛ nea enti a ɔkɔɔ so kaa asɛm no kyerɛɛ Yudafo no. Nea ɛma ɔyɛɛ saa ne sɛ na ‘ne koma pɛ.’ Nea na ɛda ne koma so ne sɛ Yudafo binom benya nkwa. (Rom. 11:13, 14) Nea ɛto so mmienu, Paulo kaa sɛ ‘ɔde n’adesrɛ too Onyankopɔn anim maa wɔn.’ Ɔbɔɔ Onyankopɔn mpae srɛɛ no sɛ ɔmmoa Yudafo binom ma wontie Ahenni no ho asɛm no. Nea ɛto so mmiɛnsa, Paulo de kaa ho sɛ: “Wɔwɔ Onyankopɔn ho nnamyɛ.” Ohui sɛ nkurɔfo wɔ koma pa na wobetumi abɛsom Yehowa. Ná Paulo nim pa ara sɛ, sɛ obi wɔ nnamyɛ na ɔde di dwuma yiye a, obetumi asesa abɛyɛ Kristo suani a ɔyɛ nnam.

15. Yɛbɛyɛ dɛn asuasua Paulo? Ma ɛho nhwɛso.

¹⁵ Yɛbɛyɛ dɛn asuasua Paulo? Nea edi kan, ɛsɛ sɛ yɛma ɛda yɛn koma so pa ara sɛ yɛbɛhwehwɛ obiara a ‘ɔpɛ daa nkwa.’ Nea ɛto so mmienu, yɛsrɛ Yehowa sɛ ɔmma wɔn a wɔwɔ koma pa no ntie asɛmpa no. (Aso. 13:48; 16:14) Silvana ayɛ akwampae adwuma bɛyɛ mfe 30. Ɔka sɛ: “Sɛ merebɛkɔ fie bi mu wɔ m’asasesin mu a, midi kan bɔ Yehowa mpae srɛ no sɛ ɔmma minnya nnipa a wɔwɔ hɔ no ho adwempa.” Afei nso, yɛbɔ mpae srɛ Onyankopɔn sɛ ɔmma abɔfo no nkyerɛ yɛn kwan nkɔ wɔn a wɔwɔ koma pa nkyɛn. (Mat. 10:11-13; Adi. 14:6) Robert ayɛ akwampae adwuma bɛboro mfe 30. Ɔka sɛ: “Abɔfo nim nea ɛrekɔ so wɔ afiewuranom asetenam, enti sɛ yɛne wɔn bom yɛ adwuma a, ɛyɛ anigye pa ara.” Nea ɛto so mmiɛnsa, yɛbɔ mmɔden sɛ yebehu adepa a ɛwɔ nkurɔfo ho. Carl yɛ asafo mu panyin, na bɛboro mfe 50 ni na ɔbɔɔ asu. Ɔka sɛ: “Ɛyɛ a mehwehwɛ biribi ketewa bi a ɛbɛma mahu sɛ onii no wɔ koma pa. Ebia ɔbɛserew, ɔbɛtew n’anim, anaa obebisa asɛm bi a ɛkyerɛ sɛ ɔrepɛ biribi ahu.” Sɛ yesuasua Paulo a, yebetumi akɔ so de boasetɔ asow aba.

16, 17. (a) Dɛn na yebetumi asua afi asɛm a ɛwɔ Ɔsɛnkafo 11:6 no mu? (b) Kyerɛ sɛnea aba a yɛregu no betumi aka wɔn a wɔrehwɛ yɛn.

¹⁶ Sɛ ɛyɛ yɛn sɛ Ahenni no ho asɛm a yɛreka no nka nkurɔfo koma mpo a, ɛnsɛ sɛ yenya adwene sɛ aba a yɛregu no nnya wɔn so tumi biara. (Kenkan Ɔsɛnkafo 11:6.) Ɛwom, nnipa pii ntie yɛn, nanso wɔhwɛ yɛn. Wohu sɛ yesiesie yɛn ho kama, yɛwɔ suban pa, na yɛn anim tew. Bere rekɔ so no, ebia wɔn mu bi hwɛ yɛn abrabɔ a, ɛbɛma wɔahu sɛ adwene a ɛnteɛ a wɔanya wɔ yɛn ho no nte saa. Sergio ne Olinda a yɛadi kan aka wɔn ho asɛm no huu nsakrae a ɛte saa.

¹⁷ Sergio ka sɛ: “Eduu bere bi no, na yɛyare, enti na yɛnkɔ baabi a yɛkɔyɛ asɛnka adwuma no. Bere a yɛsan kɔe no, nkurɔfo retwam a na wobisa sɛ, ‘Mokɔɔ he? Yɛafe mo.’” Olinda nso serew kaa sɛ: “Bɔs drɔbafo no yɛɛ yɛn baabae, ebinom nso teɛɛm ka kyerɛɛ yɛn sɛ ‘Moreyɛ adwuma pa!’ Wɔkaa sɛ yɛmma wɔn nsɛmma nhoma mpo.” Nea ɛyɛɛ awarefo no nwonwa mpo ne sɛ, ɔbarima bi kɔɔ trɔk a wɔde redi adanse no ho kɔmaa wɔn nhwiren, na ɔdaa wɔn ase wɔ adwuma a wɔreyɛ no ho.

18. Adɛn nti na woasi wo bo sɛ ‘wode boasetɔ bɛsow aba’?

¹⁸ Nokwasɛm ne sɛ, sɛ ‘yɛanyi yɛn nsa amfi’ Ahenni aba a yɛregu no ho a, na yɛreboa pa ara ama wɔadi “amanaman nyinaa adanse.” (Mat. 24:14) Nea ɛsen ne nyinaa no, yɛn ani begye pa ara efisɛ yenim sɛ Yehowa ani sɔ nea yɛreyɛ no. Yehowa dɔ wɔn a “wɔde boasetɔ sow aba” nyinaa!