1. Gyinae a ɛho hia bɛn na ɛsɛ sɛ nnipa nyinaa si?

 NNIPA a ɛwɔ hɔ nnɛ wɔ gyinae bi a ɛho hia paa a ɛsɛ sɛ wosi. Ɛne sɛ, wɔbɛtaa Yehowa Nyankopɔn akyi sɛ ɔno ne amansan yi Sodifo a ɔfata, anaa wɔbɛtaa ne tamfo tirimɔdenfo Satan Ɔbonsam akyi? Saa asɛm yi mu no, obi ntumi nka sɛ, ɔno de onni obiara afã. Gyinae a yɛn mu biara besi no, ɛno na ɛbɛkyerɛ sɛ yebenya daa nkwa anaa daa nkwa bɛbɔ yɛn. (Mat. 25:31-33, 46) “Ahohiahia kɛse” no mu no, wɔbɛhyɛ yɛn mu biara agyirae ama nkwagye anaa ɔsɛe.—Adi. 7:14; 14:9-11; Hes. 9:4, 6.

2. (a) Dɛn na Hebrifo 10:35-39 hyɛ yɛn nkuran sɛ yɛnyɛ? (b) Sɛn na Adiyisɛm nhoma no betumi aboa yɛn?

² Kenkan Hebrifo 10:35-39. Sɛ woasi gyinae sɛ wobɛtaa Yehowa tumidi akyi a, ɛnde woasi gyinae pa. Seesei, wo ho pere wo sɛ wobɛboa afoforo ma wɔn nso asi gyinae pa. Ɛno nti, wubetumi de nsɛm a ɛwɔ Adiyisɛm nhoma no mu no aboa wɔn. Saa nhoma no ma yehu nea ɛbɛto wɔn a wɔsɔre tia Yehowa. Nanso ɛnyɛ ɛno nko ara. Ɛsan ma yehu nhyira a wɔn a wɔde nokwaredi taa Yehowa tumidi akyi no benya. Ɛsɛ sɛ yesusuw nokwasɛm ahorow a ɛho hia yi ho. Yɛyɛ saa a, ɛbɛma yɛasi yɛn bo sɛ yɛrennyae Yehowa som da. Afei nso, yebetumi de nea yɛasua no aboa afoforo ama wɔasi gyinae abɛsom Yehowa, na wɔakɔ so asom no.

3. Dɛn na yebesusuw ho wɔ adesua yi mu?

³ Adesua yi mu no, yebesusuw nsɛmmisa a edidi so yi ho: Nhyira bɛn na wɔn a wɔtaa Onyankopɔn tumidi akyi no benya? Akekaboa kɔkɔɔ a Adiyisɛm nhoma no ka ne ho asɛm no akyitaafo nso, dɛn na ɛbɛto wɔn?

4. Nnipakuw bɛn na ɔsomafo Yohane hui sɛ wɔne Yesu wɔ soro no?

⁴ Anisoadehu bi a ɔsomafo Yohane nyae mu no, ohuu akuw mmienu bi a wɔtaa Yehowa tumidi akyi. Akuw mmienu no nyinaa nyaa daa nkwa. Kuw a edi kan no mufo yɛ 144,000. (Adi. 7:4) Wɔfaa wɔn fii asaase so sɛ wɔne Yesu nkodi ade wɔ soro. Wɔne Yesu bɛbom adi asaase so. (Adi. 5:9, 10; 14:3, 4) Anisoadehu no mu no, Yohane huu wɔn sɛ wɔne Yesu gyina “Sion Bepɔw so” wɔ soro.—Adi. 14:1.

5. Dɛn na ɛbɛkɔ so wɔ 144,000 no mufo a aka no asetena mu nnansa yi ara?

⁵ Efi asomafo no bere so besi nnɛ no, wɔapaw nnipa mpempem pii sɛ 144,000 no mufo. (Luka 12:32; Rom. 8:17) Nanso Yohane hui sɛ, ebedu awiei mmere no mu no, na wɔn mu kakraa bi pɛ na ɛda so wɔ asaase so. Ansa na ahohiahia kɛse no befi ase no, 144,000 no mufo a wɔda so wɔ asaase so no nsa bɛka “ahyɛnsode” a etwa to no. Ɛno bɛkyerɛ sɛ Yehowa agye wɔn atom. (Adi. 7:2, 3; 12:17) Sɛ ahohiahia kɛse no rekɔ so, na edu baabi a, wɔbɛfa saa nkaefo yi akɔ soro. Wɔde wɔn bɛkɔ akɔka 144,000 no mufo a wɔadi kan adi nokware akosi owu mu no ho. Wɔne Yesu bɛbom adi ade wɔ Onyankopɔn Ahenni no mu.—Mat. 24:31; Adi. 5:9, 10.

6-7. (a) Kuw bɛn na Yohane san hui, na wɔka wɔn ho asɛm sɛn? (b) Nkaefo no ne “nnipakuw kɛse” no nyinaa, adɛn nti na ɛsɛ sɛ wɔn ani gye asɛm a ɛwɔ Adiyisɛm ti 7 no ho?

⁶ Bere a Yohane huu kuw a ɛbɛkɔ soro no akyi no, ohuu “nnipakuw kɛse” bi. Saa kuw yi nte sɛ 144,000 no, efisɛ wɔn dodow nni ano. (Adi. 7:9, 10) Wɔka wɔn ho asɛm sɛn? Wɔka kyerɛɛ Yohane sɛ: “Eyinom na wofi ahohiahia kɛse no mu, na wɔahoro wɔn ntaade na wɔama ayɛ fitaa wɔ Oguammaa no mogya mu.” (Adi. 7:14) Sɛ “nnipakuw kɛse” no nya wɔn ti didi mu wɔ ahohiahia kɛse no mu a, wɔbɛtena asaase so ha na wɔanya nhyira pii.—Dw. 37:9-11, 27-29; Mmeb. 2:21, 22; Adi. 7:16, 17.

⁷ Sɛ wɔapaw yɛn sɛ yɛnkɔ soro oo, sɛ yɛbɛtena asaase so oo, asɛm a ɛwɔ Adiyisɛm ti 7 no, yehu yɛn ho wom anaa? Ɛsɛ sɛ yehu yɛn ho wom. Onyankopɔn asomfo a wɔwɔ akuw mmienu no nyinaa mu no, hwɛ sɛnea saa bere no bɛyɛ anigye ama wɔn! Yɛn ani begye paa sɛ yesii gyinae sɛ yɛbɛtaa Yehowa tumidi akyi. Ahohiahia kɛse no ho ade foforo bɛn na Adiyisɛm nhoma no ma yehu?—Mat. 24:21.

8. Sɛn na ahohiahia kɛse no befi ase, na ɛbɛka nnipa dodow no ara sɛn?

⁸ Adesua a edi wei anim mu no, yehui sɛ ɛrenkyɛ koraa, Babilon Kɛse a egyina hɔ ma wiase nyinaa atorosom ahemman no, wiase atumfo bɛtow ahyɛ no so. (Adi. 17:16, 17) Wei na ɛbɛkyerɛ sɛ ahohiahia kɛse no afi ase. Wohwɛ a, wei bɛma nnipa pii asen yuu abɛsom Yehowa anaa? Daabi. Mmom Adiyisɛm ti 6 ma yehu sɛ, saa bere no, wɔn a wɔnsom Yehowa no bɛkɔ akɔhwehwɛ ahobammɔ afi aban ahorow ne nnwumakuw a wodi gua hɔ. Wɔn na Adiyisɛm nhoma no ka wɔn ho asɛm sɛ mmepɔw no. Esiane sɛ wɔn a wɔnsom Yehowa no rentaa Onyankopɔn Ahenni no akyi nti, Yehowa bebu wɔn sɛ asɔretiafo.—Luka 11:23; Adi. 6:15-17.

9. Ahohiahia kɛse no mu no, ɔkwan bɛn so na nkurɔfo behu sɛ Yehowa asomfo da nsow, na ɛbɛkɔ akowie sɛn?

 ⁹ Nokwasɛm ne sɛ, ahohiahia kɛse no mu a ato nea ɛyɛ den no, Yehowa asomfo anokwafo bɛda nsow. Wɔn nko ara na ɛbɛyɛ nkurɔfo a wɔresom Yehowa Nyankopɔn wɔ asaase so saa bere no. Afei nso, wɔn nko ara na ebesi no pi sɛ wɔntaa “akekaboa” no akyi. (Adi. 13:14-17) Akokoduru a wɔde begyina pintinn no bɛhyɛ wɔn a wɔsɔre tia Yehowa no abufuw. Wei bɛma amanaman bi a wɔaka wɔn ho abom, a Bible frɛ wɔn Gog a ofi Magog no atow ahyɛ Onyankopɔn nkurɔfo a wɔwɔ wiase nyinaa so.—Hes. 38:14-16.

10. Sɛnea Adiyisɛm 19:19-21 kyerɛ no, sɛ wɔtow hyɛ Yehowa nkurɔfo so a, dɛn na ɔbɛyɛ?

¹⁰ Sɛ atamfo no tow hyɛ Yehowa nkurɔfo so atirimɔden so saa a, dɛn na ɔbɛyɛ? Yehowa ka sɛ: “M’abufuw bɛdɛw.” (Hes. 38:18, 21-23) Adiyisɛm ti 19 ka nea ebesi wɔ ɛno akyi. Yehowa bɛsoma ne Ba no ama wabetwitwa agye ne nkurɔfo, na wasɛe atamfo no. “Asraafodɔm a wɔwɔ ɔsoro” a wɔne abɔfo anokwafo ne 144,000 no bɛka Yesu ho ma wɔne atamfo no de asi ani. (Adi. 17:14; 19:11-15) Saa ɔko yi bɛkɔ akowie sɛn? Nnipa ne nnwumakuw a ɛsɔre tia Yehowa nyinaa ase bɛhyew dwerɛbee!—Kenkan Adiyisɛm 19:19-21.

11. Dwumadi a ɛho hia paa bɛn na Adiyisɛm nhoma no ka ho asɛm?

¹¹ Sɛ Onyankopɔn sɛe n’atamfo pasaa, na anokwafo a ɛwɔ asaase so nya wɔn ti didi mu a, hwɛ sɛnea wɔn ani begye afa! Ɛbɛyɛ anigye bere ankasa! Ɛwom sɛ wɔsɛe Babilon Kɛse no a, anigye kɛse bɛkɔ so wɔ soro, nanso biribi foforo wɔ hɔ a ɛbɛma anigye kɛse paa akɔ so wɔ hɔ. (Adi. 19:1-3) Nokwasɛm ne sɛ, ɛno ne dwumadi titiriw a ɛwɔ Adiyisɛm nhoma no mu. Ɛyɛ “Oguammaa no ayeforohyia.”—Adi. 19:6-9.

12. Sɛnea Adiyisɛm 21:1, 2 kyerɛ no, bere bɛn na Oguammaa no ayeforohyia no bɛba so?

¹² Bere bɛn na ayeforohyia no bɛba so? Ansa na Armagedon ko no befi ase no, na 144,000 no mufo nyinaa wɔ soro. Nanso ɛnyɛ saa bere no na Oguammaa no ayeforohyia no bɛba so. (Kenkan Adiyisɛm 21:1, 2.) Oguammaa no ayeforohyia no bɛba so wɔ Armagedon ko no akyi. Saa bere no, na Onyankopɔn ayi n’atamfo nyinaa afi hɔ.—Dw. 45:3, 4, 13-17.

13. Dɛn na ɛbɛkɔ so wɔ Oguammaa no ayeforohyia no ase?

¹³ Dɛn na ɛbɛkɔ so wɔ Oguammaa no ayeforohyia no ase? Wiɛ, sɛnea aware ka ɔbea ne ɔbarima bom no, saa ara na sɛnkyerɛnne kwan so aware yi nso te. Ɛka Ɔhene Yesu Kristo ne ‘n’ayeforo’ a wɔne 144,000 no bom. Saa dwumadi titiriw yi na ɛbɛkyerɛ sɛ aban foforo a ebedi asaase so mfe 1,000 no afi ase redi tumi.—Adi. 20:6.

14-15. Adiyisɛm ti 21 de 144,000 no toto dɛn ho? (Hwɛ mfoni a ɛwɔ Ɔwɛn-Aban yi anim no.)

¹⁴ Wei akyi no, Adiyisɛm ti 21 no de 144,000 no toto kurow bi a ɛyɛ fɛ paa ho. Wɔfrɛ saa kurow no “Yerusalem Foforo.” (Adi. 21:2, 9) Ná kurow no wɔ fapem 12, na na wɔakyerɛkyerɛw “Oguammaa no asomafo 12 no din 12 no wɔ so.” Adɛn nti na wei maa Yohane ani gyei?  Efisɛ ohui sɛ wɔakyerɛw ne din wɔ fapem no baako so. Ná wei kyerɛ sɛ wɔahyɛ no anuonyam paa!—Adi. 21:10-14; Efe. 2:20.

¹⁵ Kurow foforo biara ne saa kurow yi nsɛ. Ná kurow no mmɔnten yɛ sika kɔkɔɔ amapa, ɛwɔ apon 12 a wɔde abohene ayɛ. N’afasu ne ne fapem nso, wɔde aboɔden abo na ayɛ, na na n’afanan nyinaa yɛ pɛpɛɛpɛ. (Adi. 21:15-21) Nanso Yohane hui sɛ aka biribi! Hwɛ nea afei Yohane kae: “Manhu asɔrefi biara wom, efisɛ ade nyinaa so Tumfo Yehowa Nyankopɔn ne Oguammaa no na wɔyɛ n’asɔrefi. Enhia sɛ owia anaa ɔsram hyerɛn wɔ kurow no mu, efisɛ Onyankopɔn anuonyam ma ɛhɔ hyerɛn, na Oguammaa no ne ne kanea.” (Adi. 21:22, 23) Yerusalem Foforo no mufo behu Yehowa anim ne anim. (Heb. 7:27; Adi. 22:3, 4) Wei kyerɛ sɛ, Yehowa ne Yesu na wɔyɛ kurow no asɔrefie.

16. Mfirihyia apem no mu no, dɛn na Onyankopɔn Ahenni bɛyɛ ama adasamma?

¹⁶ Sɛ wɔn a wɔasra wɔn no de wɔn ani bu saa kurow yi a, ɛma wɔn ani gye sɛ. Nanso wɔn a wɔwɔ anidaso sɛ wɔbɛtena asaase so no, wɔn nso wɔ nea enti a wɔn ani gye saa kurow yi ho. Mfirihyia Apem Nniso no mu no, Yerusalem Foforo no bɛma yɛanya nhyira bebree. Yohane hui sɛ nhyira yi retene te sɛ “nkwa nsu asubɔnten.” “Nkwa nnua” sisi asubɔnten no afanu nyinaa, na nnua no nhaban na wɔde “sa amanaman no yare.” (Adi. 22:1, 2) Nnipa a ɛte ase saa bere no nyinaa betumi anya nneɛma pa yi so mfaso. Nkakrankakra, adasamma asoɔmmerɛwfo nyinaa bɛkɔ pɛyɛ mu. Yare, yaw, ne awerɛhow nyinaa befi hɔ.—Adi. 21:3-5.

17. Sɛnea Adiyisɛm 20:11-13 ma yehu no, henanom na ebenya Mfirihyia Apem Nniso no so mfaso?

¹⁷ Henanom na ebenya saa nneɛma pa yi so mfaso? Wɔn a wobedi kan anya so mfaso ne kuw kɛse a wobenya wɔn ti adidi mu wɔ Armagedon ne mma biara a ebia wɔbɛwo wɔn wɔ wiase foforo no mu no. Adiyisɛm ti 20 nso ma yehu sɛ wobenyan awufo. (Kenkan Adiyisɛm 20:11-13.) “Atreneefo” a wɔtenaa ase tete a wodii nokware kosii owu mu no, wobenyan  wɔn ama wɔabɛtena asaase so. Afei nso, “wɔn a wɔnyɛ atreneefo” a wɔtenaa ase tete, na wɔannya hokwan ansua Yehowa ho ade no, wobenyan wɔn nso. (Aso. 24:15; Yoh. 5:28, 29) So wei kyerɛ sɛ Mfirihyia Apem Nniso no mu no, wobenyan awufo nyinaa ama wɔabɛtena asaase so anaa? Daabi. Wɔn a wonyaa hokwan a anka wobetumi de asom Yehowa nanso wɔhyɛɛ da poe no de, wɔrennyan wɔn. Wonyaa hokwan no, nanso nea wɔyɛe no kyerɛ sɛ, wɔmpɛ sɛ wɔtena Paradise asaase so.—Mat. 25:46; 2 Tes. 1:9; Adi. 17:8; 20:15.

18. Ebedu mfirihyia 1,000 no awiei no, na wɔn a ɛte asaase so no akɔ tebea bɛn mu?

¹⁸ Ebedu mfirihyia 1,000 no awiei no, na wɔn a ɛte asaase so no nyinaa akɔ pɛyɛ mu. Bɔne a yenya fii Adam hɔ no renteetee obiara bio. (Rom. 5:12) Adam bɔne no ho nsunsuanso nyinaa befi hɔ koraa. Wei kyerɛ sɛ, mfirihyia 1,000 no awiei no, wɔn a wɔte asaase so no ‘bɛba nkwa mu’ efisɛ wɔbɛyɛ nnipa a sintɔ biara nni wɔn ho.—Adi. 20:5.

19. Adɛn nti na sɔhwɛ a etwa to ho hia?

¹⁹ Satan yɛɛ biara sɛ ɔbɛma Yesu agyaa ne mudi mu, nanso Yesu annyaagyaa ne ho. Sɔhwɛ biara a ɛbaa ne so no, odii nokware wom. Ɛnde yemmisa sɛ, nnipa a wɔakɔ pɛyɛ mu nyinaa, sɛ wɔma Satan kwan sɛ ɔnsɔ wɔn nhwɛ a, wɔbɛkɔ so adi nokware anaa? Sɛ yɛn mu biara betumi ayi saa asɛmmisa no ano a, gye sɛ mfirihyia 1,000 no awiei no, woyi Satan fi n’afiase hɔ ba. (Adi. 20:7) Wɔn a ebedi nkonim wɔ sɔhwɛ a etwa to yi mu no benya daa nkwa ne ahofadi a edi mu. (Rom. 8:21) Wɔn a wɔbɛtew Yehowa so atua no, wɔde wɔn bɛka Ɔbonsam ne n’ahonhommɔne no ho asɛe wɔn nyinaa afebɔɔ.—Adi. 20:8-10.

20. Adiyisɛm nhoma no mu nkɔmhyɛ a ɛma yenya anidaso yi, ɛma wote nka sɛn?

²⁰ Adiyisɛm nhoma no mu nsɛntitiriw kakra a yɛasusuw ho yi, ɛma wote nka sɛn? Ɛnyɛ wo anigye sɛ wuhu wo ho wɔ saa nkɔmhyɛ a ɛma yenya anidaso yi mu anaa? So wei nkanyan wo sɛ boa afoforo nso ma wɔmmɛka yɛn ho wɔ nokware som mu anaa? (Adi. 22:17) Seesei, yɛasusuw nsɛm a ɛyɛ nwonwa a ebesisi daakye ho. Wei akanyan yɛn paa. Ɛno nti, yɛne ɔsomafo Yohane a ɔkaa nea edi so yi yɛ adwene: “Amen! Awurade Yesu, bra.”—Adi. 22:20.