1. Dɛn na Yehowa pɛ sɛ n’asomfo yɛ? (Hwɛ mfoni no nso.)

 SƐ YEHIA awerɛkyekye ne akwankyerɛ a, hena na yebetumi abisa no? Yenim saa asɛmmisa no ho mmuae. Yebetumi akɔ Yehowa Nyankopɔn anim. Saa pɛpɛɛpɛ na Yehowa pɛ sɛ yɛyɛ. Ɔpɛ sɛ yɛtaa bɔ no mpae, efisɛ Bible ka sɛ: “Munnnyae mpaebɔ da.” (1 Tes. 5:17) Yebetumi abɔ no mpae bere biara, na yɛahwehwɛ n’akwankyerɛ nso wɔ biribiara a yɛyɛ wɔ yɛn abrabɔ mu. (Mmeb. 3:5, 6) Esiane sɛ Yehowa yɛ Onyankopɔn a ne yam ye nti, wama yɛn kwan sɛ yebetumi abɔ no mpae mpɛn dodow biara a yɛpɛ.

2. Dɛn na yebesusuw ho wɔ adesua yi mu?

² Yɛn ani sɔ hokwan a yenya de bɔ mpae no paa. Nanso, esiane sɛ nneɛma pii gu yɛn so nti, ebetumi ayɛ den sɛ yebenya bere abɔ mpae. Ebi nso a yɛbɛte nka sɛ, ɛsɛ sɛ yɛma yɛn mpaebɔ tu mpɔn. Anigyesɛm ne sɛ, yebetumi anya nkuranhyɛ ne akwankyerɛ pii afi Kyerɛwnsɛm no mu. Adesua yi mu no, yebesusuw Yesu nhwɛso ho, na yɛahwɛ sɛnea ɛbɛboa yɛn ma yɛapɛ bere abɔ mpae. Afei nso, yebesusuw nneɛma nnum bi a ɛho hia ho, na yɛahwɛ sɛnea ɛbɛboa yɛn ama yɛn mpaebɔ atu mpɔn.

3. Dɛn na na Yesu nim fa mpaebɔ ho?

³ Ná Yesu nim sɛ Yehowa nni yɛn mpaebɔ ho agorɔ koraa. Bere tenten ansa na Yesu reba asaase so no, ohui sɛ  n’Agya buaa mmarima ne mmea anokwafo mpaebɔ. Sɛ yɛbɛyɛ nhwɛso a, bere a Yehowa buaa mpae a Hanah, Dawid, Elia ne anokwafo afoforo fi wɔn koma mu bɔe no, na Yesu wɔ ne nkyɛn. (1 Sam. 1:10, 11, 20; 1 Ahe. 19:4-6; Dw. 32:5) Enti ɛnyɛ nwanwa sɛ Yesu ka kyerɛɛ n’asuafo sɛ wɔntaa mmɔ mpae, na wɔnnya ahotoso sɛ Yehowa bebua!—Mat. 7:7-11.

4. Dɛn na yesua fi mpae a Yesu bɔe mu?

⁴ Yesu nam mpae a ɔbɔɔ Yehowa no so yɛɛ nhwɛso maa n’asuafo. Bere a Yesu reyɛ ne som adwuma no, na ɔtaa bɔ Yehowa mpae. Ná ɛsɛ sɛ ɔpɛ bere bɔ mpae efisɛ mpɛn pii no, na onni adaagye koraa, na na nnipa pii nso gu no so. (Mar. 6:31, 45, 46) Ná ɔsɔre anɔpatutuutu sɛnea ɛbɛyɛ a ɔno nko ara betumi akɔhyɛ baabi abɔ mpae. (Mar. 1:35) Anyɛ yiye koraa no, da bi, ɔbɔɔ mpae anadwo no nyinaa ansa na ɔresi gyinae bi a ɛho hia. (Luka 6:12, 13) Afei nso, adwuma a Yehowa de hyɛɛ Yesu nsa wɔ asaase so no, na ne fã a ɛyɛ den paa ne owu a na obewu no. Enti anadwo a ade rebɛkye ama wawu no, ɔbɔɔ mpae mpɛn pii sɛnea ɛbɛyɛ a obetumi adi Yehowa nokware.—Mat. 26:39, 42, 44.

5. Yɛbɛyɛ dɛn asuasua Yesu?

⁵ Yesu nhwɛso ma yehu sɛ, sɛ yenni adaagye sɛ dɛn mpo a, ehia sɛ yɛpɛ bere bɔ mpae. Sɛnea Yesu yɛe no, ebehia sɛ yɛpɛ bere bɔ mpae. Ebia yebetumi asɔre anɔpatutuutu abɔ mpae, anaa yɛbɛyɛ saa anadwo. Yɛyɛ saa a, ɛma Yehowa hu sɛ yɛn ani sɔ saa hokwan titiriw yi. Onuawa bi a ne din de Lynne kae sɛ, bere a edi kan a ohui sɛ obetumi abɔ Yehowa mpae no, ɛkaa ne koma paa. Ɔka sɛ, “Bere a mihui sɛ metumi abɔ Yehowa mpae bere biara no, ɛboaa me ma mihuu no sɛ m’adamfo paa, na na mepɛ sɛ mema me mpaebɔ tu mpɔn.” Saa ara na yɛn mu bebree te nka. Enti momma yɛnhwɛ nneɛma nnum bi a ɛho hia a yebetumi abɔ ho mpae.

6. Sɛnea Adiyisɛm 4:10, 11 kyerɛ no, dɛn na ɛfata sɛ yɛde ma Yehowa?

⁶ Yi Yehowa ayɛ. Anisoadehu bi a ɔsomafo Yohane nyae mu no, ohuu  mpanyimfo 24 wɔ soro sɛ wɔresom Yehowa. Wɔyii Onyankopɔn ayɛ na wɔkaa sɛ ɔfata sɛ wɔde “anuonyam ne nidi ne tumi” ma no. (Kenkan Adiyisɛm 4:10, 11.) Abɔfo anokwafo no nso wɔ nea enti paa a ɛsɛ sɛ wɔyi Yehowa ayɛ na wɔdi no ni. Wɔne no na ɛwɔ soro, na wɔnim no yiye. Nneɛma a ɔyɛ ma wɔhu ne su ahorow. Sɛ wɔhwɛ Yehowa nnwuma a, ɛkanyan wɔn ma wɔyi no ayɛ.—Hiob 38:4-7.

7. Dɛn na yebetumi ayi Yehowa ayɛ wɔ ho?

⁷ Yɛn nso, yɛpɛ sɛ yeyi Yehowa ayɛ wɔ yɛn mpaebɔ mu, na yɛka sɛnea yɛdɔ no, ne nea yɛn ani gye ho wɔ ne ho. Sɛ worekenkan Bible anaa woresua a, bɔ mmɔden sɛ wubehu suban a Yehowa da no adi a ɛka wo koma paa. (Hiob 37:23; Rom. 11:33) Afei, sɛnea wote nka wɔ saa suban no ho no, ka ho asɛm kyerɛ no. Afei nso, sɛnea Yehowa boa yɛn, na ɔboa anuanom a ɛwɔ wiase nyinaa no nso, yebetumi ayi no ayɛ wɔ ho. Ɔhwɛ yɛn daa, na ɔbɔ yɛn ho ban.—1 Sam. 1:27; 2:1, 2.

8. Nneɛma a yɛda Yehowa ase wɔ ho no, ebi ne sɛn? (1 Tesalonikafo 5:18)

⁸ Da Yehowa ase. Nneɛma pii nti na yɛbɔ mpae a ɛsɛ sɛ yɛda Yehowa ase. (Kenkan 1 Tesalonikafo 5:18.) Adepa biara a yɛwɔ no, yebetumi ada no ase wɔ ho, efisɛ akyɛde pa biara fi ne hɔ. (Yak. 1:17) Yebetumi ada no ase sɛ wabɔ asaase fɛfɛɛfɛ, ne nneɛma a ɛyɛ nwanwa pii. Bio nso, nkwa a ɔde ama yɛn, yɛn abusua, yɛn nnamfo, ne anidaso a yɛwɔ no, yebetumi akyerɛ ho anisɔ. Yɛpɛ sɛ yɛda Yehowa ase nso sɛ wama yɛanya hokwan afa no adamfo.

9. Adɛn nti na ebia ɛho behia sɛ yɛyere yɛn ho na yɛatumi ada Yehowa ase?

⁹ Nea enti a ɛsɛ sɛ yɛn mu biara da Yehowa ase no, ebia ɛho behia sɛ yɛyere yɛn ho paa dwinnwen ho. Nea enti a ɛte saa ne sɛ, ɛnnɛ, nnipa pii yɛ bonniayɛ. Mpɛn pii no, nea ehia nkurɔfo ne nea wɔbenya, na ɛnyɛ nea wɔbɛyɛ de akyerɛ sɛ wɔn ani sɔ nea wɔwɔ. Sɛ yɛma saa suban no wiawia yɛn a, nea ehia yɛn nko ara na yɛbɛbɔ ho mpae. Nea ɛbɛyɛ na yɛrensuasua saa suban no, biribiara a Yehowa yɛ ma yɛn no, ehia sɛ yɛkɔ so kyerɛ ho anisɔ, na yɛda no ase.—Luka 6:45.

10. Sɛn na anisɔ a onuawa bi nyae boaa no ma otumi gyinaa ɔhaw a ohyiae ano? (Hwɛ mfoni no nso.)

¹⁰ Sɛ yɛn ani sɔ nea yɛwɔ a, ebetumi aboa yɛn ma yɛagyina ɔhaw ano. Momma yɛnhwɛ onuawa bi a ne din de Kyung-sook suahu. Ɛbaa January 15, 2015 Ɔwɛn-Aban mu. Adɔktafo hui sɛ kokoram atɔ n’ahrawa mu. Ɔka sɛ: “Asɛm no bubuu me; ɛyɛɛ me sɛ mahwere biribiara, na mebɔɔ hu.” Dɛn na ɛboaa Kyung-sook ma ogyinaa yare no ano?  Ɔkaa sɛ, anadwo biara ansa na ɔbɛda no, ɔforo kɔ ne dan atifi kɔbɔ mpae denneennen. Ɛyɛ a ɔhwɛ nneɛma nnum a Yehowa ayɛ ama no saa da no na wada no ase wɔ ho. Ɔyɛ saa a, na ne ho adwo no fɔmm, na na ɛma ɔdɔ a ɔwɔ ma Yehowa no yɛ kɛse. Ohui sɛ, sɛ Yehowa asomfo anokwafo kɔ tebea a ɛyɛ den mu a, ɔboa wɔn. Afei nso ohui sɛ, nhyira a yenya no dɔɔso sen amanehunu a yɛfa mu. Sɛ yɛrehyia sɔhwɛ bi mpo a, yɛwɔ nneɛma pii a yebetumi ada Yehowa ase wɔ ho de asuasua Kyung-sook. Sɛ yɛda Yehowa ase wɔ yɛn mpaebɔ mu a, ebetumi aboa yɛn ma yɛagyina sɔhwɛ ano, na ama yɛn ani agye.

11. Bere a Yesu san kɔɔ soro no, adɛn nti na na ehia sɛ n’asuafo no nya akokoduru?

¹¹ Srɛ Yehowa na ɔmma wo akokoduru wɔ asɛnka mu. Ná Yesu adi kan aka akyerɛ n’asuafo no sɛ wɔbedi ne ho adanse “wɔ Yerusalem ne Yudea ne Samaria nyinaa de akɔ asaase ano noho.” Enti, aka kakraa bi ama Yesu asan akɔ soro no, ɔsan kaa saa adwuma no ho asɛm kyerɛɛ n’asuafo no. (Aso. 1:8; Luka 24:46-48) Ɛno akyi bere tiaa bi no, Yudafo mpanyimfo no kyeree Petro ne Yohane de wɔn kɔɔ Sanhedrin no anim. Wɔka kyerɛɛ saa mmarima anokwafo yi sɛ wɔnnyae asɛm no ka, na wɔhunahunaa wɔn mpo. (Aso. 4:18, 21) Dɛn na Petro ne Yohane yɛe?

12. Sɛnea Asomafo Nnwuma 4:29, 31 kyerɛ no, dɛn na asuafo no yɛe?

¹² Bere a Yudafo nyamesom akannifo no hunahunaa Petro ne Yohane no, wɔkaa sɛ: “Sɛ ɛteɛ wɔ Onyankopɔn ani so sɛ yetie mo mmom sen Onyankopɔn a, mo ara mummua. Na yɛn de, nea yɛate na yɛahu no, yɛrentumi nnyae ho asɛm ka.” (Aso. 4:19, 20) Bere a wɔgyaa Petro ne Yohane no, asuafo no bɔɔ Yehowa mpae denneennen sɛ wɔpɛ sɛ wɔyɛ n’apɛde. Wɔbɔɔ mpae sɛ: “Ma wo nkoa nkɔ so mfa akokoduru kɛse nka w’asɛm.” Yehowa buaa mpae a wɔfi wɔn koma mu bɔe no.—Kenkan Asomafo Nnwuma 4:29, 31.

13. Dɛn na yebetumi asua afi Jin-hyuk hɔ?

¹³ Sɛ aban bi mpo hyɛ mmara sɛ yennyae asɛm no ka a, yebetumi asuasua asomafo no na yɛakɔ so aka. Yɛnhwɛ onua bi a ne din de Jin-hyuk. Esiane sɛ wampene sɛ ɔbɛkɔ sraadi nti, wɔde no too afiase. Bere a ɔda afiase no, nneduafo bi a na wɔde wɔn mu biara ahyɛ dan baako mu no, wɔde hyɛɛ ne nsa sɛ ɔno na ɔbɛkɔ akɔma wɔn aduan ne nneɛma afoforo. Nanso nneɛma a na nneduafo no hia nko ara na na obetumi ne wɔn abɔ ho nkɔmmɔ; Bible no mpo, na ɛnsɛ sɛ ɔne wɔn bɔ ho nkɔmmɔ. Ɔsrɛɛ Yehowa sɛ ɔmma no akokoduru, na ɔmma ɔnyɛ anifere na sɛ hokwan biara yi ne ti a watumi aka nokware no ho asɛm. (Aso. 5:29) Ɔka sɛ: “Yehowa buaa me mpaebɔ no, na ɔmaa me akokoduru ne nyansa ma mitumi ne nneduafo no pii fii Bible adesua ase wɔ wɔn pon ano; ná mede simma nnum na ɛyɛ. Edu anadwo nso a, na mekyerɛw nkrataa a ade kye a mede bɛma nneduafo no.” Sɛnea Jin-hyuk yɛe no, yɛn nso yebetumi abɔ mpae asrɛ akokoduru ne nyansa, na yɛanya awerɛhyem sɛ Yehowa bɛboa yɛn ma yɛayɛ asɛnka adwuma no.

14. Sɛ yɛrehyia ɔhaw a, dɛn na ebetumi aboa yɛn? (Dwom 37:3, 5)

¹⁴ Srɛ Yehowa sɛ ɔmmoa wo na gyina  wo haw ano. Yɛn mu pii wɔ hɔ a, yare anaa biribi foforo reteetee yɛn, yɛn dɔfo bi awu, ɔhaw bi asɔre wɔ yɛn abusua mu, nkurɔfo retan yɛn ani, anaa yɛrehyia ɔhaw foforo. Saa ɔhaw yi mu pii wɔ hɔ a, yare kodiawu ne akodi a ɛrekɔ so wɔ wiase no ama ayɛ den paa sɛ yebegyina ano. Sɛ worehyia saa ɔhaw yi bi a, ka wo koma mu asɛm kyerɛ Yehowa. Fa no sɛ Yehowa yɛ wo yɔnko berɛbo, na ka wo haw no ho asɛm kyerɛ no. Nya awerɛhyem sɛ “obeso wo mu.”—Kenkan Dwom 37:3, 5.

15. Sɛn na mpaebɔ betumi aboa yɛn ma ‘yɛamia yɛn ani agyina amanehunu mu’? Ma nhwɛso.

¹⁵ Sɛ yɛbɔ mpae daa a, ɛbɛboa yɛn ma yɛamia yɛn ani agyina amanehunu mu.’ (Rom. 12:12) Yehowa nim nea n’asomfo refa mu, enti “otie wɔn sufrɛ.” (Dw. 145:18, 19) Ɔkwampaefo bi a wadi mfe 29 a ne din de Kristie ahu sɛ saa asɛm no yɛ nokware. Prɛko pɛ na yare fii ase teetee onuawa yi. Wei maa adwinnwen kɛse bɛtɔɔ no so. Akyiri yi, adɔktafo kaa sɛ owuyare bi abɔ ne maame. Kristie ka sɛ: “Mebɔɔ Yehowa mpae denneennen srɛɛ no sɛ ɔmma me ahoɔden a metumi de agyina ano da biara. Meyeree me ho sɛ merentoto me som ase, enti na mekɔ adesua daa, na na meyɛ kokoam adesua nso.” Ɔde ka ho sɛ: “Mpaebɔ boaa me ma mitumi gyinaa mmere bɔne no ano. Ná minim sɛ Yehowa ka me ho daa, na ɛno kyekyee me werɛ paa. Ɛwom sɛ ɛnyɛ amonom hɔ ara na me ho tɔɔ me, nanso Yehowa buaa me mpaebɔ, na ɔmaa me asomdwoe ne akomatɔyam.” Mommma yɛn werɛ mmfi da sɛ “Yehowa nim sɛnea obegye wɔn a wɔde onyamesom pa tena ase no afi sɔhwɛ mu.”—2 Pet. 2:9.

16. Adɛn nti na yehia Yehowa mmoa na yɛatumi ako atia sɔhwɛ?

¹⁶ Srɛ Yehowa sɛ ɔmmoa wo na ko tia sɔhwɛ. Esiane sɛ bɔne wɔ yɛn ho nti, nneɛma  a ɛtwetwe yɛn kɔ bɔne mu no, daa ɛsɛ sɛ yɛko tia. Satan reyɛ nea obetumi biara sɛ ɔbɛma ayɛ den sɛ yɛbɛko atia sɔhwɛ. Ɔkwan baako a ɔpɛ sɛ ɔfa so sɛe yɛn adwene ne sɛ ɔbɛma yɛde nneɛma a ɛmfata agyigye yɛn ani. Anigyede a ɛte saa betumi ama yɛde nneɛma fi ahyɛ yɛn adwene mu. Wei yɛ nneɛma a ebetumi asɛe yɛn koma, na ebetumi ama yɛayɛ bɔne kɛse.—Mar. 7:21-23; Yak. 1:14, 15.

17. Sɛ yɛsrɛ Yehowa sɛ ɔmmoa yɛn mma yɛnko ntia sɔhwɛ a, dɛn na ɛsɛ sɛ yɛyɛ ka ho? (Hwɛ mfoni no nso.)

¹⁷ Sɛ biribi retwetwe yɛn kɔ bɔne mu, na yebetumi ako atia a, yehia Yehowa mmoa. Awurade mpaebɔ no mu no, Yesu de saa adesrɛ yi kaa ho sɛ: “Mfa yɛn nkɔ sɔhwɛ mu, mmom gye yɛn fi ɔbɔnefo no nsam.” (Mat. 6:13) Yehowa pɛ sɛ ɔyɛ yɛn mmoa, nanso ɛsɛ sɛ yɛsrɛ no sɛ ɔmmoa yɛn. Sɛ yɛbɔ mpae nso a, ɛsɛ sɛ yetu ho anammɔn. Yebetumi ayɛ nneɛma pɔtee bi sɛnea ɛbɛyɛ a nsusuwii bɔne a agye ntini wɔ Satan wiase no mu no, yɛremfa nhyɛ yɛn adwenem. (Dw. 97:10) Sɛ yɛkenkan Bible anaa yesua a, yebetumi de nneɛma pa ahyɛ yɛn adwenem. Yɛkɔ asafo nhyiam ne asɛnka a, ɛno nso bɛbɔ yɛn adwene ho ban. Yehowa nso ahyɛ bɔ sɛ ɔremma wɔnsɔ yɛn nhwɛ ntra nea yebetumi.—1 Kor. 10:12, 13.

18. Dɛn na ɛsɛ sɛ yɛn nyinaa yɛ wɔ mpaebɔ ho?

¹⁸ Awiei mmere a emu yɛ den yi mu no, ehia sɛ yɛn mu biara bɔ mpae paa sɛnea ɛbɛyɛ a yɛbɛkɔ so adi Yehowa nokware. Da biara, pɛ bere na fi wo komam bɔ Yehowa mpae. Yehowa pɛ sɛ ‘yɛka yɛn koma mu nsɛm kyerɛ no.’ (Dw. 62:8) Yi Yehowa ayɛ na da no ase wɔ nea ɔyɛ nyinaa ho. Srɛ Yehowa sɛ ɔmmoa wo na nya akokoduru wɔ asɛnka mu. Ɔhaw biara a worefa mu no, srɛ no sɛ ɔmmoa wo na woatumi agyina ano. Afei nso, sɔhwɛ biara a ebia worehyia no, srɛ no sɛ ɔmmoa wo na ko tia. Mma biribiara anaa obiara nnsiw wo kwan sɛ daa wobɛbɔ Yehowa mpae. Nanso, sɛn na Yehowa bua yɛn mpaebɔ? Yebesusuw asɛmmisa a ɛho hia yi ho wɔ adesua a edi hɔ no mu.