1-2. Adɛn nti na ɛsɛ sɛ yɛn mu biara yi ɔdɔ a enni huammɔ adi kyerɛ ne yɔnko?

SƐ YƐN mu biara yi ɔdɔ a enni huammɔ adi kyerɛ ne yɔnko a, mfaso wɔ so paa. Ebi ne sɛn? Mmebusɛm nhoma no mu nsɛm a edidi so yi ma yenya mmuae no: “Mma ɔdɔ a enni huammɔ ne nokwaredi nnkɔ nnnyaw wo. . . . Ɛba saa a, wubenya adom ne ntease a edi mu wɔ Onyankopɔn ne onipa ani so.” “Onipa a ne dɔ nni huammɔ no, ɛboa ɔno ara.” “Obiara a ɔhwehwɛ trenee ne ɔdɔ a enni huammɔ no, obenya nkwa.”—Mmeb. 3:3, 4; 11:17, ase hɔ asɛm; 21:21.

² Mmebusɛm yi ma yehu nneɛma mmiɛnsa bi nti a ɛsɛ sɛ yɛda ɔdɔ a enni huammɔ adi. Nea edi kan, sɛ yɛda ɔdɔ a enni huammɔ adi a, ɛma yɛsom bo wɔ Onyankopɔn ani so. Nea ɛto so mmienu, sɛ yɛda ɔdɔ a enni huammɔ adi a, ɛboa yɛn ankasa. Ebi ne sɛ, ɛma yenya nnamfo a yɛne wɔn ntam ntetew da. Nea ɛto so mmiɛnsa, sɛ yɛda ɔdɔ a enni huammɔ adi a, ɛbɛma yɛanya nhyira daakye, a daa nkwa mpo ka ho. Ampa, mfaso wɔ so paa sɛ yetie asɛm a Yehowa aka yi: “Obiara nna ɔdɔ a enni huammɔ adi nkyerɛ ne yɔnko na onhu no mmɔbɔ.”—Sak. 7:9.

3. Nsɛmmisa bɛn na yebesusuw ho wɔ adesua yi mu?

³ Adesua yi mu no, yebenya nsɛmmisa nnan ho mmuae. Henanom na ɛsɛ sɛ yeyi ɔdɔ a enni huammɔ adi kyerɛ wɔn? Dɛn na yebetumi asua afi Rut nhoma no mu a ɛbɛboa yɛn ama yɛada ɔdɔ a enni huammɔ adi? Dɛn na yɛbɛyɛ de akyerɛ sɛ yɛreda ɔdɔ a enni huammɔ adi? Sɛ yɛda ɔdɔ a enni huammɔ adi a, mfaso bɛn na yebenya?

4. Yɛbɛyɛ dɛn asuasua sɛnea Yehowa da ɔdɔ a enni huammɔ adi no? (Marko 10:29, 30)

⁴ Adesua a edi wei anim mu no, yehui sɛ Yehowa yi ne dɔ a enni huammɔ adi kyerɛ wɔn a wɔdɔ no na wɔsom no no nkutoo. (Dan. 9:4) Yɛpɛ sɛ ‘yesuasua Onyankopɔn, efisɛ yɛyɛ ne mma a ɔdɔ yɛn.’ (Efe. 5:1) Enti yɛpɛ sɛ yɛda ɔdɔ a enni huammɔ adi kyerɛ yɛn nuanom Kristofo nyinaa. Wei kyerɛ sɛ nsu mu oo, awia mu oo, yɛbɛbata wɔn ho denneennen.—Kenkan Marko 10:29, 30.

5-6. Ɔdɔ a obiara tumi da bi adi no, nsonsonoe bɛn na ɛda ɛno ne ɔdɔ a enni huammɔ ntam?

⁵ Yɛn nyinaa begye atom sɛ, sɛ yɛte nea ɔdɔ a enni huammɔ kyerɛ ase yiye a, ɛnna yebetumi ayi no adi akyerɛ yɛn nuanom Kristofo. Nea ɛbɛma yɛate ɔdɔ a enni huammɔ ase akɔ akyiri no, momma yɛnhwɛ nsonsonoe a ɛda ɛno ne ɔdɔ a obiara tumi da bi adi no ntam.

 ⁶ Ɔdɔ a obiara tumi da bi adi no, momma yɛmfa asɛm bi a esii nkyerɛkyerɛ mu. Bere bi na ɔsomafo Paul ne nkurɔfo bi te po so hyɛn bi mu, na hyɛn no bɔe. Wei ma wokopuee supɔw bi a wɔfrɛ no Malta so. Ná nnipa a ɛte supɔw no so no nnim akwantufo a na wɔn asɛm ayɛ mmɔbɔ yi wɔ baabiara, nanso woyii wɔn yam daa ahɔhoyɛ adi kyerɛɛ wɔn. (Aso. 28:2, 7) Ahɔhoyɛ a wɔdaa no adi kyerɛɛ akwantufo no, ɛyɛ ɔdɔ a obiara tumi da bi adi, na ɛnyɛ ɔdɔ a enni huammɔ.

7-8. (a) Dɛn na ɛkanyan obi ma ɔda ɔdɔ a enni huammɔ adi? (b) Adɛn nti na yebesusuw Rut nhoma no mu nsɛm bi ho?

⁷ Yɛaka ɔdɔ a obiara tumi da bi adi ho asɛm wɔ  nkyekyɛm 6 no mu. Dɛn ne nsonsonoe a ɛwɔ ɛno ne ɔdɔ a enni huammɔ mu? Adwene a ɛma obi yɛ biribi na ɛkyerɛ. Dɛn na ɛkanyan Onyankopɔn nkurɔfo a wɔn ho asɛm wɔ Bible mu ma wɔdaa ɔdɔ a enni huammɔ adi? Wɔn a wɔdaa ɔdɔ a enni huammɔ adi no, wɔn koma na ɛkaa wɔn ma wɔyɛɛ saa, na ɛnyɛ sɛ ɛsɛ sɛ wɔyɛ ara nti na wɔyɛe. Momma yɛnhwɛ Dawid nhwɛso no. Dawid koma kaa no ma ɔdaa ɔdɔ a enni huammɔ adi kyerɛɛ ne yɔnko berɛbo Yonatan, ɛmfa ho sɛ na Yonatan papa repɛ Dawid akum no no. Yonatan wu akyi mfe pii mpo, Dawid kɔɔ so daa ɔdɔ a enni huammɔ adi kyerɛɛ Yonatan ba Mefiboset.—1 Sam. 20:9, 14, 15; 2 Sam. 4:4; 8:15; 9:1, 6, 7.

⁸ Sɛ yɛhwɛ Rut nhoma no mu nsɛm bi a, ebetumi ama yɛasua ɔdɔ a enni huammɔ ho ade pii. Nnipa a wɔaka wɔn ho asɛm wɔ saa nhoma no mu no, ɔdɔ a enni huammɔ ho ade bɛn na yebetumi asua afi wɔn hɔ? Yɛbɛyɛ dɛn de asuade no ayɛ adwuma wɔ yɛn asafo mu? *

9. Adɛn nti na Naomi kaa sɛ Yehowa abrɛ no ase?

⁹ Yɛhwɛ Rut nhoma no mu a, wɔn a yebehu wɔn ho asɛm no bi ne Naomi ne n’ase Rut, ne ɔbarima nyamesuroni bi a ne din de Boas. Ná Boas yɛ Naomi kunu busuani. Ɔkɔm bi a esii Israel nti, Naomi, ne kunu, ne ne mma mmarima mmienu tu kɔɔ Moab. Bere a wɔda so wɔ hɔ no, Naomi kunu wui. Ne mma mmarima mmienu no mu biara waree, nanso awerɛhosɛm ne sɛ, wɔn nso wui. (Rut 1:3-5; 2:1) Esiane sɛ sotɔre mmienu ma anihaahaa nti, asɛm a ɛtoo Naomi no bubuu no koraa. Awerɛhow hyɛɛ ne so ara ma ɔkaa sɛ Yehowa abrɛ no ase. Nea na ɔrefa mu nti,  hwɛ nea ɔka faa Onyankopɔn ho: “Yehowa ne me anni no yiye.” “Ade nyinaa so Tumfo no ne me adi no nwenweenwene.” Ɔsan kaa sɛ: “Yehowa abrɛ me ase, na ade nyinaa so Tumfo no ama awie me bɔne.”—Rut 1:13, 20, 21.

10. Nsɛm yayaayaw a Naomi kae no, dɛn na Yehowa yɛe wɔ ho?

¹⁰ Nsɛm yayaayaw a Naomi kae no, dɛn na Yehowa yɛe wɔ ho? Yehowa annan n’akyi ankyerɛ ne somfo a na n’ani atutu aka ne nsam no. Mmom onyaa tema maa no. Yehowa nim sɛ “nhyɛso betumi ama onyansafo ayɛ n’ade sɛ ɔbɔdamfo.” (Ɔsɛnk. 7:7) Ne nyinaa mu no, na ehia sɛ Yehowa boa Naomi ma ohu sɛ ɔntoo no agyaagyaamu. Mmoa bɛn na Onyankopɔn de maa no? (1 Sam. 2:8) Ɔmaa Rut kɔboaa Naomi de daa ɔdɔ a enni huammɔ adi kyerɛɛ no. Rut fi ɔpɛ pa mu boaa Naomi, na nkakrankakra ne werɛ kyekyee. Ɔboaa no nso ma ohui sɛ Yehowa da so ara ka ne ho. Dɛn na yesua fi nea Rut yɛe no mu?

11. Adɛn nti na anuanom a wodwen afoforo ho fi wɔn pɛ mu boa wɔn a wɔakɔ ahokyere mu?

¹¹ Ɔdɔ a enni huammɔ ka yɛn ma yefi yɛn pɛ mu boa wɔn a wɔakɔ ahokyere mu. Sɛnea Rut kɔɔ so bataa Naomi ho no, ɛnnɛ nso, asafo no mufo a wɔn aba mu abu anaa wɔabotow no, anuanom a wodwen afoforo ho kɔ so ara bata wɔn ho. Wɔdɔ wɔn nuanom, na wɔayɛ krado sɛ wɔbɛyɛ nea wobetumi biara de aboa wɔn. (Mmeb. 12:25, ase hɔ asɛm; 24:10) Ɛno ara nso na ɔsomafo Paul kaa sɛ yɛnyɛ. Ɔkaa sɛ: “Wɔn a wɔabotow no, monkyekye wɔn werɛ; wɔn a wɔyɛ mmerɛw no, mommoa wɔn; munnya nnipa nyinaa ho abotare.”—1 Tes. 5:14.

12. Sɛ onua anaa onuawa bi abam abu a, mpɛn pii no, dɛn paa na yɛyɛ a ɛbɛboa no?

¹² Sɛ onua anaa onuawa bi abam abu a, mpɛn pii no, ade a yɛyɛ a ɛbɛboa no paa ne sɛ yɛbɛyɛ aso atie no, na yɛama no awerɛhyem sɛ yɛdɔ no. Sɛ wuyi wo yam boa Yehowa nguan a wɔsom bo ma no no bi a, ne werɛ remfi da. (Dw. 41:1) Mmebusɛm 19:17 ka sɛ: “Nea ɔdom mmɔborɔwa no, ɔde bɔ Yehowa bosea, na nea wayɛ no, Ɔbɛhyɛ no ananmu.”

13. Nsonsonoe bɛn na ɛda nea Rut yɛe ne nea Orpa yɛe no ntam, na adɛn nti na nea Rut yɛe no kyerɛ sɛ ɔdaa ɔdɔ a enni huammɔ adi? (Hwɛ mfoni a ɛwɔ Ɔwɛn-Aban yi anim no.)

¹³ Sɛ yɛhwɛ nea ɛtoo Naomi bere a ne kunu ne ne mma mmarima mmienu no wui no a, ɛno nso ma yɛte ɔdɔ a enni huammɔ ase yiye. Bere a Naomi tee sɛ “Yehowa asan abɛhwɛ ne nkurɔfo ama wɔn aduan” no, ɔyɛe sɛ ɔbɛsan akɔ ne nkyi. (Rut 1:6) Ne nsenom mmienu no nyinaa yɛe sɛ wɔne no bɛkɔ. Nanso bere a wɔnam kwan so no, Naomi ka kyerɛɛ wɔn mprɛnsa sɛ wɔnsan nkɔ Moab. Dɛn na wɔyɛe? Bible ka sɛ: “Orpa few n’ase  ano ne no dii nkra. Rut de, wansan; ɔbataa ne ho.” (Rut 1:7-14) Orpa tiee nea Naomi kae no, na ɔsan kɔɔ Moab. Nanso Rut de, wamfa ne ti annye. Ná anka ɔno nso betumi asan akɔ ne kurom, nanso esiane sɛ na ɔwɔ ɔdɔ a enni huammɔ nti, ɔyɛɛ n’adwene sɛ ɔne n’ase a n’asɛm ayɛ mmɔbɔ no bɛkɔ, na waboa no. (Rut 1:16, 17) Ɛnyɛ obi na ɔhyɛɛ Rut sɛ ɔmmata Naomi ho, na mmom ɔno ara na ofi ne pɛ mu yɛɛ saa. Nea Rut yɛe no kyerɛ sɛ na ɔreda ɔdɔ a enni huammɔ adi. Dɛn na yebetumi asua afi saa asɛm yi mu?

14. (a) Ɛnnɛ, dɛn na anuanom pii fi wɔn pɛ mu yɛ? (b) Sɛnea Hebrifo 13:16 kyerɛ no, afɔrebɔ bɛn na ɛsɔ Onyankopɔn ani?

¹⁴ Sɛ obi wɔ ɔdɔ a enni huammɔ a, ɔde nneɛma bɔ afɔre. Efi tete besi nnɛ nyinaa, yɛn nuanom bebree afi wɔn pɛ mu ayi ɔdɔ a enni huammɔ adi akyerɛ wɔn mfɛfo gyidifo, a wɔn a wonhyiaa wɔn da mpo ka ho. Sɛ yɛbɛyɛ nhwɛso a, sɛ atoyerɛnkyɛm si baabi a, ntɛm ara, wɔpɛ sɛ wohu nea wobetumi ayɛ de aboa. Sɛ asafo no muni bi kɔ ahokyere mu a, wɔntwentwɛn wɔn nan ase sɛ wɔbɛyɛ nneɛma pɔtee bi de aboa no. Wosuasua tete Kristofo a na wɔwɔ Makedonia no, na wɔde nneɛma bɔ afɔre. Nea ɛbɛyɛ na wɔaboa wɔn nuanom a ade ahia wɔn no, ‘wɔyɛ nea ɛboro wɔn ahoɔden so mpo.’ (2 Kor. 8:3) Sɛ Yehowa hu sɛ wɔreda ɔdɔ a ɛte saa adi a, hwɛ sɛnea ɛsɔ n’ani fa!—Kenkan Hebrifo 13:16.

15-16. Dɛn na Rut yɛe a ɛkyerɛ sɛ na wasi ne bo?

¹⁵ Sɛ yɛhwɛ sɛnea Rut boaa Naomi no a, yebetumi anya asuade pii. Momma yensusuw emu kakra ho.

¹⁶ Si wo bo. Bere a Rut kaa sɛ ɔne n’ase Naomi bɛkɔ Yuda no, mfiase no, Naomi ampene. Nanso Rut ampa abaw. Ekowiee sɛn? “Bere a Naomi hui sɛ Rut asi ne bo sɛ ɔne no bɛkɔ no, wanhyɛ no bio.”—Rut 1:15-18.

17. Dɛn na ɛbɛboa yɛn na yɛampa abaw ntɛm?

¹⁷ Asuade: Sɛ yebetumi aboa obi a wabotow a, ehia sɛ yenya ne ho abotare, na ɛnsɛ sɛ yɛpa abaw ntɛm. Sɛ wopɛ sɛ woboa onuawa bi a ohia mmoa a, ebia mfiase no, ɔbɛtwetwe ne ho. * Nanso ɔdɔ a enni huammɔ bɛkanyan yɛn ama yɛayɛ nea yebetumi biara aboa no. (Gal. 6:2) Yegye di sɛ, ebedu baabi no, ɔbɛma kwan ama yɛaboa no, na yɛakyekye ne werɛ.

18. Dɛn na ɛbɛyɛ sɛ ɛhyee Rut?

¹⁸ Mma wo bo mfuw. Bere a Naomi ne Rut koduu Betlehem no, kurom hɔfo behyiaa wɔn. Naomi ka kyerɛɛ wɔn sɛ: “Mekɔɔ no ma, nanso Yehowa ama maba no nsapan.” (Rut 1:21) Bere a Rut tee nea Naomi kae no, wo de hwɛ sɛnea ɔbɛte nka afa! Ná Rut ayɛ nea obetumi nyinaa aboa Naomi. Ná Rut ne no asu, wakyekye ne werɛ, na na ɔne no atwa kwantenten nna bebree. Wei nyinaa akyi no, Naomi kaa sɛ: “Yehowa ama maba no nsapan.” Asɛm a Naomi kae yi ma ɛyɛe sɛ gyama mmoa a Rut de maa no no nyinaa, na n’ani nsɔ. Ɛbɛyɛ sɛ wei hyee Rut paa! Ne nyinaa akyi no, ɔkɔɔ so bataa Naomi ho.

19. Sɛ obi wɔ amanehunu mu a, dɛn na ɛbɛma yɛakɔ so aboa no?

¹⁹ Asuade: Ɛnnɛ nso, sɛ onuawa bi wɔ amanehunu mu na yɛreboa no a, ebia mfiase no ɔbɛka asɛm bi ama ahaw yɛn, ɛmfa ho nea yɛayɛ ama no nyinaa. Nanso ɛnsɛ sɛ yɛma yɛn bo fuw. Mmom, ɛsɛ sɛ yɛkɔ so boa yɛn  nuabea a ade ahia no no, na yɛsrɛ Yehowa sɛ ɔmma yenhu ɔkwan pa a yɛbɛfa so akyekye ne werɛ.—Mmeb. 17:17.

20. Dɛn na ɛhyɛɛ Rut mpamden ma ɔkɔɔ so boaa Naomi?

²⁰ Ntwentwɛn wo nan ase sɛ wobɛhyɛ afoforo nkuran. Ná Rut ayi ɔdɔ a enni huammɔ adi akyerɛ Naomi, nanso afei de, na Rut ankasa nso hia nkuranhyɛ. Enti, Yehowa kanyan Boas ma ɔhyɛɛ no nkuran. Boas ka kyerɛɛ Rut sɛ: “Nea woayɛ nti, Yehowa nhyira wo. Yehowa, Israel Nyankopɔn a woabɛhwehwɛ ahobammɔ wɔ ne ntaban ase no mma wo akatua pa.” Asɛmdɛ a Boas kae no kyekyee Rut werɛ paa. Rut nso ka kyerɛɛ Boas sɛ: “Woakyekye me werɛ, na woaka asomdwoe nsɛm akyerɛ w’abaawa.” (Rut 2:12, 13) Ɛyɛ bere a Rut hia nkuranhyɛ no na Boas kaa awerɛkyekyesɛm yi kyerɛɛ no. Wei hyɛɛ no mpamden ma ɔkɔɔ so boaa Naomi.

21. Sɛnea Yesaia 32:1, 2 ka no, dɛn na asafo mu mpanyimfo betumi ayɛ ama anuanom?

²¹ Asuade: Anuanom a woyi ɔdɔ a enni huammɔ adi kyerɛ afoforo no, ɛtɔ da a wɔn nso hia nkuranhyɛ. Boas maa Rut awerɛhyem sɛ wahu ayamye a wada no adi akyerɛ Naomi no. Ɛnnɛ nso, sɛ asafo mu mpanyimfo de wɔn ani to fam a, wobehu anuanom a woyi wɔn yam boa afoforo no, na wɔakamfo wɔn. Sɛ mpanyimfo no antwentwɛn wɔn nan ase sɛ wobeyi wɔn yam akamfo anuanom a, ɛbɛhyɛ wɔn den ma wɔakɔ so aboa afoforo.—Kenkan Yesaia 32:1, 2.

22-23. Yɛyɛ dɛn hu sɛ sɛnea na Naomi te nka no sesae, na adɛn ntia? (Dwom 136:23, 26)

²² Bere bi akyi no, Boas yii ne yam kyɛɛ Rut ne Naomi aduan. (Rut 2:14-18) Boas ayamye no kaa Naomi sɛn? Naomi kaa sɛ: “Yehowa a ɔda ɔdɔ a enni huammɔ adi kyerɛ ateasefo  ne awufo no nhyira ɔbarima no.” (Rut 2:20a) Wei ma yehu sɛ, afei de, sɛnea na Naomi te nka no asesa! Ná wadi kan adi abooboo sɛ: “Yehowa abrɛ me ase,” nanso ɔno na afei de n’ani agye a ɔreka sɛ: ‘Yehowa ada ɔdɔ a enni huammɔ adi’ yi. Ɛbɛyɛ sɛ dɛn na ɛmaa sɛnea na Naomi te nka no sesae?

²³ Nkakrankakra, ewiee ase no, Naomi huu Yehowa nsa wɔ n’asetena mu. Bere a ɔresan akɔ Yuda no, Yehowa nam Rut so maa ne nsa kaa mmoa biara a ohia. (Rut 1:16) Afei nso, bere a Boas a ‘ɔyɛ obusuani a obetumi agye wɔn’ no yii ne yam kyɛɛ wɔn aduan no, Naomi hui sɛ Yehowa nsa wom. * (Rut 2:19, 20b) Ɛbɛyɛ sɛ ɔkaa wɔ ne tirim sɛ, ‘Afei na mahu sɛ Yehowa anyi me baako anhyɛ me nsa. Wannyaw me mu da!’ (Kenkan Dwom 136:23, 26.) Ɛbɛyɛ sɛ Naomi ani gyei paa sɛ Rut ne Boas ampa abaw, na wonyaa ne ho abotare! Yebetumi aka sɛ, nea asɛm no kowiei no maa wɔn mmiɛnsa nyinaa dii ahurusi.

24. Adɛn nti na yɛpɛ sɛ yɛkɔ so da ɔdɔ a enni huammɔ adi kyerɛ yɛn nuanom Kristofo?

²⁴ Dɛn na Rut nhoma no ama yɛasua afa ɔdɔ a enni huammɔ ho? Sɛ yɛwɔ ɔdɔ a enni huammɔ, na sɛ yɛn nuanom kɔ ahokyere mu a, yebenya wɔn ho abotare; yɛrempa abaw. Ɛsan nso kanyan yɛn ma yɛde nneɛma bɔ afɔre na yɛatumi aboa wɔn. Wɔn a woyi ɔdɔ a enni huammɔ adi kyerɛ afoforo no, ɛnsɛ sɛ mpanyimfo no twentwɛn wɔn nan ase sɛ wobeyi wɔn yam akamfo wɔn. Sɛ yehu sɛ yɛn nuanom a na ade ahia wɔn no asan akenten wɔn ho resom Yehowa a, ɛma yɛn ani gye paa. (Aso. 20:35) Ɛnde, dɛn paa nti na yɛkɔ so da ɔdɔ a enni huammɔ adi? Nea enti a yɛyɛ saa ne sɛ, yɛpɛ sɛ yesuasua Yehowa a “ne dɔ a enni huammɔ nni ano” no, na yɛsɔ n’ani.—Ex. 34:6; Dw. 33:22.