1-2. Adɛn nti na ebia yebenya adwene sɛ Yehowa mmua yɛn mpaebɔ?

 BIBLE ka sɛ: “Di ahurusi wɔ Yehowa mu, na ɔbɛma wo nea wo koma pɛ.” (Dw. 37:4) Saa bɔhyɛ yi ma yenya akomatɔyam paa! Nanso wohwɛ a, ɛsɛ sɛ yɛhwɛ kwan sɛ biribiara a yebebisa Yehowa no, amonom hɔ ara na wayɛ ama yɛn anaa? Adɛn nti na ehia paa sɛ yebisa saa asɛm yi? Momma yɛnhwɛ nhwɛso a edidi so yi. Onuawa sigyani bi pɛ sɛ ɔkɔ Ahenni Asɛmpakafo Sukuu no bi, enti wabɔ ho mpae. Wahwɛ kwan saa ara, nanso wɔnnya mfrɛɛ no. Yare bi a emu yɛ den abɔ onua aberante bi, na wasrɛ Yehowa sɛ ɔmma ne ho ntɔ no, sɛnea ɛbɛyɛ a obetumi ayɛ pii wɔ asafo no mu. Nanso ne ho ntɔɔ no. Awofo bi a wɔyɛ Kristofo asrɛ Yehowa sɛ ɔmma wɔn ba ntena nokware no mu. Nanso wɔn ba no agyae Yehowa som.

² Ebia wo nso woasrɛ Yehowa hɔ biribi, nanso wo nsa nkae. Enti, ebia wubenya adwene sɛ Yehowa bua ebinom mpaebɔ nanso ommua wo de. Anaa ebia w’adwene bɛyɛ wo sɛ woayɛ bɔne bi ntia. Onuawa bi a ne din de Janice b nyaa adwene a ɛte saa. Ná ɔne ne kunu pɛ sɛ wɔkɔsom wɔ Betel, enti wɔbɔɔ ho mpae. Onuawa no ka sɛ: “Ná migye di paa sɛ ɛrenkyɛ biara Betel bɛfrɛ yɛn.” Awarefo no hwɛɛ kwan mfe pii nanso wɔamfrɛ wɔn. Janice ka sɛ: “Me werɛ howee, na meyɛɛ basaa. Ná minhu nea mayɛ atia Yehowa. Ná mabɔ mpae saa ara sɛ Yehowa mma yɛnkɔ Betel. Adɛn nti na wantie me?”

3. Dɛn na yebesusuw ho wɔ adesua yi mu?

³ Ɛtɔ da a, ebia yɛn adwene bɛyɛ yɛn sɛ Yehowa ntie yɛn mpaebɔ. Mmarima anokwafo a wɔtenaa ase tete no mpo, ebinom nyaa saa adwene no bi. (Hiob 30:20; Dw. 22:2;  Hab. 1:2) Adɛn nti na wubetumi agye adi sɛ Yehowa betie wo mpaebɔ? (Dw. 65:2) Nea ɛbɛboa yɛn ma yɛanya saa asɛmmisa no ho mmuae no, yebedi kan asusuw nsɛm a edidi so yi ho: (1) Dɛn na yebetumi ahwɛ kwan sɛ Yehowa bɛyɛ? (2) Dɛn na Yehowa pɛ sɛ yɛyɛ? (3) Adɛn nti na ebia ɛho behia sɛ yɛbɔ biribi foforo ho mpae?

4. Sɛnea Yeremia 29:12 ka no, dɛn na Yehowa ahyɛ bɔ sɛ ɔbɛyɛ?

⁴ Yehowa ahyɛ yɛn bɔ sɛ obetie yɛn mpaebɔ. (Kenkan Yeremia 29:12.) Yɛn Nyankopɔn no dɔ n’asomfo anokwafo, enti yɛbɔ mpae a, ɔremmu nnua ngu n’asom. (Dw. 10:17; 37:28) Nanso, wei nkyerɛ sɛ biribiara a yebebisa no, ɔbɛyɛ ama yɛn. Nneɛma a yebisa Yehowa no bi wɔ hɔ a, gye sɛ yɛtwɛn kosi wiase foforo no mu ansa na yɛn nsa aka.

5. Sɛ yɛde yɛn abisade to Yehowa anim a, dɛn na ɔhwɛ? Kyerɛkyerɛ mu.

⁵ Sɛ yɛde yɛn abisade to Yehowa anim a, ɔhwɛ sɛ ɛne n’atirimpɔw hyia anaa. (Yes. 55:​8, 9) N’atirimpɔw baako ne sɛ, nnipa a wɔde anigye tie no no, wɔn na ɔpɛ sɛ wɔhyɛ asaase so ma na odi wɔn so. Nanso Satan kyerɛ sɛ, sɛ nnipa ankasa di wɔn ho so a, nneɛma bɛkɔ yiye ama wɔn. (Gen. 3:​1-5) Yehowa ama kwan sɛ nnipa ankasa nni wɔn ho so, sɛnea ɛbɛyɛ a obiara behu sɛ Ɔbonsam yɛ ɔtorofo. Ɛnnɛ, ɔhaw a yɛrefa mu no, emu bebree fi nnipa aban. (Ɔsɛnk. 8:9) Yenim sɛ ɛnyɛ saa bere yi na Yehowa beyi saa ɔhaw yi nyinaa afi hɔ. Anyɛ saa a, ebia ebinom bɛka sɛ, sɛ nnipa di wɔn ho so a, nneɛma kɔ yiye, kyerɛ sɛ wɔbetumi ayi nnipa haw afi hɔ.

6. Adɛn nti na ɛsɛ sɛ yegye di sɛ Yehowa dɔ yɛn na ɔbɛyɛ nea ɛtene bere nyinaa?

⁶ Sɛ nnipa mmienu de abisade koro to Yehowa anim a, ebia ɛsono sɛnea obebua wɔn mu biara. Sɛ yɛbɛyɛ nhwɛso a, bere a Ɔhene Hesekia yaree denneennen no, ɔsrɛɛ Yehowa sɛ ɔmma ne ho ntɔ no. Yehowa nso tiee no, na ɔsaa no yare. (2 Ahe. 20:​1-6) Nanso bere bi, ɔsomafo Paul srɛɛ Yehowa sɛ onyi “ɔhonam mu nsɔe” bi mfi ne so, nanso Yehowa anyi amfi hɔ. Ɛbɛyɛ sɛ na ɛyɛ yare bi na ɛreteetee no. (2 Kor. 12:​7-9) Yɛnhwɛ ɔsomafo Yakobo ne ɔsomafo Petro nso. Ná Ɔhene Herode pɛ sɛ okum wɔn mmienu nyinaa. Asafo no bɔɔ mpae maa Petro, na ɛbɛyɛ sɛ wɔbɔɔ bi maa Yakobo nso. Ne nyinaa mu no, Herode kum Yakobo, nanso Petro de, ɔbɔfo bi begyee no. (Aso. 12:​1-11) Ebia yebebisa sɛ, ‘Adɛn nti na Yehowa gyee Petro nanso wannye Yakobo?’ Bible no nka. c Nanso yebetumi anya awerɛhyem sɛ “ntɛnkyea biara” nni Yehowa akwan mu. (Deut. 32:4) Afei nso, yenim sɛ na Yehowa dɔ Petro ne Yakobo nyinaa. (Adi. 21:14) Ɛtɔ da a, sɛnea yɛpɛ sɛ Yehowa bua yɛn mpaebɔ no, ɛnyɛ saa na ɔyɛ no. Nanso esiane sɛ yegye di sɛ Yehowa dɔ yɛn na ɔyɛ nea ɛtene bere nyinaa nti, ɔkwan a ɔfa so bua yɛn mpaebɔ no, yɛnkasa ho.—Hiob 33:13.

7. Dɛn na ɛnsɛ sɛ yɛyɛ, na adɛn ntia?

⁷ Ɛsɛ sɛ yɛbɔ mmɔden sɛ yɛremfa yɛn ho ntoto afoforo ho. Yɛmfa no sɛ, ebia yebisaa biribi pɔtee bi fii Yehowa hɔ, nanso yɛn nsa anka. Akyiri yi, yehui sɛ obi bisaa ade koro no ara, nanso ɔno de asɛ Yehowa ayɛ ama no. Onuawa bi a ne  din de Anna nyaa osuahu bi a ɛte saa. Ná ne kunu Matthew yare kokoram, na ɔbɔɔ mpae sɛ Yehowa nsa no yare. Bere koro no ara na Kristofo mmea mmienu bi a wɔn mfe akɔ anim nso yare kokoram. Anna bɔɔ mpae denneennen maa Matthew ne anuanom mmea no. Anuanom mmea no ho tɔɔ wɔn, nanso Matthew de owui. Mfiase no, Anna bisaa ne ho sɛ, ‘Yehowa na ɔmaa anuanom mmea yi ho tɔɔ wɔn anaa? Sɛ saa a, mpae a mebɔe sɛ Yehowa mma me kunu ho ntɔ no no, adɛn nti na wantie?’ Yɛrentumi nkyerɛ nea ɛyɛe a anuanom mmea no ho tɔɔ wɔn. Nea yenim ne sɛ Yehowa beyi amanehunu nyinaa afi hɔ korakora, na ɔhwɛ kwan paa sɛ obenyan ne nnamfo a wɔawuwu no.—Hiob 14:15.

8. (a) Sɛnea Yesaia 43:2 ma yehu no, sɛn na Yehowa boa yɛn? (b) Sɛ yɛrefa sɔhwɛ a emu yɛ den mu a, sɛn na mpaebɔ betumi aboa yɛn? (Hwɛ video a yɛato din Mpaebɔ Boa Yɛn Bere a Yɛrefa Ɔhaw Mu no.)

⁸ Yehowa bɛboa yɛn bere nyinaa. Yehowa yɛ yɛn Agya a ɔdɔ yɛn, enti ɔmpɛ sɛ yehu amane. (Yes. 63:9) Nanso sɔhwɛ a ɛte sɛ nsubɔnten anaa ogya a yehyia no, ɛnyɛ ne nyinaa na osiw ano. (Kenkan Yesaia 43:2.) Ne nyinaa mu no, ɔhyɛ yɛn bɔ sɛ ɔbɛboa yɛn ma yɛafa mu. Afei nso, ɔremma kwan mma sɔhwɛ a yɛrehyia no nsɛe yɛne no ntam. Bio nso, Yehowa ma yɛn ne honhom kronkron, na ɛboa yɛn ma yemia yɛn ani gyina sɔhwɛ mu. (Luka 11:13; Filip. 4:13) Ɛno nti, yebetumi anya ahotoso sɛ, biribiara a yehia na ama yɛatumi amia yɛn ani agyina sɔhwɛ mu na yɛakɔ so adi Yehowa nokware no, ɔde bɛma yɛn bere nyinaa. d

9. Sɛnea Yakobo 1:​6, 7 kyerɛ no, adɛn nti na ɛsɛ sɛ yenya ahotoso sɛ Yehowa bɛboa yɛn?

⁹ Yehowa pɛ sɛ yɛde yɛn ho to no so. (Heb. 11:6) Sɛ yehyia sɔhwɛ a, ɛtɔ da a yebetumi ate nka sɛ ɛboro yɛn so. Ebi mpo a yebenya adwene sɛ ɛnyɛ ade a Yehowa bɛboa yɛn. Nanso Bible ma yɛn awerɛhyem sɛ Onyankopɔn tumi nti, yebetumi ‘aforo ɔfasu.’ (Dw. 18:29) Enti sɛ́ anka yebenya adwene sɛ ɛnyɛ ade a Yehowa bɛboa yɛn no, ɛsɛ sɛ yenya gyidi a emu yɛ den na yɛbɔ mpae, na yenya ahotoso sɛ Yehowa betie yɛn mpaebɔ.—Kenkan Yakobo 1:​6, 7.

10. Fa nhwɛso kyerɛ sɛnea yebetumi ayɛ yɛn mpaebɔ ho adwuma.

¹⁰ Yehowa pɛ sɛ yɛyɛ yɛn mpaebɔ ho adwuma. Sɛ yɛbɛyɛ nhwɛso a, ebia onua bi bɛbɔ mpae asrɛ Yehowa sɛ ɔmmoa no na n’adwumawura mma no kwan sɛnea ɛbɛyɛ a obetumi akɔ ɔmantam nhyiam. Ɔkwan bɛn na ebia Yehowa bɛfa so abua saa mpae no? Ebia ɔbɛma onua no akokoduru ma watumi akɔ n’adwumawura no anim. Nanso ebehia sɛ onua no ankasa tutu ne nan kɔ n’adwumawura no hɔ de n’adesrɛ no kɔto n’anim. Ebi mpo a ebehia sɛ ɔkɔ n’anim mpɛn pii. Anaasɛ ebia ɔbɛma wɔn a ɔne wɔn yɛ adwuma no bi ayɛ n’adwuma no ama no, na ɔno nso akɔyɛ onii no de ama no da foforo. Ebia obetumi mpo aka sɛ nna a ɔrenyɛ adwuma no, wɔntew mfi n’akatua mu.

11. Nea ɛhaw yɛn no, adɛn nti na ɛsɛ sɛ yɛkɔ so bɔ ho mpae?

¹¹ Nea ɛhaw yɛn no, Yehowa pɛ sɛ yɛkɔ so bɔ ho mpae. (1 Tes. 5:17) Asɛm bi a Yesu kae ma yehu sɛ, yɛn abisade no bi wɔ hɔ a, ɛnyɛ amonom hɔ ara na Yehowa bɛyɛ ama yɛn. (Luka 11:9) Enti mpa  abaw! Kɔ so bɔ mpae denneennen. (Luka 18:​1-7) Sɛ yɛkɔ so bɔ nea ɛhaw yɛn no ho mpae a, ɛbɛma Yehowa ahu sɛ yɛn abisade no ho hia yɛn paa. Afei nso, sɛ yɛyɛ saa a, yɛma Yehowa hu sɛ yegye di paa sɛ ɔbɛboa yɛn.

12. (a) Sɛ yɛde yɛn abisade reto Yehowa anim a, asɛm bɛn na ɛsɛ sɛ yebisa yɛn ho, na adɛn ntia? (b) Sɛ yɛrebɔ Yehowa mpae a, dɛn na yɛbɛyɛ de akyerɛ sɛ yebu no? (Hwɛ adaka a yɛato din “ M’adesrɛ Kyerɛ Sɛ Mibu Yehowa Anaa?” no.)

¹² Sɛ yɛbɔ biribi ho mpae na yɛn nsa anka a, yebetumi abisa yɛn ho nsɛm mmiɛnsa bi. Nea edi kan, ‘Nea merebɔ ho mpae no, ɛno na ɛsɛ sɛ mibisa anaa?’ Mpɛn pii no, ɛyɛ a ɛyɛ yɛn sɛ yenim nea eye ma yɛn paa. Nanso nneɛma a yebisa no, ebia na ɛremmoa yɛn. Sɛ yɛrebɔ ɔhaw bi ho mpae a, ebia ano aduru bi wɔ hɔ a ɛbɛboa yɛn paa asen nea yɛrebisa no. Afei nso, nea yebisa no bi wɔ hɔ a, ebia na ɛne Yehowa apɛde nhyia. (1 Yoh. 5:14) Momma yɛmfa awofo a yɛkaa wɔn ho asɛm no nyɛ nhwɛso. Wɔde too Yehowa anim sɛ ɔmma wɔn ba no ntena nokware no mu. Anhwɛ a ɛbɛyɛ wo sɛ mfomso biara nni wɔn adesrɛ no ho. Nanso Yehowa de, ɔrenhyɛ obiara sɛ ɔnsom no. Ɔpɛ sɛ yɛne yɛn mma nyinaa fi yɛn pɛ mu som no. (Deut. 10:​12, 13; 30:​19, 20) Enti, anka awofo no betumi asrɛ Yehowa sɛ ɔmmoa wɔn ma wɔnkyerɛkyerɛ wɔn ba no ma ɛnka ne koma, sɛnea ɛbɛyɛ a ɛbɛkanyan no ma wadɔ Yehowa na wafa no adamfo.—Mmeb. 22:6; Efe. 6:4.

13. Sɛnea Hebrifo 4:16 kyerɛ no, bere bɛn na Yehowa bɛboa yɛn? Kyerɛkyerɛ mu.

¹³ Asɛm a ɛtɔ so mmienu a yebetumi  abisa yɛn ho ne sɛ, ‘Bere aso sɛ Yehowa yɛ m’abisade no ma me anaa?’ Ebia ɛbɛyɛ yɛn sɛ ɛsɛ sɛ Yehowa bua yɛn mpaebɔ amonom hɔ ara. Nanso nea ɛwom ne sɛ, Yehowa nim bere a eye paa a ɛsɛ sɛ ɔboa yɛn. (Kenkan Hebrifo 4:16.) Sɛ yɛde yɛn adesrɛ bi to Yehowa anim na yɛannya ho mmuae amonom hɔ ara a, ebia yebenya adwene sɛ Yehowa reka sɛ ɔrenyɛ. Nanso ebia nea na Yehowa reka ne sɛ ‘Twɛn kakra.’ Onua aberante a na ɔyare a ɔbɔɔ mpae sɛ Yehowa mma ne ho ntɔ no a yɛkaa ne ho asɛm no, momma yɛmfa n’asɛm no nyɛ nhwɛso. Sɛ Yehowa saa no yare anwanwakwan so a, anka ebia Satan bɛka sɛ ayaresa a onua no nyae nti na ɔda so ara resom Yehowa. (Hiob 1:​9-11; 2:4) Yehowa ayi bere bi asi hɔ a ɔde bɛsa ayarefo nyinaa yare. (Yes. 33:24; Adi. 21:​3, 4) Enti saa bere no nnya nsoe yi, ɛnsɛ sɛ yɛhwɛ kwan sɛ Yehowa bɛsa yɛn yare anwanwakwan so. Enti onua no betumi asrɛ Yehowa sɛ ɔnhyɛ no den na ɔmma no asomdwoe a ɔde begyina ne yare no ano, na wakɔ so de nokwaredi asom no.—Dw. 29:11.

14. Dɛn na woasua afi Janice asɛm no mu?

¹⁴ Wokae Janice a ɔbɔɔ mpae sɛ ɔpɛ sɛ ɔkɔ Betel no? Mfe nnum akyi ansa na ɔrehu sɛnea Yehowa buaa ne mpaebɔ no. Ɔka sɛ: “Yehowa de saa bere no kyerɛkyerɛɛ me nneɛma pii sɛnea ɛbɛyɛ a mɛyɛ Kristoni mapa. Mibehui sɛ ɛsɛ sɛ mede me ho to no so paa. Ná ehia sɛ mema me kokoam adesua tu mpɔn. Afei nso, na ɛsɛ sɛ minya koma mu anigye, na ɛno nso de, ennyina ɔsom hokwan bi a menya so.” Akyiri yi, wɔmaa Janice ne ne kunu kɔyɛɛ ɔmansin adwuma. Janice hwɛ n’akyi a, ɔka sɛ: “Yehowa  buaa me mpaebɔ no, nanso ɛnyɛ sɛnea na mehwɛ kwan no. Ɛkyɛe kakra ansa na merehu sɛ ɔsom hokwan a Yehowa ama yɛanya no yɛ akyɛde kɛse. Meda no ase paa sɛ wama mahu sɛ ɔdɔ me na ne yam ye.”  

15. Sɛ yɛrebɔ mpae a, ɛtɔ da a, adɛn nti na ehia sɛ yɛtrɛw yɛn ahye mu? (Hwɛ mfoni no nso.)

¹⁵ Asɛm a ɛtɔ so mmiɛnsa a yebetumi abisa yɛn ho ne sɛ, ‘Ɛsɛ sɛ mebɔ biribi foforo ho mpae anaa?’ Sɛ yɛrebɔ mpae a, eye sɛ yɛbɔ biribi pɔtee ho mpae. Nanso ɛtɔ da a, ebia ebehia sɛ yɛtrɛw yɛn ahye mu, kyerɛ sɛ, ɛsɛ sɛ yɛbɔ nneɛma afoforo ho mpae. Sɛ yɛyɛ saa a, ɛbɛma yɛahu nea Yehowa pɛ sɛ yɛyɛ. Onuawa sigyani no a na ɔrebɔ mpae sɛ ɔpɛ sɛ ɔkɔ Ahenni Asɛmpakafo Sukuu no, momma yɛmfa n’asɛm no nyɛ nhwɛso. Ná ɔpɛ sɛ ɔkɔ sukuu no bi sɛnea ɛbɛyɛ a obetumi akɔsom wɔ baabi a wɔhia asɛmpakafo pii. Enti bere a ogu so rebɔ mpae sɛ wɔnto nsa mfrɛ no no, obetumi nso asrɛ Yehowa sɛ ɔmmoa no ma onhu akwan a obetumi afa so atrɛw ne som adwuma mu. (Aso. 16:​9, 10) Afei, nea ɔbɛyɛ de akyerɛ sɛ ɔreyɛ ne mpaebɔ no ho adwuma no, obetumi abisa ne mansin sohwɛfo sɛ asafo bi bɛn hɔ a wɔhia akwampaefo pii anaa. Anaasɛ obetumi akyerɛw akɔ Betel akobisa baabi a wɔhia adawurubɔfo pii. e

16. Awerɛhyem bɛn na yebetumi anya?

¹⁶ Sɛnea yɛahu no, yebetumi anya awerɛhyem sɛ, esiane sɛ Yehowa dɔ yɛn nti, bere nyinaa obebua yɛn mpaebɔ wɔ ɔkwan a ɛfata so. (Dw. 4:3; Yes. 30:18) Ɛtɔ da a, mmuae a yɛrehwehwɛ no, ebia ɛnyɛ ɛno na yebenya. Nanso Yehowa rensisiw n’aso wɔ yɛn mpaebɔ ho da. Ɔdɔ yɛn paa, na ɔrennyaw yɛn da. (Dw. 9:10) Enti kɔ so ‘fa wo ho to no so daa,’ na ka wo koma mu asɛm kyerɛ no wɔ mpaebɔ mu.—Dw. 62:8.