1-2. (a) Dɛn na aban a ɛwɔ hɔ no bi ayɛ de akyerɛ sɛ wɔsɔre tia Yehowa nkurɔfo, nanso dɛn na Yehowa nkurɔfo yɛ wɔ ho? (b) Adɛn nti na wɔtan yɛn ani mpo a, yɛn ani betumi agye? (Ka mfoni a ɛwɔ Ɔwɛn-Aban yi anim no nso ho asɛm.)

 YƐREKASA yi, wokɔ aman bɛboro 30 so a, wɔabara yɛn adwuma no wɔ hɔ, anaa wɔmma yentumi nsom Yehowa sɛnea yɛpɛ. Saa aman no bi so no, atumfoɔ no de yɛn nuanom Kristofo agu afiase. Bɔne bɛn na wɔayɛ? Yehowa ani so de, wɔnyɛɛ bɔne biara. Wɔn bɔne ara ne sɛ, wɔakenkan Bible, wɔaka wɔn gyidi ho asɛm akyerɛ afoforo, na wɔne wɔn nuanom Kristofo ahyiam asom Yehowa. Afei nso, wɔasi wɔn bo sɛ wɔrenyɛ amanyɔsɛm. Ɛmfa ho sɛ wɔretan Onyankopɔn asomfo anokwafo yi ani no, wɔkɔ so ma wɔn abrabɔ di mu, * kyerɛ sɛ, wɔawe ataa so sɛ ɔsom a wɔde ma Yehowa no, wɔremma biribiara nsɛe no. Wei ma wɔn ani gye paa!

² Adansefo a wɔwɔ akokoduru yi, ebia woahu wɔn mu bi mfoni pɛn, na wuhui sɛ wɔn ani agye. Nea enti a wɔn ani agye ne sɛ, wonim sɛ Yehowa gye wɔn tom, efisɛ wɔn abrabɔ di mu wɔ n’ani so. (1 Be. 29:17a) Yesu kaa sɛ: “Anigye ne wɔn a trenee nti wɔtan wɔn ani . . . Momma mo ani  nnye na munni ahurusi, efisɛ mo akatua so.”—Mat. 5:10-12.

3. Sɛnea Asomafo Nnwuma 4:19, 20 ma yehu no, bere a wɔtan asomafo no ani no, dɛn na wɔyɛe, na adɛn ntia?

³ Ɛnnɛ, sɛnea wɔretan yɛn nuanom ani no, saa ara na wɔtan asomafo no nso ani bere a wɔkaa Yesu ho asɛm no. Yudafo Asɛnnibea Kɛse no atemmufo no, mpɛn pii no, “wɔka kyerɛɛ [asomafo no] denneennen sɛ wɔnnka biribiara wɔ Yesu din mu.” (Aso. 4:18; 5:27, 28, 40) Dɛn na asomafo no yɛe? (Kenkan Asomafo Nnwuma 4:19, 20.) Ná wonim sɛ obi a ɔwɔ tumi sen atemmufo no na ‘ahyɛ wɔn sɛ wɔmmɔ dawuru, na wonni Kristo ho adanse frenkyemm nkyerɛ ɔman no.’ (Aso. 10:42) Enti Petro ne Yohane a na wɔyɛ asomafo no ananmusifo no de akokoduru kaa sɛ, wobetie Onyankopɔn na ɛnyɛ saa atemmufo no. Afei nso, wɔkaa sɛ wɔrennyae Yesu ho asɛm ka. Ná ɛte sɛ nea wɔrebisa atemmufo no sɛ, ‘Mopɛ sɛ mokyerɛ sɛ mo mmara korɔn sen Onyankopɔn de anaa?’

4. Sɛnea Asomafo Nnwuma 5:27-29 kyerɛ no, ɛsa bɛn na asomafo no atwa ato hɔ ama nokware Kristofo nyinaa, na yɛbɛyɛ dɛn asuasua wɔn?

⁴ Asomafo no atwa sa pa ato hɔ a nokware Kristofo nyinaa adi akyi fi saa bere no. Ɛne sɛ, “Onyankopɔn ne sodifo a ɛsɛ sɛ yetie no, na ɛnyɛ nnipa.” (Kenkan Asomafo Nnwuma 5:27-29.) Asomafo no nokwaredi nti, wɔhwee wɔn, na ‘wɔde anigye pue fii Yudafo Asɛnnibea Kɛse no anim kɔe, efisɛ wobuu wɔn sɛ Yesu din nti, wɔfata sɛ wogu wɔn anim ase,’ na wɔkɔɔ so kaa asɛmpa no.—Aso. 5:40-42.

5. Nsɛmmisa bɛn na ɛsɛ sɛ yenya ho mmuae?

⁵ Nhwɛso a asomafo no yɛe no ma nsɛmmisa bi ba yɛn adwenem. Ebi ne sɛ, gyinae a wosii sɛ wobetie Onyankopɔn na ɛnyɛ nnipa no, ɛyɛɛ dɛn na wotumi yɛɛ saa, na bere koro no ara nso, Bible mu asɛm a ɛka sɛ ‘mommrɛ mo ho ase nhyɛ atumfoɔ a wɔkorɔn no ase’ no,  wotumi dii so? (Rom. 13:1) Yɛbɛyɛ dɛn ‘ayɛ osetie ama aban ne tumidi’ sɛnea ɔsomafo Paul kae no, na bere koro no ara nso Onyankopɔn a ɔno ne yɛn sodifo no, yɛama yɛn abrabɔ adi mu wɔ n’ani so?—Tito 3:1.

6. (a) Henanom ne “atumfo a wɔkorɔn” a Romafo 13:1 ka wɔn ho asɛm no, na asɛde bɛn na yɛwɔ wɔ wɔn anim? (b) Tumi a atumfoɔ nyinaa wɔ no, dɛn na ɛsɛ sɛ yɛhyɛ no nsow wɔ ho?

⁶ Kenkan Romafo 13:1. Kyerɛwsɛm yi mu no, asɛm “atumfo a wɔkorɔn” no gyina hɔ ma nnipa aban a ɛwɔ tumi wɔ nkurɔfo so no. Ɛsɛ sɛ Kristofo brɛ wɔn ho ase ma saa atumfoɔ yi. Atumfoɔ yi hwɛ sɛ asomdwoe bɛba ɔman mu, mmara bɛyɛ adwuma, na ɛtɔ da mpo a, wotumi twitwa gye Yehowa nkurɔfo. (Adi. 12:16) Ɛno nti, tow ne sika a wɔpɛ sɛ yetua ma wɔn no, ɛsɛ sɛ yetua. Afei nso ɛsɛ sɛ yesuro wɔn, na nidi a ɛsɛ fata wɔn no, yɛde ma wɔn. (Rom. 13:7) Nanso ɛsɛ sɛ yɛkae sɛ tumi a saa atumfoɔ yi wɔ no, Yehowa na ama kwan. Bere a Yesu gyina Roma Amrado Pontio Pilato anim a ɔrebisabisa no nsɛm no, nea Yesu kae no ma yehu sɛ nea yɛreka yi yɛ nokware. Pilato ka kyerɛɛ Yesu sɛ ɔwɔ tumi sɛ ogyaa no, anaa ɔma wokum no. Ɔkaa saa no, Yesu ka kyerɛɛ no sɛ: “Sɛ wɔamma wo kwan amfi soro a, anka worennya me so tumi biara.” (Yoh. 19:11) Wei ma yehu sɛ na Pilato tumi wɔ baabi a ɛkɔpem. Ɛnnɛ nso, tumi a atumfoɔ ne amanyɔfo nyinaa wɔ no, ɛwɔ baabi a ɛkɔpem.

7. Nneɛma bɛn mu na ɛnsɛ sɛ yetie atumfoɔ no, na dɛn na ɛsɛ sɛ wohu?

⁷ Mmara a aban bɛhyɛ a entia Onyankopɔn mmara no, Kristofo di so. Nanso sɛ aban no pɛ sɛ yɛyɛ biribi a Onyankopɔn abara, anaa nea Onyankopɔn pɛ sɛ yɛyɛ no, aban no bara yɛn a, ɛnsɛ sɛ yetie. Sɛ yɛbɛyɛ nhwɛso a, ebia aban no bɛhyɛ sɛ mmerante nkɔ sraadi nkɔko mma wɔn man. * Anaa ebia wɔbɛbara yɛn Bible ne asafo nhoma ahorow, na wɔahyɛ mmara sɛ mma yɛnnka asɛm no, na mma yennhyiam nnsom nso. Sɛ atumfoɔ no tra hyeɛ, na wɔtan Kristo asuafo ani a, Onyankopɔn ne wɔn wɔ bi ka. Yehowa ani tua biribiara!—Ɔsɛnk. 5:8.

8. Nsonsonoe bɛn na ɛwɔ obi a ‘ɔkorɔn’ ne obi a ɔyɛ “opumpuni” ntam, na adɛn nti na ɛho hia sɛ yehu?

⁸ Yɛka sɛ obi “korɔn” a, ɛkyerɛ sɛ ɔyɛ nipa titiriw, anaasɛ ɔwɔ tumi paa, nanso ɛnkyerɛ sɛ ɔkyɛn obiara. Obi yɛ “opumpuni” mmom a, na ɛkyerɛ saa. Ɛwom sɛ Bible frɛ nnipa aban “atumfo a wɔkorɔn,” nanso obi wɔ hɔ a ɔwɔ tumi sen wɔn nyinaa; ɔno ne opumpuni no. Wohwɛ Bible mu a, mpɛn nnan na wɔde abodin “Opumpuni no” frɛ Yehowa Nyankopɔn.—Dan. 7:18, 22, 25, 27.

9. Dɛn na odiyifo Daniel hui wɔ anisoadehu mu?

⁹ Odiyifo Daniel nyaa anisoadehu a ɛma ɛda adi pefee sɛ Yehowa wɔ tumi sen atumfoɔ a aka nyinaa. Daniel dii kan huu mmoa akɛse nnan a wogyina hɔ ma wiase tumidi a atwam ne nea ɛwɔ hɔ. Ɛno ne: Babilon, Medo-Persia, Greece, Roma ne Anglo-Amerika a ɛwɔ hɔ nnɛ a efi Roma mu bae no. (Dan. 7:1-3, 17) Afei Daniel hui sɛ Yehowa Nyankopɔn te n’ahengua so wɔ ɔsoro abaguafo mu. (Dan. 7:9, 10) Nea edi hɔ a odiyifo nokwafo no hui no,  ɛsɛ sɛ ɛyɛ kɔkɔbɔ ma atumfoɔ a ɛwɔ hɔ nnɛ no.

10. Sɛnea Daniel 7:13, 14, 27 kyerɛ no, henanom na Yehowa de asaase so tumi maa wɔn, na dɛn na wei ma yehu fa ne ho?

¹⁰ Kenkan Daniel 7:13, 14, 27. Onyankopɔn gyee tumi a nnipa aban wɔ nyinaa fii wɔn nsam, na ɔde maa nkurɔfo a wɔfata na wɔwɔ tumi sen wɔn. Henanom na ɔde maa wɔn? Ɔde maa “obi a ɔte sɛ onipa ba,” kyerɛ sɛ Yesu Kristo, ne “Opumpuni no akronkronfo no,” kyerɛ sɛ 144,000 a wobedi ade “daa daa” no. (Dan. 7:18) Wei ma yehu pefee sɛ, Yehowa ne “Opumpuni no,” efisɛ ɔno nko ara na ɔwɔ tumi a obetumi de ayɛ saa.

11. Dɛn bio na Daniel kyerɛwee a ɛma yehu sɛ Yehowa wɔ tumi wɔ aman nyinaa so?

¹¹ Nea Daniel hui wɔ anisoadehu mu no, ɛne asɛm bi a na wadi kan aka hyia. Daniel kaa sɛ: “Ɔsoro Nyankopɔn no . . . , otu ahene na osi ahene.” Ɔsan kyerɛwee sɛ: “Ɔsorosoroni no na odi nnipa ahenni so tumi, na ɔde ma obiara a ɔpɛ.” (Dan. 2:19-21; 4:17) Wohwɛ abakɔsɛm mu a, Yehowa atu nkurɔfo ade so, na ɔde nkurɔfo asi agua so pɛn anaa? Yiw!

12. Ma nhwɛso a ɛkyerɛ sɛnea Yehowa tuu ahemfo ade so tete no. (Hwɛ mfoni no.)

¹² Yehowa ama ada adi pefee sɛ ɔwɔ “atumfo a wɔkorɔn” no so tumi paa. Momma yɛnhwɛ ɛho nhwɛso mmiɛnsa. Egypt hene Farao de Yehowa nkurɔfo yɛɛ nkoa, na opirim ne koma mpɛn pii sɛ ɔrennyaa wɔn. Nanso Onyankopɔn gyee ne nkurɔfo no, na ɔmaa Po Kɔkɔɔ no faa Farao. (Ex. 14:26-28; Dw. 136:15) Babilon hene Belsasar too pon, na ‘ɔmaa ne ho so tiaa Ɔsoro Wura no,’ na ‘ɔkamfoo anyame a wɔde dwetɛ ne sika kɔkɔɔ ayɛ’ sen sɛ ɔbɛkamfo Yehowa. (Dan. 5:22, 23) Nanso Onyankopɔn brɛɛ saa ɔhantanfo no ase. “Saa anadwo no ara,” wokum Belsasar na wɔde n’ahenni no maa Mediafo ne Persiafo. (Dan. 5:28, 30, 31) Palestina hene Herode Agripa I ma wokum ɔsomafo Yakobo, na ɔde ɔsomafo Petro nso too afiase, a na adwene no ne sɛ obekum no. Nanso Yehowa amma Herode nsusuwii no amma mu. “Yehowa bɔfo bɔɔ no,” na owui.—Aso. 12:1-5, 21-23.

13. Ma nhwɛso a ɛkyerɛ sɛnea Yehowa dii ahemfo bi a wɔkaa wɔn ntama bɔɔ ano so nkonim.

 ¹³ Sɛ ahemfo ka wɔn ntama bɔ ano mpo a, Yehowa ama yɛahu sɛ ɔwɔ wɔn so tumi. Ɔko maa Israelfo no, na Kaananfo ahemfo 31 a wɔkaa wɔn ntama bɔɔ ano no, ɔboaa Israelfo no ma wodii wɔn so. Afei nso, ɔboaa Israelfo no ma wɔko faa Bɔhyɛ Asaase no fã kɛse no ara. (Yos. 11:4-6, 20; 12:1, 7, 24) Bio nso, Ɔhene Ben-Hadad ne Siria ahemfo 32 a wɔne Israelfo koe no, Yehowa maa Israelfo no yɛɛ wɔn pasaa.—1 Ahe. 20:1, 26-29.

14-15. (a) Dɛn na Ɔhene Nebukadnesar ne Ɔhene Dario ka faa Yehowa tumidi ho? (b) Dɛn na odwontofo no ka faa Yehowa ne ne man ho?

¹⁴ Yehowa ama ada adi mpɛn pii sɛ ɔno ne Opumpuni no! Bere a Babilon hene Nebukadnesar de ‘ɔno ara n’ahoɔden, ne tumi, ne n’anuonyam’ hoahoaa ne ho, na wammrɛ ne ho ase annye antom sɛ Yehowa na ɔfata ayeyi no, Yehowa ma ɔbɔɔ dam. Bere a Nebukadnesar adwene san baa fie no, ‘oyii Ɔsorosoroni no ayɛ,’ na ogye toom sɛ Yehowa “tumi yɛ tumi a ɛwɔ hɔ daa.” Ɔde kaa ho sɛ: “Obiara nni hɔ a obetumi asiw no kwan.” (Dan. 4:30, 33-35) Bere a Daniel hyiaa nokware a obedi ama Onyankopɔn no ho sɔhwɛ, na Yehowa gyee no fii agyata amena mu no, Ɔhene Dario kaa sɛ: “Obiara ho mpopo na onsuro Daniel Nyankopɔn no. Efisɛ ɔno ne Onyankopɔn teasefo no, na ɔte hɔ daa. N’ahenni rensɛe da, na ne tumidi wɔ hɔ daa.”—Dan. 6:7-10, 19-22, 26, 27, ase hɔ asɛm.

¹⁵ Odwontofo no kaa sɛ: “Amanaman no tu agyina a, Yehowa bɔ gu; sɛ aman no fa adwene a, ɔma ɛyɛ kwa.” Ɔde kaa ho sɛ: “Anigye ne ɔman a wɔn Nyankopɔn ne Yehowa; nnipa a wapaw wɔn sɛ n’agyapade.” (Dw. 33:10, 12.) Wei ma yehu sɛ yɛwɔ nnyinaso pa bi nti a ɛsɛ sɛ yɛkɔ so di nokware ma Yehowa!

16. Ahotoso bɛn na yebetumi anya bere a “ahohiahia kɛse” no aba, na adɛn ntia? (Hwɛ mfoni no.)

¹⁶ Nneɛma a Yehowa yɛe tete no, yɛakenkan ho asɛm. Ɛnde, dɛn na yebetumi ahwɛ kwan nnansa yi ara? Yebetumi anya ahotoso sɛ “ahohiahia kɛse” a ɛreba no, Yehowa begye n’asomfo anokwafo. (Mat. 24:21; Dan. 12:1) Aman bi a wɔaka wɔn ho abom a wɔfrɛ wɔn Gog a ofi Magog no, sɛ ɔde anibere tow hyɛ Yehowa asomfo anokwafo a wɔwɔ wiase nyinaa no so a, Yehowa begye wɔn. Aman bi a wɔbɛka wɔn ho abom no, sɛ aman 193 a ɛwɔ Amanaman Nkabom no mu nyinaa ka ho mpo a, wɔrentumi nnyina Opumpuni no ne ne soro asafodɔm no anim ketekete mpo! Yehowa ahyɛ bɔ sɛ: “Mɛhyɛ me ho anuonyam na matew me din ho, na mɛda me ho adi wɔ aman pii anim ma wɔahu sɛ mene Yehowa.”—Hes. 38:14-16, 23; Dw. 46:10.

17. Dɛn na Bible ka sɛ ɛbɛto asaase so ahemfo, na wɔn a wɔn abrabɔ di mu wɔ Yehowa ani so no nso, dɛn na wobenya?

¹⁷ Sɛ Gog tow hyɛ Yehowa asomfo so a, ɛno na ɛbɛkɔ akɔtwe Yehowa da kɛse no mu ko a ɛne Armagedon no aba. Saa ko no mu na Yehowa bɛsɛe “asaase nyinaa so ahemfo” no. (Adi. 16:14, 16; 19:19-21) Nanso, “atreneefo nko ara na wɔbɛtena asaase so, na wɔn a wɔn abrabɔ di mu na wɔbɛka so.”—Mmeb. 2:21, ase hɔ asɛm.

18. Dɛn na nokware Kristofo pii afi wɔn pɛ mu ayɛ, na adɛn ntia? (Daniel 3:28)

¹⁸ Efi tete nyinaa, ɔdɔ a nokware Kristofo wɔ ma Yehowa a ɔne Amansan Hene no nti, wɔn mu pii ahwere wɔn ahofadi na wɔde wɔn nkwa mpo ato asiane mu. Wɔkɔ so di Yehowa nokware; wɔte sɛ Hebrifo mmiɛnsa a wodii Opumpuni no nokware no. Ɛwom sɛ wɔde wɔn guu fononoo a ogya redɛw wom mu, nanso Opumpuni no twitwa gyee wɔn.—Kenkan Daniel 3:28.

19. Dɛn na Yehowa begyina so abu ne nkurɔfo atɛn, na dɛn na ɛsɛ sɛ yɛyɛ?

¹⁹ Odwontofo Dawid kaa sɛ ɛho hia paa sɛ yɛkɔ so di Onyankopɔn nokware. Ɔkyerɛwee sɛ: “Yehowa bebu aman atɛn. O Yehowa, sɛnea me trenee te ne sɛnea m’abrabɔ di mu no, hwɛ ho bu me atɛn.” (Dw. 7:8) Dawid san kyerɛwee sɛ: “Ma abrabɔ a edi mu ne trenee mmɔ me ho ban.” (Dw. 25:21) Ɔkwan a edi mu a yɛbɛfa so abɔ yɛn bra ne sɛ yɛbɛkɔ so adi Yehowa nokware. Ɛmfa ho nea ebesi biara no, yɛrennan yɛn akyi nkyerɛ no da! Ɛba saa a, yɛbɛte nka te sɛ odwontofo no. Ɔkyerɛwee sɛ: “Anigye ne wɔn a wɔn abrabɔ di mu na wɔde Yehowa mmara yɛ adwuma.”—Dw. 119:1, ase hɔ asɛm.