1. Anidaso bɛn na Yehowa de ama yɛn?

 YEHOWA ama yɛn anidaso nwanwaso bi; ɛno ne daa nkwa. Ebinom wɔ anidaso sɛ wɔbɛtena ase daa wɔ soro; wɔbɛyɛ honhom abɔde a wɔrenwu da. (1 Kor. 15:50, 53) Nanso, nnipa dodow no ara wɔ anidaso sɛ wɔbɛtena asaase so daa; wɔn ani begye na wobenya apɔwmuden a edi mu. (Adi. 21:3, 4) Sɛ yɛhwɛ kwan sɛ yɛbɛtena ase daa wɔ soro oo, asaase so oo, yɛn anidaso no som bo ma yɛn.

2. Dɛn na yɛn anidaso gyina so, na adɛn nti na yɛreka saa?

² Sɛ Bible ka “anidaso” a, ebetumi akyerɛ “nneɛma pa a obi rehwɛ kwan.” Daakye ho anidaso a yɛwɔ no, ke ara ne ke, ɛbɛbam, efisɛ efi Yehowa hɔ. (Rom. 15:13) Yenim nea wahyɛ ho bɔ no, na yenim nso sɛ odi ne bɔhyɛ so bere nyinaa. (Num. 23:19) Biribiara a Yehowa aka no, yɛwɔ awerɛhyem paa sɛ ɔwɔ ɔpɛ ne tumi a ɔde bɛyɛ. Enti yɛn anidaso no nyɛ nsusuwii hunu anaa adaeso; egyina adanse a edi mu so.

3. Dɛn na yebesusuw ho wɔ adesua yi mu? (Dwom 27:14)

³ Yɛn soro Agya no dɔ yɛn, na ɔpɛ sɛ yɛde yɛn ho to no so. (Kenkan Dwom 27:14.) Sɛ yɛwɔ ahotoso kɛse wɔ Yehowa mu, na yegye di sɛ yɛn anidaso no bɛbam a, yebetumi de akokoduru ne anigye agyina sɔhwɛ biara a yebehyia ano. Momma yɛnhwɛ sɛnea anidaso a yɛwɔ no bɔ yɛn ho ban. Yebedi kan ahwɛ nea enti a Bible de anidaso toto sɛkyɛ ne dade kyɛw ho. Ɛno akyi no, yɛbɛhwɛ sɛnea yɛbɛhyɛ yɛn anidaso mu den.

4. Adɛn nti na anidaso te sɛ sɛkyɛ? (Hebrifo 6:19)

⁴ Krataa a ɔsomafo Paul kyerɛw kɔmaa Hebrifo no mu no, ɔde anidaso a yɛwɔ no totoo sɛkyɛ ho. (Kenkan Hebrifo 6:19.) Ná Paul taa fa po so tu kwan, enti na onim sɛ sɛkyɛ na ɛboa po so hyɛn ma egyina faako. Bere bi, na ɔte po so hyɛn mu retu kwan, ɛnna ahum kɛse bi tui. Ahum no retu no, ohui sɛ hyɛn no mu adwumayɛfo retotow sɛkyɛ gu po no mu sɛnea ɛbɛyɛ a mframa rentwe hyɛn no nkɔpem abotan a etintim nsu no mu no. (Aso. 27:29, 39-41) Sɛnea sɛkyɛ boa ma po so hyɛn gyina faako no, saa ara na yɛn anidaso no nso ma yegyina pintinn. Ɛno nti, sɛ yehyia sɔhwɛ a ɛte sɛ ahum mpo a, yɛntwe yɛn ho mfi Yehowa ho. Anidaso a yɛwɔ no boa yɛn, na yɛn ani so antan yɛn, efisɛ yɛwɔ awerɛhyem sɛ ɛrenkyɛ koraa, mmere pa bɛba. Kae sɛ, Yesu bɔɔ kɔkɔ sɛ nkurɔfo bɛtan yɛn ani. (Yoh. 15:20) Enti, daakye ho anidaso a yɛwɔ no, sɛ yedwinnwen ho a, ɛbɛboa yɛn ama yɛakɔ so asom Yehowa.

5. Bere a na Yesu nim sɛ obewu no, sɛn na anidaso boaa no?

⁵ Momma yɛnhwɛ sɛnea anidaso boaa Yesu ma ogyinaa pintinn, ɛmfa ho sɛ na onim sɛ wobekum no yayaayaw no. Pentekoste afe 33 Y.B. no, ɔsomafo Petro faa nkɔmhyɛ bi a ɛwɔ Nnwom nhoma no mu asɛm kae. Ɛma yehu sɛnea na Yesu benya ahotoso na ɔremmɔ hu. Ɛhɔ ka sɛ: “Mɛtena anidaso mu; efisɛ worennyaw me wɔ Ɔdamoa mu, na woremma nea odi nokware ma wo no mporɔw. . . . Wobɛma manya anigye kɛse wɔ w’anim.” (Aso. 2:25-28; Dw. 16:8-11) Ɛwom sɛ na Yesu nim sɛ obewu, nanso na ɔwɔ anidaso paa sɛ Onyankopɔn benyan no, na ɔde anigye asan akɔka n’Agya ho wɔ soro.—Heb. 12:2, 3.

6. Dɛn na onua bi ka faa anidaso ho?

⁶ Anidaso a yɛwɔ no aboa anuanom pii ama wɔatumi agyina sɔhwɛ ano. Momma yɛnhwɛ onua nokwafo Leonard Chinn a na ɔte England no. Wiase Ko a Edi Kan no rekɔ so no, esiane sɛ wankɔ sraadi nti, wɔde no too afiase. Abosome mmienu de, wɔde ɔno nko ara hyɛɛ afiase dan no baako mu. Ɛno akyi no, wɔma ɔkɔyɛɛ adwumaden. Akyiri yi ɔkyerɛwee sɛ: “Nea mefaa mu no ma mihui sɛ yehia anidaso na yɛatumi agyina sɔhwɛ ano. Yɛwɔ Yesu, asomafo no ne adiyifo no nhwɛso. Afei nso, yɛwɔ bɔhyɛ ahorow a ɛwɔ Bible mu no. Wei nyinaa ma yenya daakye ho anidaso a edi mu, na ɛhyɛ yɛn den ma yetumi gyina sɔhwɛ ano.” Ná anidaso te sɛ sɛkyɛ ma Leonard, na yɛn nso, ebetumi ayɛ saa ara ama yɛn.

7. Sɛn na sɔhwɛ hyɛ yɛn anidaso mu den? (Romafo 5:3-5; Yakobo 1:12)

⁷ Sɛ yehyia sɔhwɛ na Yehowa boa yɛn ma yetumi gyina ano a, ɛma yehu sɛ wagye yɛn atom. Wei hyɛ yɛn anidaso no mu den. (Kenkan Romafo 5:3-5; Yakobo 1:12.) Wei kyerɛ sɛ, seesei yɛn anidaso no mu ayɛ den sen bere a yɛtee asɛmpa no foforo no. Satan pɛ sɛ sɔhwɛ a yehyia no mene yɛn, nanso Yehowa bɛboa yɛn ma yɛatumi agyina emu biara ano.

8. Adɛn nti na anidaso te sɛ dade kyɛw? (1 Tesalonikafo 5:8)

⁸ Bible no san de anidaso a yɛwɔ no toto dade kyɛw ho. (Kenkan 1 Tesalonikafo 5:8.) Ɔsraani hyɛ dade kyɛw de bɔ ne ti ho ban sɛnea ɛbɛyɛ a atamfo akode no bi nkɔbɔ ne ti. Yɛn nso, ɔko a  yɛne Satan reko no, ehia sɛ yɛbɔ yɛn adwene ho ban na wannya yɛn. Ɔde sɔhwɛ bebree ne nneɛma foforo taataa yɛn sɛnea ɛbɛyɛ a ɔbɛsɛe yɛn adwene. Sɛnea dade kyɛw bɔ ɔsraani ti ho ban no, saa ara na yɛn anidaso nso bɔ yɛn adwene ho ban sɛnea ɛbɛyɛ a yɛbɛkɔ so adi Yehowa nokware.

9. Sɛ nkurɔfo nni anidaso a, dɛn na ɛde ba?

⁹ Daa nkwa ho anidaso a yɛwɔ no bɛboa yɛn ma yɛde nyansa ne nhumu abɔ yɛn bra. Nanso, sɛ yɛn anidaso tɔ ape, na yɛma wiase nsusuwii fa yɛn adwene dommum a, ebetumi apia daa nkwa ho anidaso a yɛwɔ no ato nkyɛn. Momma yɛnhwɛ tete Kristofo bi a na wɔte Korinto. Onyankopɔn bɔhyɛ titiriw baako a ɛne owusɔre anidaso no, eduu baabi no, na wonni mu gyidi bio. (1 Kor. 15:12) Paul kaa sɛ, nnipa a wonni daakye ho anidaso no, nea wobenya no nnɛ nko ara na wodwen ho. (1 Kor. 15:32) Ɛnnɛ, nnipa pii nni Onyankopɔn bɔhyɛ mu anidaso. Enti, nea ɛbɛma wɔn ani agye nnɛ nko ara na wɔatu di akyi. Nanso yɛn de, Onyankopɔn bɔhyɛ na yɛde yɛn werɛ ahyem. Yɛn anidaso no te sɛ dade kyɛw a ɛbɔ yɛn adwene ho ban, na ɛmma yenni yɛn akɔnnɔ akyi nkɔyɛ biribi a ɛbɛsɛe yɛne Yehowa ntam.—1 Kor. 15:33, 34.

10. Sɛn na anidaso betumi abɔ yɛn ho ban afi adwene a ɛmfata ho?

¹⁰ Adwene a ɛmfata a ɛne sɛ mfaso biara nni so sɛ yɛbɛsɔ Yehowa ani no, yɛn anidaso a ɛte sɛ dade kyɛw no betumi abɔ yɛn ho ban afi ho. Sɛ yɛbɛyɛ nhwɛso a, ebinom betumi anya adwene sɛ: ‘Metwe me mu tann a, minnye nni sɛ metumi aka wɔn a ɛbɛtena ase daa no ho. Merentumi nyɛ adepa biara. Merentumi nni Onyankopɔn mmara so da.’ Kae sɛ bere a gyamsereni Elifas kɔe sɛ ɔrekɔkyekye Hiob werɛ no, biribi a ɛte saa na ɔkae. Elifas kaa sɛ: “Ɛbɛyɛ dɛn na onipa dasani ho atew?” Afei ɔkaa Onyankopɔn nso ho asɛm sɛ: “Hwɛ! N’akronkronfo koraa, onnye wɔn nni, na ɔsoro mpo, ɛho ntew wɔ n’ani so.” (Hiob 15:14, 15) Wo ara hwɛ atosɛm a ɛte saa! Kae sɛ Satan na ɔpɛ sɛ wunya saa adwene no. Onim sɛ, sɛ woma kwan ma saa nsusuwii no nya wo so tumi a, w’anidaso bɛsa. Enti po saa atosɛm no na fa w’adwene si Yehowa bɔhyɛ so. Mma w’adwene mu nnyɛ wo naa da sɛ Yehowa pɛ sɛ wotena ase daa, na ɔbɛboa wo ma woadu saa botae no ho.—1 Tim. 2:3, 4.

11. Bere a yɛretwɛn ama yɛn anidaso no aba mu no, adɛn nti na ɛsɛ sɛ yenya abotare?

¹¹ Ɛnyɛ bere nyinaa na ɛyɛ mmerɛw sɛ yɛbɛhyɛ yɛn anidaso mu den. Ebia yɛbɛte nka sɛ Onyankopɔn rekyɛ wɔ ne bɔhyɛ ho. Nanso kae sɛ, sɛnea yebu bere no, ɛnyɛ saa na Yehowa bu no, efisɛ ɔno de, ɔwɔ hɔ daa. (2 Pet. 3:8, 9) Nea wabɔ ne tirim sɛ ɔbɛyɛ no, ɔbɛyɛ no ɔkwan a ɛfata paa so, nanso ebia ɔrenyɛ no bere a yɛhwɛ kwan. Dɛn na ɛbɛboa yɛn ma yɛahyɛ yɛn anidaso mu den, bere a yɛde ntoboase retwɛn ama Onyankopɔn bɔhyɛ abam no?—Yak. 5:7, 8.

12. Sɛnea Hebrifo 11:1, 6 ma yehu no, twaka bɛn na anidaso ne gyidi wɔ?

¹² Yehowa na ɔbɛma yɛn anidaso abam. Enti sɛ yɛkɔ so bata ne ho a, ɛbɛma yɛahyɛ yɛn anidaso mu den. Nokwasɛm ne sɛ, Bible ma yehu sɛ anidaso ne gyidi wɔ twaka. Ɛne sɛ, yebetumi anya anidaso a, ɛsɛ sɛ yegye di sɛ Yehowa wɔ hɔ, “na ɔyɛ wɔn a wɔn ani abere rehwehwɛ no no katuafo.” (Kenkan Hebrifo 11:1, 6.) Sɛ  yegye di paa sɛ Yehowa wɔ hɔ a, yebenya awerɛhyem a emu yɛ den sɛ ne bɔhyɛ biara bɛba mu. Ayɔnkofa a yɛne Yehowa wɔ no, momma yɛnhwɛ nneɛma pɔtee bi a yebetumi ayɛ de ahyɛ mu den. Yɛyɛ saa a, ɛbɛhyɛ yɛn anidaso mu den.

13. Yɛbɛyɛ dɛn abɛn Onyankopɔn?

¹³ Bɔ Yehowa mpae, na kenkan n’Asɛm. Ɛwom sɛ yenhu Yehowa, nanso yebetumi abɛn no. Yebetumi abɔ no mpae, a yɛwɔ awerɛhyem sɛ obetie yɛn. (Yer. 29:11, 12) Sɛ yɛkan Bible na yedwinnwen ho a, ɛkyerɛ sɛ yɛretie Onyankopɔn. Tete no, wɔn a wodii Yehowa nokware no, sɛ yɛkan wɔn ho ade na yehu sɛnea Yehowa hwɛɛ wɔn no a, ɛbɛhyɛ yɛn anidaso mu den paa. Biribiara a ɛwɔ Onyankopɔn Asɛm mu no, “wɔakyerɛw sɛ ɛnkyerɛkyerɛ yɛn, na yɛnam yɛn animia ne Kyerɛwnsɛm no mu awerɛkyekye so anya anidaso.”—Rom. 15:4.

14. Nea Yehowa ayɛ ama afoforo no, adɛn nti na ɛsɛ sɛ yedwinnwen ho?

¹⁴ Sɛnea Yehowa adi ne bɔhyɛ ahorow so no, dwinnwen ho. Yɛnhwɛ nea Yehowa yɛ maa Abraham ne Sara. Ná wɔanyinyin adu baabi a wontumi nwo. Nanso Onyankopɔn hyɛɛ wɔn bɔ sɛ wɔbɛwo. (Gen. 18:10) Bere a Yehowa hyɛɛ wɔn bɔ no, dɛn na Abraham yɛe? Bible ka sɛ: ‘Ogye dii sɛ ɔbɛyɛ aman bebree agya.’ (Rom. 4:18) Ɛwom sɛ nnipa ani so no, na anidaso asa, nanso na Abraham wɔ ahotoso sɛ Yehowa bedi ne bɔhyɛ so. Ɔbarima nokwafo yi nsa ansi fam. (Rom. 4:19-21) Bible mu nsɛm bi a ɛte sei ma yehu sɛ, sɛ tebea bi sɔre na ɛte sɛ nea anidaso nyinaa asa mpo a, yebetumi de yɛn ho ato Yehowa so bere nyinaa sɛ ɔbɛma ne bɔhyɛ biara aba mu.

15. Nea Onyankopɔn ayɛ ama yɛn no, adɛn nti na ɛsɛ sɛ yedwinnwen ho?

 ¹⁵ Dwinnwen nea Yehowa ayɛ ama wo no ho. Bɔhyɛ ahorow a ɛwɔ Onyankopɔn Asɛm mu a abam no, dwinnwen sɛnea aboa wo no ho. Yɛbɛyɛ nhwɛso a, Yesu hyɛɛ bɔ sɛ n’Agya bɛhwɛ ama wo nsa aka nea wuhia wɔ asetenam. (Mat. 6:32, 33) Yesu asan ama wo awerɛhyem sɛ, sɛ wosrɛ Yehowa sɛ ɔmma wo honhom kronkron a, ɔde bɛma wo. (Luka 11:13) Yehowa adi saa bɔhyɛ no so. Ebia w’ankasa nso wokae biribi a Yehowa ayɛ ama wo de akyerɛ sɛ wadi ne bɔhyɛ so. Ɛho nhwɛso ne sɛ, wahyɛ bɔ sɛ ɔde wo bɔne bɛkyɛ wo, ɔbɛkyekye wo werɛ, na ɔbɛma wo nea wuhia a ɛbɛma woatumi abɛn no. (Mat. 6:14; 24:45; 2 Kor. 1:3) Nea Onyankopɔn ayɛ ama wo dedaw no, sɛ wudwinnwen ho a, ɛbɛma woagye adi paa sɛ, nea waka sɛ ɔbɛyɛ ama wo daakye no nso, ɔbɛyɛ.

16. Adɛn nti na anidaso yɛ akyɛde a ɛsom bo?

¹⁶ Daa nkwa ho anidaso a yɛwɔ no, ɛyɛ akyɛde a ɛsom bo a efi Onyankopɔn hɔ. Yɛrehwɛ daakye papa bi kwan; yenim sɛ ɛdan sɛ boɔ koraa a ɛbɛba. Ɛte sɛ sɛkyɛ. Sɛ yehyia sɔhwɛ, nkurɔfo tan yɛn ani, anaa wɔde owu hunahuna yɛn mpo a, ɛboa yɛn ma yegyina pintinn. Ɛte sɛ dade kyɛw. Ɛbɔ yɛn adwene ho ban sɛnea ɛbɛyɛ a yebekyi bɔne, na yɛabata papa ho. Bible mu anidaso a yɛwɔ no twe yɛn bɛn Onyankopɔn, na ɛma yehu sɛ ɔdɔ yɛn paa. Sɛ yɛhyɛ yɛn anidaso mu den a, ɛboa yɛn paa.

17. Adɛn nti na yɛn anidaso ma yedi ahurusi?

¹⁷ Krataa a ɔsomafo Paul kyerɛw kɔmaa Romafo no mu no, ɔhyɛɛ wɔn nkuran sɛ: “Munni ahurusi wɔ anidaso no mu.” (Rom. 12:12) Ná Paul betumi adi ahurusi, efisɛ na ɔwɔ awerɛhyem sɛ, sɛ ɔkɔ so di nokware a, obenya daa nkwa wɔ soro. Yɛn nso yebetumi adi ahurusi wɔ yɛn anidaso no mu, efisɛ yegye di paa sɛ Yehowa bɛhwɛ ama ne bɔhyɛ nyinaa aba mu. Odwontofo no kyerɛwee sɛ: “Anigye ne onipa a . . . n’anidaso ne Yehowa, ne Nyankopɔn, . . . Ɔno na odi nokware bere nyinaa.”—Dw. 146:5, 6.