1924—Mfe Ɔha a Atwam
JANUARY 1924 Bulletin a no kaa sɛ, “Afe yi ahyɛase yɛ bere pa a obiara a wahyira ne ho so ama Awurade no . . . de bɛhwehwɛ akwan a obetumi afa so atrɛw ne som mu.” Saa afe no, Bible Asuafo no de saa afotu no yɛɛ adwuma wɔ akwan mmienu so. Ɛne sɛ: wɔde akokoduru kaa asɛmpa no, na wɔfaa akwan foforo so kaa asɛmpa no.
WƆFAA RADIO SO KAA ASƐMPA NO
Anuanom a ɛwɔ Betel no de bɛboro afe baako na esii WBBR radio steehyin no wɔ Staten Island, New York City. Wɔdii kan bubuu nnua a ɛwɔ asaase no so no nyinaa. Ɛno akyi no, wɔsii dan kɛse a adwumayɛfo no bɛtena mu, ɛnna wɔsii dan foforo nso a wɔde mfiri no besisi mu. Bere a anuanom wiee saa adwuma no, wɔfii ase hyehyɛɛ mfiri a na ɛbɛma radio steehyin no afi ase ayɛ adwuma. Nanso na nneɛma bi reyɛ ayɛ osiakwan, enti na ɛsɛ sɛ wɔdi ho dwuma ansa.
Ná ɛsɛ sɛ anuanom de nnua mmienu a emu biara tenten yɛ mita 61 (anammɔn 200) sisi hɔ, na atumi akura antenna a ne tenten yɛ mita 91 (anammɔn 300) mu. Ɛno na na ebetumi ama nkurɔfo akyere radio steehyin no, nanso na ɛho adwuma ayɛ den ama anuanom no. Bere a edi kan a wɔyɛe no, anyɛ yiye, nanso ewiee ase no, wɔtumi yɛe efisɛ wɔde wɔn ho too Yehowa so. Calvin Prosser a ɔyɛɛ saa adwuma no bi no kaa sɛ: “Sɛ yetumi yɛɛ saa adwuma no bere a edi kan no ara a, anka yɛbɛhyɛ yɛn ho anuonyam na yɛaka sɛ, ‘Hwɛ adwuma a yɛayɛ!’” Anuanom no de ho ayeyi nyinaa maa Yehowa, nanso na wɔn haw to ntwae.
Nnua atenten mmienu a na ebekura antenna no mu na ama nkurɔfo atumi akyere WBBR steehyin no, yɛde baako resi hɔ
Afei ara na na radio steehyin adwuma no ahyɛ ase, enti na ɛyɛ den sɛ obi benya ɛho mfiri atotɔ. Enti obi de dedaw bi a ɛwɔ hɔ na anuanom no kɔtɔe. Sɛ́ anka wɔbɛkɔ akɔtɔ akasam no, tɛlefon so de bi na wɔde yɛe. Da koro anadwo bi wɔ February mu no, anuanom no kɔsɔɔ mfiri a wɔahyehyɛ no nyinaa hwɛe. Ná ɛsɛ sɛ wɔnya biribi ka wɔ radio steehyin hɔ, enti anuanom no too Ahenni nnwom. Anuanom no mu baako a ne din de Ernest Lowe kaa aseresɛm bi a esii bere a wɔreto nnwom no. Ná Ɔtemmufo Rutherford b wɔ Brooklyn; ná efi hɔ kɔ baabi a radio steehyin no wɔ no bɛyɛ kilomita 25 (akwansin 15). Ná wate nnwom a wɔreto wɔ radio so no, enti ɔfrɛɛ wɔn.
Onua Rutherford kaa sɛ, “Munnyae saa dede no. Moreto nnwom sɛ nnyinammoa a wɔresu!” Anuanom no ani wui, enti ntɛm ara na wɔdum afiri no, nanso na wɔasiesie wɔn ho sɛ wɔbɛyɛ dwumadi a edi kan no.
February 24, 1924 no, bere a wɔhyɛɛ dwumadi a edi kan no ase no, Onua Rutherford hyiraa radio steehyin no so maa “Mesia Ahenni adwuma no.” Ɔkaa sɛ nea enti a wɔyɛɛ radio steehyin no ne sɛ, “ɛbɛboa nkurɔfo ma wɔate Bible no ase ɛmfa ho ɔsom a wɔwom. Afei nso, ɛbɛboa wɔn ma wɔahu sɛ yɛte awiei mmere mu.”
Benkum: Onua Rutherford wɔ studio a yedii kan yɛe no mu
Nifa: Mfiri a na wɔde yɛ adwuma wɔ radio steehyin hɔ
Radio so dwumadi a edi kan no kɔɔ yiye paa. Ahyehyɛde no de WBBR no bɔɔ asɛmpa no dawuru mfe 33.
WƆDE AKOKODURU BƆƆ ASƆFO NO AKYI
July afe 1924 no, Bible Asuafo no yɛɛ nhyiam wɔ Columbus, Ohio. Nkurɔfo fi wiase baabiara baa saa nhyiam no bi. Wɔtiee kasa ahorow wɔ Arabic, Borɔfo, French, German, Greek, Hungary, Italy, Lithuania, Poland, Russia, Scandinavia kasa ahorow, ne Ukraine kasa mu. Wɔyɛɛ dwumadi no bi wɔ radio so, na da biara nea ɛkɔɔ so wɔ nhyiam no ase no, wɔyɛɛ nhyehyɛe maa atesɛm krataa bi a wɔato din Ohio State Journal no bɔɔ ho dawuru.
Afe 1924, nhyiam a yɛyɛe wɔ Columbus, Ohio
Yawda, July 24 no, nhyiamfo no bɛboro 5,000 kɔɔ asɛnka. Wɔmaa nhoma bɛyɛ 30,000, na wɔfii Bible adesua mpempem bebree ase. Ɔwɛn-Aban no kaa sɛ, “na ɛno ne nhyiam no fã a ɛyɛ dɛ paa.”
Fida, July 25 no, biribi titiriw nso kɔɔ so wɔ nhyiam no ase. Onua Rutherford de akokoduru kenkan asɛm bi de bɔɔ asɔfo no akyi paa. Ɔkaa sɛ “Onyankopɔn Ahenni a ɔnam so behyira adasamma no,” amanyɔfo, nyamesom akannifo, ne aguadifo mpanyimfo no “mpɛ sɛ nkurɔfo betie ho asɛmpa no.” Ɔsan kaa sɛ saa mpanyimfo no “agye Amanaman Apam no atom, na wɔkyerɛe sɛ ɛno ne ‘Onyankopɔn Ahenni no sɛso wɔ asaase so.’” Ná Bible Asuafo no behia akokoduru paa na wɔatumi aka saa asɛm no akyerɛ nkurɔfo.
Sɛnea nhyiam no nyaa wɔn a wɔkɔɔ bi no so tumi no, Ɔwɛn-Aban no kaa ho asɛm sɛ: “Bere a Awurade asraafo kakra yi baa Columbus bɛyɛɛ nhyiam no na wɔresan akɔ no, na wɔn gyidi ayɛ den . . . , wɔbenyaa ahoɔden a wɔde bɛko atia ɔsɔretia biara a ɔtamfo no de bɛba wɔn so.” Leo Claus a ɔkɔɔ nhyiam no bi no kaa sɛ: “Yɛrefi nhyiam no ase akɔ no, na yɛn ani agye sɛ asɛm a Onua Rutherford kae no, yɛrekɔka akyerɛ nkurɔfo a ɛwɔ yɛn asaasesin mu.”
Ecclesiastics Indicted kratawa
Nsɛm a Onua Rutherford kae no, akyiri yi wɔyɛɛ no kratawa na wɔtoo din Ecclesiastics Indicted. October mu no, Bible Asuafo no fii ase kyekyɛe. Wɔ kurow ketewa bi a wɔfrɛ no Cleveland a ɛwɔ Oklahoma mu no, Frank Johnson kyekyɛɛ nkratawa no wiei wɔ asaasesin a wɔde maa no no mu. Owiei no, ɔtwɛnee simma 20 ansa na anuanom a aka no rewie wɔn de abehyia no. Wantumi antwɛn wɔ petee mu, efisɛ na wɔn a n’asɛm no ahyɛ wɔn abufuw no rehwehwɛ no. Enti Onua Johnson kɔtetɛw asɔredan bi a na ɛbɛn hɔ mu. Ɔkɔɔ hɔ no, na obiara nni hɔ, enti ɔde Ecclesiastics Indicted no bi hyɛɛ ɔsɔfo no Bible mu, ɛnna ɔde bi nso too akongua biara so. Ɔyɛɛ no ntɛmntɛm, na ofii hɔ. Ná ɔwɔ bere kakra, enti ɔkɔɔ asɔredan mmienu mu kaa ho kɔyɛɛ saa ara.
Frank yɛɛ ntɛm kɔɔ baabi a na ɛsɛ sɛ anuanom no bɛfa no no. Ɔkɔtetɛw pɛtro steehyin bi akyi, na na ɔrehwɛ sɛ mmarima a na wɔrepɛ no akyere no no reba anaa. Ná saa mmarima no tete kar mu, na wɔbetwaam wɔ hɔ a wɔanhu no. Wɔkɔe ara pɛ na anuanom a ɛbɛn hɔ a na wɔne Frank reyɛ asɛnka adwuma no de kar bɛfaa no.
Anuanom no baako kaa sɛ, “yɛrekɔ no, yetwaam wɔ baabi a asɔredan mmiɛnsa no wɔ no. Asɔredan no mu biara, na nnipa bɛyɛ 50 gyinagyina anim. Ná wɔn mu bi rekenkan kratawa no, ɛnna ebinom nso de rekyerɛ ɔsɔfo no. Yɛamfi hɔ ntɛm a, anka asɛm too yɛn! Yɛdaa Yehowa Nyankopɔn ase paa sɛ ɔbɔɔ yɛn ho ban na yetumi kaa Ahenni ho asɛmpa no a atamfo no antumi ankyere yɛn.”
BIBLE ASUAFO NO DE AKOKODURU KAA ASƐMPA NO WƆ AMAN AFOFORO SO
Józef Krett
Aman afoforo so nso, Bible Asuafo no de akokoduru koro no ara bi kaa asɛmpa no. France atifi fam no, Józef Krett kaa asɛmpa no kyerɛɛ Polandfo bi a wɔtu biriw a na wɔatu aba ɔman no mu no. Anuanom yɛɛ nhyehyɛe sɛ ɔmma ɔkasa bi a yɛato din “Wɔbenyan Awufo Nnansa Yi Ara.” Bere a wɔde nsato nkrataa maa nkurɔfo a ɛwɔ kurom hɔ sɛ wɔmmetie ɔkasa no bi no, ɔsɔfo bi a ɔwɔ hɔ bɔɔ n’asɔremma no kɔkɔ sɛ mma wɔnnkɔ. Nanso ankosi hwee. Nnipa bɛboro 5,000 kotiee ɔkasa no bi; na ɔsɔfo no mpo ka ho! Onua Krett ka kyerɛɛ ɔsɔfo no sɛ ɔno nso nkyerɛkyerɛ ne gyidi mu, nanso wanyɛ. Nnipa a Onua Krett maa ɔkasa no kyerɛɛ wɔn no, esiane sɛ na Onyankopɔn Asɛm no ho sukɔm de wɔn nti, nhoma ne nhomawa biara a ɔwɔ no, ɔkyekyɛɛ ne nyinaa maa wɔn.—Amos 8:11.
Claude Brown
Onua bi a ne din de Claude Brown de asɛmpa no kɔɔ Afrika man bi a wɔfrɛ no Gold Coast mu; seesei wɔfrɛ hɔ Ghana. Ɔkasa ahorow a ɔmae ne nhoma a ɔkyekyɛe no boa maa nokware no trɛw ntɛmntɛm wɔ ɔman no mu. John Blankson a saa bere no na ɔresua aborɔfo nnuru ho nimdeɛ no kotiee Onua Brown kasa no baako. Ntɛm ara na ohui sɛ wahu nokware no. John kaa sɛ, “Nokware no a mihui no maa m’ani gyei paa, na obiara a mehu no wɔ sukuu mu hɔ no, na meka bi kyerɛ no.”
John Blankson
Da koro, John kɔɔ Anglikan asɔredan bi mu kobisaa ɔsɔfo no Baasakoro nkyerɛkyerɛ ho asɛm. Saa bere no, na John abɛte ase paa sɛ Baasakoro no yɛ atoro nkyerɛkyerɛ. Ɔsɔfo no pam no fii hɔ, na ɔteɛteɛɛm guu no so sɛ: “Wonyɛ Kristoni; woyɛ Ɔbonsam ba. Fi ha kɔ!”
Bere a John kɔɔ fie no, ɔkyerɛw krataa kɔmaa ɔsɔfo no sɛ wɔnhyia wɔ baabi a nkurɔfo wɔ na ɔnkyerɛkyerɛ Baasakoro no mu. Ɔsɔfo no ka kyerɛɛ John sɛ ɔnkohu ɔkyerɛkyerɛfo panyin a ɔwɔ sukuu mu hɔ no. Ɔkɔe no, ɔkyerɛkyerɛfo no bisaa no sɛ ɔno na ɔkyerɛw saa krataa no kɔmaa ɔsɔfo no anaa.
John buae sɛ, “Yiw, ɛyɛ me a.”
Ɔkyerɛkyerɛfo no ka kyerɛɛ John sɛ ɔnkyerɛw krataa nkɔpa ɔsɔfo no kyɛw. Enti John kyerɛwee sɛ:
“Sir, me kyerɛkyerɛfo se, menkyerɛw krataa mmɛpa wo kyɛw, nanso sɛ wugye tom sɛ wokyerɛkyerɛ atosɛm a, ɛnde mɛkyerɛw krataa no abɛpa wo kyɛw.”
Ɔkyerɛkyerɛfo no ho dwiriw no, na obisaa no sɛ, “Blankson, wei na wopɛ sɛ wokyerɛw?”
“Yiw. Nea metumi akyerɛw ara no no.”
“Yebeyi wo adi. Worentumi nkasa ntia aban sɔfo na wonkɔ so ntena sukuu mu ha.”
“Sir, . . . sɛ wokyerɛ yɛn ade na yɛnte ase a, sɛ ɛyɛ a yebisa ho asɛm?”
“Ampa, ɛyɛ a mubisa.”
“Sir, nea ɛkɔɔ so no no, asɛm kɛkɛ na mibisaa no. Ná owura no rekyerɛkyerɛ yɛn Bible, ɛnna mibisaa no asɛm. Sɛ mabisa no asɛm na wantumi anyi ano a, adɛn nti na ɛsɛ sɛ mekyerɛw krataa kɔpa no kyɛw?”
Wɔanyi Blankson adi, na wankyerɛw krataa biara nso ankɔpa kyɛw.
NÁ BIBLE ASUAFO NO PƐ SƐ WƆYƐ PII
Nea ɛkɔɔ so wɔ afe no mu no, Ɔwɛn-Aban no bɔɔ no mua sɛ: “Asɛm a Dawid kae no, yɛne no yɛ adwene. Ɔkaa sɛ: ‘Wode ahoɔden bɔɔ me so maa akodi.’ (Dwom 18:39, Akuapem Twi Bible, a The Bible Society of Ghana yɛe.) Yɛanya nkuranhyɛ kɛse wɔ afe no mu, efisɛ yɛahu Awurade nsa wɔ adwuma no mu . . . N’asomfo a wahyira wɔn no . . . de anigye reka asɛmpa no.”
Afe no rekɔ n’awiei no, anuanom no yɛɛ nhyehyɛe sɛ wɔbebue radio steehyin no baako aka ho. Enti wɔfii ase yɛɛ radio steehyin foforo ho adwuma wɔ baabi a ɛbɛn Chicago. Wɔtoo radio steehyin foforo yi din ASƐMPA. Mfiri a wɔde yɛɛ adwuma wɔ ha yi de, na ɛwɔ ahoɔden paa. Ná ebetumi aboa ama nkurɔfo a ɛwɔ akyirikyiri te sɛ Canada mpo ate Ahenni ho asɛmpa no.
Afe 1925 no, na hann bi rebɛhyerɛn ama Bible Asuafo no ate Adiyisɛm ti 12 no ase yiye. Ná saa ntease foforo no bɛto ebinom hintidua, nanso, na nnipa bebree begye atom. Saa ntease foforo no, na ɛfa nneɛma a ɛkɔɔ so wɔ soro ne sɛnea ɛkaa Onyankopɔn nkurɔfo wɔ asaase so no ho.
