1. Akyɛde a Yesu de ama yɛn no, ebi ne nea ɛwɔ he?

 ONIPA biara nni hɔ a n’ayamye te sɛ Yesu de no. Bere a ɔwɔ asaase so no, oyii ne yam de tumi a ɔwɔ no yɛɛ anwanwade de boaa afoforo. (Luka 9:​12-17) Akyɛde a ɛso paa a ɔde maa yɛn ne ne nkwa a ɔde too hɔ maa yɛn no. (Yoh. 15:13) Efi bere a Yesu nyan fii awufo mu no, wakɔ so ara ada ayamye adi. Ɔhyɛɛ yɛn bɔ sɛ, ɔbɛsrɛ Yehowa sɛ ɔmma yɛn honhom kronkron sɛnea ɛbɛyɛ a ɛbɛkyerɛkyerɛ yɛn na akyekye yɛn werɛ, na wadi ne bɔhyɛ so. (Yoh. 14:​16, 17, ase hɔ asɛm; 16:13) Afei nso, Yesu nam asafo nhyiam ahorow a yɛyɛ so tete yɛn ma yetumi yɛ asɛnka adwuma no wɔ wiase baabiara.—Mat. 28:​18-20.

2. ‘Nnipa a wɔyɛ akyɛde ma asafo no’ a Efesofo 4:​7, 8 ka wɔn ho asɛm no, wɔne henanom?

² Momma yɛnhwɛ akyɛde foforo a Yesu de ama yɛn. Ɔsomafo Paul kyerɛwee sɛ, bere a Yesu kɔɔ soro no, “ɔde nnipa yɛɛ akyɛde maa asafo no.” (Kenkan Efesofo 4:​7, 8.) Paul kyerɛɛ mu sɛ, Yesu de wɔn mae sɛ akyɛde sɛnea ɛbɛyɛ a wɔbɛboa asafo no wɔ akwan ahorow so. (Efe. 1:​22, 23; 4:​11-13) Ɛnnɛ, ‘nnipa a wɔyɛ akyɛde ma asafo’ yi, wɔn mu bi ne asafo mu asomfo, asafo mu mpanyimfo, ne amansin so ahwɛfo. a Saa mmarima yi tɔ sin, enti wɔdi mfomso. (Yak. 3:2) Nanso, yɛn Awurade Yesu Kristo nam wɔn so boa yɛn; ɔde wɔn akyɛ yɛn.

3. Adwuma a ‘nnipa a wɔyɛ akyɛde’ yi yɛ no, ma nhwɛso fa kyerɛ sɛnea yɛn nyinaa betumi aboa wɔn ma wɔayɛ.

³ Yesu de ahyɛ ‘nnipa a wɔyɛ akyɛde’ yi nsa sɛ wɔnhyɛ asafo no den. (Efe. 4:12) Nanso yɛn a yɛaka nyinaa betumi aboa wɔn  ama wɔayɛ saa adwuma a ɛho hia yi. Yɛbɛyɛ nhwɛso a, sɛ wɔresi Ahenni Asa bi a, ebinom yɛ dan no ho adwuma tee. Afoforo nso noa nnuan ma adwumayɛfo no, na wɔyɛ nneɛma afoforo nso ma wɔn; wɔyɛ saa de boa adwuma no. Saa ara nso na yɛn nyinaa betumi de yɛn kasa ne yɛn nneyɛe aboa asafo mu asomfo, asafo mu mpanyimfo ne amansin so ahwɛfo. Momma yɛnhwɛ sɛnea yenya adwumaden a wɔyɛ no so mfaso, ne nea yebetumi ayɛ de akyerɛ sɛ yɛn ani sɔ nea wɔyɛ no. Afei nso, Yesu a ɔde ‘nnipa a wɔyɛ akyɛde’ yi maa yɛn no, yɛbɛhwɛ nea yebetumi ayɛ de akyerɛ sɛ yɛn ani sɔ nea wayɛ ama yɛn no.

ASAFO MU ASOMFO YƐ “NNWUMA A WƆDE BOA AFOFORO”

4. Tete Kristofo no bere so no, ‘nnwuma a na asafo mu asomfo yɛ de boa afoforo’ no, ebi ne nea ɛwɔ he?

⁴ Tete Kristofo no bere so no, wɔpaw anuanom mmarima no bi sɛ asafo mu asomfo. (1 Tim. 3:8) “Nnwuma a wɔde boa afoforo” a Paul kaa ho asɛm no, ɛbɛyɛ sɛ wɔn na na wɔyɛ. (1 Kor. 12:28) Ɛda adi sɛ, na asafo mu asomfo hwɛ yɛ nnwuma ahorow a ɛho hia wɔ asafo no mu, sɛnea ɛbɛyɛ a asafo mu mpanyimfo no betumi de wɔn adwene asi nkyerɛkyerɛ ne ahwɛfo adwuma no so. Yɛbɛyɛ nhwɛso a, ɛbɛyɛ sɛ asafo mu asomfo boae ma wɔhwɛɛ Kyerɛwnsɛm a na ɛwɔ hɔ no so kyerɛw bi anaa wɔboae ma wɔtotɔɔ nneɛma a na wɔde bɛyɛ saa adwuma no.

5. Ɛnnɛ, nnwuma a asafo mu asomfo yɛ de boa asafo no, ebi ne nea ɛwɔ he?

⁵ Nnwuma a asafo mu asomfo yɛ de boa asafo no, momma yɛnhwɛ emu bi. (1 Pet. 4:10) Wɔtumi ma wɔhwɛ asafo no sikasɛm anaa asaasesin a asafo no yɛ mu adwuma no so. Afei nso, wɔtumi ma wɔkra nhoma ma anuanom. Ɔdio ne video ho nneɛma a wɔde di dwuma nso, wɔtumi ma wɔhwɛ so. Wɔn mu bi tumi yɛ atɛndant anaa wɔboa ma wɔsiesie Ahenni Asa so. Saa nnwuma yi nyinaa ho hia na ama biribiara atumi akɔ so pɛpɛɛpɛ wɔ asafo no mu. (1 Kor. 14:40) Bio nso, asafo mu asomfo no bi yɛ dwumadi wɔ Kristofo Abrabɔ ne Asɛnka Adesua no mu, na wɔma baguam ɔkasa nso. Wɔtumi nso ma asafo mu somfo bi som sɛ kuw sohwɛfo boafo. Ɛtɔ da a, sɛ asafo mu mpanyimfo rekɔsrasra anuanom a, wɔtumi ma asafo mu asomfo a wɔfata ka wɔn ho.

6. Nea enti a yɛn ani sɔ adwumaden a asafo mu asomfo yɛ no, ebi ne sɛn?

⁶ Nnwuma a asomfo yɛ no, sɛn na ɛboa asafo no? Onuawa bi a ne din de Beberly b a ɔwɔ Bolivia ka sɛ: “Asafo mu asomfo adaworoma nti, mitumi nya adesua no so mfaso paa. Nnwuma a wɔyɛ no nti, mitumi to nnwom, ma mmuae, tie ɔkasa ahorow, na mitumi nya video ne mfoni ahorow no so mfaso. Sɛ anuanom ba Ahenni Asa so a, wɔhwɛ bɔ wɔn ho ban, na wɔn a wɔntumi mma Ahenni Asa so no, wɔboa wɔn ma wɔtie adesua no wɔ videoconference so. Yɛpɔn adesua a, wɔdi anim ma yesiesie Ahenni Asa no so. Bio nso, wɔboa ma wɔyi sika a ɛwɔ ntoboa nnaka no mu no, na wɔhwɛ ma yɛn nsa ka nhoma biara a yehia. Sɛ asafo mu asomfo yi nni hɔ a, anka yɛbɛyɛ dɛn?” Leslie te Colombia, na ne kunu yɛ asafo mu panyin. Ɔka sɛ: “Asafo mu asomfo boa me kunu ma odi n’asɛyɛde ahorow ho dwuma. Sɛ ɛnyɛ wɔn a, anka me kunu rennya ne ho atwaye koraa. Nsi ne ahokeka a wɔde yɛ adwuma, ne ahofama a wɔwɔ no, m’ani sɔ paa.” Yegye di paa sɛ, saa ara na wo nso wote nka.—1 Tim. 3:13.

7. Dɛn na yebetumi ayɛ de akyerɛ sɛ yɛn ani sɔ nnwuma a asafo mu asomfo yɛ no? (Hwɛ mfoni no nso.)

⁷ Ɛwom, ebia yɛn mu paa de, yɛn ani sɔ nea asafo mu asomfo yɛ no, nanso Bible hyɛ yɛn  nkuran sɛ: “Monyɛ nnipa a wɔkyerɛ anisɔ.” (Kol. 3:15) Krzysztof yɛ asafo mu panyin a ɔte Finland. Nea ɔyɛ de kyerɛ sɛ n’ani sɔ nea asafo mu asomfo yɛ no, ɔka ho asɛm sɛ: “Ɛyɛ a mekyerɛw nsɛm bi gu kaad so kɔma wɔn anaa mesɛnde wɔn tɛs mɛsegye; ɛyɛ a mede kyerɛwsɛm bi ka ho. Afei nso, ɔkwan pɔtee bi a asafo mu somfo bi faa so hyɛɛ me nkuran anaa nea enti a m’ani sɔ adwuma a ɔyɛ no, na makyerɛw aka ho.” Pascal ne Jael yɛ awarefo a wɔte New Caledonia; ɛyɛ a wɔbɔ mpae ma asafo mu asomfo. Pascal kyerɛ mu sɛ: “Nnansa yi, yɛbɔ mpae ma asafo mu asomfo no paa. Ɛyɛ a yɛda Yehowa ase sɛ ɔde wɔn akyɛ yɛn, na ɛyɛ a yɛsrɛ no sɛ ɔnka wɔn ho na ɔmmoa wɔn.” Mpaebɔ a ɛte saa no, Yehowa tie na asafo no nyinaa nya so mfaso.—2 Kor. 1:11.

ASAFO MU MPANYIMFO ‘YƐ ADWUMADEN WƆ MO MU’

8. Mpanyimfo a na ɛwɔ tete Kristofo no bere so no, adɛn nti na Paul kyerɛwee sɛ “wɔyɛ adwumaden”? (1 Tesalonikafo 5:​12, 13)

⁸ Tete Kristofo no bere so no, na asafo mu mpanyimfo no yɛ adwumaden de boa asafo no. (Kenkan 1 Tesalonikafo 5:​12, 13; 1 Tim. 5:17) Ná ‘wɔdi asafo no anim,’ kyerɛ sɛ, na wɔhwɛ nhyiam ahorow no so, na na wɔbom sisi gyinae ahorow. Afei nso, sɛnea ɛbɛyɛ a wɔbɛbɔ asafo no ho ban no, na ‘wɔtu anuanom fo,’ nanso na wɔyɛ no ɔdɔ so. (1 Tes. 2:​11, 12; 2 Tim. 4:2) Yɛreka yi nso, na wɔyɛ adwumaden de hwɛ wɔn mmusua, na na wɔhwɛ sɛ wɔn ankasa nso ne Yehowa ntam bɛyɛ kama.—1 Tim. 3:​2, 4; Tito 1:​6-9.

9. Ɛnnɛ, nnwuma a asafo mu mpanyimfo yɛ no, ebi ne sɛn?

⁹ Ɛnnɛ, asafo mu mpanyimfo nni adaagye. Wɔyɛ asɛmpakafo. (2 Tim. 4:5) Wɔde nsi ne ahokeka di asɛnka adwuma no anim, wɔyɛ nhyehyɛe ma yetumi ka asɛmpa no wɔ asaasesin no mu, na wɔtete yɛn ma yetumi yɛ asɛnka ne nkyerɛkyerɛ adwuma no yiye. Wɔsan yɛ atemmufo a wɔwɔ mmɔborɔhunu, na wɔmmu atɛnkyea. Sɛ Kristoni bi yɛ bɔne kɛse bi a, mpanyimfo no yɛ nea wɔbetumi biara sɛ wɔbɛboa onii no ma ɔne Yehowa ntam asan ayɛ papa. Bere koro no ara nso, wɔhwɛ sɛ wɔbɛma asafo no ho atew. (1 Kor. 5:​12, 13; Gal. 6:1) Wɔn adwuma titiriw paa ne sɛ wɔbɛyɛ ahwɛfo. (1 Pet. 5:​1-3) Wɔto wɔn bo ase siesie Bible mu ɔkasa ahorow, na wɔma de hyɛ asafo no den. Afei nso wɔbɔ mmɔden sɛ wɔbehu obiara a ɔwɔ asafo no mu yiye, na wɔsrasra wɔn hyɛ wɔn nkuran. Asafo mu mpanyimfo no bi san boa ma wɔsisi Ahenni Asa, na wɔboa ma wɔsiesie nso. Ebinom nso hwɛ ma wɔyɛ nhyiam akɛse ho ntotoe. Wɔn mu bi nso ka Ayaresabea Ntam Nkitahodi Boayikuw ne Ayarefo Nsrahwɛ Akuw no ho. Wei da nkyɛn a, wɔsan yɛ nnwuma afoforo nso ka ho. Momma yɛnka na asafo mu mpanyimfo bɔ adwuma!

10. Nea enti a yɛn ani sɔ adwumaden a asafo mu mpanyimfo yɛ no, ebi ne sɛn?

¹⁰ Yehowa ka too hɔ sɛ, yebenya ahwɛfo a wɔbɛhwɛ yɛn so yiye, na ɛba saa a ‘yɛrensuro bio, na ehu biara nso renka yɛn.’ (Yer. 23:4) Johanna yɛ onuawa bi a ɔwɔ Finland. Bere a yare bi a emu yɛ den bɔɔ ne maame no, ohui sɛ saa asɛm no yɛ nokware. Ɔka sɛ: “Ɛwom, sɛnea mete nka no, ɛyɛ den ma me sɛ mɛka ho asɛm akyerɛ afoforo. Nanso, asafo mu panyin bi a na menhyɛ da nnim no nyaa abotare tiee me, ɔne me boom bɔɔ mpae, na ɔma minyaa awerɛhyem sɛ Yehowa dɔ me. Asɛm pɔtee a ɔkae de, menkae, nanso mekae sɛ saa bere no, ehu biara a ɛwɔ me mu no tu yerae. Migye di sɛ Yehowa na ɔsomaa no sɛ ɔmmɛboa me, na ɔbaa bere pa mu nso.” Sɛn na mpanyimfo a ɛwɔ w’asafo mu aboa wo?

11. Dɛn na yɛbɛyɛ de akyerɛ sɛ yɛn ani sɔ nnwuma a asafo mu mpanyimfo no yɛ no? (Hwɛ mfoni no nso.)

 ¹¹ ‘Esiane adwuma a asafo mu mpanyimfo no yɛ nti,’ Yehowa pɛ sɛ yɛkyerɛ ho anisɔ. (1 Tes. 5:​12, 13) Henrietta nso te Finland. Ɔka sɛ: “Asafo mu mpanyimfo fi wɔn pɛ mu boa afoforo, nanso wei nkyerɛ sɛ wɔnni biribiara yɛ anaa wɔyɛ adwuma a wɔmmrɛ anaa wɔnni haw biara wɔ wɔn asetenam. Ɛtɔ mmere bi a meka kyerɛ wɔn sɛ: ‘Wunim biribi? Mepɛ sɛ wuhu sɛ woyɛ ade paa.’” Onuawa bi a ne din de Sera a ɔwɔ Türkiye c ka sɛ: “Mpanyimfo hia nkuranhyɛ na wɔatumi akɔ so ayɛ adwuma a ɛhyɛ wɔn nsa no. Enti yebetumi akyerɛw nkuranhyɛsɛm agu kaad so akɔma wɔn, yebetumi ato nsa afrɛ wɔn na yɛne wɔn abom adidi, anaa yebetumi ne wɔn abom akɔ asɛnka.” Ebia, adwumaden a asafo mu panyin bi reyɛ no, w’ani sɔ paa. Sɛ saa a, ɛnde yɛ biribi ma onhu.—1 Kor. 16:18.

AMANSIN SO AHWƐFO HYƐ ASAFO NO DEN

12. Tete Kristofo no bere so no, nhyehyɛe bɛn na na ɛwɔ hɔ a ɛhyɛɛ asafo no den? (1 Tesalonikafo 2:​7, 8)

¹² Afei nso, Kristo Yesu paw mmarima bi sɛ wɔmmoa asafo no wɔ kwan foforo so. Ɔnam mpanyimfo a na ɛwɔ Yerusalem no so somaa Paul, Barnaba, ne afoforo sɛ wɔnsrasra nsafo ahorow no sɛ ahwɛfo akwantufo. (Aso. 11:22) Adɛn ntia? Ɛne sɛ wɔbɛhyɛ asafo no den, sɛnea asafo mu asomfo ne mpanyimfo yɛ no ara. (Aso. 15:​40, 41) Saa mmarima yi de nneɛma pii bɔɔ afɔre, na wɔde wɔn nkwa mpo too asiane mu sɛnea ɛbɛyɛ a wɔbɛkyerɛkyerɛ afoforo na wɔahyɛ wɔn den.—Kenkan 1 Tesalonikafo 2:​7, 8.

13. Amansin so ahwɛfo adwuma no bi ne sɛn?

¹³ Amansin so ahwɛfo ntena faako. Ebinom  twa kwantenten kɔsrasra nsafo no. Nnawɔtwe biara amansin so ahwɛfo ma ɔkasa ahorow, wɔsrasra anuanom hyɛ wɔn den, wɔne akwampaefo hyiam, wɔne asafo mu mpanyimfo nso hyiam, na wɔyɛ asɛnka nhyiam nso. Wɔsua ɔkasa ahorow a wɔbɛma, na wɔyɛ ɔmansin ne ɔmantam nhyiam ho ntotoe. Wɔkyerɛ ade wɔ akwampaefo sukuu mu, na wɔne akwampaefo a ɛwɔ ɔmansin no mu yɛ nhyiam titiriw bi. Afei nso, Betel tumi de nnwuma afoforo hyɛ wɔn nsa, na ɛtɔ da a, ɛsɛ sɛ wɔdi ho dwuma ntɛm.

14. Nea enti a yɛn ani sɔ adwumaden a amansin so ahwɛfo yɛ no, ebi ne sɛn?

¹⁴ Sɛn na nsafo no nya amansin so ahwɛfo adwuma no so mfaso? Onua bi a ɔwɔ Türkiye ka amansin so ahwɛfo nsrahwɛ ho asɛm sɛ: “Bere biara a ɔmansin sohwɛfo bɛba abɛsra yɛn asafo no, ɛkanyan me ma mihu sɛ ɛsɛ sɛ minya bere pii ma anuanom. Mahyia amansin so ahwɛfo bebree, nanso wɔn mu baako koraa nni hɔ a ɔma minyaa adwene sɛ onni adaagye anaa ɔmpɛ nnipa.” Johanna a yɛadi kan aka ne ho asɛm no, bere bi ɔne ɔmansin sohwɛfo bi kɔɔ asɛnka nanso wɔanto obiara wɔ fie. Ɔka sɛ: “Ne nyinaa akyi no, me werɛ remfi saa da no da. Ná mewɔ nua mmea mmienu a wɔn nyinaa atu akɔtena baabi foforo, na na mafe wɔn paa. Ɔmansin sohwɛfo no hyɛɛ me nkuran paa, na ɔboaa me ma mihui sɛ seesei de, ebia esiane sɛ yɛne yɛn adɔfo ntam kwan ware nti, yɛrentaa nhu wɔn. Nanso yɛkɔ wiase foforo no mu a, yebenya hokwan pii ne wɔn abɔ.” Amansin so ahwɛfo pii nso yi wɔn yam yɛ saa ara; wɔboa anuanom a wɔsom wɔn no.—Aso. 20:37–21:1.

15. (a) Sɛnea 3 Yohane 5-8 kyerɛ no, yɛbɛyɛ dɛn akyerɛ sɛ yɛn ani sɔ adwuma a amansin so ahwɛfo yɛ no? (Hwɛ mfoni no nso.) (b) Anuanom mmarima a wɔyɛ adwumaden wɔ asafo no mu no, adɛn nti na ɛsɛ sɛ yɛkyerɛ nea wɔn yerenom yɛ ho anisɔ, na yɛbɛyɛ dɛn ayɛ saa? (Hwɛ adaka a yɛato din, “ Kae Wɔn Yerenom.”)

¹⁵ Ɔsomafo Yohane hyɛɛ Gaio nkuran sɛ,  anuanom a wɔbɛsra nsafo no hyɛ wɔn den no, wɔnsom wɔn hɔho, na ‘wɔnnya wɔn kwan sɛnea ɛsɔ Onyankopɔn ani.’ (Kenkan 3 Yohane 5-8.) Ɔkwan baako a yebetumi afa so ayɛ saa ne sɛ yɛbɛto nsa afrɛ ɔmansin sohwɛfo no na yɛne no abom adidi. Ɔkwan foforo nso ne sɛ, sɛ ɔbɛsra yɛn asafo a, nhyehyɛe a ɛwɔ hɔ ma asɛnka no, yɛde yɛn ho bɛhyem. Leslie a yɛadi kan aka ne ho asɛm no, ɔfa akwan foforo so kyerɛ adwuma a wɔyɛ no ho anisɔ. Ɔka sɛ: “Ɛyɛ a mebɔ mpae sɛ Yehowa mma wɔn nea wɔhia. Ɛyɛ a me ne me kunu kyerɛw nkrataa nso kɔma wɔn, na yɛma wɔhu sɛ wɔn nsrahwɛ no aboa yɛn paa.” Kae sɛ amansin so ahwɛfo nyɛ soro abɔfo. Ɛtɔ da a, wɔtumi yare, dadwen hyɛ wɔn so, na wɔn abam mpo tumi bu. Wubetumi aka nkuranhyɛsɛm akyerɛ ɔmansin sohwɛfo no anaa woama no akyɛde ketewa bi; ebia na Yehowa nam wo so rebua ne mpaebɔ!—Mmeb. 12:25.

YEHIA ‘NNIPA A WƆYƐ AKYƐDE’

16. Sɛnea Mmebusɛm 3:27 ma yehu no, nsɛm bɛn na anuanom mmarima betumi abisa wɔn ho?

¹⁶ Yehia anuanom mmarima pii ma wɔasom sɛ ‘akyɛde ama asafo’ no wɔ wiase baabiara. Sɛ woyɛ onuabarima a wabɔ asu a, ‘wubetumi aboa’? (Kenkan Mmebusɛm 3:27.) Wopɛ sɛ wode si w’ani so sɛ wobɛba abɛyɛ asafo mu somfo anaa? Wode asi w’ani so sɛ wobɛyere wo ho abɛyɛ asafo mu panyin na woasom wo nuanom anaa? d Wubetumi ayɛ nsakrae wɔ w’asetenam sɛnea ɛbɛyɛ a wubetumi akɔ Ahenni Asɛmpakafo Sukuu no bi anaa? Saa sukuu no bɛtete wo na ama Yesu atumi de wo ayɛ adwuma kɛse. Sɛ wote nka sɛ womfata a, bɔ Yehowa mpae. Srɛ no sɛ ɔmfa ne honhom kronkron no mmoa wo na adwuma biara a wɔde bɛhyɛ wo nsa no, woatumi ayɛ no yiye.—Luka 11:13; Aso. 20:28.

17. Dɛn na ‘nnipa a wɔyɛ akyɛde’ no ma yehu fa yɛn Hene, Kristo Yesu ho?

¹⁷ Anuanom mmarima a Yesu apaw wɔn sɛ ‘akyɛde ama asafo no’ yɛ adanse a ɛkyerɛ sɛ ɔredi yɛn anim wɔ awiei mmere yi mu. (Mat. 28:20) Ɛyɛ yɛn dɛ paa sɛ yɛwɔ Ɔhene a ɔdɔ yɛn, ne yam ye, na odwen yɛn ho ma enti wapaw anuanom mmarima a wɔfata sɛ wɔmmoa yɛn. Ɛno nti, hwehwɛ hokwan a wode bɛkyerɛ sɛ w’ani sɔ adwumaden a saa mmarima yi yɛ no. Afei nso, mma wo werɛ mmfi da sɛ wobɛda Yehowa ase, efisɛ ɔno na “akyɛde pa ne akyɛde a edi mu biara” fi ne hɔ.—Yak. 1:17.