1-2. Bere a Yesu asuafo mmienu nam kwan so rekɔ Emaus no, dɛn na esii?

 NÁ ƐYƐ Nisan 16, afe 33. Ná awerɛhow ahyɛ Yesu asuafo no ma, na na ehu nso akyekyere wɔn. Ná asuafo no mu mmienu fi Yerusalem rekɔ Emaus; efi Yerusalem kɔ saa akuraa no ase yɛ kilomita 11 anaa akwansin 7. Ná saa mmarima yi abam abu paa, efisɛ Yesu a ɔyɛ wɔn kannifo no, na wɔkum no nkyɛe koraa. Mesia a na wɔn ani da no so sɛ ɔrebegye wɔn no, ɔno na wawu yi. Nanso na wɔn sũ rebɛdan serew.

² Ɔbarima bi bɛtoo wɔn, na ɔne wɔn bɔɔ anan nantewee. Asuafo no kaa nea ɛtoo Yesu no kyerɛɛ no. Afei, ɔbarima no ne wɔn bɔɔ nkɔmmɔ bi a na wɔn werɛ remfi da. Ɔkyerɛɛ wɔn nea enti a na ɛsɛ sɛ Mesia no hu amane na owu; “ɔhyɛɛ ase fii nea Mose ne Adiyifo no nyinaa” kyerɛwee so. Bere a mmarima mmiɛnsa no nyinaa koduu Emaus no, ɔbarima no ma wɔhui sɛ ɔno ne Yesu a Onyankopɔn anyan no no. Bere a wɔhui sɛ Mesia no te ase no, wɔn ani gyei papa!—Luka 24:​13-35.

3-4. Akyiri yi, Yesu asuafo no tee nka sɛn, na dɛn na yebesua wɔ adesua yi mu? (Asomafo Nnwuma 1:3)

³ Nnafua 40 a etwa to a Yesu dii wɔ asaase so no, oyii ne ho adi mpɛn pii kyerɛɛ n’asuafo no. (Kenkan Asomafo Nnwuma  1:3.) Saa bere no, ehu ne awerɛhow a na ahyɛ Yesu asuafo no ma no tu yerae efisɛ ɔhyɛɛ wɔn nkuran. Wei maa wɔn ani gyei, na wɔnyaa akokoduru kɔkaa Ahenni ho asɛmpa no kyerɛɛ afoforo, na wɔkyerɛkyerɛɛ wɔn. a

⁴ Nea Yesu yɛe saa bere no, sɛ yesua ho ade a, ebetumi aboa yɛn. Adesua yi mu no, yɛbɛhwɛ sɛnea Yesu de saa bere no (1) hyɛɛ n’asuafo no nkuran, (2) boaa wɔn ma wɔtee Kyerɛwnsɛm no ase yiye, (3) tetee wɔn sɛnea ɛbɛyɛ a wɔbetumi aso asɛyɛde akɛse mu daakye. Emu biara no, yɛbɛhwɛ sɛnea yebetumi asuasua nea Yesu yɛe no.

HYƐ AFOFORO NKURAN

5. Adɛn nti na na Yesu asuafo no hia nkuranhyɛ?

⁵ Ná Yesu asuafo no hia nkuranhyɛ. Adɛn ntia? Efisɛ na wɔn mu bi agyaw wɔn afie, wɔn mmusua ne wɔn nnwuma hɔ abedi Yesu akyi. (Mat. 19:27) Ebinom nso wɔ hɔ a, esiane sɛ na wɔabɛyɛ Yesu asuafo nti, na nkurɔfo bu wɔn animtiaa. (Yoh. 9:22) Ná wɔgye di sɛ Yesu ne Mesia a wɔhyɛɛ ne ho bɔ no, ɛno nti na wɔyɛɛ saa nsakrae yi nyinaa. (Mat. 16:16) Nanso bere a atamfo kum Yesu no, wɔn anidaso nyinaa sae, na ɛmaa wɔn abam bui paa.

6. Bere a Yesu nyan fii awufo mu no, dɛn na ɔyɛe?

⁶ Ná Yesu nim sɛ ne wu no na na abubu n’asuafo no a enti wɔredi awerɛhow, na ɛnyɛ sɛ na wɔn gyidi ayɛ mmerɛw. Enti ɛda a Yehowa nyan no no ara, ofii ase hyɛɛ ne nnamfo no nkuran. Yɛbɛyɛ nhwɛso a, bere a na Maria Magdalene resu wɔ Yesu ɔda no ho no, oyii ne ho adi kyerɛɛ no. (Yoh. 20:​11, 16) Asuafo mmienu a yɛkaa wɔn ho asɛm wɔ adesua yi mfiase no nso, oyii ne ho adi kyerɛɛ wɔn. Afei nso, oyii ne ho adi kyerɛɛ ɔsomafo Petro. (Luka 24:34) Dɛn na yebetumi asua afi nea Yesu yɛe no mu? Bere a oyii ne ho adi kyerɛɛ Maria Magdalene no, yɛnhwɛ nea esii.

7. Sɛnea Yohane 20:​11-16 kyerɛ no, Nisan 16 anɔpatutuutu no, dɛn na Yesu hui sɛ Maria reyɛ, na dɛn na ɛno kaa Yesu ma ɔyɛe? (Hwɛ mfoni no nso.)

⁷ Kenkan Yohane 20:​11-16. Nisan 16  anɔpatutuutu no, mmea anokwafo bi kɔɔ Yesu da no so. (Luka 24:​1, 10) Mmea no mu baako ne Maria Magdalene. Bere a Maria duu ɔda no so no, ohui sɛ Yesu amu no nni hɔ. Otuu mmirika kɔka kyerɛɛ Petro ne Yohane, na wɔn nso tuu mmirika kɔɔ ɔda no so, na Maria nso dii wɔn akyi. Bere a mmarima mmienu no behui sɛ amu no nni hɔ no, wɔsan kɔɔ fie. Maria de, wankɔ; ná ɔte hɔ resu. Nanso na onnim sɛ, sɛɛ na Yesu rehwɛ no. Ná Yesu nim sɛ ɔno nti na na ɔresu, enti na ɔpɛ sɛ ɔkyekye ne werɛ. Wei nti oyii ne ho adi kyerɛɛ Maria, na ɔyɛɛ biribi a ɛhyɛɛ no nkuran paa. Yesu ne no kasae, na ɔde adwuma bi a ɛho hia hyɛɛ ne nsa. Ɔka kyerɛɛ Maria sɛ ɔnkɔka nkyerɛ ɔno Yesu nuanom sɛ wasɔre afi awufo mu.—Yoh. 20:​17, 18.

8. Yɛbɛyɛ dɛn asuasua Yesu?

⁸ Yɛbɛyɛ dɛn asuasua Yesu? Sɛ yɛbɔ mmɔden hu ɔhaw a yɛn nuanom refa mu, yɛte wɔn ase, na yɛka awerɛkyekyesɛm kyerɛ wɔn a, ɛbɛhyɛ wɔn nkuran ma wɔakɔ so asom Yehowa. Yɛyɛ saa a, na yɛresuasua Yesu. Momma yɛnhwɛ asɛm bi a ɛtoo onuawa bi a ne din de Jocelyn; ne nuabea nyaa akwanhyia wui yayaayaw. Ɔka sɛ: “Midii awerɛhow saa ara abosome pii.” Nanso onua bi ne ne yere too nsa frɛɛ no kɔɔ wɔn fie, wɔma ɔkaa nea ɛhaw no, na wɔyɛɛ aso tiee no. Afei wɔmaa no awerɛhyem sɛ ɔsom bo ma Onyankopɔn. Jocelyn ka sɛ: “Metee nka te sɛ nea mewɔ ɛpo so na mframa rebɔ denneennen; na migye me ho a ennye. Nanso Yehowa nam wɔn so gyee me. Wɔboaa me ma mesan kentenee me ho sɛnea ɛbɛyɛ a metumi akɔ so asom Yehowa.” Yɛn nso, sɛ afoforo reka wɔn haw na yɛyɛ aso tie wɔn, na yɛka awerɛkyekyesɛm kyerɛ wɔn a, ɛbɛhyɛ wɔn nkuran ma wɔakɔ so asom Onyankopɔn.—Rom. 12:15.

BOA AFOFORO MA WƆNTE KYERƐWNSƐM NO ASE

9. Ɔhaw bɛn na Yesu asuafo no hyiae, na sɛn na Yesu boaa wɔn?

⁹ Yesu asuafo no tiee Onyankopɔn Asɛm, na wɔbɔɔ mmɔden sɛ wɔde bɛyɛ adwuma wɔ wɔn asetenam. (Yoh. 17:6) Ne nyinaa akyi no, kum a wɔkum Yesu sɛ ɔbɔnefo no, ɛmaa wɔn adwene mu yɛɛ wɔn naa. Nanso Yesu hui sɛ, te na na wɔnte Kyerɛwnsɛm no ase yiye, na ɛnyɛ sɛ wɔwɔ koma bɔne. (Luka 9:​44, 45; Yoh. 20:9) Enti ɔboaa wɔn ma wɔtee nea wɔkenkanee wɔ Kyerɛwnsɛm no mu no ase. Momma yɛnhwɛ ɔkwan a ɔfaa so yɛɛ saa bere a ɔkɔtoo asuafo mmienu a na wɔnam kwan so rekɔ Emaus no.

10. Sɛn na Yesu boaa n’asuafo no ma wɔhui sɛ ɔno ne Mesia no? (Luka 24:​18-27)

¹⁰ Kenkan Luka 24:​18-27. Hyɛ no nsow sɛ, bere a Yesu kɔtoo mmarima no, ɛnyɛ hɔ ara na ɔka kyerɛɛ wɔn sɛ ɔno ne Yesu. Mmom, obisabisaa wɔn nsɛm. Adɛn ntia? Ebia na ɔpɛ sɛ wɔka nea ɛwɔ wɔn adwenem ne wɔn komam. Na saa pɛpɛɛpɛ na wɔyɛe. Wɔka kyerɛɛ no sɛ, na wɔhwɛ kwan sɛ Yesu bɛba abegye Israelfo no afi Romafo no nsam. Bere a wɔkaa nea ɛhaw wɔn wiei no, Yesu de Kyerɛwnsɛm no boaa wɔn ma wɔtee nea na asi no ase. b Saa da no anwummere no, Yesu ne asuafo no bi nso hyiae, na ɔkyerɛkyerɛɛ saa nsɛm no mu kyerɛɛ wɔn. (Luka 24:​33-48) Dɛn na yebetumi asua afi saa asɛm yi mu?

11-12. (a) Sɛnea Yesu kyerɛkyerɛɛ Kyerɛwnsɛm no mu no, dɛn na yebetumi asua afi mu? (Hwɛ mfoni no nso.) (b) Ɔkwan bɛn so na onua a ɔne Nortey suaa ade no boaa no?

¹¹ Yɛbɛyɛ dɛn asuasua Yesu? Nea edi kan, sɛ worekyerɛkyerɛ Bible asuafo a, bisa nsɛm a  ɛbɛma wɔatumi aka nea ɛwɔ wɔn koma ne wɔn adwenem. (Mmeb. 20:5) Sɛ wuhu nea wɔrefa mu a, boa wɔn ma wɔnhu sɛnea wɔbenya kyerɛwnsɛm a ɛfa wɔn tebea no ho. Nanso hwɛ na woankyerɛ wɔn nea wɔnyɛ. Mmom, boa wɔn ma wɔnsusuw Kyerɛwnsɛm no ho na wɔnhu sɛnea wɔde nnyinasosɛm a ɛwom no bɛbɔ wɔn bra. Momma yɛnhwɛ onua bi a ɔwɔ Ghana a ne din de Nortey.

¹² Bere a Nortey dii mfe 16 no, ofii ase suaa Bible no. Ankyɛ na n’abusuafo sɔre tiaa no. Dɛn na ɛboaa no ma ɔkɔɔ so gyinaa pintinn? Ná nea ɔne no sua Bible no de Mateo ti 10 no aboa no ama wabehu sɛ, nokware Kristofo behyia ɔsɔretia. Nortey ka sɛ, “Enti bere a ɔsɔretia no fii ase no, na migye di paa sɛ mahu nokware no.” Nea ɔne no suaa Bible no de Mateo 10:16 no nso boaa no ma obehui sɛ, ɛsɛ sɛ ɔyɛ anifere na ɔda obu adi bere a ɔreka ne gyidi ho asɛm wɔ fie no. Nortey asubɔ akyi no, ɔyɛe sɛ ɔbɛyɛ ɔkwampaefo, nanso na ne papa pɛ sɛ ɔkɔ suapɔn. Sɛ́ anka nea ɔne no sua ade no bɛkyerɛ no nea ɔnyɛ no, ɔne no susuw Bible nnyinasosɛm ho sɛnea ɛbɛyɛ a obetumi asi gyinae. Ekowiee sɛn? Nortey bɛyɛɛ ɔkwampaefo. Ne papa pam no fii fie. Nea esii no maa Nortey tee nka sɛn? Ɔka sɛ, “Migye di paa sɛ misii gyinae pa.” Yɛn nso, sɛ yɛto yɛn bo ase ne afoforo susuw Kyerɛwnsɛm no ho a, yebetumi aboa wɔn ama wɔabɛyɛ Kristofo a wɔn ase atim.—Efe. 3:​16-19.

TETE MMARIMA MA WƆMMƐYƐ ‘AKYƐDE MMA ASAFO NO’

13. Dɛn na Yesu yɛe sɛnea ɛbɛyɛ a ne kɔ akyi no asɛnka adwuma no bɛkɔ so? (Efesofo 4:8)

¹³ Yesu wɔ asaase so no, adwuma a n’Agya de maa no sɛ ɔnyɛ no, ɔhwɛ yɛɛ no pɛpɛɛpɛ. (Yoh. 17:4) Nkurɔfo wɔ adwene bi sɛ, ‘Wopɛ biribi yiye a, gye sɛ wo ara woyɛ w’ade.’ Adwene a ɛte saa no, Yesu annya bi. Mfe mmiɛnsa ne fã a ɔde yɛɛ ne som adwuma wɔ asaase so no, ɔtetee afoforo ma wɔhuu adwuma no ani so. Ansa na Yesu rekɔ soro no, ɔde Yehowa nguan a wɔsom bo no hyɛɛ n’asuafo no nsa sɛ wɔnhwɛ wɔn so. Afei nso, ɔka kyerɛɛ wɔn sɛ wɔnni anim ma wɔnyɛ asɛnka ne ɔkyerɛkyerɛ adwuma no. Asuafo a wɔdii adwuma no anim no, ɛbɛyɛ sɛ na wɔn mu bi nnya nnii mfe 30 mpo. (Kenkan Efesofo 4:8.) Saa mmarima no  yɛɛ adwumaden na wɔkɔɔ so bataa Yesu ho. Nanso aka nnafua 40 ma wakɔ soro no, ɔde ntetee pii maa wɔn sɛnea ɛbɛyɛ a wɔbetumi abɛyɛ ‘akyɛde ama asafo no.’ Ɔyɛɛ no sɛn?

14. Nnafua 40 a etwa to a Yesu dii wɔ asaase so no, mmoa bɛn na ɔde maa n’asuafo no a na ɛbɛma wɔn gyidi ayɛ den? (Hwɛ mfoni no nso.)

¹⁴ Afotu biara a na ehia sɛ Yesu de ma n’asuafo no, ɔde maa wɔn, nanso ɔyɛɛ no ɔdɔ so. Yɛbɛyɛ nhwɛso a, ohui sɛ na n’asuafo no bi nnye nni sɛ wasɔre afi awufo mu, enti ɔmaa wɔn afotu. (Luka 24:​25-27; Yoh. 20:27) Afei nso, ɔka kyerɛɛ wɔn sɛ wɔmfa wɔn adwene nsi Yehowa nkurɔfo a wɔbɛhwɛ wɔn no so, sen sɛ wɔde wɔn adwene besi wɔn honam fam nnwuma so. (Yoh. 21:15) Ɔkaee wɔn sɛ hokwan a ebia afoforo benya wɔ Yehowa som mu no, ɛnsɛ sɛ wɔde haw wɔn ho. (Yoh. 21:​20-22) Bio nso, adwene a ɛntene a na wɔwɔ wɔ Ahenni no ho no, ɔtenee no, na ɔboaa wɔn ma wɔhui sɛ ɛsɛ sɛ wɔde wɔn adwene si asɛmpaka adwuma no so. (Aso. 1:​6-8) Dɛn na asafo mu mpanyimfo betumi asua afi Yesu hɔ?

15-16. (a) Akwan bɛn na asafo mu mpanyimfo betumi afa so asuasua Yesu? (b) Afotu a asafo mu panyin bi de maa Patrick no, ɛboaa no sɛn?

¹⁵ Asafo mu mpanyimfo bɛyɛ dɛn asuasua Yesu? Ɛsɛ sɛ wɔtete mmarima na wɔboa wɔn, a mmerantewaa mpo ka ho, sɛnea ɛbɛyɛ a wɔbetumi aso asɛyɛde akɛse mu daakye. c Ɛnsɛ sɛ mpanyimfo no hwɛ kwan sɛ wɔn a wɔretete wɔn no bɛyɛ wɔn biribiara pɛpɛɛpɛ. Ɛsɛ sɛ wɔde afotu ma wɔn wɔ ɔdɔ so sɛnea ɛbɛyɛ a wɔbenya suahu na wɔahu hia a ehia sɛ wɔbrɛ wɔn ho ase, wɔyɛ anokwafo, na wɔfi wɔn pɛ mu som afoforo.—1 Tim. 3:1; 2 Tim. 2:2; 1 Pet. 5:5.

¹⁶ Afotu bi a asafo mu panyin bi de maa onua bi a ne din de Patrick no, momma yɛnhwɛ sɛnea ɛboaa no. Ɔyɛ aberantewaa no, na n’anom kasa nyɛ dɛ koraa, na na ɔne afoforo nni no yiye; ná saa ara na ɔyɛ anuanom mmea mpo. Asafo mu panyin bi hui sɛ saa suban a Patrick wɔ no nye, enti otuu no fo, nanso  ɔyɛɛ no ɔdɔ so. Patrick ka sɛ, “Ɛyɛ me dɛ sɛ otuu me fo.” Afei nso, “Kan no, sɛ mihu sɛ hokwan a mepɛ no, anuanom afoforo anya a, na m’abam abu. Nanso, afotu a ɔpanyin no de maa me no boaa me ma mihui sɛ, sɛ́ anka mede m’adwene besi hokwan bi a menya wɔ asafo no mu so no, ehia sɛ mebrɛ me ho ase som anuanom mmom.” Afotu no a Patrick de yɛɛ adwuma nti, odii mfe 23 na wɔpaw no sɛ asafo mu panyin.—Mmeb. 27:9.

17. Dɛn na Yesu yɛe a ɛkyerɛ sɛ na ogye n’asuafo no di?

¹⁷ Yesu de hyɛɛ n’asuafo no nsa sɛ wɔnka asɛmpa no na wɔnkyerɛkyerɛ nso. Ɛbɛyɛ sɛ na asuafo no te nka sɛ wɔrentumi nyɛ saa adwuma no. Nanso Yesu de, na onim paa sɛ wɔbetumi ayɛ. Ná ogye n’asuafo no di paa, enti ɔka kyerɛɛ wɔn sɛ: “Sɛnea Agya no asoma me no, me nso meresoma mo.”—Yoh. 20:21.

18. Dɛn na asafo mu mpanyimfo betumi ayɛ de asuasua Yesu?

¹⁸ Asafo mu mpanyimfo bɛyɛ dɛn asuasua Yesu? Asafo mu mpanyimfo a wɔn ho akokwaw tete afoforo de asɛyɛde hyehyɛ wɔn nsa. (Filip. 2:​19-22) Yɛbɛyɛ nhwɛso a, sɛ anuanom rekosiesie Ahenni asa so a, asafo mu mpanyimfo betumi ama mmarimaa ne mmeawa nso ayɛ bi. Wɔbetumi de nnwuma bi ahyehyɛ wɔn nsa na wɔatete wɔn ama wɔahu sɛnea wɔbɛyɛ no, na wɔanya gyidi sɛ wɔbɛyɛ no yiye. Asafo mu panyin bi a wɔpaw no nkyɛe a ne din de Matthew ka sɛ, ɛyɛ no dɛ paa sɛ asafo mu mpanyimfo a wɔn ho akokwaw tetee no yiye. Wɔma ohuu sɛnea ɔbɛyɛ nnwuma ahorow wɔ asafo no mu, na wɔnyaa ne mu gyidi sɛ obetumi ayɛ. Matthew ka sɛ, “Sɛ midi mfomso a, na wɔhu no sɛ ɛka ntetee no ho, na wɔboaa me ma mituu mpɔn.” d

19. Dɛn na ɛsɛ sɛ yesi yɛn bo sɛ yɛbɛyɛ?

¹⁹ Nnafua 40 a etwa to a Yesu dii wɔ asaase so no, ɔde saa bere no hyɛɛ afoforo nkuran, ɔkyerɛkyerɛɛ wɔn, na ɔtetee wɔn. Momma yensi yɛn bo sɛ yebedi n’anammɔn akyi pɛɛ. (1 Pet. 2:21) Ɔbɛboa yɛn ma yɛayɛ saa, efisɛ ɔhyɛɛ bɔ sɛ: “Me ne mo wɔ hɔ nna nyinaa kosi wiase yi awiei bere.”—Mat. 28:20