ADESUA ASƐM 43
DWOM 90 Monhyɛ Mo Ho Nkuran
Sɛ Yɛn Adwenem Yɛ Yɛn Naa a, Yɛbɛyɛ Dɛn Adi So?
“Monhwehwɛ nneɛma nyinaa mu nhwɛ sɛ ɛyɛ nokware anaa.”—1 TES. 5:21.
NEA ADESUA YI BƐKA HO ASƐM
Adwenem naayɛ a ebetumi ama yɛn gyidi ayɛ mmerɛw no, sɛnea yebedi so.
1-2. (a) Nsɛm bɛn na ebia Yehowa asomfo bebisa wɔn ho? (b) Dɛn na yebesusuw ho wɔ adesua yi mu?
MPANYIMFO OO, mmofra oo, ɛtɔ da a, obiara adwenem tumi yɛɛ no naa. a Yɛbɛyɛ nhwɛso a, ebia ɔbabun bi a ɔyɛ Ɔdansefo adwene yɛ no sɛ Yehowa nnwen ne ho. Ɛno nti, ebia onhu sɛ ɔmmɔ asu anaa mma ɔmmɔ. Nhwɛso foforo nso ne sɛ, ebia onua bi sii gyinae wɔ ne mmeranteberem sɛ ɔrenni sika akyi, na mmom ɔde Ahenni no bedi kan. Wei nti, seesei onnya sika ahe biara mfa nhwɛ n’abusua, enti ɛyɛ a na n’adwene yɛ no mmienu mmienu wɔ gyinae a osii no ho. Afei, yɛnhwɛ onuawa bi a ne mfe akɔ anim a n’ahoɔden so atew. Ebia kan no, nea na otumi yɛ no, seesei ontumi nyɛ, enti ebia n’abam abu. Woabisa wo ho pɛn sɛ: ‘Enti Yehowa nim me? Nneɛma a mede abɔ afɔre ama Yehowa no ohu? Me so da so ara wɔ mfaso ma Yehowa?’
2 Sɛ yɛampɛ nsɛmmisa a ɛte saa ho mmuae a, ebetumi ama yɛn gyidi ayɛ mmerɛw. Adesua yi mu no, yɛbɛhwɛ sɛnea Bible nnyinasosɛm bɛboa yɛn bere a yɛn adwene yɛ yɛn sɛ (1) Yehowa nnwen yɛn ho, (2) bere bi a atwam no yɛansisi gyinae pa, anaa (3) seesei yɛn so nni mfaso mma Yehowa.
SƐ W’ADWENEM YƐ WO NAA A, NEA WOBƐYƐ
3. Sɛ yɛn adwenem yɛ yɛn naa a, dɛn na yebetumi ayɛ?
3 Sɛ yɛn adwenem yɛ yɛn naa, na ɛma yebisabisa yɛn ho nsɛm bi a, yebetumi ahwehwɛ ho mmuae wɔ Bible mu. Sɛ yɛyɛ saa a, ɛbɛhyɛ yɛn gyidi den, ɛbɛma yɛne Yehowa ayɔnkofa mu ayɛ den, na ɛbɛboa yɛn ma ‘yɛagyina pintinn wɔ gyidi no mu.’—1 Kor. 16:13.
4. Yɛbɛyɛ dɛn ‘ahwehwɛ nneɛma nyinaa mu ahwɛ sɛ ɛyɛ nokware’? (1 Tesalonikafo 5:21)
4 Kenkan 1 Tesalonikafo 5:21. Hyɛ no nsow sɛ Bible ka kyerɛ yɛn sɛ ‘yɛnhwehwɛ nneɛma nyinaa mu nhwɛ sɛ ɛyɛ nokware anaa.’ Yɛbɛyɛ no sɛn? Sɛnea yɛn adwene yɛ yɛn no, yebetumi de atoto nea Bible ka no ho ahwɛ. Momma yɛmfa ɔbabun no a n’adwene yɛ no sɛ Onyankopɔn nnwen ne ho no nyɛ nhwɛso. Wohwɛ a, ɛsɛ sɛ ɔfa no sɛ saa adwene a wanya no yɛ nokware? Daabi, sɛ ɔpɛ sɛ onya Yehowa adwene wɔ asɛm no ho a, ɛsɛ sɛ ‘ɔhwehwɛ mu hwɛ sɛ ɛyɛ nokware anaa.’
5. Yɛbɛyɛ dɛn ahu mmuae a Yehowa de ma yɛn wɔ yɛn nsɛmmisa ho?
5 Sɛ yɛkenkan Bible no a, yebehu sɛ Yehowa rekasa akyerɛ yɛn. Nanso sɛ yebenya Yehowa adwene wɔ asɛmmisa pɔtee bi ho a, ɛsɛ sɛ yɛyere yɛn ho hwehwɛ mmuae no. Ɛsɛ sɛ yɛhwehwɛ kyerɛwnsɛm a ɛfa yɛn asɛmmisa no ho, na yesua ho ade. Yebetumi de nneɛma a yɛde yɛ nhwehwɛmu a Yehowa ahyehyɛde no de ama yɛn no atweetwee saa asɛm no mu. (Mmeb. 2:3-6) Sɛ yɛrebɛyɛ nhwehwɛmu no a, yebetumi asrɛ Yehowa sɛ ɔmmoa yɛn na yennya yɛn asɛmmisa no ho mmuae. Afei yebetumi ahwehwɛ Bible nnyinasosɛm ne nsɛm pɔtee bi a ɛfa yɛn tebea no ho a yebetumi de ayɛ adwuma. Nnipa a Bible ka wɔn ho asɛm a wɔhyiaa tebea a ɛte sɛ yɛn de no, sɛ yesua wɔn ho ade a, ebia ɛno nso bɛboa.
6. Sɛn na asafo nhyiam boa yɛn ma yetumi di adwenem naayɛ so?
6 Yɛkɔ asafo nhyiam nso a, Yehowa kasa kyerɛ yɛn. Sɛ yɛkɔ asafo nhyiam daa a, ɔkasa anaa mmuae bi a obi bɛma no, ebia yɛbɛte asɛm pɔtee bi wom. Wei betumi aboa yɛn ama yɛadi nea ama yɛn adwenem ayɛ yɛn naa no so. (Mmeb. 27:17) Afei, nneɛma pɔtee bi a etumi ma yɛn adwenem yɛ yɛn naa no, yɛnhwɛ sɛnea yebetumi adi so.
BERE A ƐYƐ WO SƐ YEHOWA NNWEN WO HO
7. Asɛm bɛn na ebia ebinom bebisa wɔn ho?
7 Woabisa wo ho pɛn sɛ: ‘Enti Yehowa nim me?’ Sɛ wote nka sɛ wo so nni mfaso a, anhwɛ a ɛbɛyɛ wo sɛ worentumi ne Ɔbɔadeɛ no mfa adamfo da. Ɛbɛyɛ sɛ Ɔhene Dawid nyaa saa adwene no bi. Nnipa a yɛnsɛ hwee mpo, sɛnea Yehowa dwen yɛn ho no, ɛyɛɛ Dawid nwanwa paa. Enti obisae sɛ: “O Yehowa, onipa ne hena a wubu ne ho akontaa? Na ɔdasani ne hena a wudwen ne ho?” (Dw. 144:3) Ɛhe na wubetumi anya saa asɛmmisa yi ho mmuae?
8. Sɛnea 1 Samuel 16:6, 7, 10-12 kyerɛ no, dɛn na Yehowa hwɛ wɔ nnipa ho?
8 Yɛhwɛ Bible mu a, yehu sɛ wɔn a asɛ nkurɔfo mfa wɔn nyɛ hwee no, Yehowa nim wɔn. Ɛho nhwɛso ne sɛ, Yehowa somaa Samuel kɔɔ Yese fie sɛ ɔnkɔsra ne mma mmarima no baako, na daakye wayɛ Israel hene. Ná Yese wɔ mma mmarima baawɔtwe; ɔfrɛɛ wɔn mu baason sɛ wɔmmehyia Samuel, nanso wamfrɛ Dawid a na ɔyɛ akumaa no anka ho. b Nso Dawid mmom na Yehowa paw no. (Kenkan 1 Samuel 16:6, 7, 10-12.) Ná Yehowa nim Dawid paa; ohui sɛ ɔyɛ aberante a ɔdɔ no yiye.
9. Adɛn nti na wubetumi agye adi sɛ Yehowa dwen wo ho? (Hwɛ mfoni no nso.)
9 Wo de, nea Yehowa ayɛ de akyerɛ sɛ onim wo no, dwinnwen ho. Tebea a wowom no, ɛho afotu a ɛbɛboa wo na ɔde ma wo. (Dw. 32:8) Wei kyerɛ sɛ onim wo paa. (Dw. 139:1) Afotu a Yehowa de ma wo no, sɛ wode yɛ adwuma na wuhu sɛnea ɛboa wo a, ɛbɛma woagye adi sɛ Yehowa dwen wo ho. (1 Be. 28:9; Aso. 17:26, 27) Mmɔden biara a worebɔ sɛ wobɛsom Yehowa no, ohu. Ohu suban a ɛyɛ fɛ a wowɔ no, na ɔpɛ sɛ ɔfa wo adamfo. (Yer. 17:10) N’ani begye paa sɛ wo nso wobɛfa no adamfo.—1 Yoh. 4:19.
“Sɛ wohwehwɛ [Yehowa] a, ɔbɛma woahu no.” —1 Be. 28:9 (Hwɛ nkyekyɛm 9) c
BERE A ƐYƐ WO SƐ BERE BI A ATWAM NO WOANSISI GYINAE PA
10. Gyinae a yesisii bere bi a atwam no, sɛ yedwinnwen ho a, nsɛmmisa bɛn na ebetumi aba yɛn tirim?
10 Ɛtɔ da a, ebinom hwɛ gyinae a wɔsisii bere bi a atwam a, ɛyɛ a wɔntumi nhu sɛ wɔsii gyinae pa anaa wɔansi gyinae pa. Ebia na wɔyɛ adwuma bi a sika wom paa, nanso wɔgyaee sɛnea ɛbɛyɛ a wɔbenya bere pii de asom Yehowa. Seesei ebia mfe pii atwam, na wɔn mfɛfo a wɔyɛɛ wɔn adwene sɛ wɔbɛyɛ adwuma apɛ sika no, ebia wɔhu wɔn a asɛ nneɛma rekɔ yiye ma wɔn. Wei enti, ebia wɔbebisa sɛ: ‘Nneɛma a Yehowa som nti mede bɔɔ afɔre no, mfaso bɛn paa na ɛwɔ so? Anaa anka ɛsɛ sɛ meyɛ adwuma pɛ sika pii?’
11. Nea ɔkyerɛw Dwom 73 no, dɛn na ɛmaa n’abam bui?
11 Wo nso, sɛ woabisa wo ho nsɛm a ɛte saa pɛn a, hwɛ sɛnea Dwom 73 kyerɛwfo no tee nka. Sɛ ɔhwɛ wɔn a na wɔnsom Yehowa no a, na asɛ wɔwɔ apɔwmuden, wɔdi yiye, na wɔnni haw biara. (Dw. 73:3-5, 12) Sɛ ɔhwɛ sɛnea asɛ wɔredi yiye no a, na ɔte nka sɛ mfaso biara nni so sɛ ɔresom Yehowa. Saa adwene a onyae yi maa n’abam bui, na ‘ɔfaa ɔhaw mu daa nyinaa.’ (Dw. 73:13, 14) Nea na ɛhaw no no, dɛn na ɔyɛe wɔ ho?
12. Sɛnea Dwom 73:16-18 kyerɛ no, sɛn na odwontofo no dii ne haw no ho dwuma?
12 Kenkan Dwom 73:16-18. Odwontofo no kɔɔ Yehowa tenabea kronkron no mu. Ɔkɔɔ hɔ no, otumi dwen nneɛma ho yiye. Ohui sɛ ɛwom sɛ asɛ ebinom redi yiye, nanso na wɔgyina baabi a ɛhɔ yɛ toro. Ɛno nti, onyaa asomdwoe, na obehui sɛ, sɛ obi de Yehowa som di kan a, na ɔntow ne ho ngui koraa. Wei ma osii ne bo sɛ ɔbɛkɔ so asom Yehowa.—Dw. 73:23-28.
13. Sɛ gyinae bi a wusisii bere bi a atwam ama w’adwene yɛ wo mmienu mmienu a, dɛn na wubetumi ayɛ na woanya asomdwoe? (Hwɛ mfoni no nso.)
13 Sɛnea Onyankopɔn Asɛm boaa odwontofo no, wo nso ebetumi aboa wo ama woanya asomdwoe. Ɔkwan bɛn so? Nneɛma pa a wowɔ ne agyapade a woaboaboa ano wɔ soro no, dwinnwen ho, na kae sɛ wɔn a wɔnsom Yehowa no, wɔn akatua ara na wɔrenya wɔ wiase yi mu no. Nea wɔatumi ayɛ wɔ abrabɔ mu no, ebia ɛno na wɔde wɔn ho to so, efisɛ wɔnni anidaso biara bio. Nanso wo de, Yehowa ahyɛ wo bɔ sɛ nhyira a obehwie agu wo so no, ɛnyɛ asɛm ketewa. (Dw. 145:16) Afei nso, dwen wei ho hwɛ: Sɛ yesii gyinae foforo bi a, anka saa bere yi yennim sɛnea yɛn abrabɔ awie yɛn. Asɛm a edi hɔ yi yɛ nokware turodoo: Wɔn a Onyankopɔn ne wɔn yɔnko nnipa ho dɔ kanyan wɔn ma wɔsisi gyinae no, adepa biara remmɔ wɔn da.
Nhyira a Yehowa de ahyɛ yɛn bɔ no, ɛyɛ a dwinnwen ho (Hwɛ nkyekyɛm 13) d
BERE A ƐYƐ WO SƐ WO SO NNI MFASO MMA YEHOWA
14. Tebea bɛn na ebinom wom, na asɛm bɛn na ebia wɔbebisa wɔn ho?
14 Onyin ne yare reteetee Yehowa asomfo binom. Ebinom nso adi dɛm. Ɛno nti, ebia wɔbɛte nka sɛ wɔnsom bo mma Yehowa. Ebia wɔbebisa wɔn ho sɛ, ‘Me so da so ara wɔ mfaso ma Yehowa?’
15. Nea ɔkyerɛw Dwom 71 no, dɛn na na ogye di?
15 Nea ɔkyerɛw Dwom 71 no, na ɔno nso wɔ ɔhaw bi a ɛte saa. Enti ɔbɔɔ mpae sɛ: “Sɛ m’ahoɔden so huan a, nnyaw me.” (Dw. 71:9, 18) Nanso, na odwontofo no gye di paa sɛ ɔde nokwaredi som Yehowa a, obeso no mu. Odwontofo no hui sɛ, wɔn a yare anaa onyin nyinaa akyi no, wɔyere wɔn ho yɛ nea wɔbetumi nyinaa de som Yehowa no, n’ani sɔ wɔn mmɔdenbɔ no.—Dw. 37:23-25.
16. Dɛn na ɛkyerɛ sɛ wɔn a wɔn mfe akɔ anim no so wɔ mfaso ma Yehowa? (Dwom 92:12-15)
16 Sɛ wo mfe akɔ anim a, sɛnea Yehowa hu wo no, hu wo ho saa ara. Onyin nti, ebia w’apɔwmuden nyɛ papa, nanso Yehowa betumi aboa wo ma wode nokwaredi akɔ so asom no. (Kenkan Dwom 92:12-15.) Nea seesei wuntumi nyɛ no, mfa w’adwene nsi ɛno so, mmom fa w’adwene si nea wutumi yɛ no so. Yɛbɛyɛ nhwɛso a, wubetumi de wo nhwɛso pa ahyɛ afoforo den, na woama wɔahu sɛ wudwen wɔn ho. Sɛnea Yehowa aboa wo abesi saa bere yi ne anidaso a emu yɛ den a wowɔ sɛ ne bɔhyɛ nyinaa bɛbam no, wubetumi aka ho asɛm akyerɛ afoforo. Afei nso, mma wo werɛ mmfi da sɛ mpae a wufi wo komam bɔ ma afoforo no, Yehowa tie paa. (1 Pet. 3:12) Sɛ yɛn tebea te sɛn oo, sɛ ɛte sɛn oo, yɛn nyinaa betumi ayɛ biribi ama Yehowa ne afoforo.
17. Adɛn nti na ɛnsɛ sɛ yɛde yɛn ho toto afoforo?
17 Esiane sɛ wuntumi nyɛ pii wɔ Yehowa som mu nti ama w’abam abu a, nya awerɛhyem sɛ nea wutumi yɛ biara Yehowa ani sɔ. Anhwɛ a, wode wo ho bɛtoto afoforo ho. Nanso nyɛ saa! Adɛn ntia? Efisɛ Yehowa mfa yɛn ntoto obiara ho. (Gal. 6:4) Yɛbɛyɛ nhwɛso a, Maria de ngo huamhuam a ne bo yɛ den paa maa Yesu. (Yoh. 12:3-5) Nanso sɛ yɛhwɛ okunafo hiani no a, ɔde nkaprɛ mma mmienu a ɛnsom bo ahe biara yii ntoboa wɔ asɔrefie hɔ. (Luka 21:1-4) Yesu amfa okunafo hiani no antoto Maria ho; ohui sɛ na wɔn mmienu nyinaa reyɛ biribi de akyerɛ sɛ wɔwɔ gyidi. N’agya Yehowa nso, biribiara a woyɛ ma no no, sɛ esua sɛ dɛn mpo a, n’ani sɔ paa, efisɛ onim sɛ ahofama ne ɔdɔ a wowɔ ma no nti na woyɛ saa.
18. Sɛ yɛn adwenem yɛ yɛn naa a, dɛn na ɛbɛboa yɛn ma yɛadi so? (Adaka a yɛato din, “ Sɛ W’adwenem Yɛ Wo Naa a, Yehowa Asɛm Betumi Aboa Wo Ma Woadi So” no, hwɛ ɛno nso.)
18 Ɛtɔ da a, yɛn nyinaa adwenem tumi yɛ yɛn naa. Nanso sɛnea yɛahu no, Onyankopɔn Asɛm Bible no betumi aboa yɛn ma yɛadi so. Enti biribiara a ama w’adwenem ayɛ wo naa no, bɔ mmɔden yɛ ho adwuma. Ɛba saa a, ɛremma w’abam mmu, mmom w’adwene besi wo pi. Kae sɛ, Yehowa nim wo paa. Biribiara a wode abɔ afɔre ama no no, n’ani sɔ paa, na ɔhyɛ bɔ sɛ obetua wo ka. Nya awerɛhyem sɛ Yehowa dɔ n’asomfo nyinaa na odwen wɔn ho.
DWOM 111 Nea Ɛma Yɛn Ani Gye
a ASƐM BI MU NKYERƐKYERƐMU: Adesua yi mu no, sɛ yɛka sɛ obi adwenem yɛ no naa a, nea ɛkyerɛ ne sɛ, onii no adwene yɛ no sɛ ɔnsom bo mma Yehowa, anaa ɛyɛ no sɛ bere bi a atwam no, wansisi gyinae pa. Adwenem naayɛ a yɛreka yi, ɛnyɛ nea Bible ka ho asɛm no. Ɛno de, ɛkyerɛ sɛ obi nni Yehowa mu gyidi, na onnye nni sɛ ne bɔhyɛ bɛbam.
b Bere a Yehowa paw Dawid no, ɛwom sɛ Bible nka mfe pɔtee a na wadi, nanso ɛbɛyɛ sɛ na ɔda so yɛ aberantewaa.—Hwɛ October 1, 2011, Ɔwɛn-Aban no kr. 21, nky. 2.
