1. Yehowa te nka sɛn wɔ n’asomfo ho?

 BIRIBIARA a Yehowa asomfo refa mu wɔ asaase so no, n’ani tua. Sɛ yɛn ani gye a, ohu; yɛn werɛ how nso a, ohu. (Dw. 37:18) Ateetee a yɛrefa mu nyinaa akyi no, sɛ ohu sɛ yɛamia yɛn ani resom no a, ɛma n’ani gye! Afei nso, wayɛ krado sɛ ɔbɛboa yɛn na wakyekye yɛn werɛ.

2. Dɛn na Yehowa yɛ ma wɔn a wɔn koma abubu, na yɛbɛyɛ dɛn anya mmoa a ɔde ma no bi?

² Dwom 147:3 ma yehu sɛ, wɔn a wɔn koma abubu no, ɛte sɛ nea wɔapira, enti Yehowa ‘kyekyere wɔn akuru.’ Ɛha yi, Yehowa te sɛ obi a wato ne bo ase rehwɛ obi a ɔhaw abubu no. Yɛbɛyɛ dɛn anya mmoa a Yehowa de ma n’asomfo no bi? Yɛnhwɛ mfatoho yi. Sɛ obi pira a, dɔktani a waben betumi ahwɛ no ama ne ho atɔ no. Nanso sɛ onii a wapira no ho bɛtɔ no a, ɛsɛ sɛ odi dɔktani no akwankyerɛ so pɛpɛɛpɛ. Adesua yi mu no, wɔn a wiase no ama wɔn ani atutu aka wɔn nsam no, yɛbɛhwɛ nea Yehowa ka kyerɛ wɔn wɔ n’Asɛm no mu. Afei nso, yɛbɛhwɛ sɛnea yɛde n’afotu no bɛyɛ adwuma.

YEHOWA MA YEHU SƐ YƐSOM BO PAA MA NO

3. Adɛn nti na ebinom te nka sɛ wɔnsɛ hwee?

³ Wiase a yɛte mu yi, ɔdɔ asa. Wei nti, nnipa pii wɔ hɔ a, afoforo ahyɛ wɔn aniɛyaa ateetee wɔn ama wɔte nka sɛ wɔnsɛ  hwee. Onuawa bi a ne din de Helen a ka sɛ: “Ná ɔdɔ ketekete sei mpo nni m’abusua mu. Ná me papa koko nye koraa; daa na ɔka kyerɛ me sɛ mfaso biara nni me so.” Ebia wo nso, obi ateetee wo pɛn, daa na ɔkasa tia wo, anaa na ɔma wote nka sɛ wonsɛ hwee. Sɛ saa a, ebia ɛbɛyɛ den ama wo sɛ wubegye adi sɛ obi fi ne koma nyinaa mu dɔ wo.

4. Awerɛhyem bɛn na Yehowa de ma yɛn wɔ Dwom 34:18?

⁴ Sɛ ebinom ateetee wo pɛn mpo a, wubetumi anya awerɛhyem sɛ Yehowa dɔ wo na wosom bo ma no. “Yehowa bɛn wɔn a wɔn koma abubu.” (Kenkan Dwom 34:18.) Sɛ ‘w’abam abu’ a, kae sɛ Yehowa huu nneɛma pa wɔ wo ho, ɛnna ɔtwee wo baa ne nkyɛn. (Yoh. 6:44) Bere nyinaa wayɛ krado sɛ ɔbɛboa wo efisɛ wosom bo ma no.

5. Wɔn a na afoforo mfa wɔn nyɛ hwee no, sɛnea Yesu ne wɔn dii no, dɛn na yebetumi asua afi mu?

⁵ Atenka a Yehowa wɔ ma nnipa no, sɛ yɛhwɛ sɛnea Yesu ne nnipa dii a, ebetumi ama yɛate ase. Bere a Yesu reyɛ ne som adwuma wɔ asaase so no, wɔn a na nkurɔfo mfa wɔn nyɛ hwee no, ɔne wɔn dii no yiye. (Mat. 9:​9-12) Bere bi, ɔbea bi a na mogya retu no de ne nsa kaa Yesu ataade, na na ogye di sɛ ɛbɛma ne ho atɔ no. Yesu anka n’anim, mmom ɔkyekyee ne werɛ na ɔkamfoo no sɛ ɔwɔ gyidi. (Mar. 5:​25-34) Yesu suasuaa n’Agya pɛpɛɛpɛ. (Yoh. 14:9) Enti wubetumi agye adi sɛ wosom bo ma Yehowa na suban pa a wowɔ te sɛ gyidi ne ɔdɔ a wowɔ ma no no, ohu ne nyinaa.

6. Sɛ obi te nka sɛ ɔnsɛ hwee a, dɛn na ebetumi aboa no?

⁶ Sɛ daa wote nka sɛ wonsɛ hwee a, dɛn na wubetumi ayɛ? Bible mu nsɛm a ɛma wuhu sɛ wosom bo ma Yehowa no, kenkan na  dwinnwen ho. b (Dw. 94:19) Ebia wode botae bi sii w’ani so na woantumi annu ho, anaa wuntumi nyɛ pii sɛnea afoforo yɛ no, enti w’abam abu. Sɛ saa a, nnya adwene sɛ wonsɛ hwee. Yehowa nhwɛ kwan sɛ wobɛyɛ nea ɛboro w’ahoɔden so. (Dw. 103:​13, 14) Sɛ obi ateetee wo pɛn anaa wama woahu amane a, nka sɛ efi wo. Onii no mmom na asodi da no so. Kae sɛ wɔn a wɔteetee afoforo no, Yehowa bebu wɔn atɛn. (1 Pet. 3:12) Momma yɛnhwɛ Sandra. Ɔyɛ abofra no, ɔfaa ateetee mu. Ɔka sɛ: “Daa, mebɔ mpae srɛ Yehowa sɛ suban pa a ohu wɔ me ho no, ɔmmoa me mma me nso minhu.”

7. Nea yɛafa mu wɔ asetenam no, sɛn na ebetumi aboa yɛn wɔ Yehowa som mu?

⁷ Hu sɛ Yehowa betumi afa wo so aboa afoforo. Wama woanya hokwan sɛ wo ne no bɛbom ayɛ asɛnka adwuma no. (1 Kor. 3:9) Nea woafa mu wɔ asetenam nti, sɛ afoforo rehu amane a, ebetumi ayɛ mmerɛw ama wo sɛ wobɛte wɔn ase. Wubetumi ayɛ nneɛma pii de aboa wɔn. Helen a yɛadi kan aka ne ho asɛm no nyaa mmoa, na seesei ɔno nso tumi boa afoforo. Ɔka sɛ: “Me a mensɛ hwee yi, Yehowa ama mahu sɛ ɔdɔ me na ɔnam me so nso boa afoforo.” Seesei, Helen ani agye sɛ ɔyɛ daa kwampaefo.

YEHOWA DE YƐN BƆNE KYƐ YƐN A, ƆPƐ SƐ YEGYE TOM

8. Awerɛkyekyesɛm bɛn na ɛwɔ Yesaia 1:18?

⁸ Yehowa asomfo bi wɔ hɔ a, bɔne a wɔyɛe wɔ wɔn asubɔ akyi anaa nea wɔyɛe ansa na wɔrebɔ asu mpo, ɛda so ara reteetee wɔn paa. Nanso ɛsɛ sɛ yɛkae sɛ, ɔdɔ kɛse a Yehowa wɔ ma yɛn nti na ɔde agyede no mae. Ɛsɛ sɛ yegye tom sɛ agyede no nti, Yehowa betumi de yɛn bɔne akyɛ yɛn. Yehowa ma yɛn awerɛhyem sɛ, sɛ yɛne no ‘toto nneɛma yiye’ c wie a, ommu yɛn bɔne ho akontaa bio. (Kenkan Yesaia 1:18.) Ɛyɛ yɛn dɛ paa sɛ Yehowa nkae bɔne a yɛayɛ atwam no! Nanso papa a yɛayɛ no de, ne werɛ mfi da.—Dw. 103:​9, 12; Heb. 6:10.

9. Bɔne a yɛayɛ atwam no, adɛn nti na ɛnsɛ sɛ yɛkɔ so dwinnwen ho?

⁹ Sɛ bɔne bi a woayɛ atwam reteetee wo a, yere wo ho fa w’adwene si nea woreyɛ no mprempren ne nea wobɛyɛ daakye no so. Momma yɛnhwɛ ɔsomafo Paul. Onuu ne ho sɛ bere bi ɔtan Kristofo no ani yayaayaw, nanso na onim sɛ Yehowa de ne bɔne akyɛ no. (1 Tim. 1:​12-15) Wohwɛ a, ɔkɔɔ so dwinnwen bɔne a na wayɛ atwam no ho? Nneɛma bi a bere bi ɔyɛe wɔ Yudasom mu a ɛma ogyee din no, wankɔ so annwinnwen ho. Enti ɛda adi sɛ bɔne a na wayɛ atwam no nso, wannwinnwen ho. (Filip. 3:​4-8, 13-15) Mmom, Paul yeree ne ho yɛɛ ne som adwuma, na ɔde n’adwene sii nea na ɛda n’anim no so. Ná Paul nim sɛ nea wayɛ atwam no, ɔrentumi nyɛ ho hwee. Enti wo nso, kae sɛ nea mmoa adi no, wɔadi kɔ. Nanso seesei de, wubetumi ayi Yehowa ayɛ na wode w’ani asi nea Yehowa bɛyɛ ama wo daakye no so.

10. Nea yɛyɛe bere bi a atwam no, sɛ ahaw obi a, dɛn na yebetumi ayɛ?

¹⁰ Bere bi a atwam no, sɛ woyɛɛ biribi ma ɛhaw afoforo a, ebia ebetumi ateetee wo. Dɛn na ebetumi aboa wo? Yɛ nea wubetumi biara fa siesie ɔhaw no, na fi wo komam pa wɔn kyɛw. (2 Kor. 7:11) Srɛ Yehowa sɛ ɔmmoa wɔn a wo nneyɛe ahaw wɔn no. Obetumi aboa wo ne wɔn nyinaa ma moakɔ so de anigye asom no na moanya asomdwoe.

11. Dɛn na yebetumi asua afi odiyifo Yona hɔ? (Hwɛ a ɛwɔ Ɔwɛn-Aban yi anim no nso.)

 ¹¹ Sua biribi fi mfomso a woadi no mu, na ma Yehowa nkyerɛ nea ɔde wo bɛyɛ. Momma yɛnhwɛ odiyifo Yona. Onyankopɔn somaa no sɛ ɔnkɔ Niniwe. Sɛ́ anka ɔbɛkɔ Niniwe no, ɔde n’ani kyerɛɛ baabi foforo koraa. Yehowa teɛɛ ne so, na osuaa biribi fii mfomso a odii no mu. (Yona 1:​1-4, 15-17; 2:​7-10) Yehowa antow no ankyene. Onyankopɔn san ka kyerɛɛ no sɛ ɔnkɔ Niniwe, na saa bere yi de, wantwentwɛn ne nan ase koraa na otiei. Ɛwom, ɛyɛɛ Yona yaw sɛ bere a edi kan no, odii mfomso a ɛte saa, nanso wamma ɛno ansiw no kwan sɛ afei de, ɔbɛyɛ nea Yehowa aka no.—Yona 3:​1-3.

YEHOWA NAM HONHOM KRONKRON NO SO KYEKYE YƐN WERƐ

12. Sɛ awerɛhosɛm bi to yɛn a, ɔkwan bɛn so na Yehowa ma yenya asomdwoe? (Filipifo 4:​6, 7)

¹² Sɛ awerɛhosɛm bi to yɛn a, Yehowa nam ne honhom kronkron no so kyekye yɛn werɛ. Momma yɛnhwɛ nea ɛtoo Ron ne Carol. Wɔn babarima kum ne ho yayaayaw. Wɔka sɛ: “Ná ɔhaw ne amane ato yɛn pɛn, nanso wei de, na yenhuu bi da. Ná yɛkɔ kɛtɛ so anadwo a, yentumi nna; yɛbɔɔ mpae saa ara. Afei, yɛtee nka paa sɛ yɛanya asomdwoe a Filipifo 4:​6, 7 ka ho asɛm no bi.” (Kenkan.) Sɛ worehyia ɔhaw kɛse bi a, wubetumi abɔ Yehowa mpae ara kosi sɛ wo ara wubehu sɛ woabɔ no mpae. (Dw. 86:3; 88:1) Kɔ so srɛ Yehowa sɛ ɔmma wo ne honhom kronkron. Ɔremmu n’ani ngu w’abisade so da.—Luka 11:​9-13.

13. Ɔkwan bɛn so na honhom kronkron betumi aboa yɛn ma yɛakɔ so de nokwaredi asom Yehowa? (Efesofo 3:16)

¹³ Ɔhaw kɛse bi a worehyia nti, w’abam abu anaa? Honhom kronkron betumi ahyɛ wo den ma woakɔ so de nokwaredi asom Yehowa. (Kenkan Efesofo 3:16.) Momma yɛnhwɛ nea ɛtoo onuawa bi a ne din de Flora. Ná ɔne ne kunu yɛ asɛmpatrɛwfo, ɛnna ne kunu no fii n’akyi, na ekowiee awaregyae mu. Flora ka sɛ: “Huammɔ a me kunu dii me no ma midii awerɛhow paa. Mebɔɔ Yehowa mpae sɛ ɔmma ne honhom kronkron no mmoa me na mintumi nnyina ɔhaw a ɛte saa ano. Ɔhaw a na mfiase no ayɛ sɛ bepɔw a na mintumi mforo no, Yehowa maa me ahoɔden ma mitumi foroe.” Flora gye di sɛ Onyankopɔn aboa no ma ɔde ne ho ato no so kɛse, na ɔhaw foforo biara a obehyia no, obekurakura no. Flora ka sɛ: “Dwom 119:32 no mu nsɛm fa me ho. Ɛhɔ ka sɛ: ‘Medi wo mmara nsɛm so ntɛm, efisɛ woma enya baabi tena wɔ me koma mu.’”

14. Yɛbɛyɛ dɛn ama Onyankopɔn honhom no aboa yɛn?

¹⁴ Sɛ wosrɛ Yehowa sɛ ɔmma wo honhom kronkron a, dɛn na ɛsɛ sɛ woyɛ? Yɛ nneɛma a ɛbɛma woanya Onyankopɔn honhom no. Ebi ne adesuakɔ ne asɛnkakɔ. Kenkan Bible da biara na dwinnwen ho na ama woanya Yehowa adwene. (Filip. 4:​8, 9) Sɛ worekan Bible no a, ɔhaw a wɔn a ɛka wɔn ho asɛm no hyiae no, dwinnwen ho na hwɛ sɛnea Yehowa boaa wɔn. Sandra a yɛadi kan aka ne ho asɛm no, ohyiaa ɔhaw akɛse ntoatoaso. Ɔka sɛ: “Yosef asɛm no hyɛ me nkuran paa. Ɔhaw a ohyiae ne ntɛnkyea a wɔbuu no no, wamma emu biara ansɛe ɔne Yehowa ayɔnkofa.”—Gen. 39:​21-23.

YEHOWA NAM YƐN NUANOM KRISTOFO SO KYEKYE YƐN WERƐ

15. Henanom na wɔbetumi akyekye yɛn werɛ, na ɔkwan bɛn na wɔbɛfa so ayɛ saa? (Hwɛ mfoni no nso.)

¹⁵ Sɛ yɛrehu amane a, yɛn nuanom Kristofo betumi ‘akyekye yɛn werɛ paa.’ (Kol. 4:11) Mmoa a yɛn nuanom de ma yɛn no yɛ  ɔkwan baako a Yehowa fa so ma yehu sɛ ɔdɔ yɛn. Yɛn nuanom Kristofo betumi ayɛ aso atie yɛn de akyekye yɛn werɛ, anaa hu a yebehu wɔn kɛkɛ koraa betumi akyekye yɛn werɛ. Wɔbetumi akenkan Bible mu asɛm bi a ɛhyɛ nkuran akyerɛ yɛn anaa wɔbetumi ne yɛn abɔ mpae. d (Rom. 15:4) Ɛtɔ da a, onua anaa onuawa bi betumi aboa yɛn ma yɛanya Yehowa adwene na yɛanyɛ biribi a ɛbɛsɛe yɛn asomdwoe. Afei nso, sɛ yɛwɔ ahohia mu a, yɛn nuanom Kristofo betumi ayɛ nneɛma pɔtee bi de aboa yɛn; ebia wɔbɛbrɛ yɛn aduan.

16. Sɛ yɛpɛ sɛ afoforo boa yɛn a, dɛn na ebia ebehia sɛ yɛyɛ?

¹⁶ Sɛ yɛpɛ sɛ afoforo boa yɛn a, ebia ebehia sɛ yɛka kyerɛ wɔn. Yɛn nuanom Kristofo dɔ yɛn na wɔpɛ sɛ wɔboa yɛn. (Mmeb. 17:17) Nanso ebia wɔrentumi nhu sɛnea yɛte nka anaa nea yehia. (Mmeb. 14:10) Sɛ ɔhaw bi reteetee wo a, wubetumi aka ho asɛm akyerɛ wo nnamfo a wugye wɔn di. Ma wɔnhu nea wopɛ sɛ wɔyɛ de boa wo. Asafo mu mpanyimfo a wɔyɛ wo nnamfo no, wubetumi aka sɛnea wote nka no akyerɛ wɔn mu bi. Anuanom mmea binom nso ahu sɛ, sɛ wɔka nea wɔrefa mu no kyerɛ anuanom mmea afoforo a wɔn ho akokwaw a, wɔtumi kyekye wɔn werɛ.

17. Sɛ yɛrepɛ nkuranhyɛ a, nneɛma a ebetumi ayɛ osiakwan no, ebi ne sɛn, na dɛn na yebetumi ayɛ wɔ ho?

 ¹⁷ Hwɛ na woantew wo ho. Ɛyaw a worefa mu nti, ebia w’ani rennye ho sɛ wo ne afoforo bɛbɔ. Ɛtɔ da a, ebia wo nuanom Kristofo rente wo ase, anaa ebia wɔbɛka nsɛm a ɛyɛ yaw akyerɛ wo. (Yak. 3:2) Sɛ wo nuanom pɛ sɛ wɔhyɛ wo nkuran a, mma saa nneɛma yi nnsiw wo kwan. Asafo mu panyin bi a ne din de Gavin a ɔwɔ adwenemhaw ka sɛ: “Mpɛn pii no, ade a mempɛ sɛ mɛyɛ koraa ne sɛ, me ne me nnamfo bedi nkɔmmɔ anaasɛ me ne wɔn bɛbɔ.” Nanso Gavin nni sɛnea ɔte nka no akyi, na ɔne anuanom bɔ. Ɔyɛ saa a, mpɛn pii no, ohu sɛ ɛboa no. Onuawa bi a ne din de Amy ka sɛ: “Nea mafa mu pɛn nti, ɛyɛ den ma me sɛ megye nnipa adi. Nanso merebɔ mmɔden sɛ mɛdɔ me nuanom na magye wɔn adi, efisɛ saa na Yehowa yɛ. Minim sɛ meyɛ saa a, ɛma Yehowa ani gye, na ɛma me nso m’ani gye.”

ƐBƆ A YEHOWA AHYƐ SƐ DAAKYE ƆBƐMA YƐN HO ATƆ YƐN NO, MA ƐNKYEKYE WO WERƐ

18. Dɛn na yebetumi ahwɛ kwan sɛ ebesi daakye, na dɛn na yebetumi ayɛ nnɛ?

¹⁸ Yebetumi anya awerɛhyem sɛ biribiara a ɛma yedi yaw na yɛteetee no, Yehowa beyi ne nyinaa afi hɔ ama yɛn ho atɔ yɛn. (Adi. 21:​3, 4) Saa bere no, ateetee a yɛafa mu no, “ɛremma komam bio.” (Yes. 65:17) Sɛnea yɛahu no, ɛnnɛ mpo yɛrehu amane a, Yehowa kyekye yɛn werɛ. Yehowa fa akwan bebree so kyekye yɛn werɛ, enti bɔ mmɔden gye ne nyinaa tom. Mma w’adwenem nnyɛ wo naa da sɛ Yehowa ‘dwen wo ho.’—1 Pet. 5:7.