Abantenten a na ɛwɔ Solomon asɔrefie no anim no, ɛhɔ na na wɔfa wura Kronkronbea hɔ. Kyerɛw Kronkron—Wiase Foforo Nkyerɛase biara a wɔyii no adi ansa na afe 2023 reba no kaa sɛ, “abantenten a ɛwɔ asɔredan no anim no, ne tenten ne asɔredan no tɛtrɛtɛ yɛ pɛ; ɛyɛ basafa 20, na efi soro besi fam yɛ basafa 120.” (2 Be. 3:4) Bible nkyerɛase afoforo nso ka sɛ, na abantenten no tenten yɛ basafa 120. Wei kyerɛ sɛ, na ne tenten yɛ mita 53 (anammɔn 175)!

Nanso, abantenten a na ɛwɔ Solomon asɔrefie no anim no, Kyerɛw Kronkron—Wiase Foforo Nkyerɛase a wɔtintimii afe 2023 no ka ho asɛm sɛ: ‘Ná efi soro besi fam yɛ basafa 20,’ anaa bɛyɛ mita 9 (anammɔn 30). a Nea enti a yɛayɛ saa nsakrae yi, yɛnhwɛ emu kakra.

Efi abantenten no soro besi fam no, 1 Ahene 6:3 nkyerɛ sɛ na ɛyɛ sei anaa sei. Bere a Yeremia rekyerɛw saa asɛm no, ɔkaa abantenten no tenten ne ne tɛtrɛtɛ ho asɛm, nanso efi soro besi fam de, wanka. Afei, nneɛma afoforo a ɛwɔ asɔrefie hɔ no, ɔkaa ho asɛm pii wɔ ti nson no mu. Ebi ne ɔsɛn kɛse a wɔde dade yɛe a wɔde nsu gu mu a wɔfrɛ no Ɛpo no, kɔbere trɔk du a wɔde twe nsu, ne kɔbere adum mmienu a esi abantenten no anim. (1 Ahe. 7:​15-37) Sɛ ɛyɛ ampa sɛ na abantenten no tenten boro mita 50 na na ɛware sen asɔrefie no koraa a, ɛnde adɛn nti na Yeremia anka sɛ efi soro besi fam yɛ sei anaa sei? Mfe pii akyi mpo, Yudafo abakɔsɛm akyerɛwfo kaa sɛ abantenten no, na ɛnware nsen Solomon asɔrefie no.

Nhomanimfo hwɛ asɔredan no a, wɔnnye nni sɛ na abantenten a ne tenten yɛ basafa 120 betumi abata ɔdan no ho ma ayɛ yiye. Tete no, adan atenten a na wɔde abo ne birikisi si no, na ase no trɛw paa, nanso wohwɛ ne soro no a, na ɛntrɛw saa. Asɔredan a na wɔsisi wɔ Egypt no, baabi a wɔfa wura mu no, wohwɛ n’afasu no a, saa ara na na ɛte. Nanso na Solomon asɔrefie no nte saa. Nhomanimfo kyerɛ sɛ na ɔdan no afasu no sin anim yɛ basafa 6, anaa mita 2.7 (anammɔn 9). Abakɔsɛm kyerɛwfo Theodor Busink a ɔka sɛnea na tete adan te ho asɛm ka sɛ: “[Baabi a wɔfa wura asɔredan no mu] no, sɛ wohwɛ afasu no sin anim a, ɛnyɛ ade a abantenten no tenten bedu basafa 120 da.”

Bere a ɔkyerɛwfo no rehwɛ tete Bible nsaano nkyerɛwee no so akyerɛw 2 Beresosɛm 3:4 no bi no, ɛbɛyɛ sɛ odii mfomso. Ɛwom sɛ tete nsaano nkyerɛwee no bi ka wɔ saa kyerɛwsɛm yi mu sɛ, efi abantenten no soro besi fam yɛ basafa “120.” Nanso nsaano nkyerɛwee afoforo a edi mu te sɛ Codex Alexandrinus a adi bɛboro mfe 1,500 ne Codex Ambrosianus a adi bɛboro mfe 1,400 no, ɛka sɛ ɛyɛ “basafa 20.” Adɛn nti na na ɔkyerɛwfo bi betumi adi mfomso akyerɛw “120”? Hebri nsɛmfua a wɔkyerɛ ase “ɔha” ne “basafa” no di nsɛ. Enti ebetumi aba sɛ ɔkyerɛwfo no rekyerɛw asɛmfua a wɔkyerɛ ase “basafa” no, ɛnna ɔkɔkyerɛw asɛmfua a wɔkyerɛ ase “ɔha” no.

Ɛwom, yɛrebɔ mmɔden sɛ yɛbɛte Solomon asɔrefie no ho nsɛm ase yiye, na yɛakyerɛ sɛnea na ɛte pɛpɛɛpɛ. Nanso nea ehia yɛn paa ne nea saa asɔrefie no gyina hɔ ma—ɛno ne honhom fam asɔrefie kɛse no. Ɛyɛ yɛn dɛ paa sɛ Yehowa ato nsa afrɛ n’asomfo nyinaa sɛ wɔmmɛsom no wɔ saa asɔrefie yi mu!—Heb. 9:​11-14; Adi. 3:12; 7:​9-17.