1. Sɛnea Malaki 3:16 kyerɛ no, nhoma bɛn na efi tete nyinaa Yehowa rekyerɛw, na dɛn na ɛwom?

 MFE mpempem pii ni na Yehowa fii ase kyerɛw nhoma titiriw bi. Nkurɔfo din na ɛwɔ saa nhoma no mu; ɔdansefo nokwafo Habel na ne din di kan. * (Luka 11:50, 51) Efi saa bere no reba nyinaa, Yehowa akɔ so de din no bi aka ho. Enti yɛrekasa yi, nnipa ɔpepem pii din na ɛwom. Bible frɛ saa nhoma no “nkae nhoma,” “nkwa nhoma” anaa “nkwa nhoma mmobɔwee.” Adesua yi mu no, yɛbɛfrɛ saa nhoma no “nkwa nhoma.”—Kenkan Malaki 3:16; Adi. 3:5; 17:8.

2. Henanom din na ɛwɔ nkwa nhoma no mu, na yɛbɛyɛ dɛn na wɔakyerɛw yɛn din wɔ saa nhoma no mu?

² Wɔn a wɔde osuro ne ahopopo som Yehowa, na Yehowa din da wɔn koma so no, wɔn na wɔn din wɔ saa nhoma titiriw yi mu. Saafo no betumi anya daa nkwa. Sɛ yenya Onyankopɔn Ba Yesu Kristo agyede afɔre no mu gyidi, na yɛyere yɛn ho ne Yehowa nya ayɔnkofa a emu yɛ den a, yɛn din betumi akɔ nkwa nhoma no mu. (Yoh. 3:16, 36) Sɛ yɛn anidaso ne sɛ yɛbɛkɔ soro oo, sɛ yɛbɛtena asaase so oo, yɛn nyinaa pɛ sɛ wɔkyerɛw yɛn din wɔ saa nhoma no mu.

3-4. (a) Mprempren sɛ yɛn din wɔ nkwa nhoma no mu a, ɛno kyerɛ sɛ yebenya daa nkwa anaa? Kyerɛkyerɛ mu. (b) Adesua yi ne nea edi hɔ no mu no, dɛn na yebesusuw ho?

³ Sɛ obi din wɔ nkwa nhoma no mu a, ɛno kyerɛ sɛ  ɔkwan biara so obenya daa nkwa anaa? Asɛm a Yehowa ka kyerɛɛ Mose wɔ Exodus 32:33 no ma yenya mmuae no. Yehowa kaa sɛ: “Nea wayɛ me bɔne no, ɔno na mɛpopa ne din afi me nhoma mu.” Wei kyerɛ sɛ, mprempren edin a ɛwɔ saa nhoma no mu no, Onyankopɔn betumi apopa. Ɛte sɛ nea Yehowa de pɛnsere na akyerɛw. (Adi. 3:5) Ɛsɛ sɛ yɛbɔ yɛn ho mmɔden ma yɛn din ka saa nhoma no mu kosi sɛ Yehowa bɛkyerɛw no afebɔɔ te sɛ nea ɔde pɛn akyerɛw.

⁴ Ebia wei bɛma nsɛmmisa bi aba yɛn tirim. Yɛbɛyɛ nhwɛso a, ebia yebebisa sɛ, wɔn a wɔn din wɔ nkwa nhoma no mu ne wɔn a wɔn din nnim no, dɛn na Bible ka fa wɔn ho? Bere bɛn na wɔn a wɔn din wɔ nkwa nhoma no mu no benya daa nkwa? Wɔn a wowui a wɔannya hokwan amfa ansua Yehowa ho ade da no nso ɛ? Wɔn din betumi aba nkwa nhoma no mu anaa? Adesua yi ne nea edi hɔ no bɛma yɛanya saa nsɛmmisa yi ho mmuae.

HENANOM NA WƆN DIN WƆ NHOMA NO MU?

5-6. (a) Sɛnea Filipifo 4:3 ma yehu no, wɔn a wɔn din wɔ nkwa nhoma no mu no, henanom na ɛka ho? (b) Bere bɛn na wɔbɛkyerɛw wɔn din wɔ nkwa nhoma no mu afebɔɔ?

⁵ Henanom din na ɛwɔ nkwa nhoma no mu? Nea ɛbɛma yɛanya saa asɛmmisa no ho mmuae no, yebesusuw nnipakuw nnum bi ho. Saa nnipakuw yi, ebinom din wɔ nkwa nhoma no mu, na ebinom nso din nnim.

⁶ Kuw a edi kan no mufo ne wɔn a wɔapaw wɔn sɛ wɔne Yesu nkodi ade wɔ soro no. Seesei wɔn din wɔ nkwa nhoma no mu anaa? Yiw. Yɛhwɛ ɔsomafo Paul asɛm a ɔkyerɛw kɔmaa ne “mfɛfo adwumayɛfo” a na wɔwɔ Filipi no a, wɔn a wɔasra  wɔn a wɔapaw wɔn sɛ wɔne Yesu nkodi ade no, seesei wɔn din wɔ nkwa nhoma no mu. (Kenkan Filipifo 4:3.) Sɛ wɔn din bɛka nkwa nhoma no mu a, gye sɛ wɔkɔ so di nokware. Enti ansa na wobewu anaa ansa na ahohiahia kɛse no befi ase no, wɔbɛma wɔn ahyɛnsode a etwa to. Wei bɛkyerɛ sɛ wɔakyerɛw wɔn din wɔ nkwa nhoma no mu afebɔɔ.—Adi. 7:3.

7. Nnipakuw kɛse a wɔka nguan foforo no ho no, sɛn na Adiyisɛm 7:16, 17 ma yehu bere a wɔbɛkyerɛw wɔn din wɔ nkwa nhoma no mu afebɔɔ?

⁷ Kuw a ɛtɔ so mmienu no ne nnipakuw kɛse a wɔka nguan foforo no ho no. Mprempren, wɔn din wɔ nkwa nhoma no mu anaa? Yiw. (Adi. 7:14) Yesu kaa sɛ wɔn a wɔte sɛ nguan yi bɛkɔ “daa nkwa mu.” (Mat. 25:46) Nanso ɛnyɛ sɛ wonyaa wɔn ti didii mu wɔ Armagedon ara, na wɔama wɔn daa nkwa. Wɔn din a ɛwɔ nkwa nhoma no mu no, ɛbɛyɛ te sɛ nea wɔde pɛnsere akyerɛw. Mfirihyia Apem Nniso no mu no, Yesu “bɛhwɛ wɔn, na ɔbɛkyerɛ wɔn kwan akɔ nkwa nsuti ho.” Wɔn a wɔde Kristo akwankyerɛ bɛyɛ adwuma no, awiei koraa no Yehowa bebu wɔn anokwafo na wakyerɛw wɔn din wɔ nkwa nhoma no mu afebɔɔ.—Kenkan Adiyisɛm 7:16, 17.

8. Henanom na wɔn din nni nkwa nhoma no mu, na dɛn na ɛbɛto wɔn?

⁸ Kuw a ɛtɔ so mmiɛnsa no ne mpɔnkye a wɔbɛsɛe wɔn wɔ Armagedon no. Wɔn din nni nkwa nhoma no mu. Yesu kaa sɛ ‘wɔbɛkɔ daa ɔsɛe mu.’ (Mat. 25:46) Onyankopɔn honhom maa Paul kaa sɛ “wɔn a wɔte saa no, wɔbɛsɛe wɔn afebɔɔ de atwe wɔn aso.” (2 Tes. 1:9; 2 Pet. 2:9) Wɔn a efi tete nyinaa wɔahyɛ da ayɛ bɔne atia honhom kronkron no, yebetumi aka sɛ wɔn nso, saa ara na ɛbɛto wɔn. Wɔrennya daa nkwa, mmom wɔbɛsɛe wɔn afebɔɔ. Ɛda adi pefee sɛ wɔrennya owusɔre. (Mat. 12:32; Mar. 3:28, 29; Heb. 6:4-6) Afei momma yɛnto yɛn bo ase nhwɛ akuw mmienu bi a wobenyan wɔn ama wɔabɛtena asaase so.

WƆN A WOBENYA OWUSƆRE

9. Sɛnea Asomafo Nnwuma 24:15 ka no, akuw mmienu bɛn na wobenyan wɔn ama wɔabɛtena asaase so, na nsonsonoe bɛn na ɛwɔ wɔn ntam?

⁹ Bible ma yehu nnipakuw mmienu bi a wobenyan wɔn a wɔwɔ anidaso sɛ wobetumi atena asaase so daa. Wɔne “atreneefo” ne “wɔn a wɔnyɛ atreneefo.” (Kenkan Asomafo Nnwuma 24:15.) “Atreneefo” no ne wɔn a wɔde nokwaredi som Yehowa bere a wɔte ase no. Nanso “wɔn a wɔnyɛ atreneefo” no de, wɔamfa nokwaredi ansom Yehowa. Nea ɛwom ne sɛ, mpɛn pii no na wɔn abrabɔ nye. Esiane sɛ akuw mmienu no nyinaa benya owusɔre nti, wohwɛ a, yebetumi aka sɛ wɔn din wɔ nkwa nhoma no mu anaa? Nea ɛbɛma yɛanya saa asɛmmisa no ho mmuae no, momma yensusuw kuw biara ho.

10. Adɛn nti na wobenyan “atreneefo” no, na hokwan bɛn na ebinom benya? (“Nsɛmmisa a Efi Akenkanfo Hɔ” a ɛfa wɔn a wobenyan wɔn ama wɔabɛtena asaase so ho no, hwɛ ɛno nso wɔ Ɔwɛn-Aban yi mu.)

¹⁰ Kuw a ɛtɔ so nnan ne “atreneefo” no. Ansa na wɔrewu no, na wɔakyerɛw wɔn din wɔ nkwa nhoma no mu. Bere a wowui no, wohwɛ a wɔpopaa wɔn din fii nkwa nhoma no mu anaa? Daabi, efisɛ Yehowa ani so de, wɔda so “te ase.” Yehowa ‘nyɛ awufo Nyankopɔn, na mmom ateasefo de, efisɛ n’ani so de, wɔn nyinaa te ase.’ (Luka 20:38) Wei kyerɛ sɛ bere a wobenyan atreneefo ama wɔabɛtena asaase so  no, na wɔn din da so ara wɔ nkwa nhoma no mu. Nanso mfiase no, ɛbɛyɛ te sɛ nea wɔde “pɛnsere” akyerɛw. (Luka 14:14) Atreneefo a wobenyan wɔn no, yebetumi aka sɛ wɔn mu bi benya hokwan asom sɛ “mpanyimfo wɔ asaase nyinaa so.”—Dw. 45:16.

11. Mmoa bɛn na “wɔn a wɔnyɛ atreneefo” no behia ansa na wɔatumi akyerɛw wɔn din wɔ nkwa nhoma no mu?

¹¹ Nea etwa to no, momma yɛnhwɛ kuw a ɛtɔ so nnum no. Wɔne “wɔn a wɔnyɛ atreneefo” no. Ebia esiane sɛ na wonnim nea Yehowa hwehwɛ fi wɔn hɔ nti, wɔammɔ bra pa ansa na wɔrewu. Enti wɔn din nni nkwa nhoma no mu. Nanso Onyankopɔn benyan wɔn ama wɔanya hokwan a ɛbɛma wɔakyerɛw wɔn din wɔ nkwa nhoma no mu. “Wɔn a wɔnyɛ atreneefo” yi behia mmoa paa. Wɔn mu bi dii bɔne paa, anaa wɔyɛɛ nneɛma a ani yɛ nyan ansa na wɔrewu. Enti ebehia sɛ wɔkyerɛkyerɛ wɔn na wɔatumi de Yehowa mmara a ɛteɛ no abɔ wɔn bra. Nea ɛbɛyɛ na wei atumi ayɛ yiye no, Onyankopɔn Ahenni no bɛhwɛ ama nkyerɛkyerɛ adwuma kɛse bi a yɛnyɛɛ bi saa da akɔ so.

12. (a) Henanom na ɛbɛkyerɛkyerɛ wɔn a wɔnyɛ atreneefo no? (b) Wɔn a wɔremfa nea wɔbɛkyerɛkyerɛ wɔn no nyɛ adwuma no, dɛn na ɛbɛto wɔn?

¹² Henanom na ɛbɛkyerɛkyerɛ wɔn a wɔnyɛ atreneefo no? Ɛyɛ nnipakuw kɛse no ne atreneefo a wobenyan wɔn no. Wɔn a wɔnyɛ atreneefo no, sɛ wɔbɛkyerɛw wɔn din wɔ nkwa nhoma no mu a, ebehia sɛ wɔyere wɔn ho ne Yehowa fa adamfo na wohyira wɔn ho so ma no. Nkɔso biara a wɔn a wɔnyɛ atreneefo yi benya no, Yesu Kristo ne wɔn a ɔne wɔn bebu atɛn no de wɔn ani bedi akyi paa. (Adi. 20:4) Obiara a ɔbɛsen ne kɔn apo saa mmoa no begye n’ani so; wadi mfe 100 mpo a, wɔbɛsɛe no. (Yes. 65:20) Yehowa ne Yesu tumi hu nea ɛrekɔ so wɔ nnipa komam. Enti wɔremma obiara kwan mma ɔnnsɛe wiase foforo no.—Yes. 11:9; 60:18; 65:25; Yoh. 2:25.

 NKWA WUSƆRE NE ATEMMU WUSƆRE

13-14. (a) Bere bi a atwam no, Yesu asɛm a ɛwɔ Yohane 5:29 no, sɛn na na yɛte ase? (b) Dɛn na ɛwɔ saa asɛm no mu a ɛsɛ sɛ yɛhyɛ no nsow?

¹³ Yesu san kaa wɔn a wobenyan wɔn aba asaase so ho asɛm. Yɛbɛyɛ nhwɛso a, ɔkaa sɛ: “Bere no reba a wɔn a wɔwɔ nkae ada mu nyinaa bɛte ne nne, na wɔapue. Wɔn a wɔyɛɛ papa no bɛkɔ nkwa wusɔre mu, na wɔn a wɔyɛɛ akyiwade no akɔ atemmu wusɔre mu.” (Yoh. 5:28, 29) Dɛn na na Yesu pɛ sɛ ɔkyerɛ?

¹⁴ Bere bi a atwam no, na yɛte Yesu asɛm yi ase sɛ, wɔn a wobenyan wɔn no, saa papa a wɔyɛe anaa akyiwade a wɔyɛe no, ɛyɛ biribi a ɛbɛkɔ so wɔ wɔn wusɔre akyi. Wei kyerɛ sɛ wonyan ebinom a, wɔbɛyɛ papa na ebinom nso ayɛ akyiwade. Nanso hyɛ no nsow sɛ, Yesu anka sɛ wɔn a afei ara na wɔafi nkae ada mu no, ebinom bɛyɛ papa na ebinom nso ayɛ akyiwade. Ɔde twam kabea na edii dwuma. Ɔkaa wɔn a “wɔyɛɛ papa” ne wɔn a “wɔyɛɛ akyiwade” ho asɛm. Wei kyerɛ sɛ wɔyɛɛ saa nneɛma no ansa na wɔrewu. Emu da hɔ, ɛnte saa? Ade yi, wɔremma obiara kwan mma ɔnnyɛ akyiwade wɔ wiase foforo no mu. Enti wutumi hu sɛ wɔn a wɔnyɛ atreneefo no yɛɛ akyiwade no ansa na wɔrewu. Sɛ saa a, ɛnde Yesu asɛm a ɛfa “nkwa wusɔre” ne “atemmu wusɔre” ho no kyerɛ sɛn?

15. Henanom na ebenya “nkwa wusɔre” no, na adɛn ntia?

¹⁵ Atreneefo a wɔyɛɛ papa ansa na wɔrewu no benya “nkwa wusɔre,” efisɛ wɔn din wɔ nkwa nhoma no mu dedaw. Wei kyerɛ sɛ “wɔn a wɔyɛɛ papa” a wobenyan wɔn a wɔaka wɔn ho asɛm wɔ Yohane 5:29 no, wɔn ara ne “atreneefo” a wobenyan wɔn a wɔn ho asɛm wɔ Asomafo Nnwuma 24:15 no. Saa ntease yi ne asɛm a ɛwɔ Romafo 6:7 no hyia. Ɛhɔ ka sɛ: “Nea wawu no, wɔde ne bɔne akyɛ no.” Bɔne a saa atreneefo yi yɛe bere a wɔte ase no, wowui no, Yehowa de kyɛɛ wɔn. Nanso nneɛma pa a wɔyɛe no de, ɔda so kae. (Heb. 6:10) Ɛno koraa no, ɛsɛ sɛ atreneefo a wɔanyan wɔn no kɔ so ara di nokware sɛnea ɛbɛyɛ a wɔn din remfi nkwa nhoma no mu.

16. Dɛn na “atemmu wusɔre” no kyerɛ?

¹⁶ Na wɔn a wɔyɛɛ akyiwade ansa na wɔrewu no nso ɛ? Ɛwom sɛ wowui no, wɔde wɔn bɔne kyɛɛ wɔn. Nanso wɔte ase no, wɔamfa nokwaredi ansom Yehowa. Wɔn din nni nkwa nhoma no mu. Enti wɔn a “wɔyɛɛ akyiwade” a wobenyan wɔn no, wɔn ara ne “wɔn a wɔnyɛ atreneefo” a wɔn ho asɛm wɔ Asomafo Nnwuma 24:15 no. Wɔn wusɔre no bɛyɛ “atemmu wusɔre.” * Bu a wobebu wɔn a wɔnyɛ atreneefo atɛn no kyerɛ sɛ, wɔbɛma wɔn kwan ma wɔde akyerɛ sɛ wobetie Onyankopɔn anaa wɔrentie no. (Luka 22:30) Ebegye bere na ada adi sɛ wɔfata sɛ wɔkyerɛw wɔn din wɔ nkwa nhoma no mu. Sɛ wɔn a wɔnyɛ atreneefo yi din bɛba nkwa nhoma no mu a, gye sɛ wogyae abrabɔ bɔne a kan no na wɔwom no, na wohyira wɔn ho so ma Yehowa.

17-18. Wɔn a wobenyan wɔn ma wɔabɛtena asaase so no, dɛn na ebehia sɛ wɔn mu biara yɛ, na “nnwuma” bɛn na Adiyisɛm 20:12, 13 ka ho asɛm no?

¹⁷ Wɔn a wobenyan wɔn no, kan no, sɛ  na wɔyɛ atreneefo oo, wɔnyɛ atreneefo oo, nhoma mmobɔwee foforo a wobebuebue mu wɔ mfirihyia 1,000 no mu no, ebehia sɛ wodi mmara a ɛwom no so. Ɔsomafo Yohane kaa nea ohui wɔ anisoadehu mu no ho asɛm sɛ: “Mihuu awufo, akɛse ne nketewa, sɛ wogyinagyina ahengua no anim, na wobuebuee nhoma mmobɔwee mu. Na wobuee nhoma mmobɔwee foforo mu; ɛno ne nkwa nhoma mmobɔwee no. Na wɔde nsɛm a wɔakyerɛw wɔ nhoma mmobɔwee ahorow no mu no buu awufo no atɛn sɛnea wɔn nnwuma te.”—Adi. 20:12, 13.

¹⁸ “Nnwuma” bɛn na wobegyina so abu wɔn a wobenyan wɔn no atɛn? Wohwɛ a, ɛbɛyɛ nnwuma a wɔyɛe ansa na wɔrewu anaa? Daabi! Kae sɛ bere a wowui no, wɔde wɔn bɔne kyɛɛ wɔn. Enti ɛha yi, “wɔn nnwuma” no rentumi nkyerɛ nneɛma a wɔyɛe ansa na wɔrewu. Mmom, yɛbɛka a, ntetee a wobenya wɔ wiase foforo no mu no, nea wɔbɛyɛ wɔ ho no, ɛno na wɔn nnwuma no begyina hɔ ama. Mmarima anokwafo te sɛ Noa, Samuel, Dawid, ne Daniel mpo, ebehia sɛ wosua Yesu Kristo ho ade na wonya n’afɔrebɔ no mu gyidi. Ɛnde, wɔn a wɔnyɛ atreneefo no de, wɔwɔ nneɛma pii sua!

19. Wɔn a wɔbɛpo hokwan fɛfɛɛfɛ yi, dɛn na ɛda hɔ retwɛn wɔn?

¹⁹ Wɔn a wɔbɛpo hokwan fɛfɛɛfɛ yi, dɛn na ɛda hɔ retwɛn wɔn? Adiyisɛm 20:15 ka sɛ: “Obiara a wɔanhu no wɔ nkwa nhoma no mu no, wɔtow no too ogya tare no mu.” Anokwa, wɔbɛsɛe wɔn afebɔɔ. Wei nti, ehia paa sɛ, yɛyɛ nea yebetumi biara ma wɔkyerɛw yɛn din wɔ nkwa nhoma no mu, na yɛhwɛ nso sɛ ɛremfi mu da!

20. Adwuma titiriw bɛn na ɛbɛkɔ so wɔ Mfirihyia Apem Nniso no mu? (Hwɛ mfoni a ɛwɔ Ɔwɛn-Aban yi anim no.)

²⁰ Mfirihyia Apem Nniso no mu bɛyɛ anika sɛ! Nkyerɛkyerɛ adwuma kɛse bi a yɛnyɛɛ bi saa da bɛkɔ so. Afei nso, ɛbɛyɛ bere a atreneefo ne wɔn a wɔnyɛ atreneefo no, wɔbɛhwehwɛ wɔn abrabɔ mu. (Yes. 26:9; Aso. 17:31) Sɛn na saa nkyerɛkyerɛ adwuma yi bɛkɔ so? Adesua a edi hɔ no bɛboa yɛn ma yɛate nkyerɛkyerɛ adwuma yi ase, na yɛakyerɛ ho anisɔ.