1-2. Samson ho asɛm a ɛwɔ Bible mu no, adɛn nti na ɛsɛ sɛ ɛho hia yɛn?

 SƐ WOTE edin Samson a, dɛn na ɛba w’adwenem? Ebia nea ɛba w’adwenem ne ɔbarima bi a na ne ho yɛ den paa. Sɛ saa a, ɛyɛ ampa. Nanso Samson sii gyinae bɔne bi a ɛkɔfaa nsunsuanso bɔne brɛɛ no. Ne nyinaa mu no, Yehowa de n’adwene sii Samson nokwaredi so, na ɔma wɔkyerɛw ho asɛm wɔ Bible mu na aboa yɛn.

² Yehowa faa Samson so yɛɛ nneɛma a ɛyɛ nwanwa de boaa ne man Israel. Samson wu akyi mfe pii no, mmarima a na wɔwɔ gyidi soronko no, Yehowa maa ɔsomafo Paul de Samson din kaa ho. (Heb. 11:​32-34) Samson nhwɛso no betumi ahyɛ yɛn nkuran. Bere a na nneɛma nkɔ yiye mpo no, ɔde ne ho too Yehowa so. Adesua yi mu no, yɛbɛhwɛ nea yebetumi asua afi nea Samson yɛe no mu, na yɛahwɛ sɛnea ne nhwɛso no betumi ahyɛ yɛn nkuran.

3. Adwuma bɛn na Yehowa de maa Samson?

³ Bere a wɔwoo Samson no, na Filistifo na edi Israel man no so, na na wɔreteetee wɔn paa. (Atem. 13:1) Israelfo no huu amane paa, efisɛ Filistifo no dii wɔn ani. Enti, Yehowa paw Samson sɛ ɔno na “obedi anim agye Israel afi Filistifo nsam.” (Atem. 13:5) Ná wei nyɛ adwuma ketewa! Nea ɛbɛyɛ na Samson atumi ayɛ saa adwumasono no, na ɛsɛ sɛ ɔde ne ho to Yehowa so.

4. Sɛn na Yehowa boaa Samson ma ogyee ne ho fii Filistifo no nsam? (Atemmufo 15:​14-16)

 ⁴ Sɛnea Samson de ne ho too Yehowa so na Yehowa boaa no no, momma yɛnhwɛ ho nhwɛso bi. Bere bi, Filistifo asraafo bi kɔe sɛ wɔrekɔkyere Samson wɔ Lehi; ɛbɛyɛ sɛ na ɛwɔ Yuda asaase so. Ná Yuda mmarima no suro, enti wɔyɛɛ wɔn adwene sɛ wɔde Samson bɛma atamfo no. Samson ankasa nkurɔfo de nhama mmienu a ɛyɛ foforo kyekyeree no papee de no kɔmaa Filistifo no. (Atem. 15:​9-13) Nanso “Yehowa honhom maa” Samson “ahoɔden,” na ɔtetew nhama no fii ne nsa ho. Afei, “ohuu afurum bi a owui nkyɛe apantan,” na ɔfae, na ɔde kunkum Filistifo mmarima 1,000!—Kenkan Atemmufo 15:​14-16.

5. Ɔkwan bɛn so na Samson kyerɛe sɛ ɔwɔ Yehowa mu ahotoso?

⁵ Adɛn nti na Samson de afurum apantan kunkum Filistifo no? Afurum apantan a ɔde dii dwuma no de, yɛbɛka a, ɛyɛ nwanwa! Ɛda adi sɛ na Samson nim sɛ akode biara a ne nsa besom no, Yehowa betumi aboa no ma ɔde adi Filistifo no so nkonim. Nea saa ɔbarima nokwafo yi nsa soo mu no, ɛno na ɔde dii dwuma maa Yehowa apɛde yɛɛ hɔ. Ɛda adi pefee sɛ, esiane sɛ Samson de ne ho too Yehowa so nti, ɔboaa no ma odii Filistifo no so nkonim.

6. Sɛ wɔma yɛn dwumadi bi wɔ Yehowa som mu a, dɛn na yebetumi asua afi Samson hɔ?

⁶ Yɛn nso, dwumadi biara a Yehowa de bɛhyɛ yɛn nsa no, sɛ ɛyɛ den sɛ dɛn mpo a, obetumi ama yɛn ahoɔden ma yɛde ayɛ. Onyankopɔn betumi afa ɔkwan bi so aboa yɛn ma ayɛ yɛn nwanwa. Nya awerɛhyem sɛ, sɛnea Yehowa maa Samson ahoɔden no, wo nso, sɛ wode wo ho to no so a, ɔbɛboa wo ma woayɛ n’apɛde.—Mmeb. 16:3.

7. Nhwɛso bɛn na ɛkyerɛ sɛ ɛho hia sɛ yɛhwehwɛ Yehowa akwankyerɛ?

⁷ Anuanom a wɔresisi asafo adan no, wɔn mu bebree akyerɛ sɛ wɔwɔ Yehowa mu ahotoso. Bere bi a abɛsen kɔ no,  sɛ asafo no pɛ sɛ esi Ahenni Asa anaa dan foforo biara a, mpɛn pii no, anuanom no ara na na wɔyɛ ho plan na wɔsan si. Nanso eduu baabi no, esiane sɛ na nnipa pii reba Yehowa ahyehyɛde no mu nti, ɛho behiae sɛ wɔyɛ nsakrae. Anuanom mmarima a edi nneɛma anim no hwehwɛɛ Yehowa akwankyerɛ na wɔsɔɔ akwan foforo hwɛe. Ebi ne sɛ wɔbɛtotɔ adan na wɔasiesie. Robert a nnansa yi waboa ma yɛasisi asafo adan bebree wɔ wiase nyinaa no ka sɛ: “Mfiase no, na ɛyɛ den ma ebinom sɛ wɔbegye akwankyerɛ foforo yi atom.” Ɔtoa so sɛ: “Seesei, ɛsono ɔkwan a yɛfa so yɛ no no koraa, ɛnna ɛsono nea yɛayɛ fi teteete no. Nanso na anuanom ayɛ krado sɛ wɔbegye nsakrae no atom. Biribiara kyerɛ sɛ Yehowa rehyira saa nsakrae yi so.” Akwan a Yehowa nam so rekyerɛ ne nkurɔfo kwan ma wɔayɛ n’apɛde no, wei yɛ ɛho nhwɛso baako pɛ. Ɛwom ara a, ehia sɛ yɛn mu biara bisa ne ho sɛ, ‘Mema Yehowa kyerɛ me kwan, na nsakrae biara a ɛbɛba ne som mu no, migye tom anaa?’

8. Bere bi a sukɔm dee Samson paa no, dɛn na ɔyɛe?

⁸ Ebia wokae mmere bi nso a Samson yɛɛ nneɛma bi a ɛyɛ nwanwa. Ɔno nko ara kum gyata, na akyiri yi okunkum Filistifo mmarima 30 wɔ wɔn kurow Askelon mu. (Atem. 14:​5, 6, 19) Ná Samson nim sɛ ɛnyɛ Yehowa a, nea ɔyɛe no, emu biara nni hɔ a anka obetumi ayɛ da. Wei ho nhwɛso baako ni. Bere bi a okunkum Filistifo 1,000 wiei no, osukɔm dee no paa. Dɛn na ɔyɛe? Sɛ́ anka ɔno ara bɛkɔ akɔhwehwɛ nsu anom no, osu frɛɛ Yehowa sɛ ɔmmoa no.—Atem. 15:18.

9. Bere a Samson su frɛɛ Yehowa no, sɛn na ɔboaa no? (Atemmufo 15:19)

⁹ Yehowa tiee Samson sufrɛ no, na ɔyɛɛ anwanwade ma onyaa baabi a obenya nsu. Bere a Samson nom nsu no bi no, “ɔsan nyaa ahoɔden, na ne ho san sisii ne ho so.” (Kenkan Atemmufo 15:19.) Mfe bi akyi a Yehowa maa odiyifo Samuel kyerɛw Atemmufo nhoma no, ɛda adi sɛ na saa nsu no da so ara wɔ hɔ. Israelfo a wɔhuu saa nsu no, ɛbɛyɛ sɛ ɛkaee wɔn sɛ, sɛ Onyankopɔn asomfo anokwafo kɔ ahokyere mu a, wɔbetumi de wɔn ho ato no so ma waboa wɔn.

10. Sɛ yɛpɛ sɛ Yehowa boa yɛn a, dɛn na ɛsɛ sɛ yɛyɛ? (Hwɛ mfoni no nso.)

¹⁰ Ɛmfa ho ɔdom akyɛde biara a yɛwɔ anaa nea yɛatumi ayɛ wɔ Yehowa som mu biara no, bere nyinaa ɛsɛ sɛ yɛhwehwɛ Yehowa mmoa. Ɛsɛ sɛ yɛbrɛ yɛn ho ase na yegye tom sɛ dwumadi biara a Yehowa de bɛma yɛn no, sɛ yebetumi ayɛ a, gye sɛ yɛde yɛn ho to no so. Bere a Samson nom nsu a Yehowa de maa no no, onyaa ahoɔden. Yɛn nso, mmoa biara a Yehowa de bɛma yɛn no, sɛ yegye tom a, ɛbɛma yɛatumi ayɛ n’apɛde.—Mat. 11:28.

11. Dɛn na yɛyɛ a ɛbɛkyerɛ sɛ yɛde yɛn ho ato Yehowa so sɛ ɔmmoa yɛn? Ma ho nhwɛso.

¹¹ Momma yɛnhwɛ yɛn nua bi a ne din de Aleksey a ɔwɔ Russia. Russia aban no retan n’ani denneennen. Ɔtan a emu yɛ den yi nyinaa akyi no, dɛn na aboa no ma watumi agyina mu? Ɔne ne yere wɔ nhyehyɛe a wɔde sua Bible daa na wɔde som Yehowa. Ɔka sɛ: “Mebɔ mmɔden sɛ mɛyɛ me kokoam adesua na makenkan Bible daa. Anɔpa biara, me ne me yere susuw daa asɛm no ho, na yebom bɔ Yehowa mpae.” Dɛn na yebetumi asua afi  saa asɛm yi mu? Sɛ́ anka yebegye yɛn ho adi no, ɛsɛ sɛ yɛde yɛn ho to Yehowa so mmom. Yɛbɛyɛ no sɛn? Ɛne sɛ daa yebesua Bible, yɛbɛbɔ mpae, akɔ adesua ne asɛnka de ahyɛ yɛn gyidi den. Yɛyɛ saa a, Yehowa nso bɛboa yɛn ma yɛakɔ so asom no. Sɛnea ɔhyɛɛ Samson den no, yɛn nso obetumi ahyɛ yɛn den.

12. Gyinae bɔne bɛn na Samson sii, na adɛn nti na wei nte sɛ aware nhyehyɛe a ɔne Filistini bea no yɛe no?

¹² Ná Samson tɔ sin te sɛ yɛn ara, enti ɛtɔ da a, na osisi gyinae bɔne. Gyinae bi a osii kɔfaa nsunsuanso bɔne brɛɛ no. Bere a Samson bɛyɛɛ ɔtemmufo wɔ Israel no, eduu baabi no, “n’ani begyee ɔbea bi ho wɔ Sorek Bon mu. Ɔbea no din de Delila.” (Atem. 16:4) Ansa na Samson ani rebegye Delila ho no, odii kan ne Filistini bea bi yɛɛ aware nhyehyɛe. Saa aware nhyehyɛe no, na “Yehowa nsa wom,” efisɛ na Yehowa ‘rehwehwɛ kwan a ɔbɛfa so anya Filistifo no.’ Akyiri yi, Samson kɔɔ tuutuuni bea bi fie wɔ Filistifo kurow Gasa mu. Saa bere no, Onyankopɔn maa Samson ahoɔden ma otuu kurow no apon soa kɔe, na wei maa kurow no ano kwan daa hɔ. (Atem. 14:​1-4; 16:​1-3) Nanso Delila asɛm no de, ɛbɛyɛ sɛ na ɛyɛ soronko efisɛ ɛda adi sɛ na ɔyɛ Israelni.

13. Sɛn na Delila twetwee Samson kɔɔ bɔne mu?

¹³ Filistifo no ka kyerɛɛ Delila sɛ, sɛ ɔboa wɔn ma wɔn nsa ka Samson a, wɔbɛma no sika kɛse, na ɔno nso penee so. Wohwɛ a, ɛbɛyɛ sɛ Delila ho dɔ na na asisiw Samson aso ara ma enti wanhu nea na Delila pɛ sɛ ɔyɛ anaa? Yɛrentumi nsi no pi, nanso Delila kɔɔ so guan Samson  ho sɛ ɔnkyerɛ no baabi a n’ahoɔden no fi. Ɔyɛe ara ma ewiee ase no, Samson ka kyerɛɛ no. Awerɛhosɛm ne sɛ, mfomso a Samson dii no maa n’ahoɔden no fii ne nsa, na ɔne Yehowa ntam sɛee saa bere no.—Atem. 16:​16-20.

14. Samson gyee Delila dii no, nsunsuanso bɔne bɛn na ɛde brɛɛ no?

¹⁴ Esiane sɛ Samson amfa ne ho anto Yehowa so, na ogyee Delila dii nti, ɛkɔfaa nsunsuanso bɔne brɛɛ no. Filistifo no kyeree Samson, na wɔtutuu n’ani. Wɔde no kɔtoo afiase wɔ Gasa, na wɔma ɔyɛɛ akoa a ɔyam hwiit. Gasa kurow no na bere bi Samson kotutuu n’apon no. Bere bi a Filistifo no redi wɔn afahyɛ bi no, wɔde no baa hɔ bedii ne ho agorɔ. Wɔbɔɔ afɔre kɛse maa wɔn nyame Dagon, efisɛ na ɛyɛ wɔn sɛ ɔno na ɔmaa wɔn nsa kaa Samson. Wɔkɔfaa Samson fii afiase hɔ baa apontow no ase sɛ “ommegyigye wɔn ani.”—Atem. 16:​21-25.

15. Dɛn na Samson yɛe a ɛkyerɛ sɛ ɔsan de ne ho too Yehowa so? (Atemmufo 16:​28-30) (Hwɛ mfoni a ɛwɔ Ɔwɛn-Aban yi anim no.)

¹⁵ Samson dii mfomso kɛse nanso wamma n’abam ammu. Ɔhwehwɛɛ kwan a ɔbɛfa so ako atia Filistifo no, efisɛ ɛno ne adwuma a na Onyankopɔn pɛ sɛ ɔyɛ. (Kenkan Atemmufo 16:​28-30.) Samson srɛɛ Yehowa sɛ: ‘Ma mintua Filistifo no ka.’ Nokware Nyankopɔn no tiee Samson adesrɛ no, na ɔsan maa no ahoɔden soronko. Ɛno nti, Samson tumi kunkum Filistifo bebree saa bere no sen bere biara.

16. Mfomso a Samson dii no, dɛn na yebetumi asua afi mu?

¹⁶ Ɛwom, mfomso a Samson dii no kɔfaa nsunsuanso bɔne brɛɛ no, nanso wannyae sɛ ɔbɛyɛ Yehowa apɛde. Yɛn nso, sɛ yedi mfomso bi mpo na ehia sɛ wɔka yɛn anim anaa hokwan bi a yɛwɔ fi yɛn nsa a, ɛnsɛ sɛ yɛn abam bu. Kae sɛ, yedi mfomso mpo a, Yehowa ntow yɛn nkyene. (Dw. 103:​8-10) Yɛn mfomso nyinaa akyi no, Yehowa betumi ahyɛ yɛn den ma yɛayɛ n’apɛde sɛnea ɔyɛ maa Samson no.

17-18. Dɛn na w’ani gye ho wɔ Michael suahu no ho? (Hwɛ mfoni no nso.)

¹⁷ Momma yɛnhwɛ onua aberantewa bi a ne din de Michael. Ná ɔmfa Yehowa som nni agorɔ koraa; na ɔyɛ ɔsomfo san  yɛ daa kwampaefo. Nanso awerɛhosɛm ne sɛ odii mfomso. Ɛbaa saa no, hokwan a ɔwɔ wɔ asafo no mu no, ne nyinaa bɔɔ no. Ɔka sɛ: “Ebesi saa bere yi, na biribiara rekɔ yiye ma me wɔ Yehowa som mu. Nanso prɛko pɛ, ɛyɛɛ te sɛ nea makɔpem ban. Mannya adwene da sɛ Yehowa bɛtow me akyene. Nanso sɛnea na me ne ne ntam te no, ɛyɛɛ me sɛ anhwɛ a merennya no saa bio. Anaa sɛnea na mekeka me ho wɔ ne som mu no, anhwɛ a na mantumi anyɛ no saa bio.”

¹⁸ Anigyesɛm ne sɛ, Michael amma n’abam ammu. Ɔde ka ho sɛ: “Nea ɛbɛyɛ na masiesie me ne Yehowa ntam no, mede sii m’ani so sɛ daa mɛbɔ no mpae, mesua ade na madwinnwen ho.” Bere bi akyi no, Michael san nyaa hokwan a na ɔwɔ wɔ asafo no mu no. Seesei, ɔyɛ asafo mu panyin ne daa kwampaefo. Ɔka sɛ: “Mmoa ne nkuranhyɛ a minya fii anuanom hɔ, ɛnkanka asafo mu mpanyimfo no hɔ no, ɛboaa me ma mihui sɛ Yehowa da so ara dɔ me. Seesei, metumi de ahonim pa asom wɔ asafo no mu bio. Nea mefaa mu yi ama mahu sɛ, obiara a obefi ne komam anu ne ho no, Yehowa de ne bɔne bɛkyɛ no.” Sɛ yɛadi mfomso mpo a, yebetumi anya awerɛhyem sɛ Yehowa betumi ama yɛayɛ n’apɛde na wahyira yɛn. Nanso sɛ wei betumi ayɛ yiye a, gye sɛ yɛyɛ nea yebetumi biara siesie yɛn akwan na yɛkɔ so de yɛn ho to Yehowa so.—Dw. 86:5; Mmeb. 28:13.

19. Sɛn na Samson nhwɛso no ahyɛ wo den?

¹⁹ Nsɛm a esisii wɔ Samson asetenam no, yɛasusuw emu kakraa bi ho wɔ adesua yi mu. Ná ɔtɔ sin, nanso bere a Delila guan ne ho ara ma odii mfomso mpo no, wamma n’abam ammu, mmom ɔkɔɔ so som Yehowa. Yehowa nso antow no ankyene. Onyankopɔn san maa Samson ahoɔden ma ɔyɛɛ adwuma a ɔde hyɛɛ ne nsa no. Ná Yehowa da so ara bu no sɛ ɔbarima a ɔwɔ gyidi soronko, enti anokwafo a wɔn din wɔ Hebrifo ti 11 no, ɔma wɔde ne din kaa ho. Yɛn soro Agya a ɔdɔ yɛn a yɛsom no no, sɛ yehu sɛ n’ani gye ho paa sɛ ɔhyɛ yɛn den, ɛnkanka bere a yɛayɛ mmerɛw no a, ɛhyɛ yɛn nkuran paa! Enti sɛnea Samson yɛe no, momma yɛn nso yɛnsrɛ Yehowa sɛ: ‘Mepa wo kyɛw, kae me, na hyɛ me den.’—Atem. 16:28.