1. Bere a Yesu maa Petro tumi yii nam bebree no, dɛn na Petro yɛe?

 DA KORO anadwo bi, Petro kɔɔ po sɛ ɔrekoyi nam, nso anadwo mu no nyinaa, wannya hwee. Nanso ɛhɔ ara na Yesu ka kyerɛɛ no sɛ: “Pia kɔ baabi a emu dɔ, na mungu mo asau no mfa nyi nam.” (Luka 5:4) Ná Petro nnye nni sɛ obenya nam no bi, nanso ɔyɛɛ nea Yesu kae no. Bere a Petro ne wɔn a ɛka ne ho no guu asau no, wɔyii mpataa pii maa asau no mpo fii ase tetewee. Bere a wɔhui sɛ ɛyɛ anwanwade na Yesu ayɛ no, wɔn “ho dwiriw wɔn.” Petro teɛɛm sɛ: “Awurade, fi me nkyɛn kɔ, na meyɛ ɔdebɔneyɛfo.” (Luka 5:​6-9) Ɛbɛyɛ sɛ Petro tee nka mpo sɛ ɔmfata sɛ ɔbɛn Yesu.

2. Sɛ yesua Petro ho ade a, adɛn nti na ɛbɛboa yɛn?

² Nokwasɛm na Petro kae no, na ɔyɛ “ɔdebɔneyɛfo” ampa. Bible ma yehu sɛ, ɛtɔ mmere bi a, na ɔka nsɛm bi anaa ɔyɛ nneɛma bi a akyiri yi, wobɛhwɛ na wanu ne ho. Wo nso, ɛtɔ da a wote nka te sɛ Petro anaa? Wowɔ mmerɛwyɛ anaa sintɔ bi a ayɛ koankɔ a daa ɛteetee wo anaa? Sɛ saa a, sɛ wusua Petro ho ade a, ɛbɛma woahu sɛ anidaso wɔ hɔ. Adɛn nti na yɛreka saa? Susuw wei ho hwɛ: Petro mmerɛwyɛ ho asɛm a ɛwɔ Bible mu no, anka Yehowa betumi ama wɔayi afi mu. Nanso Onyankopɔn ma wɔkyerɛw too hɔ sɛnea ɛbɛyɛ a yebetumi asua biribi afi mu. (2 Tim. 3:​16, 17) Ná Petro wɔ mmerɛwyɛ ne atenka te sɛ yɛn ara. Enti sɛ yesua ne ho ade a, ɛbɛboa yɛn ma yɛahu sɛ Yehowa nhwehwɛ pɛyɛ mfi yɛn hɔ. Yehowa pɛ sɛ yɛkɔ so yere yɛn ho ɛmfa ho sɛ yɛwɔ mmerɛwyɛ no.

3. Adɛn nti na ɛnsɛ sɛ yɛpa abaw?

³ Sɛ yɛpɛ sɛ yedi mmerɛwyɛ bi so a, adɛn nti na ɛnsɛ sɛ yɛpa abaw? Wɔtaa bu bɛ bi sɛ, nkakrankakra na akokɔ de  nom nsu. Yɛbɛyɛ nhwɛso a, sɛ obi pɛ sɛ osua sanku bɔ a, ebetumi agye no mfe pii. Bere a ɔresua bɔ no, obetumi adi mfomso bebree, nanso sɛ wannyae na ɔkɔ so ara bɔ a, obehu bɔ yiye. Sɛ ohu sanku no bɔ yiye mpo a, ɛwom ara a, obetumi adi mfomso. Nanso, onnyae bɔ. Yɛn nso, sɛ yɛatumi adi mmerɛwyɛ bi so mpo a, ɛwom ara a, ebetumi asan ayi ne ti. Nanso ɛnsɛ sɛ yɛpa abaw; ɛsɛ sɛ yɛkɔ so ara yɛ ho adwuma nkakrankakra. Yɛn nyinaa, ɛtɔ da a, yetumi ka asɛm bi anaa yɛyɛ biribi a, akyiri yi wobɛhwɛ na yɛanu yɛn ho. Nanso sɛ yɛampa abaw a, Yehowa bɛboa yɛn ma yɛakɔ so ayɛ nsakrae biara a ehia. (1 Pet. 5:10) Petro dii mfomso pii, nanso wampa abaw. Momma yɛnhwɛ sɛnea ne nhwɛso no betumi aboa yɛn. Petro mfomso nyinaa akyi no, sɛnea Yesu nyaa tema maa no no, ebetumi akanyan yɛn ma yɛakɔ so asom Yehowa.

4. Yɛhwɛ asɛm a ɛwɔ Luka 5:​5-10 no a, asɛm bɛn na Petro ka faa ne ho, nanso awerɛhyem bɛn na Yesu de maa no?

⁴ Nea enti a Petro kaa sɛ ɔyɛ “ɔdebɔneyɛfo” anaa bɔne ko a na ɛwɔ n’adwenem no, Kyerɛwnsɛm no nka. (Kenkan Luka 5:​5-10.) Nanso ɛbɛyɛ sɛ na wadi mfomso akɛse bi. Yesu hui sɛ Petro suro, efisɛ asɛ na obu ne ho abomfiaa. Nanso na Yesu nim sɛ Petro betumi asom Yehowa akosi awiei. Enti ɔka kyerɛɛ Petro sɛ mma ‘onnsuro.’ Gyidi a na Yesu wɔ wɔ Petro mu no sesaa n’asetena. Akyiri yi, Petro ne ne nua Andrea gyaee mpataayi adwuma no, na wɔde wɔn bere nyinaa bedii Mesia no akyi. Saa gyinae a wɔsii no ma wɔnyaa nhyira pii.—Mar. 1:​16-18.

5. Bere a Petro amma ne mmerɛwyɛ ammu n’abam na okodii Yesu akyi no, nhyira bɛn na onyae?

⁵ Bere a Petro kodii Kristo akyi no, ohuu anwanwade pii a ɔyɛe no. Ohui sɛ Yesu saa nkurɔfo yare, otuu ahonhommɔne, na onyan awufo mpo. b (Mat. 8:​14-17; Mar. 5:​37, 41, 42) Afei nso, anisoadehu a na ɛkyerɛ nea Yesu bɛyɛ wɔ Onyankopɔn Ahenni mu daakye no, ohuu bi, na enyaa ne so tumi paa. (Mar. 9:​1-8; 2 Pet. 1:​16-18) Nneɛma a Petro hui no, sɛ wammedi Yesu akyi a, anka ɔrenhu da. Ɛbɛyɛ sɛ ɛyɛɛ no dɛ paa sɛ wamma ne mmerɛwyɛ no ammu n’abam amma saa nhyira yi nyinaa ammɔ no!

6. Wohwɛ a, Petro tumi dii ne mmerɛwyɛ so a wammrɛ anaa? Kyerɛkyerɛ mu.

 ⁶ Ɛmfa ho nea na Petro ahu na wate nyinaa akyi no, na ne mmerɛwyɛ da so ara reteetee no. Momma yɛnhwɛ ɛho nhwɛso kakra. Bere a Yesu kyerɛɛ sɛnea obehu amane na wawu ama Bible nkɔmhyɛ abam no, Petro kaa n’anim. (Mar. 8:​31-33) Afei nso, Petro ne asomafo a aka no, na wɔtaa gye akyinnye wɔ wɔn mu nea ɔyɛ kɛse ho. (Mar. 9:​33, 34) Anadwo a ade rebɛkye ama Yesu awu no, Petro tow hyɛɛ ɔbarima bi so twaa n’aso fii hɔ. (Yoh. 18:10) Saa anadwo no ara, ehu kaa no ara ma ɔkaa no mprɛnsa sɛ onnim Yesu. (Mar. 14:​66-72) Wei maa Petro sui paa.—Mat. 26:75.

7. Yesu wusɔre akyi no, hokwan bɛn na Petro nyae?

⁷ Ná Petro abam abu paa, nanso Yesu anyi ne baako anhyɛ ne nsa. Bere a Yesu nyan fii awufo mu no, ɔmaa Petro nyaa hokwan a ɔde bɛkyerɛ sɛ ɔda so ara dɔ no. Yesu ka kyerɛɛ Petro sɛ ɔnhwɛ ne nguan. (Yoh. 21:​15-17) Petro nso ampopo ne ti. Pentekoste da no, na ɔwɔ Yerusalem, na wɔn a wɔdii kan de honhom kronkron sraa wɔn no, na ɔka ho.

8. Mfomso kɛse bɛn na Petro dii wɔ Antiokia?

⁸ Bere a wɔde honhom kronkron sraa Petro no, ɛno akyi mpo no, na ne mmerɛwyɛ da so ara teetee no. Afe 36 Y.B. no, na Petro wɔ hɔ bi na wɔde honhom kronkron sraa Kornelio a ɔyɛ amanaman muni a na wɔntwaa no twetia no. Ná wei yɛ adanse pefee a ɛkyerɛ sɛ “Onyankopɔn nyiyi nnipa mu,” na wɔn a wɔnyɛ Yudafo nso betumi abɛka Kristofo asafo no ho. (Aso. 10:​34, 44, 45) Ɛno akyi no, Petro fii ase ne wɔn a ɛnyɛ Yudafo didii. Kan no a, anka ɔrenyɛ biribi a ɛte saa da. (Gal. 2:12) Nanso Yudafo Kristofo no bi tee nka sɛ, ɛnsɛ sɛ Yudafo ne wɔn a ɛnyɛ Yudafo bom didi. Bere a wɔn a ɛwɔ saa adwene no bi baa Antiokia no, Petro ne anuanom a wɔnyɛ Yudafo no annidi bio. Ɛbɛyɛ sɛ na osuro sɛ ɛbɛhaw Yudafo Kristofo no nti na ɔyɛɛ saa. Ɔsomafo Paul huu Petro nyaatwom no, na ɔkaa n’anim maa obiara hui. (Gal. 2:​13, 14) Saa mfomso a Petro dii yi nyinaa akyi mpo no, wampa abaw. Dɛn na ɛboaa no?

9. Ɔkwan bɛn so na Yohane 6:​68, 69 si so dua sɛ na Petro yɛ ɔnokwafo?

⁹ Ná Petro yɛ ɔnokwafo; wamma biribiara ansiw no kwan sɛ ɔbɛkɔ so adi Yesu akyi. Bere bi, Yesu kaa asɛm bi a n’asuafo no ante ase, nanso Petro kyerɛe sɛ ɔbɛkɔ so adi n’akyi. (Kenkan Yohane 6:​68, 69.) Asuafo no antwɛn ammisa Yesu sɛ ɔnkyerɛkyerɛ wɔn mu, ɛnna wɔn mu bebree gyaee n’akyi di. Nanso Petro de, wanyɛ saa. Ná onim sɛ Yesu nko ara na ɔwɔ “daa nkwa nsɛm.”

10. Dɛn na Yesu yɛe a ɛkyerɛ sɛ na ogye Petro di? (Hwɛ mfoni no nso.)

¹⁰ Yesu anyi Petro baako anhyɛ ne nsa. Anadwo a ade rebɛkye ama Yesu awu no, na onim sɛ Petro ne asomafo a aka no beguan agyaw no. Nanso Yesu kaa biribi a na ɛkyerɛ sɛ ogye di sɛ Petro bɛsan agyina ne nan so, na wakɔ so asom Yehowa akosi awiei. (Luka 22:​31, 32) Ná Yesu nim sɛ ‘honhom no pɛ, nanso honam no yɛ mmerɛw.’ (Mar. 14:38) Enti, ɛwom sɛ Petro kaa sɛ onnim Yesu, nanso Yesu anyi ne baako anhyɛ ne nsa. Yesu nyan fii awufo mu no, oyii ne ho adi kyerɛɛ Petro. Ɛbɛyɛ sɛ saa bere no, na obiara nni Petro nkyɛn. (Mar. 16:7; Luka 24:34; 1 Kor. 15:5) Saa bere no, na Petro werɛ ahow paa, enti wo de, hwɛ sɛnea ɛbɛyɛ sɛ ɛhyɛɛ no nkuran!

11. Sɛn na Yesu maa Petro nyaa awerɛhyem sɛ Yehowa bɛboa no?

 ¹¹ Yesu maa Petro nyaa awerɛhyem sɛ Yehowa bɛboa no. Bere a Yesu nyan fii awufo mu no, ɔyɛɛ anwanwade foforo maa Petro ne asomafo a aka no san yii mpataa bebree. (Yoh. 21:​4-6) Ɛda adi sɛ, saa anwanwade yi maa Petro nyaa awerɛhyem sɛ, nneɛma a ohia wɔ n’asetenam no, ɛnyɛ den koraa sɛ Yehowa betumi ama ne nsa aka. Ɛbɛyɛ sɛ wei maa Petro kaee Yesu asɛm a ɛne sɛ, wɔn a wɔkɔ ‘so hwehwɛ Ahenni no kan’ no, Yehowa bɛma wɔn nsa aka nea wɔhia. (Mat. 6:33) Wei nti, Petro de asɛnka adwuma no na edii kan wɔ n’asetenam, na ɛnyɛ mpataayi adwuma no. Pentekoste afe 33 Y.B. no, ɔde akokoduru dii adanse, na ɛboaa nnipa mpempem ma wɔtiee asɛmpa no. (Aso. 2:​14, 37-41) Ɛno akyi no, ɔboaa Samariafo ne nnipa a wɔnyɛ Yudafo ma wɔbedii Kristo akyi. (Aso. 8:​14-17; 10:​44-48) Wei ma yehu sɛ Yehowa de Petro dii dwuma paa; ɔboaa nnipa ahorow nyinaa bi ma wɔbaa asafo no mu.

12. Sɛ mmerɛwyɛ bi reteetee yɛn a, sɛn na Petro nhwɛso no betumi aboa yɛn?

¹² Yehowa betumi aboa yɛn ama yɛayere yɛn ho adi yɛn mmerɛwyɛ so. Ɛtɔ da a, ɛnyɛ mmerɛw koraa sɛ yɛbɛkɔ so asom Yehowa, ɛnkanka bere a mmerɛwyɛ bi reteetee yɛn no. Sɛ yɛde yɛn mmerɛwyɛ toto Petro de no ho a, ɛtɔ da a ebetumi ayɛ yɛn sɛ Petro de no koraa sua. Nanso Yehowa betumi ahyɛ yɛn den na yɛampa abaw. (Dw. 94:​17-19) Momma yɛnhwɛ nhwɛso bi. Ansa na onua bi rebehu nokware no, na ɔne mmarima da; ɔyɛɛ saa mfe pii. Osii n’adwene pi, na ogyaee saa ɔbrafi no. Nanso ɛtɔ da a na akɔnnɔ bɔne tumi ba ne mu. Dɛn na ɛboaa no ma ɔyeree ne ho dii so? Ɔkyerɛ mu sɛ: “Yehowa hyɛ yɛn den.” Ɔde ka ho sɛ: “Yehowa honhom no mmoa so nti . . . , mahu sɛ metumi [akɔ so] de nokware no abɔ me bra . . . Yehowa atumi de me ayɛ adwuma, na me sintɔ nyinaa akyi no, ɔkɔ so hyɛ me den.”

13. Sɛnea Asomafo Nnwuma 4:​13, 29, 31 ka no, yɛbɛyɛ dɛn asuasua nea Petro yɛe no? (Hwɛ mfoni no nso.)

¹³ Sɛnea yɛahu no, nnipa ho suro nti, Petro dii mfomso akɛse. Nanso bere a Petro srɛɛ Yehowa sɛ ɔmma no akokoduru no, otumi kasaa akokoduru so. (Kenkan  Asomafo Nnwuma 4:​13, 29, 31.) Yɛn nso, ehu ka yɛn a, yebetumi adi so. Momma yɛnhwɛ onua bi a ne din de Horst; na ɔyɛ aberante bere a na Nasi aban no di Germany so no. Saa bere no, na aban no hwɛ kwan sɛ ɔmanfo no bɛka asɛm pɔtee bi de ahyɛ Hitler anuonyam. Ná Horst nim sɛ ɛyɛ mfomso sɛ ɔbɛka saa asɛm no, nanso ehu nti, ɛtɔ da a na waka bi. Horst awofo anka n’anim, mmom wɔne no bɔɔ mpae, na wɔsrɛɛ Yehowa sɛ ɔmma no akokoduru. Esiane sɛ Horst awofo boaa no, na ɔde ne ho too Yehowa so nti, afei de onyaa akokoduru gyinaa pintinn. Akyiri yi ɔkaa sɛ: “Yehowa annyaw me da.” c

14. Sɛn na ahwɛfo a wɔdwen anuanom ho betumi ahyɛ wɔn a wɔn abam abu nkuran?

¹⁴ Yehowa ne Yesu renyi yɛn baako nhyɛ yɛn nsa. Bere a Petro kaa sɛ onnim Yesu no, akyiri yi na ato no adwinnwen; ná ɛsɛ sɛ osi gyinae titiriw bi. Ɛne sɛ, ɔbɛtwe ne ho afi Kristo ho, anaa ɔbɛkɔ so ayɛ ne suani? Ná Yesu abɔ mpae asrɛ ama Petro sɛnea ɛbɛyɛ a ne gyidi rensa. Yesu kaa saa mpae no ho asɛm kyerɛɛ Petro, na onyaa Petro mu awerɛhyem sɛ akyiri yi obegyina ne nan so na wahyɛ ne nuanom den. (Luka 22:​31, 32) Sɛ Petro kae Yesu asɛm no a, wunhu sɛ na ɛbɛhyɛ no den paa? Yɛn nso, sɛ ɛba sɛ ɛsɛ sɛ yesi gyinae titiriw bi wɔ yɛn asetenam a, ahwɛfo a wɔdwen yɛn ho no, ebia Yehowa bɛfa wɔn so ahyɛ yɛn nkuran ma yɛakɔ so adi nokware. (Efe. 4:​8, 11) Momma yɛnhwɛ onua bi a ne din de Paul. Wasom sɛ ɔpanyin mfe pii, na ɔbɔ mmɔden sɛ ɔbɛkyekye anuanom werɛ wɔ saa kwan no so. Anuanom a wɔreyɛ apa abaw no, ɛyɛ a ɔka kyerɛ wɔn sɛ, ɔkwan a Yehowa faa so twee wɔn baa  nokware no mu no, wɔnwinnwen ho. Afei ɔma wɔn awerɛhyem sɛ, Yehowa dɔ a enni huammɔ nti, ɔrento wɔn agyaagyaamu. Ɔka sɛ: “Mahu anuanom bebree a wɔn abam bui a Yehowa mmoa so nti, wɔsan sɔre gyinaa wɔn nan so kɔɔ so som Yehowa.”

15. Sɛn na Petro ne Horst nhwɛso no ma yehu sɛ asɛm a ɛwɔ Mateo 6:33 no yɛ nokware?

¹⁵ Sɛnea Yehowa maa Petro ne asomafo a aka no nsa kaa nea wɔhia wɔ asetenam no, saa ara na yɛn nso, sɛ yɛde asɛnka adwuma no di kan wɔ yɛn asetena mu a, ɔbɛhwɛ ama yɛn nsa aka nea yehia. (Mat. 6:33) Wiase Ko a Ɛtɔ So Mmienu no akyi no, Horst a yɛadi kan aka ne ho asɛm no de akwampae adwuma no sii n’ani so. Nanso na odi hia, enti na onnye nni sɛ obetumi anya sika ahwɛ ne ho na bere koro no ara wayɛ bere nyinaa som adwuma no. Ɛnde, dɛn na na ɔbɛyɛ? Ɔyɛɛ n’adwene sɛ ɔbɛyɛ biribi de asɔ Yehowa ahwɛ, enti bere a ɔmansin sohwɛfo bɛsraa wɔn asafo no, ɔde nnawɔtwe no nyinaa kɔɔ asɛnka. Nnawɔtwe no baa awiei no, obi de sika hyɛɛ envelope mu maa ɔmansin sohwɛfo no sɛ ɔmfa mma Horst, nanso wanka nipa a ɔyɛɛ saa. Horst ho dwiriw no paa. Sika a na ɛwom no, na ebetumi aboa no ama wayɛ akwampae adwuma no abosome pii. Horst hui sɛ Yehowa nam saa akyɛde yi so rema wanya awerɛhyem sɛ, ɔbɛhwɛ no. Ɔde Ahenni no dii kan wɔ n’asetenam ne nkwa nna a aka nyinaa.—Mal. 3:10.

16. Petro nhwɛso ne nkrataa a ɔkyerɛwee no, adɛn nti na ɛho hia sɛ yesusuw ho?

¹⁶ Bere bi, Petro kaa sɛ Yesu mfi ne nkyɛn nkɔ, nanso Yesu ankɔ, na ɛbɛyɛ sɛ ɛno maa Petro ani gyei paa! Kristo kɔɔ so tetee Petro ma ɔbɛyɛɛ ɔsomafo a odi nokware ne obi a Kristofo betumi ahwɛ no asuasua no. Ntetee a Yesu de maa Petro a ɛho asɛm wɔ Bible mu no, yebetumi asua nneɛma pii afi mu. Nneɛma a yebetumi asua afi mu no, nkrataa mmienu a Onyankopɔn ma ɔkyerɛw kɔmaa nsafo a na ɛwɔ asomafo no bere so no, ɔkaa ebi ho asɛm wɔ mu. Ɛno da nkyɛn a, ɔkaa nneɛma pii a ebetumi aboa yɛn ho asɛm nso wɔ mu. Adesua a edi hɔ no, asuade a ɛwɔ nkrataa mmienu no mu no, yebesusuw emu kakra ho, na yɛahwɛ sɛnea yɛde bɛyɛ adwuma nnɛ.