1-2. (a) Bere a ɔsomafo Paul kyerɛw krataa kɔmaa Hebrifo no, na asetena te sɛn wɔ Yudea? (b) Adɛn nti na yebetumi aka sɛ saa krataa no boaa wɔn paa?

 YESU wu akyi no, Yudafo a na wɔabɛyɛ Kristofo a na wɔtete Yerusalem ne Yudea no kɔɔ ahokyere mu paa. Bere a Kristofo asafo no fii ase no, ankyɛ koraa na wɔtan Kristofo no ani denneennen. (Aso. 8:1) Afei bɛyɛ mfe 20 akyi no, sikasɛm ho yɛɛ den paa maa Kristo akyidifo no; ɛbɛyɛ sɛ ɔkɔm bi a ɛbaa asaase no so na ɛkɔfaa ahokyere yi bae. (Aso. 11:​27-30) Bɛyɛ mfe 61 wɔ Yesu awo akyi no, na Kristofo no wɔ asomdwoe kakra, nanso nea na ɛrebobɔ ba no, na ɛnyɛ asɛm ketewa. Saa bere no, Yehowa maa ɔsomafo Paul kyerɛw krataa bi kɔmaa wɔn; ná saa krataa no bɛboa wɔn paa.

² Hebrifo no nsa kaa krataa no wɔ bere pa mu, efisɛ na ɛrenkyɛ na asomdwoe a wɔwɔ no aba awiei. Paul maa wɔn afotu a na ɛbɛboa wɔn ma wɔagyina ahohiahia a na ɛreba no ano. Nkɔm a Yesu hyɛe sɛ wɔbɛsɛe Yerusalem ne asɔrefie no, na ɛrenkyɛ na abam. (Luka 21:20) Ɛwom, na Paul ne Kristofo a ɛte Yudea no nyinaa nnim bere pɔtee a ɔsɛe no bɛba. Nanso na saa Kristofo no betumi de bere a aka no ahyɛ wɔn gyidi den sɛnea ɛbɛyɛ a wɔbetumi de animia agyina nea na ɛreba no ano.—Heb. 10:25; 12:​1, 2.

3. Adɛn nti na ɛsɛ sɛ Hebrifo nhoma no ho hia Kristofo a ɛwɔ hɔ nnɛ?

³ Ɛrenkyɛ, yɛbɛkɔ ahohiahia kɛse bi mu, na ɛbɛkyɛn nea Yudafo no kɔɔ mu no koraa. (Mat. 24:21; Adi. 16:​14, 16) Enti afotu a Yehowa de maa saa Kristofo no, momma yensusuw bi ho, efisɛ ɛbɛboa yɛn nso.

 ‘MOMMA YƐNYERE YƐN HO NNYIN WƆ GYIDI NO MU’

4. Yudafo a na wɔabɛyɛ Kristofo no, ɔhaw ahorow bɛn na wɔhyiae? (Hwɛ mfoni no nso.)

⁴ Yudafo a na wɔabɛyɛ Kristofo no hyiaa ɔhaw kɛse bi. Bere bi na Yudafo no yɛ Yehowa nkurɔfo a wapaw wɔn. Ahemfo a na wɔyɛ Yehowa ananmusifo wɔ asaase so no, Yerusalem na na wɔtena di ade. Afei nso, asɔrefie a na ɛwɔ hɔ no, ɛhɔ na na wɔsom Yehowa. Sɛnea na wɔn nyamesom akannifo no kyerɛkyerɛ Mose Mmara no mu no, ɛno na na Yudafo anokwafo nyinaa di so. Nnuan a na ɛsɛ sɛ wɔdi ne nea ɛnsɛ sɛ wɔdi, twetiatwa ne sɛnea na ɛsɛ sɛ wɔne wɔn a wɔnyɛ Yudafo di mpo, na wɔahyehyɛ ho mmara. Nanso Yesu wu akyi no, afɔre ahorow a na Yudafo no bɔ no, na Yehowa nnye ntom bio. Ná wei yɛ ɔhaw ma Yudafo a na wɔabɛyɛ Kristofo no, efisɛ na Mose Mmara no ara na na wɔadi so abesi saa bere no. (Heb. 10:​1, 4, 10) Kristofo a na wɔn ho akokwaw mpo, na ɛnna fam sɛ wɔbegye saa nsakrae no atom; wɔn mu baako ne ɔsomafo Petro. (Aso. 10:​9-14; Gal. 2:​11-14) Gyidi foforo a na Yudafo no abenya nti, nyamesom akannifo no sɔre tiaa wɔn denneennen.

5. Dɛn na na ɛsɛ sɛ Kristofo no hwɛ wɔn ho yiye wɔ ho?

⁵ Yudafo a na wɔabɛyɛ Kristofo no hyiaa ɔsɔretia fii nnipakuw mmienu bi hɔ. Ná kuw a edi kan no ne Yudafo nyamesom akannifo no. Ná wɔbu Yudafo a wɔabɛyɛ Kristofo no sɛ awaefo. Kuw a ɛtɔ so mmienu no yɛ ebinom a na wɔkyerɛ sɛ wɔyɛ Kristofo no. Ná wɔn mu bi agye agyina mu denneennen sɛ ɛsɛ sɛ Kristo akyidifo kɔ so di Mose Mmara no bi so. Ɛbɛyɛ sɛ nea enti a wɔyɛɛ saa ne sɛ, na wɔmpɛ sɛ nkurɔfo bɛtan wɔn ani. (Gal. 6:12) Dɛn na na ɛbɛboa Kristofo anokwafo no ma wɔakɔ so abata nokware no ho?

6. Dɛn na Paul hyɛɛ ne mfɛfo Kristofo nkuran sɛ wɔnyɛ? (Hebrifo 5:14–6:1)

⁶ Paul krataa a ɔkyerɛw kɔmaa Hebrifo  no mu no, ɔhyɛɛ ne mfɛfo Kristofo nkuran sɛ wɔnnɔ Onyankopɔn Asɛm mu asukɔ. (Kenkan Hebrifo 5:14–6:1.) Paul nam Hebri Kyerɛwnsɛm no so boaa ne nuanom ma wɔhui sɛ, Kristosom korɔn koraa sen Yudasom. a Ná Paul nim sɛ, sɛ Kristofo no nya nimdeɛ pii na wɔte nokware no ase yiye a, na ɛbɛboa wɔn ama wɔahu atoro nkyerɛkyerɛ a ebetumi adaadaa wɔn na wɔabɔ agu.

7. Ɔhaw ahorow bɛn na yehyia nnɛ?

⁷ Hebrifo a na wɔabɛyɛ Kristofo no, ɛnnɛ nso, ɔhaw a yehyia no te sɛ wɔn de no ara. Adwene a nkurɔfo wɔ ne nsɛm a wɔkeka de guan yɛn ho no, emu bebree ne Yehowa adwene nhyia. Bible mu nsɛm a ɛfa abrabɔ pa ho a yedi so no, atamfo kasa tia yayaayaw; wɔkeka sɛ yɛyɛ kyenkyenenn na yɛn tirim yɛ den. Sɛnea nkurɔfo dwen ne sɛnea wɔbɔ wɔn bra no, ade rekye a ade resa nyinaa, man ara na ɛreman fi Onyankopɔn mmara ho. (Mmeb. 17:15) Enti atosɛm a atamfo keka pɛ sɛ wɔde bu yɛn abam anaa wɔde daadaa yɛn no, ɛsɛ sɛ yɛbɔ mmɔden hu na yɛkwati.—Heb. 13:9.

8. Yɛbɛyɛ dɛn anyin wɔ gyidi no mu?

⁸ Paul tuu Hebrifo a na wɔabɛyɛ Kristofo no fo sɛ wɔnyere wɔn ho nnyin wɔ gyidi no mu. Saa afotu no, ɛsɛ sɛ yɛn nso yɛde yɛ adwuma. Wei kyerɛ sɛ ɛsɛ sɛ yesua nokware no te ase yiye, na yenya Yehowa adwene. Yɛn asubɔ akyi mpo, ɛsɛ sɛ yɛkɔ so yɛ saa ara. Sɛ yɛbaa nokware no mu akyɛ oo, sɛ nnansa yi ara na yɛreba mu oo, ɛsɛ sɛ yɛn nyinaa sua Onyankopɔn Asɛm no daa. (Dw. 1:2) Sɛ yɛpɛ bere de sua ade daa na yedwinnwen ho a, ɛbɛhyɛ yɛn gyidi den. Paul sii gyidi so dua wɔ ne krataa a ɔkyerɛw kɔmaa Hebrifo no mu.—Heb. 11:​1, 6.

ƐSƐ SƐ ‘YENYA GYIDI A EBEGYE YƐN NKWA’

9. Adɛn nti na na ɛsɛ sɛ Kristofo no hyɛ wɔn gyidi den?

⁹ Ahohiahia a na ɛreba Yudea no, sɛ na Hebrifo a wɔabɛyɛ Kristofo no benya wɔn ti adidi mu wɔ mu a, na ɛsɛ sɛ wɔhyɛ wɔn gyidi den. (Heb. 10:​37-39) Ná Yesu abɔ n’akyidifo kɔkɔ sɛ, sɛ wɔhu sɛ asraafo atwa Yerusalem ho ahyia a, ɛsɛ sɛ wɔguan kɔ mmepɔw so. Kristofo a na wɔwɔ kurow no mu ne wɔn a na wɔwɔ nkuraase no nyinaa, na saa afotu yi kɔ ma wɔn. (Luka 21:​20-24) Saa bere no, wɔn a na wɔtete nkuraase no, sɛ asraafo kɔtow hyɛ wɔn so a, na wɔtaa kɔhwehwɛ ahobammɔ wɔ kurow bi te sɛ Yerusalem mu, efisɛ na wɔatow ho fasu. Ɛno nti bepɔw so a na wɔbeguan akɔ no, wohwɛ a na asɛ ntease nnim, enti na ebegye gyidi paa.

10. Sɛ Kristofo wɔ gyidi a emu yɛ den a, dɛn na wɔbɛyɛ? (Hebrifo 13:17)

¹⁰ Afei nso, wɔn a na Yesu nam wɔn so rekyerɛ asafo no kwan no, na ɛsɛ sɛ Hebrifo a na wɔabɛyɛ Kristofo no nya wɔn mu ahotoso. Wɔn a na wɔdi nneɛma anim no, ɛda adi sɛ wɔmaa asafo no mufo nyinaa akwankyerɛ pɔtee a ɛbɛboa wɔn ma wɔadi Yesu akwankyerɛ no akyi, na ama wɔahu bere a ɛsɛ sɛ wɔguan ne ɔkwan a wɔbɛfa so ayɛ saa. (Kenkan Hebrifo 13:17.) Greek asɛmfua a wɔde dii dwuma wɔ Hebrifo 13:17 a wɔakyerɛ ase “monyɛ osetie” no, nea ɛkyerɛ ne sɛ obi  betie obi foforo akwankyerɛ esiane sɛ ɔwɔ ne mu ahotoso nti, na ɛnyɛ sɛ ɛsɛ sɛ otie onii no ara nti na ɔreyɛ saa. Enti na ɛsɛ sɛ Kristofo no nya wɔn a na wɔdi nneɛma anim no mu ahotoso ansa na ahohiahia no afi ase. Sɛ Kristofo no tie wɔn a wɔdi nneɛma anim no akwankyerɛ wɔ asomdwoe bere mu a, na ɛbɛyɛ mmerɛw ama wɔn sɛ mmere bɔne mu nso, wɔbetie wɔn.

11. Ɛnnɛ, adɛn nti na ehia paa sɛ Kristofo nya gyidi a emu yɛ den?

¹¹ Ehia sɛ yɛn nso yenya gyidi te sɛ Hebrifo a na wɔabɛyɛ Kristofo no. Bible bɔ yɛn kɔkɔ sɛ wiase yi bɛkɔ n’awiei, nanso ɛnnɛ nnipa dodow no ara nnye nni, na wɔdi ho fɛw mpo. (2 Pet. 3:​3, 4) Afei nso, ɛwom sɛ nea ɛbɛkɔ so wɔ ahohiahia kɛse no mu no, Bible ka bi ho asɛm, nanso nea ebesisi no, pii wɔ hɔ a yennim. Ɛsɛ sɛ yenya gyidi a emu yɛ den sɛ wiase awiei no bɛba bere a Yehowa ahyɛ no pɛpɛɛpɛ, na ɔrennyaw yɛn da.—Hab. 2:3.

12. Dɛn na ɛbɛboa yɛn ama yɛanya yɛn ti adidi mu wɔ ahohiahia kɛse no mu?

¹² Afei nso, “akoa nokwafo ne ɔbadwemma” a Yehowa nam no so rekyerɛ yɛn kwan nnɛ no, ɛsɛ sɛ yenya ne mu gyidi paa. (Mat. 24:45) Bere a Romafo no bae no, ɛbɛyɛ sɛ Hebrifo a na wɔabɛyɛ Kristofo no nsa kaa akwankyerɛ a na ɛbɛboa wɔn. Yɛn nso, sɛ ahohiahia kɛse no fi ase a, ebia yɛn nsa bɛka akwankyerɛ pɔtee a ebegye yɛn nkwa. Wɔn a wɔdi nneɛma anim wɔ Yehowa ahyehyɛde no mu no, saa bere yi na ɛsɛ sɛ yenya wɔn mu ahotoso kɛse na yetie akwankyerɛ a wɔde ma yɛn no. Ɛnnɛ, sɛ ɛyɛ den ma yɛn sɛ yebetie akwankyerɛ a wɔde ma yɛn no a, ahohiahia kɛse no mu nso, ɛbɛyɛ den ama yɛn sɛ yɛbɛyɛ saa.

13. Afotu a ɛwɔ Hebrifo 13:5 no, adɛn nti na na ɛfata paa?

¹³ Bere a Hebrifo a na wɔabɛyɛ Kristofo no retwɛn sɛ wɔbehu bere a ɛsɛ sɛ wɔguan no, na ɛsɛ sɛ wɔyɛ wɔn ho awiɛmfoɔ nso na wɔhwɛ yiye na wɔanyɛ “sikanibere.” (Kenkan Hebrifo 13:5.) Bere bi, ɔkɔm bi a ɛbae maa wɔn mu bi kɔɔ ahokyere mu, na na ahia ebinom nso pɛn. (Heb. 10:​32-34) Ɛwom sɛ bere bi asɛmpa no nti, wɔpenee so huu amane, nanso akyiri yi, ɛbɛyɛ sɛ wɔn mu bi nyaa adwene sɛ sika a na wɔbenya no bɛbɔ wɔn ho ban na wɔansan ankɔ ahokyere mu. Nanso sɛ obi wɔ sika sɛ dɛn mpo a, na ɛrentumi nnye no mfi ɔsɛe a na ɛreba no mu. (Yak. 5:3) Nea ɛwom ne sɛ, obiara a na n’ani bere ahonyade no, na ɛbɛyɛ den sɛ obegyaw ne fie ne n’agyapade hɔ aguan.

14. Sɛ yɛwɔ gyidi a emu yɛ den a, gyinae bɛn na yebesisi wɔ ahonyade ho?

¹⁴ Sɛ yegye di paa sɛ wiase yi awiei abɛn a, yɛremma sikapɛ ne ahonyade mmɛyɛ ade titiriw wɔ yɛn asetenam. Ahohiahia kɛse no mu no, nnipa ‘bɛtow wɔn dwetɛ agu mmɔnten so’ efisɛ wɔbehu sɛ “Yehowa abufuw da no, wɔn dwetɛ anaa wɔn sika kɔkɔɔ rentumi nnye wɔn.” (Hes. 7:19) Sɛ́ anka yɛde sikapɛ besi yɛn ani so no, ɛsɛ sɛ yesisi gyinae a ɛbɛboa yɛn ma yɛn asetena ayɛ ketewese, na yɛatumi asom Yehowa yiye. Yebetumi ayɛ saa a, ɛsɛ sɛ yɛhwɛ yiye na yɛansoa ɛka hunu angu yɛn ho so anaa yɛamma ahonyade a yɛbɛhwɛ so anaa yɛbɛbɔ ho ban ammɛyɛ yɛn so adesoa. Yɛbɛhwɛ yiye nso na yɛamma yɛn koma ankodi yɛn agyapade mu. (Mat. 6:​19, 24) Bere a wiase yi awiei rebɛn no, ebehia sɛ yɛkyerɛ sɛ Yehowa na yɛde yɛn ho to no so anaa yɛn ahonyade na yɛde yɛn ho to so.

 “EHIA SƐ MODE ANIMIA GYINA MU”

15. Hebrifo a na wɔabɛyɛ Kristofo no, adɛn nti na na ehia sɛ wɔmia wɔn ani gyina sɔhwɛ mu?

¹⁵ Ná nneɛma gye ara na ɛregye nsam wɔ Yudea, enti na ebehia sɛ Hebrifo a wɔabɛyɛ Kristofo no mia wɔn ani gyina sɔhwɛ a na wɔbehyia no ano. (Heb. 10:36) Ɛwom sɛ bere a wɔn mu bi rebɛyɛ Kristofo no, wɔamfa no ahogono, nanso wɔn mu bebree nso bɛyɛɛ Kristofo bere a na nneɛma mu adwo. Paul sii so dua kyerɛɛ wɔn sɛ ɛwom sɛ na wɔahyia wɔn gyidi ho sɔhwɛ a emu yɛ den pɛn, nanso na sɔhwɛ a Yesu hyiae no bi nnya mmaa wɔn so. Enti na ɛsɛ sɛ wɔyɛ krado sɛ, sɛ sɔhwɛ a ɛte saa ba a, wɔbedi nokware akosi owu mu. (Heb. 12:4) Esiane sɛ na nnipa pii reba Kristosom mu nti, ɛmaa Yudafo no bo fuwii paa na wɔsɔre tiaa wɔn denneennen. Mfe kakraa bi a na atwam no, na Paul akɔ Yerusalem ama basabasayɛfo atow ahyɛ no so. Yudafo bɛboro 40 ‘kaa ntam sɛ wɔrennidi na wɔrennom kosi sɛ wobekum Paul.’ (Aso. 22:22; 23:​12-14) Ɔsɔretia a emu yɛ den ne ɔtan yi nyinaa akyi no, na ɛsɛ sɛ Kristofo no kɔ so hyiam som Yehowa, wɔka asɛmpa no, na wɔkɔ so hyɛ wɔn gyidi den.

16. Sɛ nkurɔfo retan yɛn ani a, ɔkwan bɛn so na krataa a Paul kyerɛw kɔmaa Hebrifo no betumi aboa yɛn ma yɛanya adwempa? (Hebrifo 12:7)

¹⁶ Ɔsɔretia a na Hebrifo a wɔabɛyɛ Kristofo no rehyia no, dɛn na na ɛbɛboa wɔn ama wɔamia wɔn ani agyina ano? Ná Paul nim sɛ ɛsɛ sɛ wɔnya sɔhwɛ a wɔrehyia no ho adwempa. Enti ɔkyerɛɛ mu sɛ ebia Onyankopɔn bɛma kwan ama Kristofo ahyia sɔhwɛ sɛnea ɛbɛyɛ a ɛbɛtete wɔn. (Kenkan Hebrifo 12:7.) Ntetee a ɛte saa no betumi aboa Kristofo ama wɔanya suban pa. Hebrifo a na wɔabɛyɛ Kristofo no, sɔhwɛ a na wɔrehyia no, sɛ wɔde wɔn adwene si nneɛma pa a na ebefi mu aba no so a, na ɛbɛyɛ mmerɛw ama wɔn sɛ wɔbegyina ano.—Heb. 12:11.

17. Ɔsɔretia a Paul hyiae a otumi gyinaa mu no, dɛn na na wasua afi mu?

 ¹⁷ Paul hyɛɛ Hebrifo a na wɔabɛyɛ Kristofo no nkuran sɛ, sɔhwɛ biara a wɔbehyia no, wɔmmia wɔn ani nnyina mu. Ná obetumi de saa afotu pa no ama wɔn, efisɛ ansa na ɔrebɛyɛ Kristoni no, na watan Kristofo ani pɛn, enti na onim nea wɔbehyia. Afei nso bere a ɔbɛyɛɛ Kristoni no, ohyiaa ɔsɔretia pii, enti na onim sɛnea yegyina ɔsɔretia ano. (2 Kor. 11:​23-25) Enti sɛ Paul ka kyerɛɛ wɔn sɛ wɔmmia wɔn ani nnyina sɔhwɛ mu a, na onim nea ɔreka. Ɔkaee Kristofo no sɛ, sɛ wɔbetumi amia wɔn ani agyina sɔhwɛ mu a, ɛnsɛ sɛ wɔgye wɔn ho di, na mmom ɛsɛ sɛ wɔde wɔn ho to Yehowa so. Paul tumi de akokoduru kaa sɛ: “Yehowa ne me boafo; merensuro.”—Heb. 13:6.

18. Dɛn na ɛbɛto yɛn nyinaa, enti dɛn na ɛsɛ sɛ yɛyɛ seesei?

¹⁸ Yɛrekasa yi, atamfo resɔre tia yɛn nuanom binom denneennen. Yebetumi abɔ mpae ama wɔn, ɛtɔ da nso a yebetumi ayɛ nneɛma pɔtee bi de aboa wɔn de akyerɛ sɛ yɛdɔ wɔn. (Heb. 10:33) Nanso Bible ka no pefee sɛ “wɔn a wɔpɛ sɛ wɔde onyamesom pa tena ase sɛ Kristo Yesu akyidifo nyinaa, nkurɔfo bɛtan wɔn ani.” (2 Tim. 3:12) Wei nti, ɛsɛ sɛ yɛn nyinaa siesie yɛn ho ma mmere bɔne a ɛreba no. Momma yɛnkɔ so mfa yɛn ho nto Yehowa so koraa, na yennya awerɛhyem sɛ, sɔhwɛ biara a yebehyia no, ɔbɛboa yɛn ama yɛagyina mu. Bere a ɛsɛ mu no, ɔbɛma n’asomfo anokwafo nyinaa ho atɔ wɔn.—2 Tes. 1:​7, 8.

19. Dɛn na yebetumi ayɛ de asiesie yɛn ho ama ahohiahia kɛse no? (Hwɛ mfoni no nso.)

¹⁹ Ɛda adi sɛ Paul krataa a ɔkyerɛw kɔmaa Hebrifo a na wɔabɛyɛ Kristofo no, na ɛbɛboa wɔn ama wɔasiesie wɔn ho ama ahohiahia a na wɔbɛkɔ mu no. Paul hyɛɛ ne nuanom Kristofo nkuran sɛ, wɔnyere wɔn ho nnya nimdeɛ pii na wɔnte Kyerɛwnsɛm no ase yiye. Wɔyɛ saa a, na ɛbɛboa wɔn ama wɔahu nkyerɛkyerɛ a ebetumi ama wɔn gyidi ayɛ mmerɛw, na wɔabɔ agu. Ɔhyɛɛ wɔn nkuran sɛ, wɔnhyɛ wɔn gyidi den sɛnea ɛbɛyɛ a wɔde Yesu ne wɔn a edi nneɛma anim wɔ asafo no mu no akwankyerɛ bɛyɛ adwuma ntɛm ara. Afei nso, ɔboaa wɔn ma wɔhui sɛ, sɛ wɔhyia sɔhwɛ a, ɛsɛ sɛ wɔmia wɔn ani gyina mu, na wɔhu no sɛ ɛyɛ hokwan a wɔn soro Agya no de retete wɔn. Momma yɛn nso yɛmfa Bible mu afotu yi nyɛ adwuma. Yɛyɛ saa a, yebetumi amia yɛn ani agyina mu akosi awiei.—Heb. 3:14.