1-2. Sɛ yɛkyɛ ade a, ɛma yɛn ani gye. Wohwɛ a, adɛn nti na Yehowa bɔɔ yɛn saa?

 SƐ YƐKYƐ nkurɔfo ade a, ɛma yɛn ani gye sen sɛ afoforo bɛkyɛ yɛn ade. Saa na Yehowa bɔɔ yɛn. (Aso. 20:35) Wohwɛ a, wei kyerɛ sɛ, sɛ nkurɔfo kyɛ yɛn ade a, yɛn ani nnye anaa? Daabi. Yɛn nyinaa nim sɛ, sɛ obi kyɛ yɛn ade a, ɛma yɛn ani gye. Nanso sɛ yɛkyɛ afoforo ade a, ɛno na ɛma yɛn ani gye paa. Nokwasɛm ne sɛ, eye paa sɛ Yehowa bɔɔ yɛn saa. Adɛn ntia?

² Yehowa bɔɔ yɛn saa sɛnea ɛbɛyɛ a yɛn ara yebetumi ama anigye a yɛwɔ no bi abɛka ho. Sɛ yɛhwehwɛ akwan a yɛbɛfa so akyɛ ade a, ɛbɛma yɛn anigye ayɛ kɛse. Wei kyerɛ sɛ, sɛnea Yehowa bɔɔ yɛn no yɛ nwanwa paa.—Dw. 139:14.

3. Adɛn nti na Bible ka sɛ Yehowa yɛ “anigye Nyankopɔn”?

³ Kyerɛwnsɛm no ma yɛn awerɛhyem sɛ yɛkyɛ ade a, ɛma yɛn ani gye, enti ɛnyɛ nwanwa sɛ Bible ka sɛ Yehowa yɛ “anigye Nyankopɔn.” (1 Tim. 1:11) Ɔno na odii kan kyɛɛ ade, na obiara nni hɔ a ɔkyɛ ade sen no. Ɔsomafo Paul kaa sɛ, Yehowa nti na “yɛwɔ nkwa, na yɛkeka yɛn ho, na yɛwɔ hɔ.” (Aso. 17:28) Ampa, “akyɛde pa ne akyɛde a edi mu biara” fi Yehowa hɔ.—Yak. 1:17.

4. Dɛn na yɛyɛ a ɛbɛma yɛanya anigye pii?

⁴ Yɛkyɛ ade a ɛma yɛn ani gye. Ebia yɛn nyinaa pɛ sɛ yɛkyɛ ade na yenya anigye a ɛte saa no pii. Sɛ yesuasua Yehowa ayamye a, yebetumi anya anigye a ɛte saa. (Efe. 5:1) Adesua yi mu no, yebesusuw sɛnea Yehowa yi ne yam kyɛ ade no ho. Afei nso, sɛ yɛkyɛ obi ade anaa yɛyɛ ade ma obi na wankyerɛ ho anisɔ a, yɛbɛhwɛ nea yebetumi ayɛ. Wei bɛboa yɛn ma yɛakɔ so akyɛ afoforo ade na yɛanya anigye pii.

 SUASUA YEHOWA AYAMYE

5. Nneɛma bɛn na Yehowa de ma yɛn?

⁵ Nneɛma bɛn na Yehowa yi ne yam de ma yɛn? Momma yɛnhwɛ emu kakra. Yehowa ma yɛn nea yehia wɔ honam fam. Ɛnyɛ bere nyinaa na ebia ɔde nea ɛbɛma yɛn ho adwo yɛn bɛma yɛn, nanso nea yehia de, daa ɔbɛhwɛ ama yɛn nsa aka. Yɛbɛyɛ nhwɛso a, ɔma yenya aduan, ntaade ne baabi a yɛde yɛn ti bɛto. (Dw. 4:8; Mat. 6:​31-33; 1 Tim. 6:​6-8) Ɛyɛ Yehowa asɛde sɛ ɔhwɛ yɛn. Nanso wohwɛ a, esiane sɛ ɛyɛ n’asɛde ara nti na ɔyɛ saa anaa? Daabida! Ɛnde, adɛn nti na Yehowa ma yɛn nea yehia?

6. Dɛn na yesua fi Mateo 6:​25, 26 mu?

⁶ Nea ɛwom ara ne sɛ, ɔdɔ a Yehowa wɔ ma yɛn nti na ɔma yɛn nea yehia. Yɛnhwɛ Yesu nsɛm a ɛwɔ Mateo 6:​25, 26. (Kenkan.) Yesu de nneɛma a Yehowa abɔ na ɛyɛɛ nhwɛso. Yesu kaa nnomaa ho asɛm sɛ: “Wongu aba, wontwa, wɔmmoaboa ano ngu adekoradan mu.” Nanso, hwɛ nea ɔka toaa so: “Mo soro Agya ma wɔn aduan.” Afei, Yesu bisaa sɛ: “Mo ho nhia pii nsen wɔn anaa?” Asuade a ɛwom ne sɛn? Yehowa bu n’asomfo sɛ wɔsom bo koraa sen mmoa. Sɛ Yehowa hwɛ mmoa a, yebetumi anya awerɛhyem sɛ ɔbɛma yɛn nea yehia! Yehowa te sɛ agya a n’ani ku n’abusua ho; ɔdɔ a ɔwɔ ma yɛn nti, ɔbɛhwɛ yɛn.—Dw. 145:16; Mat. 6:32.

7. Akwan a yebetumi afa so asuasua Yehowa ayamye no, baako ne sɛn? (Hwɛ mfoni no nso.)

⁷ Yɛn nso, yebetumi asuasua Yehowa na yɛama ɔdɔ akanyan yɛn ma yɛde nea nkurɔfo hia ama wɔn. Yɛbɛyɛ nhwɛso a, wunim wo nua Kristoni bi a ohia aduan anaa ntaade? Yehowa betumi afa wo so ama wo nua no anya nea ohia. Yehowa asomfo de, sɛ atoyerɛnkyɛm bi si a, wɔyɛ ntɛm kɔboa wɔn a wɔn ho akam no. COVID-19 nsanyare bere no mu sei, anuanom de nnuan, ntaade ne nneɛma afoforo kɔmaa wɔn a wɔkɔɔ ahokyere mu no. Anuanom bebree nso yii ntoboa kɔboaa wiase nyinaa adwuma no. Wei nti, atoyerɛnkyɛm a esisii no, yetumi boaa anuanom a wɔn ho kaa mu wɔ wiase nyinaa no. Anuanom de asɛm a ɛwɔ Hebrifo 13:16 no yɛɛ adwuma. Ɛhɔ ka sɛ: “Mommma mo werɛ mmfi sɛ mobɛyɛ papa na mo ne nkurɔfo akyɛ nneɛma a mowɔ, efisɛ afɔrebɔ a ɛtete saa no sɔ Onyankopɔn ani yiye.”

8. Yehowa ma yɛn ahoɔden ma yɛde yɛ dɛn? (Filipifo 2:13)

 ⁸ Yehowa ma yɛn ahoɔden. Yehowa ahoɔden nni ano, na n’ani gye ho sɛ ɔde bi bɛma n’asomfo anokwafo. (Kenkan Filipifo 2:13.) Yemmisa oo, woabɔ Yehowa mpae sɛ ɔmma wo ahoɔden anaa tumi a wode bɛko atia sɔhwɛ bi pɛn? Anaa woabɔ Yehowa mpae sɛ ɔmma wo ahoɔden a wode begyina ɔhaw kɛse bi ano pɛn? Afei nso, ebia da bi, nea na ehia sɛ woyɛ no, na ayɛ den ama wo, enti wobɔɔ Yehowa mpae sɛ ɔmma wo ahoɔden a wode bɛyɛ. Bere a Yehowa buaa wo mpaebɔ na ɔmaa wo ahoɔden no, ebia wotee nka te sɛ ɔsomafo Paul. Ɔkyerɛwee sɛ: “Nea ɔhyɛ me den no adaworoma, minya ahoɔden wɔ biribiara mu.”—Filip. 4:13.

9. Yɛbɛyɛ dɛn asuasua Yehowa na yɛde ahoɔden a yɛwɔ no aboa afoforo? (Hwɛ mfoni no nso.)

⁹ Ɛwom sɛ yɛtɔ sin, nanso yebetumi asuasua sɛnea Yehowa yi ne yam de ne tumi boa yɛn no. Ahoɔden a yɛwɔ no de, yɛbɛka paa a, yɛrentumi mfa bi mma afoforo. Nanso yebetumi de ahoɔden a yɛwɔ no aboa wɔn. Yɛbɛyɛ nhwɛso a, sɛ onua anaa onuawa bi mfe akɔ anim anaa ɔyare a, yebetumi akodi gua abrɛ no, anaa yebetumi akɔyɛ ne fie nnwuma bi ama no. Sɛ yɛwɔ ahoɔden a, yebetumi akɔboa ama yɛasiesie Ahenni Asa so, anaa yɛaboa ma yɛasiesie nneɛma a asɛe wɔ hɔ. Sɛ yɛde yɛn ahoɔden yɛ nnwuma a ɛtete saa a, ɛboa yɛn nuanom a yɛne wɔn som Yehowa no.

10. Yɛbɛyɛ dɛn de yɛn anom kasa ahyɛ afoforo den?

¹⁰ Mma wo werɛ mmfi nso sɛ yɛn anom nsɛm wɔ tumi. Wunim obi a wokamfo no a ebetumi ahyɛ no nkuran? Wunim obi a ohia awerɛkyekye? Sɛ saa a, ɛnde ma onii no nhu sɛ wudwen ne ho. Wubetumi akɔsra onii no anaa woafrɛ no wɔ fon so. Wubetumi nso akyerɛw nsɛm bi agu kaad so akɔma no, asɛnde no email anaa tɛs mɛsegye. Mma nea wobɛkyerɛw no nnyɛ wo dadwen. Nsɛm kakraa bi a efi wo komam a wobɛkyerɛw no, ebia ɛno ara ne ade a wo nua Kristoni no hia saa da no na ama wakɔ so asom Yehowa, anaa ama wanya anidaso.—Mmeb. 12:25; Efe. 4:29.

11. Sɛn na Yehowa de ne nyansa di dwuma?

¹¹ Yehowa ma nyansa. Osuani Yakobo kyerɛwee sɛ: “Sɛ mo mu bi hia nyansa a, ma ɔnkɔ so mmisa Onyankopɔn, na ɔde bɛma no, efisɛ oyi ne yam kyɛ nnipa nyinaa ade a animtiaabu biara nnim.” (Yak. 1:5) Wei kyerɛ sɛ Yehowa mfa ne nyansa nsie yɛn. Oyi ne yam ma yɛn bi. Afei nso, hyɛ no nsow sɛ, sɛ Yehowa ma yɛn nyansa  a, ɛyɛ a “animtiaabu biara nnim.” Sɛ yebisa ne hɔ nyansa anaa akwankyerɛ a, ɔmma yɛnte nka sɛ yɛn adwene mu nnɔ. Nea ɛwom mpo ne sɛ, ɔhyɛ yɛn nkuran sɛ yɛnhwehwɛ.—Mmeb. 2:​1-6.

12. Nyansa a yɛwɔ no, yɛbɛyɛ dɛn de bi ama afoforo?

¹² Yɛn nso ɛ? Wohwɛ a, yebetumi asuasua Yehowa na nyansa a yɛwɔ no, yɛama afoforo bi anaa? (Dw. 32:8) Nea yenim no, yɛwɔ hokwan bebree a yebetumi de aboa afoforo. Yɛbɛyɛ nhwɛso a, yɛtaa tete wɔn a wɔyɛ foforo wɔ asɛnka mu. Asafo mu mpanyimfo to wɔn bo ase boa asomfo ne anuanom mmarima a wɔabɔ asu ma wɔhu sɛnea wɔbɛyɛ nnwuma a ɛhyehyɛ wɔn nsa wɔ asafo no mu. Afei nso, anuanom a ɛwɔ adansi ho nimdeɛ tete afoforo ma wɔsisi asafo adan, na wɔboa wɔn nso ma wɔhu sɛnea biribi sɛe a wɔbesiesie.

13. Sɛnea Yehowa ma yɛn nyansa no, sɛ yɛretete afoforo a, yɛbɛyɛ dɛn asuasua no?

¹³ Wɔn a wɔtete afoforo no, ɛsɛ sɛ wɔbɔ mmɔden suasua sɛnea Yehowa ma nyansa no. Kae sɛ, Yehowa yi ne yam ma nyansa. Yɛn nso, nimdeɛ ne osuahu biara a yɛwɔ no, ɛsɛ sɛ yeyi yɛn yam de boa wɔn a yɛkyerɛkyerɛ wɔn no. Sɛ yɛrekyerɛ afoforo nea yenim a, ɛnsɛ sɛ yenya adwene sɛ anhwɛ a wɔbɛba abegye yɛn adwuma ayɛ, enti yɛde nimdeɛ no bi besie wɔn. Saa ara nso na ɛnsɛ sɛ yɛka sɛ: ‘Me de, obiara antete me oo! Ma ɔno ara nsua.’ Ɛnsɛ sɛ Yehowa somfo biara nya saa adwene no da. Mmom, yeyi yɛn yam de yɛn nimdeɛ boa afoforo, na “yekum yɛn ho nso” ma wɔn a yɛtete wɔn no. (1 Tes. 2:8) Yɛpɛ sɛ ‘wɔn nso fata yiye sɛ wɔbɛkyerɛkyerɛ ebinom.’ (2 Tim. 2:​1, 2) Sɛ yɛn mu biara de ne nimdeɛ boa afoforo a, ɛbɛma yɛn mu biara anya nimdeɛ pii na yɛn ani nso begye paa.

SƐ ƐTE SƐ NEA NKURƆFO NKYERƐ NEA YƐYƐ MA WƆN HO ANISƆ A

14. Sɛ yɛyɛ biribi ma nkurɔfo a, dɛn na wɔn mu dodow no ara yɛ?

¹⁴ Sɛ yɛyɛ biribi ma nkurɔfo, ɛnkanka yɛn nuanom Kristofo a, wɔtaa kyerɛ ho anisɔ. Ebia wɔbɛkyerɛw krataa tiawa bi abɛda yɛn ase, anaa wɔbɛkyerɛ ho anisɔ wɔ kwan foforo so. (Kol. 3:15) Sɛ wɔkyerɛ nea yɛyɛ ma wɔn no ho anisɔ a, ɛma yɛn ani gye paa.

15. Sɛ ebinom ankyerɛ nea yɛyɛ ma wɔn ho anisɔ a, dɛn na ɛsɛ sɛ yɛkae?

¹⁵ Nanso nea ɛwom ne sɛ, ɛtɔ da a, ebinom nkyerɛ nea yɛyɛ ma wɔn no ho anisɔ. Ɛtɔ da bi a, ebia yɛde yɛn bere, yɛn ahoɔden anaa yɛn sika bɛboa afoforo, nanso wobɛhwɛ no, asɛ wɔn ani nsɔ nea yɛayɛ ama wɔn no. Sɛ biribi saa si a, dɛn na yɛbɛyɛ na yɛn anigye ansɛe anaa yɛamfa wɔn ho abufuw? Kae asɛm a ɛwɔ Asomafo Nnwuma 20:35 a adesua yi gyina so no. Sɛ yɛkyɛ ade a, ɛma yɛn ani gye, enti sɛ yɛyɛ ade ma nkurɔfo na wɔankyerɛ ho anisɔ a, ɛnsɛ sɛ ɛhaw yɛn. Sɛ afoforo ankyerɛ nea yɛyɛ ma wɔn no ho anisɔ mpo a, ɛnsɛ sɛ ɛno siw yɛn kwan sɛ yɛbɛkɔ so akyɛ ade. Yɛbɛyɛ no sɛn? Yɛnhwɛ akwan a yebetumi afa so no bi.

16. Dɛn na ɛbɛboa yɛn ama yɛakɔ so de anigye akyɛ ade?

¹⁶ Kae sɛ wokyɛ ade a na woresuasua Yehowa. Nneɛma pa a Yehowa de ma nkurɔfo no, sɛ wɔkyerɛ ho anisɔ oo, sɛ wɔankyerɛ ho anisɔ oo, ɔkɔ so de ma wɔn. (Mat. 5:​43-48) Yehowa hyɛ yɛn bɔ sɛ, sɛ yɛkyɛ nkurɔfo ade na ‘yɛamfa yɛn ani anto so sɛ yɛn nsa bɛsan aka’ a, yɛn “akatua bɛyɛ kɛse.” (Luka 6:35) Enti sɛ ɛtɔ da na nkurɔfo ankyerɛ nea woayɛ ama wɔn no ho anisɔ a, mma w’abam mmmu. Kae sɛ, esiane sɛ wode “anigye kyɛ ade” nti,  papa biara a woyɛ ma afoforo no, Yehowa betua wo ka.—Mmeb. 19:17; 2 Kor. 9:7.

17. Yɛbɛyɛ dɛn akyerɛ sɛ yɛde adwempa na ɛrekyɛ ade? (Luka 14:​12-14)

¹⁷ Sɛ yɛpɛ sɛ yehu sɛ adwempa na yɛde rekyɛ ade a, afotu a ɛwɔ Luka 14:​12-14 no bɛboa yɛn. (Kenkan.) Sɛ yɛsom obi hɔho anaa yɛyɛ obi adɔe na ɔno nso betumi ayɛ bi ama yɛn a, ɛnyɛ bɔne. Nanso, sɛ yehu sɛ yɛn de, daa nea enti a yɛyɛ nkurɔfo adɔe ne sɛ, yɛhwɛ kwan sɛ wɔn nso bɛyɛ bi atua yɛn ka nso ɛ? Ɛnde, ɛsɛ sɛ yɛbɔ mmɔden de asɛm a Yesu kae no yɛ adwuma. Yebetumi ahwɛ obi a onni bi na yɛayɛ no adɔe, efisɛ yenim sɛ ɔrentumi nyɛ bi ntua yɛn ka. Yɛyɛ saa a, yɛn ani begye, efisɛ na yɛresuasua Yehowa. Ɛno nso bɛboa yɛn na sɛ afoforo ankyerɛ nea yɛyɛ ma wɔn no ho anisɔ a, ansɛe yɛn anigye.

18. Dɛn na ɛnsɛ sɛ yɛyɛ, na adɛn ntia?

¹⁸ Nnwen adwemmɔne mma afoforo. (1 Kor. 13:7) Sɛ afoforo ankyerɛ nea yɛayɛ ama wɔn no ho anisɔ a, yebetumi abisa yɛn ho sɛ: ‘Ampa-ne-ampa ara sɛ ɛyɛ boapayɛ anaa wɔn werɛ na efii?’ Sɛnea na yɛhwɛ kwan sɛ wɔbɛkyerɛ ho anisɔ no, ebia biribi nti na wɔanyɛ saa. Ebinom nso ani sɔ paa, nanso ɛyɛ den ma wɔn sɛ wɔbɛka ho asɛm. Ebia ɛbɛyɛ wɔn aniwu sɛ afoforo reboa wɔn, ɛnkanka sɛ bere bi a atwam no, wɔn na na wɔboa afoforo a. Sɛnea ɛte biara no, ɔdɔ a yɛwɔ ma yɛn nuanom Kristofo nti, yɛrennwen adwemmɔne mma wɔn, na mmom yɛbɛkɔ so de anigye ayɛ wɔn adɔe.—Efe. 4:2.

19-20. Dɛn bio na ɛbɛboa yɛn ama yɛde anigye akyɛ ade? (Hwɛ mfoni no nso.)

¹⁹ Si abotare. Bere bi a Ɔhene Solomon nyansafo no reka adekyɛ ho asɛm no, ɔkyerɛwee sɛ: “Tow wo paanoo gu nsu mu, na nna pii akyi no, wo nsa bɛsan aka.” (Ɔsɛnk. 11:1) Sɛnea saa nsɛm yi kyerɛ no, adɔe a yɛyɛ nkurɔfo no, ɛtɔ da a, “nna pii akyi,” anaa bere tenteenten bi akyi na wɔbɛkyerɛ ho anisɔ. Yɛnhwɛ osuahu bi a esi nokwasɛm yi so dua.

 ²⁰ Bere bi, ɔmansin sohwɛfo bi yere kyerɛw krataa bi a ɛhyɛ nkuran kɔmaa onuawa bi a na wabɔ asu foforo, na ɔhyɛɛ no nkuran sɛ, ɔnyere ne ho nni Yehowa nokware. Bɛyɛ mfe nwɔtwe akyi no, onuawa no nso kyerɛw krataa brɛɛ ɔmansin sohwɛfo no yere no, na ɔkaa sɛ: “Mete nka sɛ ɛsɛ sɛ mekyerɛw wo, na mema wuhu boa a woaboa me wɔ mfe a abɛsen kɔ yi mu.” Ɔtoaa so sɛ: “[Wo krataa] no, na emu nsɛm hyɛ nkuran, nanso kyerɛwsɛm a ɛwom no na ɛkaa me koma paa, na me werɛ amfi da.” a Bere a onuawa no kaa ɔhaw a wafa mu no bi ho asɛm wiei no, ɔkaa sɛ: “Ɛtɔ da a ɛba me mu sɛ, mimfi nokware no mu, minnyae Yehowa som na mempɛ me baabi ntena! Nanso ɛba saa a, na makae kyerɛwsɛm a na ɛwɔ wo krataa no mu no na asan ahyɛ me den.” Ɔde kaa ho sɛ: “Saa mfe nwɔtwe no nyinaa, biribiara nni hɔ a ɛhyɛɛ me den sen kyerɛwsɛm a na ɛwɔ wo krataa no mu no.” Hwɛ sɛnea ɔmansin sohwɛfo yere no ani gyei bere a ne nsa kaa saa krataa no wɔ “nna pii akyi”! Yɛn nso, sɛ yɛyɛ obi adɔe anaa yɛboa obi a, ebia bere bi akyi no, onii no bɛma yɛahu sɛ n’ani asɔ.

21. Adɛn nti na woasi wo bo sɛ wobɛkɔ so asuasua Yehowa ayamye?

²¹ Sɛnea yɛadi kan aka no, Yehowa bɔɔ yɛn wɔ ɔkwan soronko bi so. Ɛwom sɛ, sɛ obi kyɛ yɛn ade anaa ɔyɛ biribi ma yɛn a, yɛn ani gye, nanso sɛ yɛkyɛ afoforo ade anaa yɛyɛ biribi ma wɔn a, ɛma yenya anigye pii. Sɛ yɛboa yɛn nuanom Kristofo a, ɛma yɛn ani gye. Na sɛ wɔkyerɛ nea yɛayɛ ama wɔn no ho anisɔ a, ɛno nso ma yɛn ani gye. Nanso nea yɛkyɛɛ no ade no, sɛ ɔkyerɛ ho anisɔ oo, sɛ wankyerɛ ho anisɔ oo, yɛn ani betumi agye sɛ yɛyɛɛ nea ɛfata. Mma wo werɛ mmfi da sɛ, biribiara a wode bɛkyɛ obi no, “Yehowa betumi ama wo nea ɛkyɛn saa koraa.” (2 Be. 25:9) Nea ɛwom ara ne sɛ, yɛrentumi nkyɛ ade nsen Yehowa! Na hwɛ sɛ Yehowa ankasa atua wo ka, anigye bɛn na ɛsen wei? Enti momma yensi yɛn bo na yɛnkɔ so nsuasua yɛn soro Agya no ayamye.