Wɔwoo me afe 1934. Ná m’awofo atu afi Switzerland abɛtena Timmins a ɛwɔ Ontario Canada; ɛyɛ kurow bi a wɔtu sika kɔkɔɔ wɔ hɔ. Bɛyɛ afe 1939 no, me maame fii ase kenkan Ɔwɛn-Aban, na ofii ase nso kɔɔ Yehowa Adansefo adesua. Ɔrekɔ a, na ɔde me ne me nuanom nyinaa ka ne ho kɔ. Ankyɛ na ɔbɛyɛɛ Yehowa Danseni.

Bere a me maame bɛyɛɛ Ɔdansefo no, me papa ani annye ho koraa. Nanso na nokware no da me maame koma so, enti osii ne bo sɛ ɔrennyae da. Bere a wɔbaraa Yehowa Adansefo wɔ Canada afe 1940 mu hɔ no mpo, me maame annyae. Ná me papa taa didi me maame atɛm paa, nanso na me maame da obu ne ayamye adi kyerɛ no bere nyinaa. Me maame nhwɛso pa no boaa me ne me nuanom ma yɛn nso yebegyee nokware no. Anigyesɛm ne sɛ, bere bi akyi no, me papa sesaa ne suban, na ofii ase ne yɛn dii no yiye.

Teokrase Nkɔso Nhyiam a wɔyɛe wɔ New York, afe 1950 no, mekɔɔ bi. Mihyiaa anuanom a wɔfi wiase afanan nyinaa, na mitiee anuanom a wɔawie Gilead suahu a ɛhyɛ nkuran. Wei kanyan me sɛ menyere me ho nyɛ pii wɔ Yehowa som mu. Efi saa bere no, misii me bo paa sɛ mɛyɛ bere nyinaa som adwuma no bi. Mesan kɔɔ fie ara pɛ na mehyehyɛɛ daa akwampaefo fɔɔm no bi. Canada Betel kyerɛw me sɛ ɛsɛ sɛ mebɔ asu ansa. Enti mebɔɔ asu October 1, 1950. Bosome baako akyi no, mebɛyɛɛ daa kwampaefo. Kapuskasing na Betel dii kan de me kɔe sɛ  menkɔyɛ asɛnka adwuma no. Ná efi hɔ kɔ kurow a na mete mu no ware paa.

Afe 1951 no, anuanom a ɛka French kasa no, Betel de too wɔn anim sɛ wɔnhwɛ sɛ wɔbetumi atu akɔ Quebec akɔka asɛm no akyerɛ wɔn a ɛka French kasa no anaa. Ná mmoa ho hia wɔ hɔ. Ná mitumi ka French ne Borɔfo kasa nyinaa, enti mekaa sɛ mɛkɔ, na wɔde me kɔ Rouyn. Ná minnim obiara wɔ hɔ. Sɛnea madi kan aka no, onii a na merekosi no so no fie nɔma nko ara na na mewɔ. Nanso manyera. Marcel bɛyɛɛ m’adamfo paa, na mede anigye somee wɔ Quebec mfe nnan. Ɛno akyi no, mebɛyɛɛ ɔkwampaefo titiriw.

Bere a mewɔ Quebec no, m’ani gyei sɛ wɔtoo nsa frɛɛ me sɛ menkɔ Gilead sukuu adesuakuw a ɛtɔ so 26 no bi; wɔyɛe wɔ South Lansing a ɛwɔ New York no. February 12, afe 1956 na yewiei, na wɔde me kɔɔ ɔman bi a seesei wɔfrɛ no Ghana b a ɛwɔ Afrika atɔe. Nanso ansa na mɛkɔ no, na ehia sɛ mesan kɔ Canada kodi “nnawɔtwe kakra” wɔ Toronto kosi sɛ me nkrataasɛm bɛtotom.

Ewiee ase no, nnawɔtwe kakra no dan abosome nson. Saa bere no, Cripps abusua no hwɛɛ me kama wɔ wɔn fie, na mibehuu wɔn babea bi a ne din de Sheila. Yɛn mu biara ani begyee ne yɔnko ho. Bere a meyɛe sɛ mede rebɛto n’anim sɛ mɛware no no, ɛhɔ ara pɛ na me nkrataasɛm no totoom. Me ne Sheila bɔɔ ho mpae, na yesii gyinae sɛ ɛsɛ sɛ mekɔyɛ m’adwuma no. Nanso yɛkaa sɛ yɛbɛkɔ so adi nkitaho na yɛahwɛ sɛ daakye bi yebetumi aware a. Ná saa gyinaesi no nna fam, nanso akyiri yi yebehui sɛ yesii gyinae pa.

Merekɔ Ghana ahenkurow Accra no, meforoo keteke, hyep, ne wimhyɛn; ne nyinaa dii bosome baako. Mekɔe no, mekɔyɛɛ ɔmantam sohwɛfo. Mitutuu akwan wɔ Ghana  nyinaa; ná Ivory Coast (a seesei wɔfrɛ no Côte d’Ivoire) ne Togoland (a seesei wɔfrɛ no Togo) nso ka ho. Mpɛn pii no, Betel kar na na mede kɔ, na na me nko ara na metaa kɔ. Merekɔ a, anigye de, na mefa no kwa!

Edu nnawɔtwe awiei a, na mekɔyɛ dwumadi wɔ ɔmansin nhyiam ase. Ná yenni nhyiam asa biara. Enti na anuanom no de mpampuro ne berɛw bɔ apata na awia anhye yɛn. Esiane sɛ na frigye nni kafeteria hɔ nti, na wɔde mmoa ba baabi a ɛbɛn hɔ, na sɛ ɛho behia a wɔakum wɔn de ayɛ aduan ama nhyiamfo no.

Yenyaa suahu ahorow bi a ɛyɛ serew wɔ nhyiam a ɛtete saa ase. Herb Jennings c a na ɔyɛ ɔsɛmpatrɛwni no, bere bi na ɔrema ɔkasa. Ɛhɔ ara na nantwi bi tewee wɔ kafeteria hɔ tuu mmirika bɛfaa platfɔɔm no anim hɔ. Herb gyaee kasa, na na asɛ aboa no ani so atan no paa. Nanso anuanom mmarima akantinka nnan kɔkyeree no san de no kɔɔ kafeteria hɔ, na atiefo no bɔ gyee so.

Nnawɔtwe no mu no, wɔn a ɛtete nkuraase a na ɛbɛn baabi a yɛbɛyɛ nhyiam no, ɛyɛ a na mikoyi yɛn video a yɛato din The New World Society in Action no kyerɛ wɔn. Sɛ mede ntama fitaa sɛn nnua mmienu ntam a, na mayi wɔ so akyerɛ wɔn. Ná nkuraa no asefo no ani gye ho paa! Wɔn mu pii wɔ hɔ a, na ɛno ne video a edi kan a wɔahwɛ pɛn. Wɔhwɛ video no na wɔhu sɛ nkurɔfo rebɔ asu a, na wɔbɔ wɔn nsam saa ara. Obiara a ɔhwɛɛ saa video no hui paa sɛ Yehowa Adansefo yɛ baako na wɔwɔ wiase baabiara.

Midii bɛyɛ mfe mmienu wɔ Afrika no, m’ani gyei paa sɛ mekɔɔ amanaman ntam nhyiam a wɔyɛɛ no afe 1958 wɔ New York no. Ná Sheila yɛ ɔkwampaefo titiriw wɔ Quebec, na ɔno nso baa bi. M’ani gyei paa sɛ mihyiaa no. Ná yɛtaa fa krataakyerɛw so di nkitaho, nanso seesei a na yɛasan ahyia bio no, mede too n’anim sɛ mɛware no, na ɔpenee so. Mekyerɛw kobisaa Onua Knorr d sɛ obetumi ama Sheila akɔ Gilead na owie a wabɛka me ho wɔ Afrika anaa. Ɔno nso ampopo ne ti. Sheila wiei no, ɔbaa Ghana. Yɛwaree wɔ Accra October 3, 1959. Yɛtee nka sɛ Yehowa som a yɛde dii kan nti, ɔno nso ahyira yɛn mmoroso.

Afe 1961 no, wɔde yɛn kɔɔ Cameroon. Anuanom a edi adwuma no anim no ka kyerɛɛ me sɛ menkɔboa mma yennya Betel foforo wɔ hɔ, enti na minni adaagye koraa. Wɔpaw me sɛ menhwɛ Betel no so. Esiane sɛ na menyɛɛ bi da nti, na mewɔ pii sua. Afe 1965 no, yebehui sɛ Sheila nyem. Ná ɛyɛ den ma yɛn sɛ yebegye atom sɛ yɛrebɛyɛ awofo. Nanso bere a yesiesiee yɛn adwene wiei a yɛreyɛ nhyehyɛe asan akɔ Canada no, awerɛhosɛm bi bɛboom.

Sheila nyinsɛn no sɛee. Dɔkta ka kyerɛɛ yɛn sɛ na abofra no yɛ ɔbarima. Asɛm yi sii no, mfe 50 atwam, nanso yɛn werɛ amfi da. Ɛwom sɛ nea esii no maa yɛn werɛ howee paa de, nanso yɛkɔɔ so yɛɛ adwuma no, efisɛ na ɛyɛ adwuma a ɛda yɛn koma so paa.

Ná anuanom a ɛwɔ Cameroon no taa hyia ɔsɔretia, efisɛ na wɔmfa wɔn ho nhyɛ amanyɔsɛm mu. Edu abatow so a, na emu taa yɛ den paa. May 13, 1970 no, biribi a na yɛnhwɛ kwan koraa sii; wɔbaraa Yehowa Adansefo. Yɛn Betel foforo fɛfɛɛfɛ no, aban no gyei; abosome nnum pɛ na na yɛde atena mu. Annu nnawɔtwe mpo na wɔpam asɛmpatrɛwfo a yɛwɔ ɔman no mu nyinaa. Ná ɛyɛ den ma yɛn sɛ yebegyaw anuanom no hɔ, efisɛ na yɛdɔ wɔn paa, na na yennim nea ɛbɛto wɔn.

Abosome nsia a edi hɔ no, yɛtenaa France Betel. Meyɛɛ nea metumi biara wɔ hɔ de boaa yɛn nuanom a ɛwɔ Cameroon no. December, afe 1970 mu no, wɔde yɛn kɔɔ Nigeria Betel. Efi saa bere no, Nigeria Betel fii ase hwɛɛ adwuma a na wɔyɛ wɔ Cameroon no so. Anuanom a na ɛwɔ Nigeria no gyee yɛn fɛfɛɛfɛ, na yɛde anigye somee wɔ hɔ mfe kakra.

Afe 1973 no, na ɛsɛ sɛ yesi gyinae bi a ɛyɛ den. Ná yare bi hyehyɛ Sheila ho a na ɛreteetee no paa. Bere a yɛkɔɔ nhyiam bi wɔ New York no, ɔde su ka kyerɛɛ me sɛ: “Merentumi ntoa so bio! Ɔbrɛ ne yare reteetee me dodo.” Ná ɔne me abom asom wɔ Afrika Atɔe bɛboro mfe 14. Nokwaredi a na ɔde asom Yehowa no, na ɛyɛ me fɛ paa, nanso na ɛsɛ sɛ yɛyɛ nsakrae. Yesusuw yɛn tebea no ho bɔɔ ho mpae kɔɔ akyiri paa. Yewiei no, yesii gyinae sɛ yɛbɛsan akɔ Canada efisɛ na yebetumi anya ayaresa a edi mu wɔ hɔ. Asɛmpatrɛw adwuma ne bere nyinaa som adwuma a na yɛrebegyae no, na ɛnna fam koraa; gyinae a yɛasisi nyinaa, ɛno na na ɛyɛ den paa.

Yekoduu Canada no, m’adamfo bi a na me ne no abɔ akyɛ maa me adwuma yɛe; na ɔtɔn kar wɔ kurow bi a ɛwɔ Toronto atifi fam. Yɛhan dan, na yɛtɔɔ nkongua dedaw. Wei maa yetumi hyɛɛ abrabɔ foforo ase a yɛankɔbɔ bosea biara. Ná yɛpɛ sɛ yɛyɛ yɛn ho awiɛmfoɔ efisɛ na yɛhwɛ kwan sɛ ebia daakye yebetumi asan akɔyɛ bere nyinaa som adwuma no bio. Ankyɛ koraa na saa anidaso no baa mu; ɛyɛɛ yɛn nwanwa efisɛ na yɛnhwɛ kwan koraa.

 Saa bere no, na wɔresi Nhyiam Asa foforo bi wɔ Norval a ɛwɔ Ontario. Enti edu Memeneda biara a na mekɔboa. Bere bi akyi no, wɔpaw me sɛ menhwɛ Nhyiam Asa no so. Ná Sheila ho retɔ no nkakrankakra, enti yɛtee nka sɛ na obetumi ayɛ saa adwuma foforo yi. Enti June, afe 1974 no, yetu kɔtenaa Nhyiam Asa so hɔ. Ɛyɛɛ yɛn dɛ paa sɛ yɛsan baa bere nyinaa som adwuma no mu bio!

Anigyesɛm ne sɛ, nkakrankakra, Sheila ho tɔ ara na na ɛretɔ no. Mfe mmienu akyi no, yetumi kɔyɛɛ ɔmansin adwuma no bi. Ɔmansin a wɔde maa yɛn no, na ɛwɔ Canada baabi a wɔfrɛ hɔ Manitoba; ná awɔw wɔ hɔ paa. Nanso na anuanom a ɛwɔ hɔ no wɔ ɔdɔ sɛ. Yehui sɛ ɛnyɛ baabi a yɛsom ne asɛm no, mmom, nea ehia paa ne sɛ yɛbɛkɔ so asom Yehowa wɔ baabiara a yɛwɔ.

Bere a yɛyɛɛ ɔmansin adwuma no mfe kakra akyi no, Canada Betel too nsa frɛɛ yɛn sɛ yɛmmɛsom wɔ hɔ. Ɛno akyi bere tiaa bi no, biribi a esii haw me paa, nanso minyaa asuade titiriw bi fii mu. Yɛyɛɛ nhyiam titiriw bi wɔ Montreal, na wɔpaw me sɛ memma ɔkasa dɔnhwerew baako ne fã wɔ French kasa mu. Awerɛhosɛm ne sɛ, me kasa no ampusuw anuanom. Wei nti onua bi a ɔyɛ adwuma wɔ Ɔsom Dwumadibea maa me afotu. Nokwasɛm ne sɛ, efi saa bere no mabehu sɛ menyɛ obi a minim kasa ma paa. Saa bere no nso, anka ɛsɛ sɛ mihu no saa. Nanso sɛnea otuu me fo no, me bo annwo so. Nea ɔkae no, me ne no anyɛ adwene na me bo fuwii efisɛ ɔbɔɔ m’akyi a wankamfo me mpo. Midii mfomso susuwii sɛ ɔkwan a ɔfaa so tuu me fo no antwa yiye. Afei nso, metee nka sɛ ɛnyɛ ɔno na ɛsɛ sɛ otu me fo.

Nna kakra akyi no, Baa Boayikuw no muni baako ne me kaa nea esii no ho asɛm. Migye toom sɛ mantie afotu no angu aso pa mu, na mepaa kyɛw. Ɛno akyi no, me ne onua a otuu me fo no kasae. Ofii ne koma mu gyee kyɛwpa no toom. Saa suahu no boaa me ma misuaa biribi a me werɛ remfi da. Ɛne sɛ, ɛho hia paa sɛ mebrɛ me ho ase. (Mmeb. 16:18) Mabɔ wei ho mpae akyerɛ Yehowa mpɛn pii, na masi me bo sɛ, afotu biara a obi de bɛma me no, merenkasa ntia.

Masom wɔ Canada Betel bɛboro mfe 40, na efi afe 1985 no, manya hokwan asom sɛ Baa Boayikuw no muni. February afe 2021 no, me dɔfo Sheila wui. Ne wu no ho awerɛhow a meredi no da nkyɛn a, me ara nso mente apɔw. Nanso esiane sɛ m’ani gye wɔ Yehowa som mu, na minni adaagye koraa wɔ Yehowa som mu nti, ‘m’adwene nkɔ nna a ɛretwam no so pii.’ (Ɔsɛnk. 5:20) Ɛwom sɛ mahyia ɔhaw pii wɔ m’asetena mu, nanso emu anigye no boro ɔhaw no so koraa. Mede Yehowa adi kan wɔ m’asetena mu, na mayɛ bere nyinaa som adwuma no mfe 70. Wei ama m’ani agye paa. Me mpaebɔ ne sɛ, anuanom mmerante ne mmabaa nso bɛkɔ so de Yehowa adi kan wɔ wɔn asetena mu, efisɛ migye di paa sɛ, sɛ wɔyɛ saa a, nhyira ne anigye a wɔn a wɔsom Yehowa nya no, wɔn nso benya bi.