1-2. Dɛn na ɛma Onyankopɔn asomfo ani gye? (Yakobo 1:​22-25)

 YEHOWA ne ne Dɔba no pɛ sɛ yɛn ani gye. Nea ɔkyerɛw Dwom 119:2 no kaa sɛ: “Anigye ne wɔn a wodi ne nkaesɛm so na wɔde wɔn koma nyinaa hwehwɛ no.” Yesu nso ka too so sɛ: “Anigye ne wɔn a wotie Onyankopɔn asɛm na wodi so!”—Luka 11:28.

² Yehowa asomfo de, yɛwɔ anigye. Adɛn ntia? Nea ɛma yɛn ani gye no dɔɔso; baako a ɛho hia paa ne sɛ yɛkenkan Onyankopɔn Asɛm no daa, na yɛyere yɛn ho de yɛ adwuma.—Kenkan Yakobo 1:​22-25.

3. Nea yɛkenkan wɔ Onyankopɔn Asɛm mu no, sɛ yɛde yɛ adwuma a, ɛboa yɛn sɛn?

³ Sɛ yɛde ‘asɛm no yɛ adwuma’ a, ɛboa yɛn wɔ akwan pii so. Yɛbɛyɛ nhwɛso a, nea yesua wɔ Onyankopɔn Asɛm mu no, sɛ yɛde yɛ adwuma a, ɛma Yehowa gye yɛn tom. Wei ma yɛn ani gye. (Ɔsɛnk. 12:13) Nea yesua wɔ Onyankopɔn Asɛm mu no, sɛ yɛde bɔ yɛn bra a, ɛma yɛne yɛn abusuafo ne yɛn nuanom Kristofo tena fɛfɛɛfɛ. Ebia w’ankasa woahu biribi a ɛte saa wɔ w’asetenam. Afei nso, ɔhaw a wɔn a wɔntie Yehowa hyia no, emu bebree wɔ hɔ a, yɛkwati. Nokwasɛm ne sɛ, yɛne Ɔhene Dawid yɛ adwene. Bere a ɔkaa Yehowa mmara, n’ahyɛde ne n’atemmusɛm ho asɛm wiei no, ɔkaa sɛ: “Nea odi so no nya akatua kɛse.”—Dw. 19:​7-11.

4. Adɛn nti na ɛtɔ da a ɛyɛ den sɛ yɛde Onyankopɔn Asɛm no bɛyɛ adwuma?

⁴ Sɛ yebetumi de Onyankopɔn Asɛm no ayɛ adwuma a, nea edi kan, ɛsɛ sɛ yɛpɛ bere de kenkan Bible no na yedwinnwen ho sɛnea ɛbɛyɛ a nea Yehowa pɛ sɛ yɛyɛ  no, yɛbɛte ase. Nanso, nnwuma pii a egu yɛn so nti, ɛnyɛ bere nyinaa na ɛyɛ mmerɛw sɛ yɛbɛyɛ saa. Enti momma yɛnhwɛ nyansahyɛ ahorow bi a ebetumi aboa yɛn ma yɛakenkan Bible no daa. Afei nso, sɛ yɛkenkan Bible no a, yɛbɛhwɛ nea ɛbɛboa yɛn ma yɛadwinnwen ho na yɛahwɛ akwan a yebetumi afa so de abɔ yɛn bra.

PƐ BERE FA KENKAN ONYANKOPƆN ASƐM

5. Nneɛma bɛn na etumi gye yɛn bere dodow no ara?

⁵ Yehowa asomfo dodow no ara nni adaagye koraa. Yɛde yɛn bere pii yɛ nneɛma a Bible hwehwɛ sɛ yɛyɛ no. Yɛbɛyɛ nhwɛso a, yɛn mu dodow no ara yɛ nnwuma de hwɛ yɛn ho ne yɛn mmusua. (1 Tim. 5:8) Yɛn mu bebree hwɛ yɛn abusuafo a wɔyare anaa wɔn mfe akɔ anim. Afei nso, ɛsɛ sɛ yɛn mu biara hwɛ n’apɔwmuden yiye; ɛno nso gye bere. Wei nyinaa nka mfua, yɛwɔ dwumadi ahorow nso wɔ asafo no mu. Emu baako a ɛho hia paa ne sɛ yɛbɛyere yɛn ho ayɛ asɛnka adwuma no. Saa nnwuma a egu wo so yi nyinaa ho hia, ɛnde wobɛyɛ dɛn anya bere de akenkan Bible no daa adwinnwen ho na wode abɔ wo bra?

6. Dɛn na wobɛyɛ na woatumi akenkan Bible da biara? (Hwɛ mfoni no nso.)

⁶ Kristofo de, ‘nneɛma a ehia yɛn paa no,’ baako ne Bible akenkan, enti ɛnsɛ sɛ yɛde di agorɔ koraa. (Filip. 1:10) Bible ka sɛ anigye ne onipa a “n’ani gye Yehowa mmara ho, na ɔkenkan Ne mmara no dwinnwen ho awia ne anadwo.” (Dw. 1:​1, 2) Wei kyerɛ pefee sɛ, ɛsɛ sɛ yɛpɛ bere de kenkan Bible. Bere bɛn na eye paa sɛ yɛkenkan Bible? Ɛsono bere a ebeye ama yɛn mu biara. Nanso bere a wode bɛhyɛ no, ɛsɛ sɛ ɛyɛ bere a ɛbɛma woatumi ayɛ no daa. Onua bi a ne din de Victor ka sɛ: “M’ani gye ho sɛ mɛkenkan Bible no anɔpa. Ɛwom sɛ anɔpa-sɔre yɛ me den, nanso saa bere no na mihu sɛ nneɛma pii  ntwetwe m’adwene. Misua ade saa bere no a, ɛkɔ me tirim paa.” Wo nso ɛ, ɛyɛ a saa bere no boa wo anaa? Bisa wo ho sɛ: ‘Bere bɛn na eye ma me paa sɛ mɛkenkan Bible no?’

DWINNWEN NEA WOKENKAN NO HO

7-8. Nea yɛkenkan no, dɛn na ebetumi ama ayɛ den sɛ yebenya so mfaso kɛse? Fa mfatoho kyerɛkyerɛ mu.

⁷ Sɛ wowɔ nhyehyɛe a wode kenkan Bible no a, biribi foforo nso wɔ hɔ a ɛsɛ sɛ woma w’ani kɔ ho. Yemmisa oo, woakenkan biribi ama bere tiaa bi akyi no wo werɛ afi pɛn? Ebi to yɛn nyinaa. Awerɛhosɛm ne sɛ, sɛ yɛkenkan Bible no nso a, biribi saa betumi ato yɛn. Ebia na yɛde asi yɛn ani so sɛ yɛbɛkenkan ti dodow bi da biara. Sɛ wowɔ nhyehyɛe a ɛte saa a, wofata nkamfo. Ɛsɛ sɛ yɛyɛ nhyehyɛe na yɛyere yɛn ho sɛ yebedi so. (1 Kor. 9:26) Nanso sɛ yebenya yɛn Bible akenkan so mfaso a, ɛsɛ sɛ yɛyɛ pii ka ho.

⁸ Yɛnhwɛ mfatoho yi: Afifide hia nsu na atumi ayɛ yiye. Nanso sɛ nsu tɔ denneennen bere tiaa bi mu a, asaase no ntumi nnonom nsu no. Sɛ ɛba saa na nsu san tɔ a, mfaso biara remma so. Asaase no hia bere a ɛde bɛnonom nsu no na atumi aboa afifide nso. Yɛn nso, sɛ yɛpɛ sɛ yɛkae Bible mu nsɛm a yɛkenkan no na yɛde bɔ yɛn bra a, ɛnsɛ sɛ yɛde akenkan no tu mmirika.—Yak. 1:24.

9. Sɛ yɛtaa de yɛn Bible akenkan tu mmirika a, dɛn na ɛsɛ sɛ yɛyɛ?

⁹ Ɛtɔ da a wode wo Bible akenkan tu mmirika anaa? Sɛ saa a, dɛn na ɛsɛ sɛ woyɛ? To wo bo ase sɛnea ɛbɛyɛ a wubetumi adwinnwen nea wokenkan no ho. Ɛnsɛ sɛ wei yɛ den. Bere a wode sua ade no, wubetumi de bi aka ho na ama woatumi adwinnwen nea wusua no ho. Wopɛ nso a, wubetumi akenkan nkyekyɛm kakraa bi na wode bere a aka no adwinnwen ho. Victor a yɛadi kan aka ne ho asɛm no ka sɛ: “Mema me Bible akenkan yɛ tiawa, ebia ti baako. Esiane sɛ mekenkan no anɔpa nti, da mu no nyinaa, ɛboa me ma mitumi dwinnwen ho.” Sɛnea wobɛkan  no biara, nea ehia paa ne sɛ wobɛkenkan no kwan bi so a ɛbɛboa wo ma woatumi adwinnwen nea wokenkan no ho.—Dw. 119:97; hwɛ adaka a yɛato din “ Nsɛm a Wubetumi Abisa Wo Ho.”

10. Sɛnea ebia wode nea woasua no bɛyɛ adwuma no, ma ho nhwɛso. (1 Tesalonikafo 5:​17, 18)

¹⁰ Sɛ wode wo Bible akenkan bɛhyɛ bere bɛn oo, sɛ bere dodow sɛn na wode bɛkenkan oo, bɔ mmɔden sɛ wobɛhwehwɛ akwan a wobɛfa so de nea wusua no ayɛ adwuma. Sɛ wokenkan Onyankopɔn Asɛm no fã bi a, bisa wo ho sɛ, ‘Mɛyɛ dɛn de saa asɛm yi abɔ me bra mprempren anaa daakye?’ Yɛmfa no sɛ wo Bible akenkan de wo akopue 1 Tesalonikafo 5:​17, 18. (Kenkan.) Sɛ wokenkan saa nkyekyɛm mmienu no wie a, wubetumi agyina na woahwɛ mpɛn dodow a wode bɔ mpae ne sɛnea wo mpaebɔ tu mpɔn fa. Afei nso, wubetumi adwinnwen sɛnea wobɛda Yehowa ase wɔ nea wayɛ ama wo no ho. Ebia wubetumi de asi w’ani so sɛ wobɛda Yehowa ase wɔ nneɛma mmiɛnsa ho. Sɛ wode simma kakraa bi mpo dwinnwen nea woakenkan no ho a, ɛbɛboa wo ma woayɛ Onyankopɔn Asɛm no tiefo ne ne yɛfo. Sɛ wode nea wokenkan fi Bible mu da biara no yɛ adwuma a, nkakrankakra wo ne Yehowa adamfofa no mu bɛyɛ den paa. Na sɛ wuhu sɛ nneɛma pii wɔ hɔ a wotɔ mu sin a ɛsɛ sɛ woyɛ ho adwuma a, dɛn na wobɛyɛ?

FA BOTAE A WUBETUMI ADU HO SISI W’ANI SO

11. Nneɛma a yɛtɔ mu sin a ɛsɛ sɛ yɛyɛ ho adwuma no, adɛn nti na ebetumi ama yɛn abam abu? Ma ho nhwɛso.

¹¹ Sɛ yɛkenkan Bible na yehu sɛ nneɛma pii wɔ hɔ a ɛsɛ sɛ yɛyɛ ho adwuma a, yɛn abam betumi abu. Yɛbɛyɛ nhwɛso a, ebia ɛnnɛ wokenkan Bible no, wusuae sɛ ɛnsɛ sɛ yɛyɛ animhwɛ. (Yak. 2:​1-8) Ɛno ma wubehui sɛ sɛnea wo ne afoforo di no, ehia sɛ woyɛ mu nsakrae. Mo! Ade kyee nso, wo Bible akenkan sii so dua sɛ, ehia sɛ yɛhwɛ yɛn kasa yiye. (Yak. 3:​1-12) Wubehui sɛ ɛtɔ mmere bi a wo kasa ntwa yiye. Enti wode sii w’ani so sɛ wobɛma w’anom kasa ayɛ dɛ. Da a edi hɔ nso, bere a wokan Bible no, ɛkaa sɛ ehia sɛ yɛhwɛ yiye wɔ wiase adamfofa ho. (Yak. 4:​4-12) Enti wubehui sɛ nneɛma a wode gyigye w’ani no, ɛsɛ sɛ wuyiyi mu. Ebedu da a ɛtɔ so nnan no, anhwɛ a wobɛte nka sɛ, nneɛma a ɛsɛ sɛ woyɛ ho adwuma no dɔɔso dodo.

12. Sɛ wokenkan Bible na wuhu sɛ ehia sɛ woyɛ nsakrae ahorow bi a, adɛn nti na ɛnsɛ sɛ w’abam bu? (Hwɛ ase hɔ asɛm no nso.)

 ¹² Sɛ wuhu sɛ ehia sɛ woyɛ nsakrae ahorow bi anaa wutu mpɔn wɔ nneɛma bi mu a, mma w’abam mmmu. Sɛ wuhu biribi saa a, ɛyɛ adanse a ɛkyerɛ sɛ wobrɛ wo ho ase, na wopɛ sɛ woyɛ nea ɛtene. Obi a ɔbrɛ ne ho ase no, sɛ ɔrekenkan Bible no a, ɔhwehwɛ akwan a ɔbɛfa so de nea ɔresua no ayɛ adwuma. a Kae sɛ, “suban foforo” no a yɛbɛhyɛ no, ɛyɛ biribi a yɛyɛ no daa. (Kol. 3:10) Dɛn na ɛbɛboa yɛn ama yɛakɔ so de Onyankopɔn Asɛm no ayɛ adwuma?

13. Ɔkwampa bɛn na yebetumi afa so de nea yesua no ayɛ adwuma? (Hwɛ mfoni no nso.)

¹³ Sɛ́ anka yɛbɛbɔ mmɔden sɛ yɛde nea yesua no nyinaa bɛyɛ adwuma prɛko pɛ no, yebetumi ayɛ no nkakrankakra. (Mmeb. 11:2) Wubetumi asɔ wei ahwɛ: Kyerɛw nneɛma a wopɛ sɛ woyɛ ho adwuma no, na yi baako anaa mmienu bi a wubedi kan ayɛ ho adwuma; wubetumi ayɛ nea aka no ho adwuma akyiri yi. Dɛn na wubedi kan ayɛ ho adwuma?

14. Nea wode asi w’ani so no, emu nea ɛwɔ he na wubetumi de afi ase?

¹⁴ Wubetumi de nea ɛbɛyɛ mmerɛw ama wo no afi ase. Wopɛ nso a, nea wuhu sɛ ehia paa sɛ woyɛ ho adwuma no, wubetumi de ɛno afi ase. Sɛ wunya hu nea ɛsɛ sɛ woyɛ ho adwuma no pɛ a, yɛ ho nhwehwɛmu wɔ yɛn nhoma ahorow no mu. Wubetumi de Watch Tower Publications Index anaa Nhoma a Yehowa Adansefo De Yɛ Nhwehwɛmu no ayɛ. Bɔ nea wode  asi w’ani so no ho mpae, na srɛ Yehowa sɛ ɔmma wo ‘ɔpɛ no ne ahoɔden a wode bɛyɛ n’apɛde.’ (Filip. 2:13) Afei fa nea woasua no yɛ adwuma. Sɛ wuhu sɛ woatumi ayɛ nsakrae a edi kan no a, ebia ɛbɛkanyan wo ma woayɛ nea edi hɔ no ho adwuma. Ɛtoa so saa ara a, ebia ɛbɛyɛ mmerɛw ama wo sɛ wobɛyɛ nsakrae biara a ehia.

MA ONYANKOPƆN ASƐM ‘NYƐ ADWUMA WƆ WO MU’

15. Nnipa a ɛkenkan Bible no, ɔkwan bɛn so na wɔn mu bebree nte sɛ Yehowa asomfo? (1 Tesalonikafo 2:13)

¹⁵ Ebinom kyerɛ sɛ wɔakenkan Bible no mpɛn pii. Nanso wohwɛ a, wɔgye Bible no di paa? Wɔde emu nsɛm no bɔ wɔn bra? Awerɛhosɛm ne sɛ, dodow no ara nyɛ saa. Nanso Yehowa asomfo de, yɛda mu fua! Yɛte sɛ Kristofo a na ɛwɔ hɔ wɔ asomafo no bere so no; yegye Bible no di paa sɛ “ɛyɛ Onyankopɔn asɛm.” Afei nso, yɛyere yɛn ho de emu nsɛm no bɔ yɛn bra.—Kenkan 1 Tesalonikafo 2:13.

16. Dɛn na ɛbɛboa yɛn ma yɛayɛ Asɛm no yɛfo?

¹⁶ Ɛnyɛ bere nyinaa na ɛyɛ mmerɛw sɛ yɛbɛkenkan Onyankopɔn Asɛm no na yɛde abɔ yɛn bra. Ebia ɛbɛyɛ den sɛ yebenya bere de akenkan. Anaa ebia yɛde yɛn Bible akenkan betu mmirika, na ɛremma yennya kwan mfa nwinnwen ho. Anaa ebia yɛbɛte nka sɛ nea ehia sɛ yɛyɛ ho adwuma no dɔɔso dodo. Akwanside biara a wowɔ no, ɛnyɛ ade a worentumi nni so. Yehowa mmoa so nti, wubetumi adi so. Mmoa biara a ɔde bɛma yɛn no, momma yensi yɛn bo sɛ yebegye atom sɛnea ɛbɛyɛ a yɛrenyɛ atiefo awerɛfifo na mmom yɛbɛyɛ Asɛm no yɛfo. Akyinnye biara nni ho sɛ, sɛ yɛkenkan Onyankopɔn Asɛm no na yɛde bɔ yɛn bra a, yɛn ani begye paa.—Yak. 1:25.