EBINOM KA SƐ DABI. Dɔkota bi kaa sɛ, sɛ wode Bible afotu bɔ wo bra a, ɛte sɛ nea woakɔfa nhoma a wɔkyerɛw no bɛyɛ mfe 90 ni sɛ wode rekyerɛ sukuufo nyansahu. Obi a onnye Bible nni mpo deɛ, ebia ɔbɛka sɛ ɛte sɛ nea woakɔfa kɔmputa bi a atwam dedaadaw ho akwankyerɛ nhoma sɛ worehwɛ so ahu sɛnea wode kɔmputa a aba so foforo bɛyɛ adwuma. Nea wei kyerɛ ara ne sɛ, ebinom bu Bible sɛ atwam dedaadaw, na mfaso biara nni so.

Ebia obi bɛka sɛ, ɛnnɛ a anibue aba a abɛɛfo mfiri abu so yi, adɛn nti koraa na ɛsɛ sɛ yɛkɔfa Bible a wɔkyerɛw no teteete de bɔ yɛn bra? Adeɛ yi, wokɔ intanɛt so a, wubenya afotu ne akwankyerɛ bebree a nnansa yi ara na ɛreba. Wohwɛ TV a, wubehu animdefo, akukudamfo, ne wɔn a wɔkyerɛw nhoma sɛ wɔretu nkurɔfo fo wɔ abrabɔ, nneyɛe, ne nneɛma foforo ho. Wokɔ baabi a yɛtɔn nhoma nso a, wubenya nhoma bebree a wokenkan a ebetumi aboa wo. Wei ama wɔn a wɔtɔn nhoma no anya wɔn ho tam.

Sɛ yɛwɔ afotu bebree saa wɔ yɛn bere yi so deɛ a, ɛnde adɛn nti na ɛsɛ sɛ yɛma Bible a wɔkyerɛw no bɛyɛ mfe 2,000 ni kyerɛ yɛn kwan? Enti sɛ wɔn a wonnye Bible nni no ka sɛ ɛte sɛ nea yɛde nyansahu anaa kɔmputa ho nhoma a atwam reyɛ adwuma a, ɛnyɛ nokware? Dabi, ɛnyɛ nokware. Efisɛ nyansahu ne mfiridwuma deɛ etwam ntɛmntɛm, nanso nea nnipa hia wɔ asetenam deɛ, ɛnsesae. Besi nnɛ nyinaa, nnipa pɛ sɛ wohu nea enti a wɔwɔ wiase, wɔpɛ sɛ wonya anigye, ahobammɔ, abusua a asomdwoe wom, ne nnamfo pa.

Ɛwom sɛ Bible no akyɛ paa deɛ, nanso ɛma yehu nea yɛyɛ a ɛbɛma yɛanya saa nneɛma no ne nneɛma foforo. Bible aka sɛ Onii a ɔbɔɔ yɛn no, ɔno na ɔkyerɛw Bible no. Bible ma yɛn afotu a yebetumi de ayɛ adwuma wɔ yɛn asetena fã biara. Ɛsan boa yɛn ma yedi yɛn haw ahorow ho dwuma. (2 Timoteo 3:16, 17) Bible yɛ nea ɛkyɛn saa mpo. Ɛka sɛ, afotu a ɛwom no, mfaso wɔ so bere nyinaa, na ɛrentwam da! Bible no ankasa mpo ka sɛ: “Onyankopɔn asɛm wɔ nkwa.”—Hebrifo 4:12.

Enti nea Bible aka yi nyinaa yɛ nokware? Wohwɛ a, Bible no bere atwam anaa? Anaasɛ ɛyɛ nhoma a ebetumi aboa yɛn asen nhoma biara? Ɛyɛ ampa sɛ ɛyɛ nhoma a ɛwɔ nkwa? Ɔwɛn-Aban soronko a yɛreyɛ a ɛbɛba atoatoa so no, wei ne nea edi kan. Ɛbɛma woanya saa nsɛmmisa yi ho mmuae.