Nea Mmofra Hia ne Nea Wɔpɛ

EFI bere a wawo abofra no, ohia sɛ woyɛ no brɛbrɛ, wososo ne mu, na wofa no. Nnuruyɛfo binom gye di sɛ nnɔnhwerew 12 a edi kan wɔ awo akyi no ho hia paa. Wɔka sɛ nea ɛna ne akokoaa hia kɛse wɔ awo akyi pɛɛ ne sɛ “wɔbɛsosɔ wɔn ho mu, ahwɛ wɔn ho anim na wɔatie wɔn ho, na ɛnyɛ sɛ wɔbɛda anaa wobedidi.” *

Awofo fi nkate mu teɛ wɔn nsa so wɔn ba mu, na wofi ɔdɔ mu de no fam wɔn bo na wɔkorɔkorɔ no. Abofra no nso ne n’awofo nya abusuabɔ a emu yɛ den na ɔyɛ aso ma wɔn. Abusuabɔ a ɛda awofo ne abofra ntam no mu yɛ den ara ma awofo de nneɛma bɔ afɔre na ama wɔatumi ahwɛ abofra no yiye.

Nea ɛne eyi bɔ abira no, sɛ akokoaa annya abusuabɔ a ɔdɔ wom amfi awofo hɔ a, obetumi abotow na wawu. Ne saa nti, nnuruyɛfo binom gye di sɛ ɛho hia sɛ wɔde abofra no ma ne na wɔ awo akyi pɛɛ. Wɔde nyansahyɛ ma sɛ, ɛsɛ sɛ ɛna ne abofra de anyɛ yiye koraa no simma 30 kosi 60 di nkitaho wɔ awo akyi pɛɛ.

Ɛmfa ho sɛnea nnipa binom si abusuabɔ a ɛte saa so dua no, wɔ ayaresabea binom mu no, ebia ɛbɛyɛ den sɛ ɛna behu ne ba ntɛm. Mpɛn pii no, wɔtew akokoaa no fi ne na ho sɛnea ɛbɛyɛ a abofra no nnya nsanyare. Nanso adanse kyerɛ sɛ, sɛ ɛna ne akokoaa nya nkitahodi a, ebia nsanyare a nkokoaa nya no so betumi atew. Ne saa nti, wɔ ayaresabea pii mu no, wɔma kwan ma ɛna ne abofra de bere tenten nya nkitahodi.

Ɛna ne Ɔba Ntam Abusuabɔ mu Nsɛnnennen

Ɛnanom bi nnya wɔn ba ho anigye bere a edi kan a wohu no no. Ne saa nti wobisa sɛ: ‘So ɛbɛyɛ den sɛ me ne me ba benya  abusuabɔ?’ Nokwarem no, ɛnyɛ ɛnanom nyinaa na wonya wɔn ba ho dɔ bere a edi kan no. Nanso, ɛho nhia sɛ ɛhaw wɔn.

Na sɛ ɛna no annya ne ba no ho dɔ amonom hɔ ara mpo a, obetumi adɔ no akyiri yi. Ɔbaatan bi ka sɛ: “Tebea a wobɛwo wom no nni wo ne wo ba no ntam abusuabɔ so nkɛntɛnso biara.” Nanso sɛ woyem na w’adwene mu yɛ wo nãã wɔ eyi ho a, ɛbɛyɛ papa sɛ wudi kan ne oduruyɛfo a obegye wo awo no susuw ho. Kyerɛ bere ko ne bere tenten a wobɛpɛ sɛ wo ne wo ba no nya abusuabɔ no mu kyerɛ no pefee.

“Kasa Kyerɛ Me!”

Ɛte sɛ nea bere bi wɔ hɔ a mmofra adwene tumi kyere ade paa. Ɛnkyɛ na saa bere no atwam. Sɛ nhwɛso no, mmofra tumi sua kasa biako anaa nea ɛboro saa mpo a wɔmmerɛ. Nanso sɛ wonya mfe anum a, sɛnea wotumi sua kasa ntɛm no ano brɛ ase.

Sɛ abofra di mfe 12 rekɔ 14 a, sɛ́ obesua kasa no bɛyɛ adesoa kɛse. Sɛnea mmofra ho duruyɛfo Peter Huttenlocher kyerɛ no, “saa bere no, adwene tumi a ɛde kyere kasa no brɛ ase.” Ɛda adi sɛ mfe kakraa a edi kan wɔ abofra asetram no ne bere titiriw a otumi de sua kasa!

Ɔkwan bɛn na mmofra fa so sua kasa, adeyɛ a ɛboa ma wɔn adwene no tumi susuw nneɛma ho no? Ɔkwan titiriw ne kasa a awofo ka kyerɛ wɔn no. Nkokoaa titiriw tie nnyigyei a efi nnipa afoforo hɔ. Barry Arons a ɔwɔ Massachusetts Mfiridwuma Ho Adesuabea no ka sɛ: “Abofra . . . suasua ne na nne.” Nanso nea ɛyɛ nwonwa ne sɛ ɛnyɛ nnyigyei nyinaa na mmofra sua. Sɛnea Arons kyerɛ no, “abofra nsuasua nnyigyei foforo a ɛne ne na nne hyia wɔ bere koro mu no.”

Awofo a wofi mmeae ahorow nyinaa tumi sakra wɔn nne ka mmofra kasa a emu nna hɔ no bi kyerɛ wɔn mma. Sɛ ɔwofo no de anigye kasa a, ɛma akokoaa no koma bɔ yiye. Wogye di sɛ eyi boa ma abofra no hu nea nsɛmfua gyina hɔ ma no ntɛm. Bere a akokoaa no mmue n’ano no, ɛte sɛ nea ɔreka sɛ: “Kasa Kyerɛ Me!”

“Monhwɛ M’anim!”

Abɛda adi sɛ, efi afe a edi kan rekɔ no, abofra ne ɔpanyin a ɔhwɛ no, a mpɛn pii no ɛyɛ ne na no nya abusuabɔ a emu yɛ den. Sɛ abofra no nya abusuabɔ a ɛte saa no mu ahotoso a, ɛma otumi ne afoforo bɔ yiye sen mmofra a wɔn awofo nhwɛ wɔn no. Wogye di sɛ, ɛsɛ sɛ abofra no ne ne na nya abusuabɔ a ɛte saa ansa na wanya mfe abiɛsa.

Sɛ ɛba sɛ wɔto akokoaa no sraha wɔ bere a ɛho hia paa yi mu, a nea ɛkɔ so abɔnten betumi anya n’adwene so nkɛntɛnso kɛse no a, dɛn na ebetumi asi? Martha Farrell Erickson a ɔde mfe bɛboro 20 yɛɛ ɛnanom 267 ne wɔn mma ho nhwehwɛmu no ka eyi sɛ: “Sɛ wobu ani gu abofra so a, ɛma ɔbotow, na eyi de nkakrankakra nya abofra no ne afoforo ntɛm abusuabɔ so nkɛntɛnso, na ɛmma n’adwenem mmue.”

Bere a na Oduruyɛfo Bruce Perry a ɔwɔ Texas Mmofra Ayaresabea rekyerɛkyerɛ asiane a ɛwɔ mmofra a wobu wɔn ani gu wɔn so mu no, ɔkae sɛ: “Sɛ woka sɛ mempaw sɛ mebubu akokoaa a wadi asram asia nnompe nnyinaa mu ne sɛ megyaw no a merenhwɛ no asram abien a, mɛka sɛ ɛbɛyɛ papa sɛ mebubu ne nnompe nnyinaa mu mmom.” Dɛn ntia? Perry susuw sɛ “nnompe betumi atõatõa, nanso sɛ wɔma abofra adwene da mpan asram abien a ehia paa yi mu a, ebetumi ama  n’adwene asɛe koraa.” Ɛnyɛ obiara na ogye tom sɛ, sɛ adwene no ho ka a wontumi nyɛ ho hwee bio. Nanso nyansahu mu nhwehwɛmu kyerɛ sɛ, tebea a eye a wɔbɛtetew akokoaa wom no ho hia na ama n’adwene anyin.

Infants (Nkokoaa) nhoma no ka sɛ: “Ne tiawa mu no, [mmofra] wɔ ɔpɛ sɛ wɔbɛda ɔdɔ adi akyerɛ afoforo na afoforo nso adɔ wɔn.” Mpɛn pii na sɛ abofra resu a, na nea ɔreka akyerɛ n’awofo ara ne sɛ: “Monhwɛ m’anim!” Ɛho hia sɛ awofo no fi ayamhyehye mu hwɛ no. Ɛdenam nkitahodi a ɛte saa so na abofra tumi ma afoforo hu n’ahiade ahorow. Ɔnam so sua sɛnea ɔne afoforo bedi nkitaho.

‘So Merensɛe Abofra No?’

Ebia wubebisa sɛ ‘Sɛ bere biara abofra no su na mefa no a, so merensɛe no?’ Ebetumi aba saa. Ɛsono sɛnea obiara kyerɛ n’dwene wɔ asɛmmisa yi ho. Esiane sɛ ɛsono abofra biara nti, mpɛn pii no, ɛsɛ sɛ awofo na wɔhwɛ ɔkwan a eye a wɔbɛfa so ayɛ wɔn ade. Nanso nhwehwɛmu bi a wɔyɛe nnansa yi kyerɛ sɛ, sɛ ɔkɔm de abofra, ne ho yeraw no anaa sɛ ne bo fuw a, n’ahommoa sɔre. Sɛ abofra ho yeraw no a, osu. Wɔkyerɛ sɛ, sɛ ɔwofo no gye abofra no so na odi n’ahiade ho dwuma ma no a, ɛma abofra no ahommoa a ɛma ne ho yeraw no no brɛ ase. Afei nso, sɛnea Ɔbenfo Megan Gunnar kyerɛ no, abofra a wɔtaa yɛ nea ɔpɛ ma no no ahommoa ntaa nsɔre. Na sɛ ne bo fuw mpo a, ɛnkyɛ na ne bo adwo.

Erickson ka sɛ: “Nokwasɛm ne sɛ, mmofra a wɔtaa yɛ wɔn ahiade ma wɔn ntɛm, titiriw wɔ asram 6 kosi 8 a edi kan no mu no, ntaa nsu kɛse sɛ mmofra a wommua wɔn no.” Ɛho hia nso sɛ wosakra ɔkwan a wofa so di akokoaa ahiade ho dwuma no mu. Sɛ wofa ɔkwan koro so di n’ahiade ho dwuma bere nyinaa, te sɛ nufu a wobɛma no anaa fa a wobɛfa no a, ɛnde wubetumi asɛe no. Ɛtɔ mmere bi a, wo nne kɛkɛ a ɔbɛte no ara ye. Anaa bɛn a wobɛbɛn abofra no na wakasa agu n’asom brɛoo no betumi afata. Wɔ ɔkwan foforo so no, ebia nea ohia ara ne sɛ wo de wo nsa bɛto n’akyi anaa n’afuru so.

Apuei Fam bɛ bi ka sɛ: “Abofra adwuma ne sɛ obesu.” Wɔ abofra fam no, ɔkwan titiriw a ɔfa so kasa ne sɛ obesu. Sɛ wubisa ade bere biara na sɛ wommua wo a, wobɛte nka dɛn? Ɛnde, sɛ wo ba a obi ammoa no a ontumi nyɛ hwee no hwehwɛ biribi na wummua no a, ɔbɛte nka dɛn? Nanso hena na ɛsɛ sɛ odi n’ahiade ho dwuma?

 Hena na Ɔbɛhwɛ Abofra No?

Nhwehwɛmu bi a wɔyɛe wɔ United States nnansa yi no daa no adi sɛ mmofra a wɔadi mfe awotwe kosi akron mu 100 mu 54 na nnipa afoforo a wɔnyɛ wɔn awofo taa boa ma wɔhwɛ wɔn. Wɔ mmusua pii mu no, awofo baanu no nyinaa yɛ adwuma na ama wɔatumi ahwɛ wɔn ho. Na ɛnanom pii gye asram kakra de hwɛ wɔn mma wɔ wɔn awo akyi. Nanso hena na ɔbɛhwɛ abofra no wɔ ɛno akyi?

Nokwarem no, yenni mmara katee biara wɔ gyinaesi a ɛte saa ho. Nanso kae sɛ abofra no da so ara hia mmoa wɔ n’asetra bere a ehia paa yi mu. Ɛsɛ sɛ awofo baanu no nyinaa bom susuw asɛm no ho anibere so. Na sɛ wɔresi nea wɔbɛyɛ no ho gyinae a, ɛsɛ sɛ wosusuw ho yiye.

Oduruyɛfo Joseph Zanga a ɔwɔ Amerika Mmofra Ho Nnuruyɛfo Asuae no ka sɛ: “Ɛreda adi sɛ, sɛ́ yebegyaw yɛn mma ama wɔatete wɔn wɔ mmotafowa sukuu a eye paa mu mpo no ntumi nsi bere a mmofra hia fi ɛnanom ne agyanom nkyɛn no ananmu.” Animdefo binom aka sɛ mmofra a wɔwɔ mmotafowa sukuu mu no nnya kwan ne wɔn ahwɛfo no mmɔ sɛnea wɔpɛ.

Esiane sɛ ɛnanom ahu sɛnea wɔn mma ahiade ho hia nti, mmea a wɔyɛ nnwuma no bi agyae adwumayɛ na ama wɔatumi atra fie ahwɛ wɔn mma mmom sen sɛ wɔbɛma afoforo atete wɔn mma ama wɔn. Ɔbea bi kae sɛ: “Manya akomatɔyam sen sɛnea anka adwuma foforo biara betumi ama manya.” Nokwarem no, sikasɛm mu ahokyere mma ɛnanom nyinaa kwan mma wɔnyɛ biribi a ɛte saa. Awofo pii ntumi nyɛ tebea no ho hwee, ma enti wɔde wɔn mma kɔ mmotafowa sukuu, nanso wɔbɔ mmɔden sɛ wɔbɛma wɔn ani akũ wɔn mma ho na wɔayi ɔdɔ adi akyerɛ wɔn bere a wɔne wɔn wɔ hɔ no. Saa ara nso na awofo pii a wonni ahokafo na wɔyɛ nnwuma no nso ntumi nyɛ tebea no ho hwee, nanso wonya wɔn mmɔdenbɔ no so mfaso pii.

Abayɛn betumi ayɛ adwuma a ɛyɛ anigye paa. Nanso ɛyɛ adwuma a ne yɛ nna fam. Wobɛyɛ dɛn atumi ayɛ ama ayɛ yiye?

[Ase hɔ asɛm]

[Adaka/Mfonini wɔ kratafa 22]

Mmofra a Wonsu

Nnuruyɛfo binom a wɔwɔ Japan ka sɛ dɔ ara na mmofra a wonsu anaa wɔnserew redɔɔso. Mmofra ho duruyɛfo Satoshi Yanagisawa frɛ wɔn mmofra a wonsu. Dɛn nti na mmofra binom nna wɔn nkate adi? Nnuruyɛfo binom gye di sɛ nea ɛma ɛba saa ne sɛ wɔn awofo ansoso wɔn mu bere a wɔwoo wɔn no. Ne saa nti mmofra no ankasa begye tom sɛ wonni boafo. Nhwehwɛmu bi kyerɛ sɛ, sɛ mmofra su na wommua wɔn anaa wɔnte wɔn ase a, mmofra no ankasa gyae su.

Oduruyɛfo Bruce Perry a ɔyɛ adwen ho yaresafo panyin wɔ Mmofra Ayaresabea a ɛwɔ Texas no kyerɛ sɛ, sɛ wɔamfa nkuranhyɛ a ɛfata amma abofra wɔ bere a ɛsɛ mu a, amemene no fã a ɛma otumi te afoforo nkate ase no ano betumi akum. Na sɛ wobu ani gu abofra no nkate fam ahiade so dodo a, ebetumi ama tema a obenya ama afoforo no ayera koraa. Oduruyɛfo Perry gye di sɛ, ani a wobu gu nkate fam ahiade so wɔ mmofraberem no na ɛma mmofra binom nyin a wɔnom nnubɔne na wɔyɛ basabasa no.

[Mfonini wɔ kratafa 23]

Abusuabɔ a ɛda ɔwofo ne ɔba ntɛm no mu yɛ den bere a wodi nkitaho no