Mose—Sɛnea N’asetra Ka Wo

NHOMANIMFO ne akasatiafo pii fam no, Mose yɛ anansesɛm mu nipa bi ara kwa. Wɔpo Bible mu asɛm no, na adanse a wogyina so ka saa no nso hwehwɛ sɛ yɛbɛpo mmarima te sɛ Plato ne Socrates ho nsɛm aka sɛ wɔyɛ anansesɛm mu nnipa.

Nanso sɛnea yɛahu no, biribiara nni hɔ a yebetumi agyina so apo nea Bible ka fa Mose ho no. Nea ɛne no bɔ abira no, nnipa a wɔwɔ Onyankopɔn mu gyidi nim sɛ adanse pii wɔ hɔ a ɛkyerɛ sɛ Bible no nyinaa yɛ “Onyankopɔn  asɛm.” * (1 Tesalonikafo 2:13; Hebrifo 11:1) Nnipa a wɔte saa fam no, wonsua Mose asetra ho ade mfa mpɛ nimdeɛ ara kwa, na mmom wɔde hyɛ wɔn gyidi den.

Mose Ankasa

Wɔn a woyi sini no taa si Mose mmaninyɛ ne n’akokoduru so dua—su horow a wɔn a wɔhwɛ sini no ani gye ho. Nokwarem no, na Mose wɔ akokoduru. (Exodus 2:16-19) Nanso nea ehia sen biara no, na ɔyɛ ɔbarima a ogye Onyankopɔn di. Na Mose bu Onyankopɔn sɛ ɔteasefo ankasa—eyi maa ɔsomafo Paulo kaa ne ho asɛm akyiri yi sɛ ‘omiaa n’ani traa mu sɛnea ohu nea wonhu no no.’—Hebrifo 11:24-28.

Ne saa nti, Mose ma yehu hia a ehia sɛ yɛne Onyankopɔn nya abusuabɔ no. Yɛn nso, yebetumi abɔ yɛn bra daa te sɛ nea yehu Onyankopɔn! Sɛ yɛyɛ saa a, yɛrenyɛ biribi a ɔmpɛ da. Afei nso hyɛ no nsow sɛ bere a na Mose yɛ akokoaa koraa no na wɔde saa gyidi no duaa ne mu. Na ne gyidi no mu yɛ den araa ma otumi gyinaa “Misrifo nyansa nyinaa” ano. (Asomafo no Nnwuma 7:22) Hwɛ nkuranhyɛsɛm ara a ɛyɛ ma awofo sɛ wobefi ase akyerɛkyerɛ wɔn mma Onyankopɔn ho asɛm afi wɔn mmofraase!—Mmebusɛm 22:6; 2 Timoteo 3:15.

Ade foforo a ɛsɛ sɛ yɛhyɛ no nsow ne Mose ahobrɛase. Na “odwo pii sen nnipa a wɔwɔ asase so nyinaa.” (Numeri 12:3) Enti na Mose wɔ ɔpɛ sɛ obegye ne mfomso ahorow atom. Ɔkyerɛwee anibiannaso a ɔyɛe a enti na ontwaa ne ba twetia no ho asɛm. (Exodus 4:24-26) Ɔka hyɛ a wanhyɛ Onyankopɔn anuonyam bere bi ma enti Onyankopɔn de asotwe a emu yɛ den baa no so ho asɛm pefee. (Numeri 20:2-12; Deuteronomium 1:37) Afei na Mose wɔ ɔpɛ sɛ obegye nyansahyɛ afi afoforo hɔ. (Exodus 18:13-24) So ɛrenyɛ papa sɛ okununom, agyanom, ne mmarima afoforo a wɔwɔ dibea besuasua Mose?

Ɛwom, akasatiafo bi nnye ntom sɛ na Mose yɛ obi a odwo, na wɔka anuɔden a ɔde yɛɛ nneɛma bi no ho asɛm de yɛ nhwɛso. (Exodus 32:26-28) Ɔkyerɛwfo Jonathan Kirsch ka sɛ: “Mose a Bible ka ne ho asɛm no nyɛ obi a odwo anaa ɔbrɛ ne ho ase, na wontumi nka ne suban ho asɛm bere nyinaa sɛ na ɔyɛ ɔtreneeni. Eduu mmere bi mu no, . . . Mose daa ahantan, atirimɔden, ne mogyapɛfo su adi.” Ɛyɛ awerɛhow sɛ nsɛm a ɛte sɛɛ a wɔka tiaa no no nyinaa nni nnyinaso papa biara. Ɛkata nokwasɛm a ɛne sɛ ɛnyɛ atirimɔdensɛm na ɛmaa Mose yɛɛ nneɛma bi na mmom ɛyɛ ɔdɔ ne atɛntrenee, ne kyi a na okyi amumɔyɛ nti na ɛma ɔyɛɛ saa. Ɛnnɛ a wogye brabɔne tom wɔ baabiara yi, Mose nhwɛso no ma yehu hia a ehia sɛ yedi abrabɔ gyinapɛn a ɛkorɔn akyi.—Dwom 97:10.

Nea Yenya Fi Mose Nkyerɛwee No Mu

Mose gyaw yɛn nkyerɛwee a ɛsom bo pii. Eyinom bi ne anwensɛm (Hiob, Dwom 90), abakɔsɛm (Genesis, Exodus, Numeri), anato ahorow (Genesis, ti 5, 11, 19, 22, 25) ne mmara horow a ɛda nsow a wɔfrɛ no Mose Mmara. (Exodus, ti 20-40; Leviticus; Numeri; Deuteronomium) Nkyerɛkyerɛ ne nnyinasosɛm ahorow a wɔde bu man a na edi mu sen saa bere no so de biara no nso wɔ Mmara a Onyankopɔn maa Mose kyerɛwee yi mu.

Wɔ aman a Ɔmampanyin no ara na odi Asɔre no anim mu no, nea ɛtaa kɔ so wɔ hɔ ne kateeyɛ, ɔsom mu nhyɛso ne tumidi a wɔde sisi afoforo. Nnyinasosɛm a ɛmma wɔmfa Asɔre ne Amammu mfra no wɔ Mose Mmara no mu. Wɔamma ɔhene hokwan sɛ ɔbɛyɛ asɔfodwuma.—2 Beresosɛm 26:16-18.

Ahotew ne yare ho bammɔ ho nsɛm te sɛ, ayarefo a woyi wɔn kogu baabi, ne agyanan a wɔkata so a ɛne ɛnnɛyi nyansahu hyia nso wɔ Mose Mmara no mu. (Leviticus 13:1-59; 14:38, 46; Deuteronomium 23:13) Eyi da nsow koraa efisɛ na Misrifo nam nnaadaa ne gyidihunu  so na ɛsa yare wɔ Mose bere so. Sɛ anka nnipa de Mose Mmara mu gyinapɛn a ɛfa ahotew ho redi dwuma wɔ aman a wonnyaa nkɔso pii mu a, anka nyarewa ne owu pii bɛpare wɔn.

Ɛnyɛ nhyɛ sɛ Kristofo bedi Mose Mmara no so. (Kolosefo 2:13, 14) Nanso sɛ wosua a, wobenya so mfaso pii. Saa Mmara no hyɛɛ Israelfo no nkuran sɛ wɔmfa ɔsom a edi mu mma Onyankopɔn na wonnyae abosonsom. (Exodus 20:4; Deuteronomium 5:9) Ɛde ahyɛde maa mmofra sɛ wonni wɔn awofo ni. (Exodus 20:12) Mmara no kasa tiaa awudi, korɔnbɔ, atorodi, ne anibere. (Exodus 20:13-17) Kristofo kyerɛ mmara a ɛte saa ho anisɔ nnɛ.

Odiyifo a Ɔte sɛ Mose

Yɛte amanehunu bere mu. Ɛda adi sɛ adesamma hia ɔkannifo te sɛ Mose—obi a ɛnyɛ tumi nko na ɔwɔ, na mmom ɔyɛ nokwaredifo, ɔwɔ akokoduru, ayamhyehye, na ɔdɔ atɛntrenee. Bere a Mose wui no, ɛbɛyɛ sɛ Israelfo no bisae sɛ, ‘So yebenya ne so nipa bio?’ Mose ankasa buaa saa asɛm no.

 Mose nkyerɛwee no kyerɛkyerɛ nea ɛyɛe a yare ne owu bae, ne nea enti a Onyankopɔn maa kwan maa abɔnefosɛm kɔɔ so mu. (Genesis 3:1-19; Hiob, ti 1, 2) Wɔayɛ Onyankopɔn nkɔmhyɛ a edi kan ho kyerɛwtohɔ wɔ Genesis 3:15—bɔhyɛ a ɛne sɛ awiei koraa, abɔnefosɛm nyinaa bɛba awiei no! Ɔkwan bɛn so? Nkɔmhyɛ no kyerɛe sɛ nkwagye nam obi a wɔbɛwo no so bɛba. Saa bɔhyɛ yi na ɛma yenyaa anidaso sɛ Mesia bi bɛba abegye adesamma. Nanso hena na ɔbɛyɛ Mesia no? Mose boa yɛn ma yehu no yiye.

Aka kakra ma Mose awu no, ɔkaa nsɛm a ehia yi: “Odiyifo a ofi wo mu a ofi wo nuanom mu te sɛ me na Awurade wo Nyankopɔn bɛma no so ama wo, ɔno na muntie no.” (Deuteronomium 18:15) Akyiri yi ɔsomafo Petro kae sɛ nsɛm yi fa Yesu ho tẽẽ.—Asomafo no Nnwuma 3:20-26.

Yudafo akyinnyegyefo dodow no ara nnye ntom sɛ na Mose ne Yesu wɔ abusuabɔ biara. Wɔka sɛ kyerɛwsɛm mu nsɛm yi fa odiyifo biara a ɔbae wɔ Mose wu akyi ho. Nanso sɛnea Tanakh—The Holy Scriptures a Yudafo Nhoma Tintim Kuw tintimii no kyerɛ no, Deuteronomium 34:10 ka sɛ: “Odiyifo bi ansɔre Israel mu bio a ɔte sɛ Mose—a AWURADE huu no anim ne anim.”

Yiw, Mose wu akyi na adiyifo anokwafo pii te sɛ Yesaia ne Yeremia bae. Nanso wɔn mu biara ne Onyankopɔn annya abusuabɔ a ɔne Mose nyae no bi—sɛ wɔne no kasae ‘anim ne anim.’ Ɛnde na Mose bɔhyɛ a ɛfa odiyifo bi a ‘ɔte sɛ ɔno’ no bɛyɛ onipa biako—Mesia no! Ɛfata sɛ yɛhyɛ no nsow sɛ ansa na Kristosom reba—ne bere a atoro Kristofo de ɔsom mu ɔtaa bae—no, saa ara na na Yudafo nhomanimfo susuw nneɛma ho. Yebetumi ahu eyi ho nhwɛso wɔ Yudafo nkyerɛwee te sɛ Midrash Rabbah, a ɛka Mose ho asɛm sɛ nea ɔkyerɛɛ “Ogyefo a ɔbɛba akyiri yi,” anaa Mesia no so kwan mu.

Yɛrentumi nnye nokwasɛm a ɛyɛ sɛ na Yesu te sɛ Mose no ho kyim ɔkwan biara so. (Hwɛ adaka “Yesu—Odiyifo Te sɛ Mose.”) Yesu wɔ tumi. (Mateo 28:19) Yesu ‘dwo na ɔbrɛ ne ho ase koma mu.’ (Mateo 11:29) Yesu kyi amumɔyɛ ne atɛnkyea. (Hebrifo 1:9) Enti obetumi adi yɛn so sɛnea yɛrehwehwɛ no pɛpɛɛpɛ! Ɛrenkyɛ, obeyi abɔnefosɛm afi hɔ na wama asase adan Paradise tebea a Mose kaa ho asɛm no. *

[Ase hɔ nsɛm]

[Adaka wɔ kratafa 12]

Mose—Nokwasɛm ne Atosɛm

Sɛnea wɔka Mose ho asɛm wɔ sini mu no ama ayɛ den sɛ wobehu ne ho nokwasɛm ahorow. Emu kakraa bi ni:

Atosɛm: Na Mose nnim sɛ ɔyɛ Yudani.

Nokwasɛm: Mose maame a ɔyɛ Yudani no na ɔde mfe kakra hwɛɛ no ne mmofraase. Asomafo no Nnwuma 7:23-25 kyerɛ sɛ Mose buu Yudafo a na wɔyɛ nkoa no sɛ “ne nuanom.”

Atosɛm: Na Mose repere adi ade wɔ Misraim.

Nokwasɛm: Bible nka asɛm a ɛte saa. Daily Bible Illustrations, a John Kitto, kyerɛwee no ka sɛ biribiara nni hɔ a yebetumi agyina so aka sɛ Mose “nam gye a wogyee no ɔba no so bɛyɛɛ ahenni no ho ɔdedifo. . . . Ɛda adi sɛ na ɔbarima a wɔde no bedi ade ho nhiaa wɔn.”

Atosɛm: Mose san kɔɔ Misraim sɛ ɔrekɔ akohyia ne tamfo.

Nokwasɛm: Bible ka sɛ bere a ɔsan kɔe no, na n’atamfo nyinaa awuwu.—Exodus 4:19.

Atosɛm: Bere a Mose foroo Bepɔw Sinai no akyi ansa na Onyankopɔn reka Mmara Nsɛm Du no akyerɛ ne man.

Nokwasɛm: Onyankopɔn nam ne bɔfo so na ɔkaa Mmara Nsɛm Du no ho asɛm kyerɛɛ Israel man no nyinaa. Ɛno akyi no, Israelfo a na wɔabɔ hu no ka kyerɛɛ Mose sɛ ɔmforo nkɔ bepɔw no so nkɔkasa mma wɔn.—Exodus 19:20–20:19; 24:12-14; Asomafo no Nnwuma 7:53; Hebrifo 12:18, 19.

Atosɛm: Farao anka n’asraafodɔm no ho anwu wɔ Po Kɔkɔɔ no mu.

Nokwasɛm: “Farao ne ne dɔm” wuwui wɔ Po Kɔkɔɔ no mu.—Exodus 14:28; Dwom 136:15.

[Adaka wɔ kratafa 29]

Yesu—Odiyifo Te sɛ Mose

Akwan a Yesu nam so kyerɛe sɛ ɔte sɛ Mose no bi ni:

▲ Mose ne Yesu nyinaa nyaa wɔn ti didii mu wɔ mmabanin a wɔn bere so sodifo hyɛe sɛ wonkunkum wɔn no mu.—Exodus 1:22; 2:1-10; Mateo 2:13-18.

▲ Wɔfrɛɛ Mose ne Yehowa ‘abakan,’ Israel man no, fii Misraim. Wɔfrɛɛ Yesu fii Misraim sɛ Onyankopɔn abakan.—Exodus 4:22, 23; Hosea 11:1; Mateo 2:15, 19-21.

▲ Mose ne Yesu nyinaa dii abuada nnafua 40 wɔ sare so.—Exodus 34:28; Mateo 4:1, 2.

▲ Mose ne Yesu nyinaa daa odwo ne ahobrɛase su a ɛkɔ akyiri adi.—Numeri 12:3; Mateo 11:28-30.

▲ Mose ne Yesu nyinaa yɛɛ anwowade.—Exodus 14:21-31; Dwom 78:12-54; Mateo 11:5; Marko 5:38-43; Luka 7:11-15, 18-23.

▲ Mose ne Yesu nyinaa somee sɛ Onyankopɔn ne Ne man ntam apam ho ntamgyinafo.—Exodus 24:3-8; 1 Timoteo 2:5, 6; Hebrifo 8:10-13; 12:24.

[Mfonini ahorow wɔ kratafa 27]

Yesu nkutoo ne odiyifo a na ɔte sɛ Mose

[Mfonini wɔ kratafa 28]

Ahotew ho mmara a wɔkyerɛkyerɛe wɔ Mose Mmara mu no betumi aboa ma wɔasiw yare ano