Ɔsom bɛn mu na wɔtetee wo?

Ná m’awofo yɛ Katolekfo a wɔnkɔ asɔre. Meyɛ aberante no, ná m’ani gye gyidi a ɛkyerɛ sɛ Onyankopɔn bi nni hɔ no ho. Wɔkyerɛkyerɛɛ me sɛ nkwa fi adannandi mu, na migye toom sɛ ɛyɛ nokware. Ɛwom sɛ na minnye nni sɛ Ɔbɔadeɛ bi wɔ hɔ de, nanso na mete nka sɛ biribi a ɛkorɔn sen nnipa wɔ hɔ. Esiane sɛ na mepɛ sɛ mihu nti, meyɛɛ nhwehwɛmu wɔ Buddhasom, Hindusom, ne Taosom mu, nanso wɔn nkyerɛkyerɛ no antumi ammua me nsɛmmisa ahorow no.

Dɛn na ɛma w’ani begyee nyansahu ho?

Efi me mmofraase no, na m’ani gye mfiri ho. Ná mitumi tutu m’agode a ɛde anyinam ahoɔden yɛ adwuma no san hyehyɛ. Na na mibisabisa m’agya a ɔyɛ mfiridwumayɛfo no nsɛm pii fa sɛnea radio ne telefon yɛ adwuma no ho.

Ɛyɛɛ dɛn na wobɛyɛɛ nyansahufo?

Misuaa ɛlɛktrɔnik mfiridwuma ho ade wɔ Genoa Sukuupɔn mu, na meyɛɛ nhwehwɛmu kɔɔ akyiri wɔ sɛnea robɔt adwumayɛ betumi anya nkɔanim no ho. Misuaa ɔkwan a onipa aniwa fa so hu ade, ne ɔkwan a mɛfa so ama robɔt atumi ahu ade te sɛ onipa.

Dɛn na ɛma w’ani gyee sɛnea yɛn aniwa hu ade no ho?

Egye nneɛma pii ansa aniwa no atumi ahu ade—sɛnea yehu  nneɛma na yɛkyerɛ ase no mpo ka ho. Sɛ nhwɛso no, susuw ɔkwan a wofa so kyere bɔɔl no ho hwɛ. Bere a wutu mmirika sɛ worekɔkyere bɔɔl no, w’aniwa no twa bɔɔl a ɛreba no mfonini. Sɛnea bɔɔl no reba wo so ne sɛnea wodannan w’aniwa no na ɛbɛkyerɛ sɛnea w’aniwa no bɛkyere mfonini no. Nanso mpɛn pii no, wode w’aniwa no si bɔɔl no so. Afei bɔɔl no ho mfonini gyina w’aniwa no so, bere a wokɔ so “dannan” w’ani kesua no.

Bere koro no ara nso, w’aniwa no bu mmirika a bɔɔl no de reba ne faako a ɛnam reba no ho akontaa. Anwonwasɛm ne sɛ, akontaabu no fi ase wɔ aniwa no mu bere a ɛhwɛ sɛnea bɔɔl no reba ne baabi a efi reba no. Afei wo nkate a ɛma w’aniwa hu ade no de sɛnea bɔɔl no redannan ne ho no ho asɛm kɔ w’amemene mu, na ɛno nso susuw ho na akyerɛ wo sɛnea wobɛkyere bɔɔl no. Adeyɛ no nyinaa yɛ hwanyann na ɛyɛ nwonwa paa.

Dɛn na ɛma wugye dii sɛ Ɔbɔadeɛ bi wɔ hɔ?

Wɔ afe 1990 mu no, mede asram kakra tenaa Dublin, Ireland, na meyɛɛ nhwehwɛmu wɔ Trinity Sukuupɔn mu. Bere a me ne me yere, Barbara, resan aba fie no, yesusuw yɛn mma no daakye ho. Afei nso, yɛyɛe sɛ yɛbɛkɔ akɔsra me nuabea a na ɔyɛ Yehowa Ɔdansefo no. Me nuabea no maa me Life—How Did It Get Here? By Evolution or by Creation? nhoma a Adansefo tintimii no biako. M’ani gyee sɛnea wɔtɔɔ wɔn bo ase yɛɛ nhwehwɛmu kɔɔ akyiri no ho. Ɛma mihui ntɛm ara sɛ, magye adannandi nkyerɛkyerɛ no adi kɛkɛ a manyɛ nhwehwɛmu biara. Sɛ nhwɛso no, na mafa no sɛ tete nnompe a wɔahu no foa adannandi so. Nanso ɛnte saa. Nokwasɛm ni, dodow a mehwehwɛ adannandi mu no, dodow no ara na mihu sɛ ɛyɛ nsɛnhunu kɛkɛ a nokwasɛm biara nni mu.

Eyi ma misusuw adwuma a meyɛ wɔ robɔt ho no ho. Hena adwinni na na meresuasua no? Merentumi nyɛ robɔt a otumi kyere bɔɔl sɛnea yɛn a yɛyɛ nnipa tumi yɛ no da. Wobetumi ayɛ ma robɔt akyere bɔɔl, nanso gye sɛ ɔfa ɔkwan pɔtẽẽ bi a wɔakyerɛ no nkutoo so. Sɛ wɔankyerɛ no ɔkwan a ɛsɛ sɛ ɔfa so kyere bɔɔl a, ɔrentumi nkyere da. Sɛnea yetumi sua biribi na yɛyɛ no korɔn koraa sen sɛnea afiri tumi yɛ—na afiri mpo, obi na ɔyɛ! Eyi ka nokwasɛm ahorow a ɛma mibegye dii sɛ Ɔbɔadeɛ bi na ɔnwenee yɛn no ho.

Dɛn na ɛma wobɛyɛɛ Yehowa Ɔdansefo?

Ebi ne sɛ, me ne Barbara ani gye ɔkwampa a Yehowa Adansefo fa so sua ade no ho. M’ani gyee nhwehwɛmu a wɔyɛ ansa na wɔatintim wɔn nhoma ahorow no ho paa. Sɛ woyɛ obi a wopɛ nneɛma mu mfeefeemu te sɛ me a, akyinnye biara nni ho sɛ w’ani begye nhwehwɛmu a etu mpɔn a wɔyɛ no ho. Sɛ mfatoho no, m’ani begyee Bible mu nkɔmhyɛ ahorow pii ho. Eyi a misuae no ama magye adi ampa sɛ Bible no fi Onyankopɔn hɔ. Wɔ afe 1992 mu no, wɔbɔɔ me ne Barbara asu sɛ Yehowa Adansefo.

So nyansahufo a woyɛ no abrɛ wo gyidi ase?

Ɛnte saa koraa, mmom no, nyansahu ama me gyidi mu ayɛ den. Sɛ nhwɛso no, hwɛ sɛnea yetumi hyɛ afoforo anim nsow no. Sɛ wɔwo abotafowa nnɔnhwerew kakraa bi akyi a, otumi hyɛ afoforo anim nsow. Sɛ obi hyɛ nnipakuw bi mu mpo a, me ne wo betumi ahu no ntɛm ara. Yebetumi ahu tebea mpo a ɔwom. Nanso, ebia na yennim sɛ adwene no yɛɛ adwuma pii ahoɔhare so ansa na yɛretumi ahyɛ biribi a ɛte saa nsow.

Yiw, migye di paa sɛ sɛnea yɛn aniwa hu ade no yɛ akyɛde a ɛsom bo a efi Yehowa Nyankopɔn hɔ. N’akyɛde ahorow a Bible ka ho no, ka me ma meda no ase na meka ne ho asɛm kyerɛ afoforo. Anyɛ hwee koraa no, atɛntrenee su a mewɔ no ma mihu sɛ, Yehowa fata sɛ yɛde ne nnwuma ho nkamfo ma no