SƐ ABOA a otumi de ne ho sie yi fi ase da wɔ awɔw bere mu a, ɔhyew a ɛwɔ ne mu no tumi brɛ ase koraa. Ebetumi abrɛ ase akodu he? Arctic asase so amoakua dodow bi atumi ayɛ biribi a ɛso bi mmae da—ɔhyew a ɛwɔ wɔn mu no kɔɔ fam koraa koduu digrii -2.9 sɛntigred! Wɔ saa tebea no mu no, na yɛhwɛ kwan sɛ awɔw no bɛma wɔn amemene no agyae adwuma yɛ. Ɔkwan bɛn so na arctic asase so amoakua no amemene kɔ so yɛ adwuma?

Susuw ho hwɛ: Sɛ ɔde ne ho sie nnawɔtwe abien anaa abiɛsa biara a, ɔwosow ne ho ma ne ho hyew no san bɛyɛ digrii 36.4 sɛntigred, na ɛnsan nkɔ fam bio ara kosi nnɔnhwerew 12 ne 15 ntam. Nhwehwɛmufo ka sɛ ɛwom sɛ bere a ɔde ka ne ho hyew yi yɛ tiaa de, nanso ɛno na ɛboa ma n’amemene no kɔ so yɛ adwuma. Bio nso, bere a ɔde ne ho asie yi mu no, ne ti ho kɔ so yɛ hyew kakra sen ne honam. Bere a wɔyɛɛ mmoa yi mu nhwehwɛmu no, ɛbɛdaa adi sɛ wɔn kɔn mu hyew no amma fam ansen digrii 0.7 sɛntigred da.

Sɛ amoakua yi pue fi baabi a ɔde ne ho asie no a, n’amemene no fi ase yɛ adwuma wɔ nnɔnhwerew abien ntam. Nokwarem no, nhwehwɛmu bi kyerɛ sɛ, sɛ amoakua yi sɔre fi nna mu bere a awɔw no atwam no a, n’amemene no yɛ adwuma yiye sen kan no! Eyi a animdefo no hui no ama wɔn ho adwiriw wɔn. Wɔde toto afifide a etumi pae foforo bere a ogya ahyew kwae bi akyi no ho.

Nhwehwɛmufo hwɛ kwan sɛ nea wɔahu wɔ arctic asase so amoakua ho yi bɛboa ma wɔate nea onipa amemene betumi ayɛ ase yiye. Wɔn botae ne sɛ wobesua nneɛma pii afa sɛnea wobetumi asiw adwenem nyarewa ano anaa mpo wɔbɛma adwene mu yare ahorow, a Alzheimer nso ka ho, agyae.

Wususuw ho dɛn? So arctic asase so amoakua yi amemene a etumi gyina awɔw ano no nam adannandi so na ɛbae? Anaa wɔbɔe?