Asoɛe a Ɛhwɛ Kuadwuma So akontaabu kyerɛ sɛ afe 2012 mu no, U.S. man no mu nnipa ɔha mu nkyɛm 14.5 a wɔn dodow yɛ ɔpepem 49 kae sɛ, “anhwɛ a wɔn ho bɛkyere wɔn, na wɔrennya aduan a ɛbɛso wɔn abusuafo nyinaa” wɔ saa afe no mu.

Nkurɔfo yɛɛ nhwehwɛmu wɔ suapɔn bi mu hui sɛ sukuufo mmea no, ɔha mu nkyɛm 56 gye toom sɛ wɔwe nsa, na mmarima no nso, ɔha mu nkyɛm 41 gye toom sɛ wɔwe nsa.

Pacific po no fã bi wɔ hɔ a emu dɔ paa; emu tenten yɛ anammɔn 36,000 anaa mita 11,000. Yɛfrɛ no Mariana Trench. Ɛhɔ yɛ sum kabii, na awɔw a ɛwɔ hɔ no sen frigye mu. Eyi nyinaa akyi no, nyansahufo bi akɔ hɔ akɔtew dɔte ahu sɛ mmoawammoawa wom. Kan no, na nkurɔfo susuw sɛ biribi a nkwa wom ntumi ntena baabi a ɛhɔ dɔ saa.

Dubai mpanyimfo pɛ sɛ wɔtew kɛsebɔne so wɔ ɔman no mu, enti nnansa yi wɔaka sɛ obiara a obetumi atew ne kɛse so kilogram 1 no, wɔbɛma no sika kɔkɔɔ gram baako—saa bere no na ne dodow yɛ U.S. dɔla 45. Ansa na obi benya saa sika no, ɛsɛ sɛ ɔkɔkyerɛw ne din na otumi tew ne kɛse so kilogram 2 ne akyi wɔ Ramadan bosome no mu.