WOHWƐ tete akwan ne adan a wɔsisiiɛ a, Romafoɔ nsuka no ka deɛ ɛdi mu paa no ho. Roma Amrado bi a na ɔsan hwɛ nsuo so twerɛɛ sɛ: “Hwɛ Piramid a ɛnyɛ adwuma biara anaa Greekfoɔ nwoma a agye din a mfasoɔ biara nni so no, na hwɛ nsuka akɛseɛ a nsuo fa mu no.”—Sextus Julius Frontinus. (Ɔtenaa ase bɛyɛ mfie 1,900 nie *).

Tete no, na nnipa taa kyekyere kuro wɔ nsubɔnten ho; Roma nso wɔkyekyeree wɔ asubɔnten ho. Mfitiaseɛ no, na Romafoɔ nya nsuo firi Tiber Asubɔnten ne asuo ne atadeɛ a na ɛbɛn hɔ no mu. Ɛfiri bɛyɛ mfie 2,400 nie no, Roma man no yɛɛ kɛse, enti na ɔman no hia nsuo bebree.

Ná Romafoɔ bebree nni pipe wɔ fie, enti ɔman no mpanimfoɔ yeyɛɛ nsuo a ɔmanfoɔ dware mu ne deɛ ankorɛankorɛ bi bɛdware mu nyinaa. Ɔmanfoɔ adwareeɛ a wɔdii kan yɛeɛ no, Aqua Virgo mu nsuo na na ɛtene kɔgu mu. Bɛyɛ mfie 4,000 nie na wɔbuee saa adwareeɛ no. Caesar Augustus adamfo paa, Marcus Agrippa na ɔyɛɛ saa nsuo no; ɔde ne sika pii hyɛɛ mu de sieisee ɛka a nsuo no nam mu no, na ɔtrɛɛ mu kɔɔ akyiri.

Adwareeɛ no bi wɔ hɔ a, na ebinom kɔhyia hɔ gye wɔn ani. Adwareeɛ akɛseɛ no mpo deɛ, na wɔaduadua nnua ne nhwiren wɔ hɔ na na wɔde nwoma agu hɔ a nkurɔfoɔ kenkan. Sɛ ɔmanfoɔ dware wie a, nsuo a ɛnam suka no mu no ba bɛtwe adwareeɛ hɔ fĩ nyinaa kɔ; ɛtwe tiafi a ɛwowɔ hɔ nyinaa nso kɔ.

“Roma nsuka.” Sɛ wote saa asɛm no a, ɛyɛ wo sɛ ɛyɛ ɛtwene a ntokuro deda mu a ɛsesa so akwansini bebree anaa? Ɛnte saa. Deɛ ɛwom ne sɛ ne fã kakraa bi na yɛhu wɔ abɔnten; deɛ aka nyinaa nam fam. Sɛdeɛ wɔyɛɛ no no, ɛho ka nnɔɔso, na nsusuan ntumi nsɛe no. Bio, ɛnnye asase mmɔ so, na ɛnsɛe ɔmanfoɔ nneɛma  nso. Ɛho nhwɛsoɔ nie: Wɔyɛɛ Aqua Marcia nsuka no afe 140 ansa na Yesu reba. Ne nyinaa tenten yɛ akwansini 57 (kilomita 92), nanso deɛ ɛpue abɔnten tenten bɛyɛ akwansini 7 (kilomita 11) pɛ.

Sɛ wɔrebɛsi nsuka a, abenfoɔ di kan hwɛ sɛ ɛbɛn nsuo. Afei wɔbɛhwɛ sɛ nsuo no ani te, ɛtene yie, na ɛyɛ dɛ anaa. Bio, wɔhwɛ sɛdeɛ wɔn a wɔnom saa nso no bi no teɛ. Sɛ wɔgye tom sɛ wɔbɛyɛ nsuka no bi wɔ hɔ a, abenfoɔ no hwɛ baabi a ɛbɛfa, emu kɛseɛ ne ne tenten. Ná wɔde nkoa na ɛyɛ nsuka no ho adwuma. Sɛ wɔkɔ suka bi ho a, ɛgye mfie pii ansa na wɔawie, ɛnkanka ne sɛ wɔbɛyɛ ɛtwene atutu mu ntokuro. Ná wei nyinaa gye sika pii.

Wɔsi nsuka bi wie a, ɛsɛ sɛ wɔma wɔn nsa da ho na wɔbɔ ho ban. Berɛ bi mpo deɛ Roma mpanimfoɔ faa nnipa bɛyɛ 700 ma wɔhwɛɛ nsuka no so. Sɛ wɔreyɛ nsuka no a, na wɔyɛ ntotoeɛ a ɛbɛbɔ ho ban. Wɔgyigyaa akwan totoo mu a sɛ biribi sɛe a wɔbɛfa hɔ akɔsiesie. Sɛ biribi kɛseɛ sɛe wɔ ho a, ɛho animdefoɔ dane nsuo no ani firi baabi a asɛe no na ama wɔatumi asiesie.

Bɛyɛ mfie 1,700 nie no, nsuka akɛ-seɛ 11 na na ɛwɔ Rome. Deɛ ɛdi kan ne Aqua Appia. Wɔyɛɛ saa suka no afe 312 ansa na Yesu reba. Ne tenten bɛyɛ akwansini du (kilomita 16). Wɔyɛɛ ne nyinaa faa asase ase. Baako bi a yɛfrɛ no Aqua Claudia no, ne tenten bɛyɛ akwansini 43 (kilomita 69). Deɛ ɛpue abɔnten no, ntokuro no tenten yɛ akwansini 6 (kilomita 10). Ntokuro no bi kɔ soro bɛyɛ anammɔn 90 (mita 27). Saa suka no, wɔakora ne fã bi so abɛsi nnɛ!

Nsuo dodoɔ sɛn na na ɛfa nsuka no mu ba kurom hɔ? Bebree kwa! Yɛnhwɛ suka bi te sɛ Aqua Marcia a yɛadi kan aka ho asɛm no. Da biara nsuo a na ɛde ba Rome no bɛyɛ 6.7 million cubic feet (190,000 cu m). Sɛ nsuo no tene duru kurom a, ɛkɔgu tank mu; ɛfiri hɔ a na emu akyekyɛ kɔ baabiara. Ebinom kyerɛ sɛ na Rome tumi nya nsuo pii kyekyɛ ma obiara tumi nya bɛyɛ galɔn 265 (lita 1,000) da ko.

Nwoma bi ka sɛ, berɛ a Roma Ahemman no reyɛ kɛse no, “baabi a ɛbɛtrɛ aduru biara no, na wɔayeyɛ nsuka no bi wɔ hɔ.” (Roman Aqueducts & Water Supply) Wɔn a wɔtu kwan kɔ baabi te sɛ Asia Minor, France, Spain, ne Afrika Atifi fam no, wɔhunu nsuka a Romafoɔ yɛe no bi; ɛyɛ anwanwadeɛ kɛseɛ!