BIBLE NO ADWENE
Mesia
Bible ka too hɔ sɛ Mesia no bɛba wiase abɛgye nnipa afiri yareɛ, amanehunu, ne owuo mu. Ɛyɛ Yesu Kristo anaa?
Ɛdeɛn na ɛbɛma nnipa ahu sɛ asomasi anaa ɔbenten ne Mesia no?
Bible ka too hɔ sɛ Mesia, anaa Kristo, no wɔ dwumadie mmienu. * Sɛ ɔdi dwuma a ɛdi kan no wie a, ɛbɛgye berɛ tenten na nea ɛtɔ so mmienu no adi so. Ɔbɛdi kan aba sɛ onipa. Nea ɛbɛyɛ na amanfoɔ ahu sɛ ɔno ne Mesia no, Bible atwerɛfoɔ kaa nsɛm pii faa n’asetena ne ne som ho. Nokwasɛm ne sɛ Bible nkɔmhyɛ dodoɔ no ara ‘di Yesu ho adanseɛ.’
Berɛ a Yesu wɔ asase so no, ɔyɛɛ anwanwadeɛ pii; seesei a wɔama no tumi wɔ soro no, ɔbɛyɛ nea ɛsene saa wɔ wiase nyinaa
NEA BIBLE KA
fa Mesia no ho.
-
Ɔyɛ Ɔhene Dawid aseni.
—Yesaia 9:7; Luka 3:23-31. * -
Wɔbɛwo no Betlehem.
—Mika 5:2; Luka 2:4-7. -
Ɔbɛka “asɛmpa.”
—Yesaia 61:1; Luka 4:43. -
Nnipa bɛbu no animtiaa na wɔremfa no nyɛ hwee.
—Yesaia 53:3; Mateo 26:67, 68. -
Wɔbɛyi no ama agye nnwetɛbena 30.
—Sakaria 11:12, 13; Mateo 26:14, 15. -
Nkurɔfoɔ bɛka atosɛm ato ne so na wɔabu no kumfɔ, nanso ɔremmue n’ano.
—Yesaia 53:6, 7; Mateo 27:12-14. -
Wɔde no bɛbɔ afɔreɛ te sɛ “adwammaa” de ayi bɔne afiri hɔ, na ama nnipa anya Onyankopɔn anim dom.
—Yesaia 53:7; Yohane 1:29, 34, 36. -
Wɔbɛku no nanso wɔremmu ne dompe biara mu.
—Dwom 34:20; Yohane 19:33, 36. -
Wɔbɛsie no adefoɔ mu.
—Yesaia 53:9; Mateo 27:57-60. -
Da a ɛtɔ so mmiɛnsa no ɔbɛnyane.—Mateo 16:21; 28:5-7.
Nkɔmhyɛ yi nyinaa ne afoforɔ pii baa mu wɔ Yesu so. Ɔsaa ayarefoɔ yareɛ na ɔnyanee awufoɔ. Wei nyinaa yɛ adanseɛ a ɛma yɛhu sɛ Yesu ne Mesia no. Ɛnyɛ ɛno nko; ɛma yɛnya awerɛhyem nso sɛ nea Bible aka sɛ ɔbɛyɛ nyinaa ɔbɛyɛ ama no aboro so daakye. (Luka 7:21-23; Adiyisɛm 21:3, 4) Yesu anyane afiri awufoɔ mu, na wakɔtena Onyankopɔn “nsa nifa” retwɛn sɛ ɔbɛwie Mesia adwuma a ɛhyɛ ne nsa no.
“Sɛ Kristo no ba a, ɔbɛyɛ nsɛnkyerɛnne asene deɛ oyi ayɛ yi anaa?”
—Yohane 7:31.
Dɛn na Mesia no bɛyɛ de awie n’adwuma?
Yesu berɛ so no, na Yudafoɔ no rehwɛ kwan sɛ Mesia no bɛba abɛgye wɔn afiri Romafoɔ nsam na ɔde ahennie bi asi Israel. (Asomafoɔ Nnwuma 1:6) Akyire yi na Yesu asuafoɔ a wɔyɛ Yudafoɔ no tee aseɛ sɛ wɔde tumi kɛseɛ bɛma no wɔ soro, na ɛhɔ na ɔbɛtena awie adwuma a ɛhyɛ ne nsa no.
NEA BIBLE KA
fa Mesia adwuma a ɛtɔ so mmienu ho.
-
Ɔbɛyɛ Onyankopɔn Ahennie no so hene adi wiase nyinaa so.
—Daniel 7:13, 14; Adiyisɛm 11:15. -
Onyankopɔn nam ne so bɛhyira nnipa a wɔkyerɛ ne mu gyidie nyinaa.
—Genesis 22:17, 18; Dwom 72:7, 8. -
Ɔde ɔsɛeɛ bɛba aman ne ahemfo a wɔsɔre tia no no nyinaa so ma ‘wɔabɔ piri.’
—Yesaia 52:15; Adiyisɛm 19:19, 20. -
Ɔbɛgye “nnipakuo kɛseɛ” a wɔfiri aman nyinaa mu de wɔn akɔ wiase foforɔ mu, baabi a wɔbɛtena ase asomdwoeɛ mu.
—Adiyisɛm 7:9, 10, 13-17. -
Ɔbɛka Yehowa Nyankopɔn ho na wɔanyane awufoɔ aba Paradise asase so.
—Luka 23:43; Yohane 5:21, 28, 29. -
Ɔbɛkyerɛkyerɛ ne manfoɔ ma wɔatena ase asomdwoeɛ mu.
—Yesaia 11:1, 2, 9, 10. -
Ɔbɛyi bɔne a ɛde yareɛ ne owuo baeɛ no afiri hɔ.
—Yohane 1:29; Romafoɔ 5:12. -
Ɔbɛsɛe Satan nnwuma na waka adasamma nyinaa abom ma wɔasom Yehowa Nyankopɔn.
—1 Korintofoɔ 15:25-28; 1 Yohane 3:8.
Yesu ayɛ Mesia adwuma a ɛdi kan no awie. Ɔbɛwie nea ɛtɔ so mmienu no nso. Enti momma yɛnsua ne ho adeɛ yie. Yɛyɛ saa a, ɛbɛkyerɛ sɛ yɛyɛ anyansafoɔ, efisɛ Yesu kaa sɛ: “Mene ɛkwan no ne nokorɛ no ne nkwa.”
“Ne berɛ so, ɔteneneeni bɛyɛ frɔmfrɔm, na bosome da so wɔ hɔ yi, asomdwoeɛ bɛbu so. Ɔbɛnya ɔmanfoɔ . . . akɔsi asase ano.”
—Dwom 72:7, 8.
^ nky. 5 “Mesia” firi Hebri kasa mu. Ɛno ara na wɔfrɛ no “Kristo” wɔ Hela kasa mu.
^ nky. 7 Twerɛsɛm a ɛdi kan no fa nkɔmhyɛ no ho, na nea ɛtɔ so mmienu no fa nkɔmhyɛ no mmamu ho.
Ebia W'Ani Begye Wei Nso Ho
BIBLE NSƐMMISA HO MMUAE
Nkɔmhyɛ a Ɛfa Mesia No Ho Di Adanse Sɛ Na Yesu Ne Mesia No Anaa?
Ná Mesia no betumi ayɛ nnipa mmienu anaa nea ɛboro saa anaa?
ƆWƐN-ABAN
“Yɛahu Mesia No”!
Nnipa pii gye di sɛ Yesu ne Mesia a wɔhyɛɛ ne ho nkɔm no. Ebinom nso nnye nni. Kenkan na hu nea Bible ka wɔ asɛm no ho.
