Sɛ wuhyia tebea bi a emu yɛ den a, wobɛhwɛ na ato wo adwinnwen. Nea ɛma ɛba saa ne sɛ, nneɛma bi kɔ so wɔ wo nipadua mu a ɛboa wo ma wutumi di tebea no ho dwuma. Nea ɛba ne sɛ, w’amemene puw ahoɔdennuru bi gu wo nipadua mu. Saa ahoɔdennuru no ma wo koma bɔ ntɛmntɛm, ɛma mogya a ɛredi aforosian wɔ wo ntini mu no ano yɛ den, ɛma w’aharawa mu bue anaa ɛma emu yɛ ketewa, na ɛma ntini a ɛwɔ wo nnompe ho no mu yeyere. Enti w’ani bɛba wo ho so no, na woayɛ krado sɛ wubedi ɔhaw no ho dwuma. Sɛ ade a ɛde adwinnwen no bae no twam a, afei wo nipadua no dwo fɔmm, na ɛsan si ne dedaw mu.

Sɛ wuhu sɛ asiane bi reba wo so anaasɛ wuhyia tebea bi a emu yɛ den a, wobɛhwɛ na ato wo adwinnwen. Wei boa wo ma wutumi di tebea no ho dwuma. Nea nipadua no yɛ de boa wo no, efi ase wɔ amemene no mu. Adwinnwen a ɛte saa ye, efisɛ ɛboa wo ma wutumi di tebea no ho dwuma ntɛm. Adwinnwen kakra betumi aboa wo nso ama woadu botae a wode asisi w’anim ho. Afei nso, sɛ ebia worekɔkyerɛw sɔhwɛ, worekɔtena adwumawura bi anim ama wabisabisa wo nsɛm a obegyina so afa wo, anaa wode wo ho rekɔhyɛ agokansi bi mu a, ɛho adwinnwen betumi aboa wo ama woabɔ wo ho mmɔden.

Nanso, sɛ adwinnwen tena wo so kyɛ a, ebetumi apira wo. Sɛ woma adwinnwen hyɛ wo so daa a, ebetumi abɔ wo yare, ebetumi ama wo bo afuw ntɛmntɛm, anaa wo werɛ ahow. Saa ara nso na ebetumi ama woayare awerɛfiri, ebetumi agyaw wo ayamhyehye, na ɛremma wuntumi nnwen nneɛma ho yiye. Ebetumi ama wo suban asɛe, na ebetumi aka sɛnea wo ne afoforo di nso. Sɛ adwinnwen hyɛ obi so bere nyinaa a, ebetumi nso ama wafi ase anom nnubɔne, anaa wayɛ nneɛma foforo a ɛmfata a osusuw sɛ ɛbɛboa no ama watumi agyina ano. Ebetumi mpo ama onii no anya adwenemhaw, wayɛ hahaaha, anaa wanya adwene sɛ obekum ne ho.

Ɛwom, ɛsono obiara ne sɛnea adwinnwen tumi haw no, nanso etumi kɔfa yare ahorow pii ba. Ɛkame ayɛ sɛ, adwinnwen tumi ka nipadua no afã nyinaa.