ANIDASO WƆ HƆ MA ASAASE YI ANAA?
Kwae
KWAE nni hɔ a, anka yɛawu. Abenfo ka sɛ, kwae akɔyɛ sɛ “asaase no ahrawa. Enni hɔ a, nkwa ntumi ntena asaase so.” Sɛ wɔka saa a, wɔdi ka. Nea enti a ɛte saa ne sɛ, nnua twe mframa bɔne a yɛfrɛ no carbon dioxide no, na ama yɛn mframa pa a yɛfrɛ no oxygen no, na ɛno na yɛhome. Afifide ne mmoa a ɛwɔ asaase so no, wokyɛ mu du a, emu nwɔtwe wɔ kwae mu.
Asɛm Ato Kwae
Afe biara, kuayɛ nti nnipa bu kwae mu nnua ɔpepepem pii. Kwaebirentuw a na ɛwɔ hɔ bɛyɛ mfe 75 ni no, seesei ɛso atew ara ama aka fã.
Sɛ wɔsɛe kwae bi a, ɛka mmoa, nnua, ne nneɛma afoforo a ɛwɔ hɔ nyinaa.
Asaase Yi—Wɔyɛe Sɛ Ɛntena Hɔ Daa
Kwae bi wɔ hɔ a, wɔbuu emu nnua nyinaa, nanso bere a wɔgyaw asaase no too hɔ no, anwanwasɛm ne sɛ, nnua fii ase fifii wɔ so ma ɛbɛyɛɛ kwae a ɛso sen kan de no mpo. Nnansa yi ara, abenfo ahu sɛ, kwae bi a wɔbuu mu nnua gui no, ankyɛ koraa na nnua no ara san fifii bio ma ɛsan bɛyɛɛ kwaebirentuw. Ɛho nhwɛso na edidi so yi:
-
Nkurɔfo a wɔyɛ nhwehwɛmu de wɔn ani too fam hwɛɛ nsaase bi a wɔbuu kwae a ɛwɔ so no yɛɛ afuw wɔ so. Kwae bɛyɛ 2,200 a ɛwɔ Amerika Apuei, Amerika Atɔe, Amerika Mfinimfini, ne Afrika atɔe fam na wɔde yɛɛ nhwehwɛmu no. Ɛbɛdaa adi sɛ, edi bɛyɛ mfe du a, asaase no betumi asan asi ne dedaw mu ama nnua asan afifi wɔ so.
-
Nhoma bi de too gua sɛ, nhwehwɛmufo bu akontaa sɛ, ebedi bɛyɛ mfe 100 no, na nsaase no asan adan kwae a ɛte apɔw a mmoa ne nnua ahorow ahorow wom.—“Science magazine.”
-
Nnansa yi ara, abenfo bi a wɔwɔ Brazil de kwae a wɔabu mu nnua na wɔagyaw asaase no ato hɔ totoo kwae a wɔabu mu nnua na wɔahyɛ da asan aduadua nnua wɔ asaase no so ho. Ná wɔrehwɛ sɛ ehia sɛ wɔduadua nnua wɔ nsaase no so ansa na adan kwae ntɛm anaa.
-
Nhoma bi kaa wɔn a wɔyɛɛ saa nhwehwɛmu no ho asɛm sɛ, “Wɔn ani gyei paa, efisɛ wɔbehui sɛ enhia sɛ nnipa haw ne ho duadua nnua” wɔ kwae a asɛe mu. Nsaase a wɔgyaw too hɔ a obiara annua dua biara wɔ so no, edii mfe nnum pɛ no, “na nnua a ɛtaa fifi wɔ saa mpɔtam hɔ no ayɛ so ma.”—National Geographic.
Mmɔden a Nnipa Rebɔ
Wokɔ wiase baabiara a, nkurɔfo rebɔ mmɔden sɛ wɔbɛbɔ kwae ho ban, na wɔasiesie kwae a asɛe nso. Amanaman Nkabom amanneɛbɔ bi ka sɛ, mmɔden a nkurɔfo rebɔ yi nti, bɛyɛ mfe 25 ni de, “sɛ na nnua 10 na nkurɔfo bu wɔ wiase nyinaa a, seesei de ɛso atew aba 5.”
Nanso mmɔden a nnipa rebɔ yi, ɛno nko ara nnɔɔso. Kuw bi a wɔato din Global Forest Watch de too gua sɛ: “Sɛnea wɔresɛe kwaebirentuw wɔ mmeae a awia bɔ paa no, mfe kakra a atwam yi de, baabi a egyina ara na egyina.”
Nnua a wɔnam sum ase bu no, ɛyɛ adwuma a sika wom paa, na sikanibere nti, nkurɔfo rebu nnua no ma asa mpo a, wɔnnwene ho.
Aban adwumayɛfo a wɔhwɛ kwae so rehwɛ nnua a adu baabi a wɔbetumi abu, ne nnua foforo a ebehia sɛ wɔdua
Nea Enti a Anidaso Wɔ Hɔ—Nea Bible Aka
“Yehowa a Nyankopɔn maa nnua a wohwɛ a ɛyɛ fɛ na eye sɛ wodi nyinaa bi fifii asaase no so.”—Genesis 2:9.
Nea ɔbɔɔ kwae no, ɔyɛɛ no kwan bi so a sɛ yɛde nnua no bi yɛ nea ehia sɛ yɛde yɛ mpo a, ɛno ara tumi si ne dedaw mu. Ɔpɛ sɛ kwae a wayɛ no ne emu mmoa ne nnua nyinaa kɔ so tena hɔ kama.
Bible ma yehu sɛ asaase ne ɛso nneɛma a nnipa reyɛ no basabasa no, Onyankopɔn bɛhwɛ ama ne nyinaa agyae, na ɔremma asaase no nsɛe. Hwɛ asɛm a yɛato din, “Onyankopɔn Ahyɛ Bɔ Sɛ Asaase Yi Bɛtena Hɔ Daa” wɔ kratafa 15.
a Yehowa yɛ Onyankopɔn din.—Dwom 83:18.
