NEA ENTI A EHIA SƐ YENYA OBU MA NKWA

• Sɛ obi nom sigaret a, ebetumi ama no anya kansa, nanso ɛnyɛ ɛno nko ara. Sɛ onya kansa nso a, ɛma ɛyɛ den sɛ ne nipadua no bɛko atia. Nokwasɛm ne sɛ, wɔn a ahrawa mu kansa kunkum wɔn no, wuyi wɔn mu du a, bɛyɛ emu nkron yɛ nnipa a wɔn ankasa nom sigaret anaa nkurɔfo nom gu wɔn so.

• Afe biara, nkurɔfo totow tuo kunkum nnipa pii wɔ mmeae a nnipa taa wɔ, na wei akɔfa ehu abɛto nnipa bebree so. Amanneɛbɔ bi a Stanford University de too gua ka sɛ: “Atutotow a ɛkɔ so wɔ sukuu mu no, nhwehwɛmu ama abɛda adi sɛ, sɛ obi fi mu fi na sɛ biribiara anyɛ no mpo a, nsunsuanso a ɛde brɛ no no, yɛmfa yɛn ani nhu de, nanso etumi teetee no mfe pii.”

• Sɛnea nkurɔfo nom nsã ne nnubɔne de kã kar no ama kwan so ayɛ hu ama adrɔbafo, na ɛde wɔn a wɔnam kwankyɛn mpo nkwa to asiane mu. Sɛ nkurɔfo yɛ wɔn ade saa de kyerɛ sɛ wɔmmu nkwa a, wobɛhwɛ na wɔde wɔn asiane akosian wɔn a wɔnam wɔn baabi.

 NEA WUBETUMI AYƐ

Hwɛ w’apɔwmuden yiye. Nneɛma bi a etumi di yɛn awu te sɛ sigaret, ne ɛlɛtrɔnik de a wɔtaa frɛ no “hyihya” a nkurɔfo nom, nsawe, ne nnuru a nkurɔfo nom gyigye wɔn ani no, sɛ obi yɛ saa nneɛma no bi a, epira ne nipadua, na ɛkyerɛ sɛ ommu ɔne wɔn a ɛbɛn no no nkwa. Sɛ obi de ne ho ahyɛ mu akyɛ sɛ dɛn mpo a, obetumi agyae.

Ma wo ne afoforo bammɔ nhia wo. Sɛ biribi sɛe wɔ fie a, yɛ no yiye na ankɔfa asiane biara amma. Sɛ woreka kar a, ɛyɛ a yɛ ahwɛyiye, na hwɛ nso sɛ biribiara ntɔɔ kyima wɔ kar no ho. Afei nso, mma obiara mpiapia wo mma wonkɔyɛ biribi a ebetumi apira wo ne afoforo anaa ebetumi akum mo.

Da ayamye adi kyerɛ nkurɔfo. Sɛ obi bu nkwa a, ɔda ayamye adi kyerɛ obiara; ɔnhwɛ baabi a obi fi, ne honam ani kɔla, ne sika, anaa ne dibea, ansa na wada ayamye adi akyerɛ no. Nea ɛte ne sɛ, basabasayɛ ne akokoakoko a ɛkɔ so wiase no, fã kɛse no ara fi ɔtan.