Awofo, sɛ mubetumi ne mo mma abɔ nkɔmmɔ yiye a, ɛsɛ sɛ mutumi ka nea ɛwɔ mo tirim ne sɛnea mote nka kyerɛ mmofra no, na wɔn nso ka wɔn de kyerɛ mo.

Ebetumi ayɛ den pa ara sɛ awofo ne wɔn mma a wonnii mfe aduonu bɛbɔ nkɔmmɔ. Nhoma bi ka sɛ, bere a na wo mma susua no, “na ɛte sɛ nea wowɔ pon bi a wutumi fa mu hu nea ɛwɔ wɔn komam. Nanso seesei de, ɛte sɛ nea wugyina akyiri baabi na worehwɛ nea ɛrekɔ so wɔ wɔn asetenam.” (Breaking the Code) Sɛ ɛte sɛ nea wo mma mpɛ sɛ wɔne wo kasa mpo a, saa bere no na ehia pa ara sɛ wo ne wɔn bɔ nkɔmmɔ.

Bere biara a wo ba pɛ sɛ ɔne wo bɔ nkɔmmɔ no, nya bere ma no. Ɛyɛ anadwofa mpo a, wo ne no mmɔ nkɔmmɔ.

“Anhwɛ a wobɛka sɛ: ‘Me ne wo wɔ hɔ da mũ no nyinaa woankasa, afei na wopɛ sɛ wokasa?’ Nanso sɛ wo ba pɛ sɛ ɔka ne komam asɛm kyerɛ wo a, wobɛyɛ no dɛn? Ade yi, ɛnyɛ saa na ɔwofo biara pɛ?”—Lisa.

“Ɛyɛ a mepɛ sɛ meda ntɛm, nanso nkɔmmɔ a me ne me mma a wonnii mfe aduonu abɔ ma akɔ yiye pa ara no, na ɛyɛ anadwo dasum.”—Herbert.

BIBLE MU ASƐM: “Obiara nnhwehwɛ nea eye ma ne nko, na mmom ne yɔnko nso de.”—1 Korintofo 10:24.

Mma biribiara ntwetwe w’adwene. Agya bi gye toom sɛ: “Ɛtɔ da na me mma ne me rekasa a, mitumi hu sɛ m’adwene wɔ nneɛma foforo so. Ɛba saa a, me mma no tumi hu sɛ ɛnyɛ ade a meretie wɔn.”

Sɛ saa na woyɛ a, ɛnde dum TV no na fa ɛlɛtrɔnik afiri biara to nkyɛn. Yɛ aso tie nea wo ba no reka, na ma onhu sɛ nea ɔreka no ho hia wo pa ara. Sɛ ɛnyɛ asɛm a ɛho hia biara mpo a, yɛ aso tie no.

“Ɛsɛ sɛ yɛma yɛn mma awerɛhyem sɛ sɛnea wɔte nka no, ɛho hia yɛn. Anyɛ saa a, wɔrenka wɔn haw nkyerɛ yɛn anaa wɔbɛkɔ akɔhwehwɛ mmoa wɔ baabi foforo.”—Maranda.

“Sɛ wo ba kyerɛ n’adwene na sɛ ɛnam baabi mpo a, nyɛ w’ade ntra so.”—Anthony.

BIBLE MU ASƐM: “Monhwɛ sɛnea mutie asɛm yiye.”—Luka 8:18.

Bere a monhyɛɛ da sɛ morebɔ nkɔmmɔ no, fa hokwan no ne wɔn mmɔ nkɔmmɔ. Sɛ awofo ne wɔn mma rebɔ nkɔmmɔ na wɔantena mmofra no anim tẽẽ a, ɛtɔ da a, ɛma mmofra no tumi ka nea ɛwɔ wɔn komam.

“Yɛte kar mu a, yɛde hokwan no bɔ nkɔmmɔ. Esiane sɛ mente me ba no anim tẽẽ na mmom mete ne nkyɛn nti, ɛma yetumi bɔ nkɔmmɔ yiye.”—Nicole.

Moredidi a, ɛyɛ hokwan foforo a mubetumi de abɔ nkɔmmɔ.

“Sɛ yɛredidi anwummere a, yɛn mu biara ka nea ankɔ yiye koraa wɔ da no mu, ne nea ɛkɔɔ yiye pa ara. Wei ka yɛn bom, na ɛma yɛn mu biara hu sɛ bere biara a yebehyia ɔhaw no, obi wɔ hɔ a ɔbɛboa yɛn.”—Robin.

BIBLE MU ASƐM: “Obiara nyɛ ntɛm ntie asɛm [na] ɔnyɛ nyaa nkasa.”—Yakobo 1:19.