BIBLE KA SƐ: ‘Onyankopɔn yɛɛ nneɛma papa. Ɛne sɛ, ɔmaa osu tɔ fii soro maa mo, ɔmaa mo mmere a aduan ba, ɔmaa mo aduan di mee, na ɔde anigye hyɛɛ mo koma ma.’—Asomafo Nnwuma 14:17.

NEA ƐKYERƐ: Mframa a yɛhome, osu a ɛtɔ, owia a ɛbɔ, ne nneɛma a ɛtete saa no yɛ akyɛde a efi Ɔbɔadeɛ no hɔ. Sɛ wusua Bible no na wubehu sɛ, ɔdɔ a Onyankopɔn dɔ wo nti na ɔde saa nneɛma yi nyinaa ama wo a, ɛbɛma anisɔ a wowɔ ma no no ayɛ kɛse.

BIBLE KA SƐ: “Ɛno bɛma woate trenee ne atɛn turodoo ne adetrenee ase, na woate papayɛ akwan nyinaa ase.”—Mmebusɛm 2:9.

NEA ƐKYERƐ: Onyankopɔn na ɔbɔɔ wo, enti onim nea ɛbɛma w’ani agye. Sɛ wotɔ wo bo ase kan Bible no na wotweetwee mu a, wubenya afotusɛm pii a ɛbɛboa wo wɔ w’abrabɔ mu.

BIBLE KA SƐ: ‘Wubenya Onyankopɔn ho nimdeɛ’—Mmebusɛm 2:5.

NEA ƐKYERƐ: Sɛ wuhu sɛ Ɔbɔadeɛ bi wɔ hɔ a, ebetumi aboa wo ma woanya nsɛmmisa bi a ɛho hia paa ho mmuae. Ebi ne sɛ: Adɛn nti na yɛwɔ wiase? Adɛn nti na amanehunu abu so saa? Sɛ obi wu a, tebea bɛn na ɔkɔ mu? Wubenya saa nsɛmmisa yi nyinaa ho mmuae wɔ Bible mu, na ɛbɛma wo koma atɔ wo yam.

BIBLE KA SƐ: “‘Me ara minim adwene a madwen wɔ mo ho,’ Yehowa asɛm ni. ‘Ɛyɛ asomdwoe adwene, na ɛnyɛ mmusu; ɛne sɛ, mɛma mo daakye ne anidaso.’”—Yeremia 29:11.

NEA ƐKYERƐ: Onyankopɔn ahyɛ bɔ sɛ, daakye obeyi abɔnefosɛm, amanehunu, ne owu mpo afi hɔ. Sɛ wunya bɔhyɛ ahorow yi mu awerɛhyem a, ɛbɛboa wo paa. Sɛ ɛba sɛ wuhyia ɔhaw bi wɔ w’asetena mu a, wubetumi agyina mu, efisɛ wunim sɛ wowɔ anidaso.