‘Munyi Yah Ayɛ!’
‘Munyi Yah Ayɛ!’
“Momma nea ɛhome nyinaa nyi Yah ayɛ.”—DWOM 150:6.
1, 2. (a) Kristosom nyaa nkɔso koduu he wɔ afeha a edi kan no mu? (b) Dɛn kɔkɔbɔ na na asomafo no adi kan de ama? (d) Ɔkwan bɛn so na ɔwae bae?
YESU de n’asuafo no hyehyɛɛ Kristofo asafo a enyaa nkɔso wɔ afeha a edi kan no mu. Wɔ ɔsom mu ɔsɔretia a emu yɛ den nyinaa akyi no, ‘wɔkaa asɛmpa no wɔ wiase abɔde nyinaa mu.’ (Kolosefo 1:23) Nanso Yesu Kristo asomafo no wu akyi no, Satan nam nnaadaa kwan so de ɔwae bae.
2 Ná asomafo no adi kan de eyi ho kɔkɔbɔ ama. Sɛ nhwɛso no, Paulo ka kyerɛɛ mpanyimfo a na wofi Efeso no sɛ: “Monhwɛ mo ho ne nguankuw nyinaa a Honhom Kronkron de mo asisi wɔn so ahwɛfo sɛ monyɛn Onyankopɔn asafo a ɔde n’ankasa [ne Ba, NW] mogya anya wɔn no yiye. Na minim sɛ me kɔ akyi no, mpataku bɔne bɛhyɛn mo mu a wɔrenkyɛe nguankuw no so. Nso mo ankasa mu nnipa bɛsɔre a wɔbɛka nkontomposɛm de atwe asuafo no adi wɔn akyi.” (Asomafo no Nnwuma 20:28-30; afei nso hwɛ 2 Petro 2:1-3; 1 Yohane 2:18, 19.) Enti, wɔ afeha a ɛto so anan mu no, Kristosom a awae no fii ase ne Roma Ahemman no yɛɛ biako. Mfehaha bi akyi no, Roma Ahemman Kronkron a na ɛne Roma pope no wɔ abusuabɔ no bedii adesamma fã kɛse so tumi. Bere bi akyi no, Protestantfo Ɔsesɛw no tew atua wɔ nnebɔne a Katolek Asɔre no yɛ traa so no ho, nanso antumi amfa nokware Kristosom ansi hɔ.
3. (a) Bere bɛn ne ɔkwan bɛn so na wɔkaa asɛmpa no kyerɛɛ abɔde nyinaa? (b) Akwanhwɛ ahorow a egyina Bible so bɛn na ɛbaam wɔ 1914 mu?
3 Nanso, bere a afeha a ɛto so 19 no bɛn n’awiei no, na Bible asuafo kuw komapafo bi asan ayere wɔn ho reka asɛm bio, na wɔkaa ‘asɛmpa no ho anidaso kyerɛɛ wiase abɔde nyinaa.’ Saa nnipakuw yi nam Bible nkɔmhyɛ a wosuae no so dii kan twee adwene sii 1914 so sɛ ɛbɛyɛ “amanaman no bere” a ɛyɛ “mmere nson” anaa mfe 2,520, a efii ase bere a wɔsɛee Yerusalem wɔ 607 A.Y.B. mu no, awiei bɛboro mfe 30 ansa na ɛreba. (Luka 21:24; Daniel 4:16) Sɛnea wɔhwɛɛ kwan no, ɛbɛdaa adi sɛ 1914 yɛ nsakrae bere wɔ onipa nsɛm mu wɔ asase so. Nsɛm atitiriw sisii wɔ soro nso. Saa bere no na mmeresanten Hene no de ne Hene a ɔbɛka ne ho adi tumi, Yesu Kristo, sii ɔsoro ahengua so, de yɛɛ ahosiesie maa nsɛmmɔnedi nyinaa a ɔbɛpopa afi asase ani na wasan de Paradise aba no.—Dwom 2:6, 8, 9; 110:1, 2, 5.
Monhwɛ Ɔhene Mesia No!
4. Ɔkwan bɛn so na Yesu yɛɛ ade ma ɛne ne din Mikael no nkyerɛase hyiae?
4 Wɔ 1914 mu no, Yesu, Ɔhene Mesia yi, fii ase yɛɛ adwuma. Wɔsan frɛ no Mikael wɔ Bible mu, na ɛkyerɛ sɛ “Hena Na Ɔte Sɛ Onyankopɔn?,” efisɛ wasi nketekrakye sɛ obebu Yehowa tumidi bem. Sɛnea wɔakyerɛw wɔ Adiyisɛm 12:7-12 no, ɔsomafo Yohane kaa nea ebesi ho asɛm wɔ anisoadehu mu sɛ: “Ɔko baa ɔsoro. Mikael ne n’abɔfo tuu ɔtweaseɛ no so sa ne no koe. Na ɔtweaseɛ no ne n’abɔfo koe. Na wɔantumi wɔn, nso wɔannya ɔkwan ɔsoro bio. Na wotuu ɔtweaseɛ kɛse no, ɔwɔ dedaw no a wɔfrɛ no ɔbonsam ne Satan, nea ɔdaadaa amanaman nyinaa no, fii hɔ tow no kyenee asase so, na wɔtow n’abɔfo kaa ne ho gui.” Asehwe kɛse ampa!
5, 6. (a) Wɔ 1914 akyi no, mpaemuka a ɛyɛ anigye bɛn na wofi soro de too gua? (b) Ɔkwan bɛn so na Mateo 24:3-13 ne eyi hyia?
5 Afei ɔsoro nne bi a egyigye kɛse paee mu kae sɛ: “Afei nkwagye ne tumi ne ahenni ayɛ yɛn Nyankopɔn de, na ahoɔden ayɛ Kristo no dea, efisɛ wɔatow yɛn nuanom anototofo no akyene; ɔno na ɔtoto wɔn ano yɛn Nyankopɔn anim awia ne anadwo. Na wɔn [Kristofo anokwafo] na wɔnam oguammaa no [Kristo Yesu] mogya ne wɔn adanse asɛm no so adi no so nkonim, na wɔannɔ wɔn kra de akosi wu mu.” Eyi kyerɛ nkwagye ma mudi mu kurafo a wɔakyerɛ Yesu ogye afɔre a ɛsom bo mu gyidi no.—Mmebusɛm 10:2; 2 Petro 2:9.
6 Ɛnne kɛse a efi soro no toaa so kae sɛ: “Eyi nti mo ɔsoro ne mo a motete mu no, momma mo bo ntɔ mo yam. Asase ne ɛpo nnue, efisɛ ɔbonsam asian aba mo nkyɛn, na wafa abufuw kɛse, efisɛ onim sɛ ne bere a ɔwɔ yɛ tiaa.” ‘Due’ a wɔhyɛɛ ho nkɔm saa maa asase yi ada adi wɔ wiase nyinaa ko ahorow, ɔkɔm, ɔyaredɔm, asasewosow, ne amumɔyɛ a ahaw asase no wɔ afeha yi mu no mu. Sɛnea Mateo 24:3-13 ka no, Yesu ka siei sɛ eyinom bɛyɛ ‘wiase awiei ho sɛnkyerɛnne’ no fã. Sɛnea nkɔmhyɛ no kyerɛe ampa no, efi 1914 reba no, adesamma ahu amane wɔ asase so a ɛmmaa saa da wɔ adesamma abakɔsɛm a atwam nyinaa mu.
7. Dɛn nti na Yehowa Adansefo de ntɛmpɛ ka asɛm no?
7 Wɔ amanehunu mfe a Satan de aba yi mu no, adesamma betumi anya daakye ho anidaso? Yiw, ɛte saa, efisɛ Mateo 12:21 ka Yesu ho asɛm sɛ: “Ne din so na amanaman de wɔn ani bɛto”! Tebea a ɛhaw adwene a ɛkɔ so wɔ amanaman no mu no nyɛ ‘wiase awiei ho sɛnkyerɛnne’ nko, na mmom ‘ba a Yesu aba’ sɛ Mesia Ahenni no soro Hene nso ‘ho sɛnkyerɛnne.’ Yesu kaa saa Ahenni no ho asɛm bio sɛ: “Wɔbɛka ahenni no ho asɛmpa yi wiase nyinaa de adi amanaman nyinaa adanse; ɛno ansa na awiei no bɛba.” (Mateo 24:14) Nnipa a wɔayɛ biako bɛn na wɔwɔ asase so nnɛ a wɔreka Onyankopɔn Ahenni tumidi ho anidaso kɛse no ho asɛm kyerɛ? Yehowa Adansefo! Wɔde ntɛmpɛ bɔ no dawuru wɔ baguam ne afie afie sɛ Onyankopɔn trenee ne asomdwoe Ahenni no rebegye asase no adi so nsɛm ho dwuma. Woreyɛ ɔsom adwuma yi bi? Wuntumi nnya hokwan biara a ɛyɛ kɛse sen saa!—2 Timoteo 4:2, 5.
“Awiei no” Ba Ɔkwan Bɛn So?
8, 9. (a) Ɔkwan bɛn so na atemmu fii ase wɔ “Onyankopɔn fi”? (b) Ɔkwan bɛn so na Kristoman abu Onyankopɔn Asɛm so?
8 Adesamma ahyɛn atemmu bere bi mu. Wɔka kyerɛ yɛn wɔ 1 Petro 4:17 sɛ atemmu fii ase “Onyankopɔn fi”—atɛn a wobu nea wose ɛyɛ Kristofo ahyehyɛde ahorow, a ada adi fi bere a “nna a edi akyiri” yi fii ase wɔ Wiase Ko I mu okunkɛse no mu wɔ 1914-18 no. Dɛn na ato Kristoman wɔ atemmu yi mu? Eye, susuw asɔre ahorow no gyinabea wɔ akodi a akɔ so fi 1914 a wɔboae no ho. So “ahiafo a wodi bem no mogya” nkekaa asɔfo a wɔhyɛɛ wɔn nkuran ma wɔkɔɔ akono no ho?—Yeremia 2:34.
9 Sɛnea Mateo 26:52 kyerɛ no, Yesu kae sɛ: “Wɔn a wɔtwe nkrante nyinaa, nkrante ano na wobewu.” Hwɛ sɛnea eyi ayɛ nokware wɔ afeha yi mu akodi ahorow no mu! Asɔfo no ahyɛ mmerante nkuran ma wɔakunkum mmerante foforo, wɔn a wɔne wɔn wɔ ɔsom koro mu mpo—Katolekni kum Katolekni, na Protestantni kum Protestantni. Wɔapagyaw ɔmampɛ asen Onyankopɔn ne Kristo. Nnansa yi ara wɔ Afrika aman bi mu no, wɔama abusua ho abehia asen Bible mu nnyinasosɛm ahorow. Wɔ Rwanda a nnipa no dodow no ara yɛ Katolekfo no, wokunkum anyɛ yiye koraa no, nnipa ɔpepem fã wɔ mmusua ntam akodi mu. Pope no gye toom wɔ Vatican atesɛm krataa L’Osservatore Romano mu sɛ: “Eyi yɛ nnipa a wɔtɔree wɔn ase wɔ baabiara, na awerɛhosɛm ne sɛ Katolekfo mpo kunkum bi.”—Fa toto Yesaia 59:2, 3; Mika 4:3, 5 ho.
10. Atemmu bɛn na Yehowa de bɛba atoro som so?
10 Mmeresanten Hene no bu ɔsom ahorow a ɛhyɛ nnipa nkuran ma wokunkum wɔn ho anaasɛ wɔnyɛ hwee, bere a wɔn asɔremma kunkum asɔremma foforo no dɛn? Adiyisɛm 18:21, 24 ka Babilon Kɛse, wiase nyinaa atoro som nhyehyɛe, no ho asɛm kyerɛ yɛn sɛ: “Ɔbɔfo hoɔdenfo bi maa ɔbo bi a ɛte sɛ owiyammo kɛse so tow kyenee po mu sɛ: sɛnea wɔbɛtow kurow kɛse Babilon akyene hwii ne no, na wɔrenhu bio koraa. Na ɛno mu na wohuu adiyifo ne ahotefo ne wɔn a wɔakum wɔn asase so no nyinaa mogya.”
11. Ahodwiriwde bɛn na akɔ so wɔ Kristoman mu?
11 Ahodwiride akɔ so wɔ Kristoman mu ma Bible nkɔmhyɛ renya mmamu. (Fa toto Yeremia 5:30, 31; 23:14 ho.) Asɔfo no su a ɛne sɛ wɔma obiara yɛ nea ɔpɛ no titiriw nti, ɔbrasɛe adonnɔn wɔn nguankuw no. Aware nyinaa mu bɛyɛ fã kowie awaregu mu wɔ United States a wose ɛyɛ Kristofo man no mu. Mmofra a wonyinsɛn ne mmarima anaa mmea a wɔne wɔn ho da abu so wɔ asɔrefo mu. Asɔfo reto mmofra nkumaa mmonnaa—na ɛyɛ ade a ɛtaa si. Wɔaka sɛ ɛka a asennibea bɔ wɔn wɔ nsɛm yi ho no betumi ama Katolek Asɔre a ɛwɔ United States no atua dɔla ɔpepepem biako wɔ mfe du mu. Kristoman abu wɔn ani agu ɔsomafo Paulo kɔkɔbɔ a yehu wɔ 1 Korintofo 6:9, 10 yi so: “Anaasɛ munnim sɛ wɔn a wɔnteɛ no rennya Onyankopɔn ahenni no? Mommma wɔnnnaadaa mo, nguaman ne abosonsomfo ne awaresɛefo ne ahodomfo ne mmarima a wɔne wɔn ho da ne awifo ne aniberefo ne asabofo ne amaanefo ne amimfo rennya Onyankopɔn ahenni no.”
12. (a) Ɔkwan bɛn so na mmeresanten Hene no bɛyɛ ade atia Babilon Kɛse? (b) Dɛn nti na Onyankopɔn nkurɔfo bɛto “Haleluia” nnwom ma ɛne Kristoman nneyɛe abɔ abira?
12 Ɛrenkyɛ, mmeresanten Hene, Yehowa, a ɔnam ne soro Sahene, Kristo Yesu, so di dwuma no bɛma ahohiahia kɛse no aba. Nea edi kan no, Kristoman ne Babilon Kɛse no afã horow a aka nyinaa benya Yehowa atemmu. (Adiyisɛm 17:16, 17) Wɔada wɔn ho adi sɛ wɔmfata nkwagye a Yehowa nam Yesu agyede afɔrebɔ no so de ama no. Wɔabu Onyankopɔn din kronkron no animtiaa. (Fa toto Hesekiel 39:7 ho.) Hwɛ fɛwdi a ɛyɛ sɛ wɔto “Haleluia” nnwom wɔ wɔn asɔredan akɛseakɛse no mu! Woyi Yehowa din a ɛsom bo no fi wɔn Bible nkyerɛase ahorow mu, nanso ɛte sɛ nea wonnim nokwasɛm a ɛne sɛ “Haleluia” kyerɛ “Munyi Yah Ayɛ”—“Yah” yɛ “Yehowa” a wɔatwa no tiaa. Ɔkwan a ɛfata so no, Adiyisɛm 19:1-6 akyerɛw “Haleluia” nnwom a ɛnkyɛ wɔbɛto de adi atemmu a Onyankopɔn de bɛba Babilon Kɛse so no ho ahurusi no ato hɔ.
13, 14. (a) Nsɛm atitiriw bɛn na edi hɔ a ebesisi? (b) Anigye bɛn na wɔn a wosuro Onyankopɔn no benya?
13 Nea ebedi hɔ aba ne Yesu ‘ba’ a ɔbɛba abebu amanaman ne nkurɔfo atɛn. N’ankasa hyɛɛ nkɔm sɛ: “Onipa ba no [Yesu Kristo] bɛba n’anuonyam mu a n’abɔfo nyinaa ka ne ho no, ɔbɛtra n’anuonyam [atemmu] ahengua so. Na wɔbɛboaboa amanaman nyinaa [a wɔwɔ asase so] ano n’anim. Na ɔbɛpaapae wɔn mu, sɛnea oguanhwɛfo paapae nguanten ne mpapo mu. Na ɔde nguanten no begyina ne nifa, na ɔde mpapo no agyina benkum. Ɛno na ɔhene [no] bese wɔn a wɔwɔ ne nifa no sɛ: Mo a m’agya ahyira mo, mommra mmɛfa ahenni a wɔasiesie ama mo fi wiase asefi mu no nni!” (Mateo 25:31-34) Nkyekyem 46 (NW) kɔ so ka sɛ mpapo kuw no “befi hɔ akɔ daa ntwafi-hɔ mu, nanso nnipa trenee no bɛkɔ daa nkwa mu.”
14 Bible nhoma a ɛne Adiyisɛm ka sɛnea “ahene mu hene ne awuranom mu awurade,” yɛn soro Awurade, Yesu Kristo, bɛtra ɔpɔnkɔ so abɛko wɔ Harmagedon, asɛe Satan nhyehyɛe no mu amammuifo ne aguadifo. Kristo nam saayɛ so behwie “ade nyinaa so tumfoɔ no, abufuw a ɛyɛ den no” agu Satan asase so ahemman no nyinaa so. Bere a saa ‘kan nneɛma yi twam no,’ wɔde nnipa a wosuro Onyankopɔn bɛkɔ wiase foforo a ɛyɛ anigye no mu, na ɛhɔ na Onyankopɔn ‘bɛpopa wɔn aniwam nusu nyinaa.’—Adiyisɛm 19:11-16; 21:3-5.
Ɛbere a Ɛsɛ sɛ Yeyi Yah Ayɛ
15, 16. (a) Dɛn nti na ɛho hia sɛ yetie Yehowa nkɔmhyɛsɛm no? (b) Dɛn na adiyifo ne asomafo no kyerɛ sɛ ɛsɛ sɛ yɛyɛ na yɛanya nkwa, na dɛn na eyi betumi akyerɛ ama nnipa pii nnɛ?
15 Saa atemmu da no abɛn! Enti, ɛbɛyɛ papa sɛ yebetie mmeresanten Hene no nkɔmhyɛsɛm no. Ɛnne bi a efi soro ka kyerɛ wɔn a wɔda so yantam atoro som nkyerɛkyerɛ ne amanne ahorow mu no sɛ: “Me man, mumfi no mu, na moanyɛ ne nnebɔne no bi, na moannya ne haw no bi.” Nanso ɛhe na ɛsɛ sɛ wɔn a woguan no kɔ? Nokware biako pɛ na ebetumi atra hɔ, enti nokware som biako pɛ na ɛwɔ hɔ. (Adiyisɛm 18:4; Yohane 8:31, 32; 14:6; 17:3) Daa nkwa a yebenya no gyina hu a yebehu saa som no na yɛatie ne Nyankopɔn no so. Bible twe yɛn adwene si no so wɔ Dwom 83:18 a ɛkenkan sɛ: “Wo, a wo nkutoo din ne YEHOWA no, wo ne ɔsorosoroni wɔ asase nyinaa so.”—King James Version.
16 Nanso, ɛho hia sɛ yɛyɛ pii sen hu a yebehu mmeresanten Hene no din kɛkɛ. Ɛho hia sɛ yesua Bible no na yehu ne su atitiriw ne n’atirimpɔw ahorow. Afei ɛho hia sɛ yɛyɛ nea ɔpɛ sɛ yɛyɛ saa bere yi, sɛnea wɔaka wɔ Romafo 10:9-13 (NW) no. Ɔsomafo Paulo faa adiyifo a wɔde honhom kaa wɔn no nsɛm kae sɛ: “Wobegye obiara a ɔbɛbɔ Yehowa din no nkwa” no. (Yoel 2:32; Sefania 3:9) Wobegye no nkwa? Yiw, wobegye nnipa pii a ɛnnɛ wɔkyerɛ Yehowa agyede a ɛnam Kristo so no mu gyidi afi ahohiahia kɛse a ɛreba no mu, bere a wɔde atemmu ba Satan wiase a aporɔw no so no.—Adiyisɛm 7:9, 10, 14.
17. Anidaso kɛse bɛn na ɛsɛ sɛ ɛkanyan yɛn ma yɛto Mose ne Oguammaa no dwom no bi nnɛ?
17 Dɛn na Onyankopɔn pɛ sɛ wɔn a wɔhwɛ kwan sɛ wobenya wɔn ti adidi mu no yɛ? Ɛne sɛ mprempren mpo yɛbɛto Mose ne Oguammaa no dwom no bi, ayi mmeresanten Hene no ayɛ de ahwɛ ne nkonimdi kwan. Yɛnam n’atirimpɔw ahorow a ɛyɛ anigye no ho asɛm a yɛka kyerɛ afoforo no so na ɛyɛ eyi. Bere a yenya nkɔanim wɔ Bible mu ntease mu no, yehyira yɛn nkwa so ma mmeresanten Hene no. Ɛno bɛma yɛatra ase daa wɔ nhyehyɛe a Ɔhene kɛse yi ka ho asɛm sɛnea yehu wɔ Yesaia 65:17-19 wɔ The Bible in Twi: Asante mu no ase: “Merebɔ ɔsoro foforɔ [Yesu Mesia Ahenni no] ne asase foforɔ [adesamma atreneefo abusua foforo], na wɔrenkae kane deɛ no na ɛremma akoma mu bio; na mmom, momma mo ho nsɛpɛ mo na monni ahurisie daa daa, adeɛ a merebɔ no nti.”
18, 19. (a) Dɛn na ɛsɛ sɛ Dawid nsɛm a ɛwɔ Dwom 145 no ka yɛn ma yɛyɛ? (b) Dɛn na yebetumi de ahotoso ahwɛ kwan afi Yehowa hɔ?
18 Odwontofo no kaa mmeresanten Hene no ho asɛm wɔ saa kwan yi so: “Awurade sõ, na ɔsɛ ayeyi kɛse, ne kɛseyɛ mu nni hwehwɛbea.” (Dwom 145:3) Ne kɛseyɛ mu nni hwehwɛbea te sɛ nea ahunmu ne mmeresanten nni awiei no! (Romafo 11:33) Bere a yɛkɔ so nya yɛn Bɔfo no ne n’agyede nsiesiei a ɛnam ne Ba, Kristo Yesu, so ho nimdeɛ no, yɛbɛpɛ sɛ yeyi yɛn mmeresanten Hene no ayɛ kɛse. Yɛbɛpɛ sɛ yɛyɛ nea Dwom 145:11-13 ka no: “Wɔka w’ahenni anuonyam, na wɔbɔ wo mmaninyɛ din, sɛ wɔbɛma nnipa mma ahu ne mmaninne ne n’ahenni anuonyam a ɛharan no. W’ahenni yɛ daa ahenni, na wo tumidi fa awo ntoatoaso nyinaa mu.”
19 Yebetumi de ahotoso ahwɛ kwan sɛ yɛn Nyankopɔn no bedi ne bɔhyɛ yi so: “Wubue wo nsam, na woma ateasefo nyinaa nya nea wɔpɛ di mee.” Mmeresanten Hene no bɛyɛ yɛn brɛbrɛ de yɛn atwa nna a edi akyiri yi awiei, efisɛ Dawid maa yɛn awerɛhyem sɛ: “Awurade hwɛ n’adɔfo nyinaa so, na abɔnefo nyinaa de, ɔbɛsɛe wɔn.”—Dwom 145:16, 20.
20. Woyɛ w’ade dɛn wɔ mmeresanten Hene no nsato a wɔde to gua wɔ nnwom anum a etwa to no mu no ho?
20 Bible mu nnwom anum a etwa to no mu biara de “Munyi Awurade ayɛ” nsato na efi ase na ewie. Enti, Dwom 146 to nsa frɛ yɛn sɛ: “Munyi Awurade ayɛ! Me kra, yi Awurade ayɛ. Mete ase yi, meyi Awurade ayɛ, mewɔ hɔ yi, mɛto dwom mama me Nyankopɔn.” Wubegye saa ɔfrɛ no so? Akyinnye biara nni ho sɛ ɛsɛ sɛ wunya ɔpɛ sɛ wubeyi no ayɛ! Ɛmmra sɛ wobɛyɛ wɔn a wɔka wɔn ho asɛm wɔ Dwom 148:12, 13 no mu biako: “Mmerante ne mmabaa nso, mpanyin ne mmofra: Wonyi Awurade din ayɛ, sɛ ne din nko na ɛsõ, n’anuonyam tra asase ne ɔsoro so.” Ɛmmra sɛ yebefi koma nyinaa mu agye nsato yi so: “Munyi Awurade ayɛ!” Momma yɛmfa biakoyɛ nyi mmeresanten Hene no ayɛ!
Wo Mmuae Ne Dɛn?
□ Dɛn ho kɔkɔbɔ na Yesu asomafo no dii kan de mae?
□ Efi 1914 no, adeyɛ atitiriw bɛn na akɔ so?
□ Ntɛn bɛn na Yehowa rebebu?
□ Dɛn nti na eyi yɛ bere a ɛsen biara a ɛsɛ sɛ yeyi mmeresanten Hene no ayɛ?
[Adesua no ho Nsɛmmisa]
[Kratafa 19 adaka]
Basabasayɛ Bere A Amanehunu Wom Yi
Nnipa pii agye atom sɛ basabasayɛ bere bi fii ase wɔ afeha a ɛto so 20 yi mfiase. Sɛ nhwɛso no, asɛm bi a wɔka fa “amanehunu a ɛbaa 1914” ho wɔ nhoma Pandaemonium a U.S. Mmarahyɛfo Daniel Patrick Moynihan kyerɛwee, na wotintim no 1993 no nnianim asɛm mu no kenkan sɛ: “Ɔko bae na wiase no sakrae—koraa. Ɛnnɛ aman awotwe pɛ na ɛwɔ asase so a na ɛwɔ hɔ wɔ 1914 mu a efi saa bere no wɔmfaa basabasayɛ nsakraa wɔn nniso. . . . Wɔ aman bɛyɛ 170 anaa nea ɛte saa a aka a ɛwɔ hɔ nnɛ no mu no, wɔhyehyɛɛ ebinom nkyɛe koraa na ama ahyia basabasayɛ pii a akɔ so nnansa yi no bi.” Nokwarem no, amanehunu pii akɔ so wɔ bere a efii ase fii 1914 no mu!
Nhoma foforo nso a wotintim no 1993 ne Out of Control—Global Turmoil on the Eve of the Twenty-First Century. Ne kyerɛwfo ne Zbigniew Brzezinski a wayɛ U.S. Ɔman Ahobammɔ Bagua no panyin pɛn. Ɔkyerɛw sɛ: “Bere a afeha a ɛto so aduonu no fii ase no, wɔkamfoe wɔ nsɛm pii a wɔkekae mu sɛ ɛyɛ Nyansa Bere mfiase ankasa. . . . Nea ɛne afeha a ɛto so aduonu no ho bɔhyɛ bɔ abira no, ɛbɛyɛɛ adesamma afeha a mogyahwiegu ne nitan ahyɛ mu ma asen biara, afeha a amammuisɛm mu nnaadaa ne nnipakum a ɛyɛ hu ahyɛ mu ma. Wɔyɛɛ atirimɔdenne ho nhyehyɛe wɔ ɔkwan a ebi mmae da so, yɛɛ nneɛma pii a ebetumi akunkum nnipa. Nsonsonoe a ɛwɔ nneɛma pa a nyansahu betumi ayɛ ne amammui mu nsɛmmɔnedi a ɛdaa adi ankasa mu no yɛ hu yiye. Nnipakum ntrɛwee wɔ wiase nyinaa saa da wɔ abakɔsɛm mu, wɔntɔree nnipa pii ase saa da, wɔnkɔɔ so mfaa mmɔdenbɔ kɛse ntɔree nnipa ase wɔ botae horow a ɛkyerɛ ahantan na nyansa nnim koraa ho saa da.” Hwɛ sɛnea saa asɛm no yɛ nokware!
[Kratafa 17 mfonini]
Mikael too Satan ne ne dɔm no kyenee asase so bere a wɔde Ahenni no sii hɔ 1914 akyi no