‘Biribi a Ɛkanyan Koma ne Adwene Kɛse’

“Merentumi mfa nsɛm nkyerɛkyerɛ anigye ne ahurusi kɛse a mekɔ so di bere a mede ahopere kenkan Is There a Creator Who Cares About You? no. Ɛma obi nya ɔpɛ bi—dabi, ɛma ohu hia a ehia—sɛ ohu pii. Meda mo ase sɛ moakanyan me koma ne m’adwene kɛse.”

SAA na Yehowa Adansefo a wɔwɔ North Carolina, U.S.A., no mu biako tee nka wɔ nhoma a Ɔwɛn Aban Asafo no yii no adi wɔ “Onyankopɔn Asetra Kwan” Ɔmantam Nhyiam Ahorow a wɔyɛe wɔ 1998 ne 1999 mu ase no ho. Sɛ wunni nhoma no bi mpo a, hyɛ nea afoforo aka afa ho yi nsow.

Bere a ɔbarima bi nsa kaa ne nhoma no wɔ San Diego, California, U.S.A., nhyiam ase no, ɔkyerɛwee sɛ: “Mahu sɛ nhoma yi hyɛ gyidi den yiye. Ama manya Yehowa adebɔ nnwuma ho anisɔ kɛse. Madu kratafa 98, na mempɛ sɛ ɛsa! Ɛma m’ani gye kɛse.”

Ɔbea bi a ofi Apuei fam kyerɛwee sɛ: “Nhyiam ase ɔkasafo no de asɛm ‘nhoma soronko’ dii dwuma, na saa asɛm no ne emu nsɛm no hyia ankasa. Ade biako a ɛda nsow wɔ nhoma no ho ne sɛ ɛnhyɛ ɔkenkanfo no sɛ onnye ntom sɛ Onyankopɔn wɔ hɔ, nanso ɛda nokwasɛm ahorow adi.”

Nea ɛka nokwasɛm ahorow yi ho ne yɛn amansan, nkwa, ne yɛn ankasa ho nyansahu mu nsɛm a ɛyɛ nwonwa a wɔahu. Eyi maa nnipa pii ho dwiriw wɔn. Ɔbea bi a ofi California kyerɛwee sɛ: “Minni nsɛm a mede bɛkyerɛkyerɛ sɛnea saa nhoma ketewa yi anya me so tumi kɛse no mu ankasa. Ná mintumi mfa nhoma no nto hɔ, efisɛ kratafa biara kaa yɛn amansan yi ne yɛn ankasa ho nsɛm a ɛreda adi pii ho asɛm. Masua nneɛma pii ankasa! Mɛkɔ so de nhoma ketewa yi adi dwuma, na maka mu asɛm akyerɛ nnipa pii sɛnea metumi.”

Ade biako a nnipa pii ani gye ho ne sɛnea nhoma no bɔ Bible mu nsɛntitiriw mua, na ɛka Ɔbɔadeɛ no nipasu ho asɛm no. Nea obi kae ne sɛ: “Bible mũ no nyinaa ho asɛm a wɔaka wɔ nhoma yi awiei hɔ no yɛ nneɛma a ɛsen biara a makenkan pɛn no mu biako.” Bere a wowiee nhyiam a edi kan wɔ New York, U.S.A. no pɛ na ɔfoforo kyerɛwee sɛ: “Nhoma foforo no yɛ nhoma a moatintim a egye adwene sen biara. Nyansahu mu nokwasɛm ahorow a ɛkyerɛ sɛ Ɔbɔadeɛ bi wɔ hɔ no gyee m’adwene. Bible mu nsɛm a moabɔ no mua tiawa no ankasa kyerɛkyerɛ nsɛm a moka no mu yiye, na ɛma obi kɔn dɔ sɛ ɔbɛkenkan pii.”

Nyansahu a Ntease Wom

Nyansahu mu nsɛm a ɛwɔ ti ahorow a edi kan no mu no te sɛ nea asete yɛ den, nanso nsɛm a wɔaka afa ho bi ni.

Canadani barima bi kyerɛwee sɛ: “Hwɛ sɛnea ɛne nyansahu nhoma a n’akyerɛwfo bɔ mmɔden sɛ wɔde nsɛmfua akɛse bedi dwuma ma nkurɔfo ho adwiriw wɔn no bɔ abira koraa. Nimdeɛ a mode  kyerɛkyerɛɛ nneɛma te sɛ abɔde a aniwa hu ho nsɛm, adufra, DNA, nkwammoaa, ne nea ɛkeka ho mu no yɛ soronko koraa ma yetumi te ase yiye. Sɛ me yam a anka mo na mokyerɛw sukuupɔn nkyerɛkyerɛ nhoma a misuae mfe bi a atwam no!”

Sukuupɔn mu abɔde a aniwa hu ho ɔbenfo bi kyerɛwee sɛ: “Ɛkyerɛkyerɛ nsɛm mu pefee, bere a ɛmfa nyansahu mu nsɛm a ɛkyere adwene biara nka ho. Nhoma no ne ɔkenkanfo no susuw nsɛm ho, na ɛfa nyansahufo a wɔagye din nsɛm ka. Eyi yɛ nhoma a ‘ɛsɛ sɛ’ obiara a n’ani gye amansan yi ne baabi a nkwa fi ho, sɛ́ ɔyɛ nyansahufo anaa ɔpapahwekwa, no ‘kenkan.’”

Ababaa bi a ɔresua ayarehwɛ adwuma kae sɛ: “Mannye anni, bere a mibuee ti 4 na mekenkan asɛm bi a wɔafa afi nhoma bi a yɛde sua ade wɔ sukuu mu aka no! Mede nhoma no maa yɛn kyerɛkyerɛfo no ka kyerɛɛ no sɛ minim sɛ n’ani begye emu nsɛm no ho. Mede kratafa 54 a ɛka amemene ho nsɛm no kyerɛɛ no. Ɔkenkan wɔ ne tirim kae sɛ, ‘Ɛyɛ anigye! Mɛsan ahwɛ mu bio.’”

Mmarahyɛ baguani bi a ɔwɔ Belgium kyerɛwee sɛ: “Nea ɛmaa me ho dwiriw me na egyee m’adwene ne nyansahu mu nsɛm a ɛkyerɛ sɛ ɛnnɛyi nyansahu nsɔre ntia onyame biako som ho adwene a ɛwɔ Bible mu, na mmom, egye tom no. Eyi yɛ adwempa ankasa.”

Ɔbɔadeɛ no a Yebehu no Yiye

Nhoma no boaa nkurɔfo a wɔwɔ nsase pii so ma wohuu Onyankopɔn yiye bɛnee no pii. Ɔkenkanfo bi a ɔwɔ Fukuoka City, Japan, kae sɛ: “Ɛte sɛ nea afei na wɔatwe adwene asi Yehowa so nea edi kan. Ntease wɔ nhoma no mu yiye. Mitumi behuu Yehowa wɔ ɔkwan bi so a na minsusuw ho saa da de besi nnɛ.” El Salvadorni bi kyerɛwee sɛ: “Mokyerɛkyerɛ sɛnea Onyankopɔn yɛ mmɔborohunufo, ɔdomfo, nea n’abodwo kyɛ, na n’adɔeyɛ dɔɔso pii no mu pefee. Nokwarem no, eyi pɛpɛɛpɛ na yehia na ama yɛabɛn ɔno ne ne Ba no. Ɛne nhoma a edi kan a ɛkyerɛkyerɛ Yehowa nsusuwii ne nnipa nkate horow a ne Ba, Yesu, daa no adi no mu.” Na ɔkenkanfo bi a ɔwɔ Zambia kae sɛ: “Mahu Yehowa wɔ ɔkwan foforo so koraa.”

Ntease wom sɛ Yehowa Adansefo ani gye ho sɛ wɔbɛka Is There a Creator Who Cares About You? no ho asɛm akyerɛ afoforo. Obiako kae sɛ: “Bere a mekenkan ti 10 [“Sɛ Ɔbɔadeɛ no Dwen Yɛn Ho a, Dɛn Nti na Amanehunu Pii Wɔ Hɔ Saa?”] wiei no, na minhu nea menyɛ, na mekae sɛ, ‘Eyi ne nhoma ankasa a yehia wɔ Japan!’ Mepɛ sɛ misua saa ti yi mu nsɛm yiye ma ɛka me tirim na mede di dwuma wɔ asɛnka mu daa.” Ɔbea foforo ne abeawa bi a wɔtetee no wɔ asɔrefie bi mu, baabi a ne papa yɛ ɔsɔfo no, resua Bible no. “Ɛyɛɛ den maa abeawa no sɛ obegye atom sɛ Ɔbɔadeɛ no wɔ hɔ. Nkyerɛkyerɛ katee biara nni saa nhoma no nkyerɛkyerɛmu mu, na mmom ɛka nokwasɛm, enti misusuw sɛ Buddhafo mpo betumi akenkan a wɔntwentwɛn wɔn nan ase. Ɛma yehu Yehowa dɔ nso yiye.”

Obi a ofi England kaa sɛnea ɛsom bo ho asɛm sɛ: “Afei na makenkan Creator nhoma no awie, na meresan afi ase bio. Nhoma a emu yɛ anigye bɛn ara ni! Sɛ wokenkan a wobɛdɔ Yehowa. Mama me fipamfo bi bi, na ɔkenkan ti abien wiei no, ɔkae sɛ ‘Mintumi mfa nto hɔ, emu yɛ anigye yiye.’ Migye di sɛ eyi bɛboa nkurɔfo ma wɔahu yɛn Bɔfo Kɛse no na wɔadɔ no.”

Ɔbarima bi a ɔwɔ Maryland, U.S.A., kae sɛ: “Ahyɛn me honhom fam nnompe mu ankasa! Mayɛ nhyehyɛe sɛ mɛma nkurɔfo a me ne wɔn yɛ adwuma nyinaa bi. Ɛtɔ mmere bi a ɛyɛ me den sɛ medi nhomanimfo a wonni adagyew no adanse. Bere a me nsa aka nhoma yi no, afei mehu ɔkwan a ɛyɛ anigye a etu mpɔn a mɛfa so.”

Ɛda adi pefee sɛ, Is There a Creator Who Cares About You? nhoma no benya nnipa a wɔwɔ asase nyinaa so nkɛntɛnso pa.

[Mfonini Fibea wɔ kratafa 25]

Cover photo above, Eagle Nebula: J. Hester and P. Scowen (AZ State Univ.), NASA