Dɛn Nti na Saulo Taa Kristofo?

‘ƐYƐƐ ME SƐ ƐSƐ SƐ meyɛ nneɛma pii mitia Yesu Nasareni no din; nokwarem no, ɛno na meyɛe wɔ Yerusalem, na minyaa asɔfo mpanyin nkyɛn tumi no, mede ahotefo bebree miguu afiase. Na wokum wɔn a, mebɔ ntonto mitia wɔn. Metaa wɔn twee wɔn aso hyia adan nyinaa mu, na mehyɛɛ wɔn ma wɔkaa abususɛm, na m’ani beree wɔn so dodo nti, metaa wɔn koduu ananafo nkurow so.’—Asomafo no Nnwuma 26:9-11.

SAULO a ofi Tarso a wɔsan frɛ no ɔsomafo Paulo no na ɔkaa saa asɛm yi. Nanso, bere a ɔkaa eyi no, na wasakra. Na ɔnsɔre ntia Kristosom bio efisɛ saa bere yi de na ɔyɛ wɔn a wɔde nsiyɛ hyɛ ho nkuran no mu biako. Nanso, dɛn na ɛmaa Saulo taa Kristofo bere bi no? Dɛn nti na osusuwii sɛ ‘ɛsɛ sɛ ɔyɛ’ nneɛma a ɛte saa? Na so yebetumi anya asuade bi wɔ n’asɛm no mu?

Wosiw Stefano Abo

Saulo din wɔ Bible mu sɛ wɔn a wokum Stefano no mu biako. “Wosunsum [Stefano] fii kurow no mu kosiw no abo. Na adansefo no de wɔn ntama guguu aberante bi a wɔfrɛ no Saulo anan ase.” “Saulo nso penee ne kum no so.” (Asomafo no Nnwuma 7:58; 8:1) Dɛn na ɛma wosiw no abo no? Yudafo, a wɔn a na wofi Kilikia ka ho, ne Stefano gyee akyinnye, nanso wɔantumi annyina n’anim. Sɛ ebia na Saulo, a ɔno nso yɛ Kilikiani, ka wɔn ho de, wɔankyerɛ. Sɛnea ɛte biara no, wɔde adansekurumfo dii dwuma ma wɔbɔɔ Stefano sobo sɛ waka abususɛm, na wɔtwee no kɔɔ Sanhedrin no anim. (Asomafo no Nnwuma 6:9-14) Saa nhyiam yi a ɔsɔfopanyin na ɔtraa pon ti no dii dwuma sɛ Yudafo asɛnnibea kunini. Sɛ́ ɔsom mu asɛnnibea kunini no, emufo no nso bɔɔ nea na wobu no sɛ nkyerɛkyerɛ kronkron no ho ban. Wɔ wɔn fam no, na Stefano fata owu. So onyaa akokoduru tumi bɔɔ wɔn sobo sɛ wonni Mmara no so? (Asomafo no Nnwuma 7:53) Na wɔbɛkyerɛ no sɛnea wodi Mmara no so!

Ɛyɛ gye a na Saulo gye di sɛ wɔreyɛ adepa na ɛma ɔpenee saa adwene no so. Na ɔyɛ Farisini. Na saa fekuw a ɛyɛ den yi hwehwɛ sɛ wodi mmara ne atetesɛm so katee. Na wobu Kristosom sɛ ɛne saa nnyinasosɛm yi di asi, kyerɛkyerɛ ɔkwan foforo a wɔfa so kɔ nkwagye mu denam Yesu so. Afeha a edi kan mu Yudafo no hwɛɛ kwan sɛ Mesia no bɛyɛ Ɔhene nuonyamfo bi a obegye wɔn afi Romafo kɔndua a wokyi no nkɛntɛnso ase. Sɛ́ obi a na Sanhedrin Kɛse no abu no fɔ wɔ abususɛm ho, na ɛno akyi, wɔabɔ no asɛndua mu  te sɛ nsɛmmɔnedifo a wɔadome no no betumi ayɛ Mesia no yɛ wɔn asɛm foforo koraa a wontumi nnye ntom, na na wɔmpɛ sɛ wɔte koraa.

Mmara no kae sɛ ɔbarima a wɔasɛn no dua so yɛ “Onyankopɔn nnome.” (Deuteronomium 21:22, 23; Galatifo 3:13) Frederick F. Bruce ka sɛ, wɔ Saulo fam no, na “nsɛm yi fata Yesu pefee. Na wawu wɔ Onyankopɔn nnome ase, ma enti, na ɔrentumi nyɛ Mesia no a sɛnea Yudafo atetesɛm kyerɛ no, ɛkame ayɛ sɛ Onyankopɔn nhyira a ebiara ne no nsɛ wɔ ne so no. Enti ka a na obi bɛka sɛ Yesu ne Mesia no yɛ abususɛm; na ɛsɛ sɛ wɔn a wɔbɛka biribi a nyansa nnim saa no hu amane sɛ abususɛnkafo.” Sɛnea Saulo ankasa gye toom akyiri yi no, adwene a ɛne sɛ ‘wɔsɛn Kristo no yɛɛ hintidua maa Yudafo.’—1 Korintofo 1:23.

Nea Saulo yɛe wɔ nkyerɛkyerɛ a ɛte saa ho ne sɛ ɔbɛsɔre atia denneennen sɛnea obetumi biara. Na ɔbɛfa atirimɔden so mpo abɔ mmɔden asiw ano. Na ogye di sɛ eyi ne nea Onyankopɔn pɛ. Bere a Saulo reka su a onyae ho asɛm no, ɔkae sɛ: “Mmɔden fam, metaa asafo no, mmara mu trenee fam, wɔannya me ho asɛm.” “Metaa Onyankopɔn asafo mema ɛtraa so, na mesɛee wɔn, na mekɔɔ so Yudafo som mu mesen m’atipɛnfo pii m’abusua mu, na mebɔɔ m’agyanom atetesɛm ho mmɔden bebree mema ɛtraa so.”—Filipifo 3:6; Galatifo 1:13, 14.

Ɔtaa Mu Kannifo

Stefano wu akyi no, na Saulo nyɛ obi a ɔka wɔn a wɔde ɔtaa ba ho kɛkɛ, na mmom, na ɔyɛ emu kannifo ankasa. Ne saa nti, ɛbɛyɛ sɛ ogyee dimmɔne bi wom, efisɛ ɔsakrae akyi mpo no, bere a ɔpɛe sɛ ɔde ne ho kɔbɔ asuafo no ho no, ‘ná wɔn nyinaa suro no, efisɛ wɔannye anni sɛ ɔyɛ osuani.’ Bere a ɛbɛdaa adi pefee sɛ ɔyɛ Kristoni ankasa no, ne sakra no bɛyɛɛ anigyesɛm wɔ asuafo no mu, na wɔde ho aseda mae sɛ wɔtee sɛ ɛnyɛ sɛ kan sɔretiafo bi na wasakra kɛkɛ, na mmom sɛ ‘ɔbarima a anka kan ɔtaa yɛn no, afei de, ɔka gyidi a kan ɔsɛee no no ho asɛmpa.’—Asomafo no Nnwuma 9:26; Galatifo 1:23, 24.

Damasko ne Yerusalem ntam kwan bɛyɛ kilomita 220—nnanson anaa nnawɔtwe nantekwan. Nanso, Saulo a na ‘ɔda so home ateɛteɛ ne okum home gu asuafo no so no,’ kɔɔ ɔsɔfo panyin no nkyɛn kɔsrɛɛ ne nkyɛn nhoma a ɔde bɛkɔ Damasko hyia adan mu. Dɛn ntia? Na sɛ Saulo hu obi a ɔnam ‘Kwan No’ so a, wakyekyere no de no akɔ Yerusalem. Bere a atumfoɔ no maa no kwan no, ‘ofii ase de ɔhaw baa asafo no so hyɛnhyɛn afie mu kɔtwee mmarima ne mmea ma wɔde wɔn koguu afiase.’ ‘Ɔhwee afoforo wɔ hyia adan mu,’ na ‘ɔbɔɔ ntonto’ (nea ɛkyerɛ ankasa ne “ntonto bo”) penee wɔn kum so.—Asomafo no Nnwuma 8:3; 9:1, 2, 14; 22:5, 19; 26:10, NW ase hɔ asɛm.

Ɛdefa sukuu a Saulo kɔe wɔ Gamaliel akwankyerɛ ase ne tumi a na ɔwɔ saa bere no ho no, nhomanimfo bi susuw sɛ na ɔyɛ Mmarasuani kɛkɛ na onyaa nkɔso nkakrankakra koduu sɛ onyaa tumi wɔ Yudasom mu. Sɛ nhwɛso no, obiako kae sɛ ebetumi aba sɛ Saulo bɛyɛɛ ɔkyerɛkyerɛfo wɔ Yerusalem hyiadan mu. Nanso, nea Saulo ‘ntonto a ɔbɔe’ no kyerɛ—sɛ́ na ɔyɛ asɛnni baguafo no muni anaasɛ ɔyɛ obi a ɔfoaa Kristofo no kum so—de yentumi nkyerɛ. *

Esiane sɛ mfiase no na Kristofo nyinaa yɛ Yudafo anaa wɔn a wɔasakra abɛyɛ Yudafo  nti, ɛda adi sɛ na Saulo bu Kristofo sɛ wɔyɛ Yudasom mu awaefo kuw, na ɔfaa no sɛ ɛyɛ Yudasom mu mpanyimfo asɛyɛde sɛ wɔteɛ emufo so. Nhomanimfo Arland J. Hultgren ka sɛ: “Sɛ Paulo ɔtaafo no hui sɛ Kristosom yɛ ɔsom foforo koraa a emfi Yudasom mu a anka ɔrensɔre ntia wɔn. Ɔne afoforo buu Kristofo kuw no sɛ ɛwɔ Yudafo tumi ase.” Enti na n’adwene ne sɛ ɔbɛfa akwan biara so ahyɛ Yudafo asoɔdenfo no ma wɔasan wɔn akyi aba wɔn som dedaw mu. (Asomafo no Nnwuma 26:11) Ɔkwan biako a na obetumi afa so ne sɛ ɔde wɔn begu afiase. Na foforo ne hwe a ɔbɛhwe wɔn wɔ hyia adan mu, nteɛso a na asɛnnibea biara a atemmufo baasa wom tumi de ma, asotwe a na wɔtaa de ma obi a ɔyɛ asoɔden tia rabifo tumidi no.

Nokwarem no, Yesu ho adi a oyi kyerɛɛ Saulo wɔ Damasko kwan so no ma ogyaee eyi nyinaa. Saulo a na ɔyɛ Kristosom tamfo denneennen no bɛyɛɛ ɛho sɛnkafo a ɔyɛ nsi mpofirim, na ankyɛ koraa na Yudafo a wɔwɔ Damasko no hwehwɛɛ ne wu. (Asomafo no Nnwuma 9:1-23) Nea ɛyɛ nwonwa no, bere a Saulo bɛyɛɛ Kristoni no, na ɔno nso behu nneɛma a n’ankasa de yɛɛ afoforo sɛ ɔtaafo no ho amane, enti mfe bi akyi no otumi kae sɛ: “Yudafo nsam madi mmaa aduanan a ɛka so biako mpɛn anum.”—2 Korintofo 11:24.

Mmɔdenbɔ Betumi Ayɛ Nea Ɛmfata

Saulo kyerɛwee wɔ n’adwensakra no akyi bere a na wɔfrɛ no Paulo no sɛ: ‘Kan na meyɛ mmusubɔfo ne ɔtaafo ne onuɔdenfo, nanso wɔahu me mmɔbɔ, efisɛ minnim na meyɛe, ogye a mannye manni mu.’ (1 Timoteo 1:13) Enti, koma pa a obi wɔ ne mmɔden a ɔbɔ wɔ ne som ho nkutoo ntumi mma onnya Onyankopɔn anim dom. Ná Saulo yɛ mmɔdenbɔfo, na ɔyɛɛ n’ade sɛnea n’ahonim kyerɛ no, nanso ɛno amma wanyɛ nea ɛteɛ. Na ne mmɔdenbɔ a emu yɛ den no yɛ nea ɛmfata. (Fa toto Romafo 10:2, 3 ho.) Ɛsɛ sɛ ɛno ma yesusuw nneɛma ho.

Ɛnnɛ, nnipa pii gye di koraa sɛ nea Onyankopɔn hwehwɛ fi wɔn hɔ ara ne abrabɔ pa. Nanso saa na ɛte? Ɛyɛ papa sɛ yɛn mu biara tie Paulo afotu yi: “Monsɔ ade nyinaa nhwɛ, na munso nea eye no mu.” (1 Tesalonikafo 5:21) Ɛno kyerɛ sɛ ɛsɛ sɛ yegye bere de nya Onyankopɔn Asɛm a ɛyɛ nokware no mu nokware nimdeɛ, na afei yɛma yɛn asetra ne no hyia kosi ase. Sɛ Bible nhwehwɛmu ma yehu sɛ ɛsɛ sɛ yɛyɛ nsakrae bi a, ɛnde, ɛsɛ sɛ yɛyɛ no ntɛm ara ɔkwan biara so. Ebia na yɛn mu kakraa bi pɛ na na wɔyɛ abususɛnkafo, ataafo, anaa anuɔdenfo te sɛ Saulo. Nanso, ɛdenam Onyankopɔn mu gyidi ne nokware nimdeɛ nkutoo so na yebetumi anya Onyankopɔn anim dom te sɛ ɔno.—Yohane 17:3, 17.

[Ase hɔ asɛm]