So Ɛsɛ sɛ Wunya Nneɛma Ho Adwene Kɔ Akyiri?

ASASEWOSOW kɛse bi sii wɔ Kobe Kurow a ɛwɔ Japan atɔe fam no mu, na adwumayɛfo a wɔatu wɔn ho ama yɛɛ ntɛm bɛboaa mpɔtam hɔfo a wɔn ho akam no. Nanso, nnuruyɛfo kuw bi a wɔkɔɔ hɔ no hui sɛ obi a ɔwɔ kurow no Akwahosan Dwumadibea no akasa atia wɔn wɔ nnuru a wokobisae no ho. Ná saa ɔpanyin a ɔsan yɛ kurow kɛse bi mu ayaresabea kwankyerɛfo no, pɛ sɛ wɔn a wɔapirapira no kɔ Kobe ayaresabea mmom sen sɛ nnuruyɛfo no de mpaane ne nnuru a wɔde fa ntini mu a ne bo yɛ den bɛma wɔn wɔ mmeae a wɔde mmoa ma no. Bere bi akyi no, wɔpenee nnuruyɛfo no abisade no so, nanso fakaa a ɔpanyin no anyɛ ne ayamhyehye a na onni no maa nnipa pii kasa tiaa no.

Ebia obi a ɔwɔ tumi bi annye w’abisade bi  antom wɔ ɔkwan a ɛte saa ara so. Ebetumi aba mpo sɛ wo nso woayɛ saa pɛn. So adwene a ɛkɔ akyiri a wubenya no betumi aboa wo?

Hu Asɛm no Ani So Yiye

Nkurɔfo taa gyina ɔfa bi, anaa adwene pɔtee bi so wɔ nsɛm mu, ma enti wonhu asɛm no ani so yiye na wonwie asete. Mpɛn pii no, nea ɛma ɛba saa ne sɛnea onipa no nhomanim te, asetra mu osuahu a ɔwɔ, ne faako a ofi. Sɛ obi bɔ mmɔden sɛ obehu asɛm bi ani so yiye a, ɛma otumi si gyinae a nyansa wom. Sɛ nhwɛso no, sɛ wonam ɔkwan a adagyew nni so a nnipa redi akɔneaba na kanea a ɛkyerɛ kwan biara nni hɔ so a, so ɛbɛyɛ nea nyansa wom sɛ wobɛhwɛ w’anim tẽẽ? Dabida! Saa ara, na susuw a wubesusuw asɛm bi ho akɔ akyiri, ahu n’ani so yiye no bɛboa wo ma woasi gyinae a ɛfata na woayɛ ade wɔ ɔkwampa so. Ebetumi agye nkwa mpo.

Nokwarem no, yɛn nyinaa betumi anya nkɔanim wɔ saa kwan yi so. Enti bisa wo ho sɛ, ‘Mmeae ahorow bɛn na sɛ misusuw nneɛma ho kɔ akyiri a ɛbɛboa m’ankasa?’

Adwene a Wukura Wɔ Afoforo Ho

Sɛ wohwɛ afoforo a, dɛn na wuhu? So ɛyɛ a wubu nea wɔka anaa wɔyɛ no sɛ sɛ anyɛ tuntum a ɛbɛyɛ fitaa, te sɛ nea gyama kɔla biara nni hɔ bio? So asɛm bi a obi ka no yɛ nkamfo anaa atɛnnidi? So onipa no di bem ankasa anaa odi fɔ koraa? Adwene a ɛte saa a wubenya no bɛyɛ te sɛ mfoninitwafo bi a obu n’ani gu otwabere mu kɔla ahorow a ɛyɛ fɛ na ɛsonsonoe so, te sɛ nea mfonini ahorow a ɛwɔ hɔ no yɛ tuntum ne fitaa nkutoo. Anaa wobɔ mmɔden de w’adwene si obi mfomso so, te sɛ ɔkwantuni a ɔma nwura a ɔhɔho foforo a biribiara mfa ne ho totow gu beae bi a ɛhɔ yɛ fɛ sɛe n’anigye no?—Fa toto Ɔsɛnkafo 7:16 ho.

Sɛ yesusuw sɛnea Yehowa bu nnipa mfomso ho a ɛbɛma yɛatumi asua nneɛma pii. Bere a ohu onipa mmerɛwyɛ ne sintɔ ahorow pii no, ɔmfa n’adwene nsi so. Odwontofo a ɔwɔ anisɔ no kae sɛ: “Yah, sɛ wudi amumɔyɛ akyi a, [Yehowa, NW] hena na anka obegyina?” (Dwom 130:3) Yehowa ayi ne yam sɛ ɔbɛma abɔnefo a wɔanu wɔn ho ne wɔn mmarato ntam aware koraa, na ofi mmɔborohunu mu popa koraa, sɛnea ɛnsɛe yɛne ne ntam abusuabɔ no. (Dwom 51:1; 103:12) Na Yehowa betumi aka afa Ɔhene Dawid, a bere bi ɔne Bat-seba yɛɛ bɔne a anibere wom no ho sɛ, ɔyɛ ɔbarima a “ɔde ne koma nyinaa dii m’akyi sɛ ɔbɛyɛ nea ɛteɛ m’ani so no nko.” (1 Ahene 14:8) Dɛn nti na Onyankopɔn tumi kaa eyi faa Dawid ho? Efisɛ ɔde n’adwene sii Dawid a na wanu ne ho no su pa ahorow so. Osusuw adanse biara a ɔwɔ ho, na onyaa ɔpɛ sɛ ɔbɛkɔ so ada mmɔborohunu adi akyerɛ n’akoa.

Kristo Yesu daa saa kwan yi a wɔfa so susuw afoforo mfomso ho kɔ akyiri no adi wɔ ɔkwan a edi mu so. (Yohane 5:19) Bere a ohuu n’asomafo no sintɔ no, Yesu daa mmɔborohunu ne ntease adi. Ohui wɔ nnipa a wɔtɔ sin ho sɛ bere mpo a wɔn ‘honhom pɛ no, honam no yɛ mmerɛw.’ (Mateo 26:41) Bere a na eyi wɔ Yesu adwene mu no, na obetumi adi n’asuafo no mfomso ne wɔn mmerɛwyɛ ahorow no ho dwuma wɔ ntoboaseɛ ne ntease mu. Wamfa n’adwene ansi wɔn sintɔ ahorow so, na mmom, wɔn nneyɛe pa so.

Bere bi a Yesu teɛɛ asomafo no adwene wɔ akyinnye a wogyei sɛ wɔn mu hena na wobebu no kɛse ho no, ɔde kaa ho sɛ: “Na mone wɔn a wɔda so ka me ho me sɔhwɛ mu. Na me nso sɛnea m’agya ayi ahenni ama me no, saa ara na meyi mama mo, na moadidi na moanom me pon so wɔ m’ahenni mu, na moatra nhengua so abu Israel mmusuakuw dumien no atɛn.” (Luka 22:24-30) Yiw, ɛmfa ho asomafo no sintɔ ahorow pii no, Yesu kaee wɔn nokwaredi ne ɔdɔ a na wɔwɔ ma no no. (Mmebusɛm 17:17) Yesu nyaa ahotoso sɛ wɔbɛyɛ nea wobetumi nyinaa, enti ɔne wɔn yɛɛ Ahenni apam. Yiw, ‘Yesu dɔɔ n’asuafo no kosii ase.’—Yohane 13:1.

Enti sɛ obi mpofirim nneyɛe ne ne mfomso  bi hyɛ wo abufuw a, suasua Yehowa ne Yesu. Susuw nneɛma ho kɔ akyiri, na bɔ mmɔden sɛ wubesusuw adanse ahorow nyinaa ho. Sɛ wususuw nneɛma ho wɔ ɔkwampa so a, ɛma ɛyɛ mmrɛ sɛ wobɛdɔ wo nuanom na woakyerɛ wɔn ho anisɔ.

Wɔ Honam Fam Adekyɛ Mu

Hokwan a Kristofo wɔ sɛ wɔkyɛ ade no yɛ ade biako a ɛma wonya anigye. Nanso so ɛsɛ sɛ yɛma yɛn adekyɛ no gyina dwumadi biako pɛ so, sɛ nhwɛso no, denam yɛn ho a yɛde bɛhyɛ asɛnka adwuma no mu nkutoo so? (Mateo 24:14; 28:19, 20) Anaasɛ wubetumi atrɛw wo nsusuwii mu de w’adwene asi afoforo honam fam ahiade ne wɔn yiyedi so? Nokwarem no, Kristofo nyinaa gye tom sɛ honhom mu ɔma so wɔ mfaso kɛse sen biribiara. (Yohane 6:26, 27; Asomafo no Nnwuma 1:8) Nanso, ɛmfa ho sɛnea honhom mu ɔma ho hia sen biara no, ɛnsɛ sɛ yebu yɛn ani gu honam fam ɔma so.—Yakobo 2:15, 16.

Sɛ yesusuw yɛn honhom fam anuanom a wɔwɔ yɛn ankasa asafo mu ne wiase nyinaa  no ahiade a egye ntɛmpɛ no ho a, yebetumi ahu nea yebetumi ayɛ de aboa wɔn no nyinaa yiye. Sɛ wɔn a wɔn tebea bɛma wɔatumi afi ayamye mu akyɛ afoforo ade no yɛ saa a, ɛma biribiara kɔ so pɛpɛɛpɛ. Wɔ saa kwan yi so no yedi yɛn nuanom nyinaa ahiade ho dwuma. Kristoni panyin bi kaa no wɔ saa kwan yi so sɛ: “Sɛ mmoa ho behia wɔ wiase fã bi a, anuanom fi wiase no fã foforo kɔboa wɔn. Sɛ wɔantumi ammoa a, ɛnde anuanom a wɔwɔ baabi foforo bedi ho dwuma. Enti yedi yɛn nuanom a wɔwɔ wiase nyinaa ahiade ho dwuma. Wiase nyinaa nuayɛkuw no yɛ nwonwa ankasa.”—2 Korintofo 8:13-15; 1 Petro 2:17.

Kristoni bea bi a na ofi koma nyinaa mu pɛ sɛ ɔkɔ amanaman ntam nhyiam bi a wɔyɛe wɔ Europa Apuei fam no antumi ankɔ. Nanso, ɔtee sɛ anuanom a wɔwɔ hɔ no hia Bible denneennen, na ɔde saa Bible no ho ntoboa menaa obi a ɔkɔe. Enti onyaa ɔma mu anigye, sɛ ɔne ne nuanom a wɔwɔ amannɔne kyɛɛ nea ɔwɔ no.—Asomafo no Nnwuma 20:35.

Ebia wonam nneɛma ho a wubesusuw akɔ akyiri so betumi ayi ntoboa kɛse de aboa wiase nyinaa Bible nkyerɛkyerɛ dwumadi a ɛrenya nkɔanim bere nyinaa no, na ɛde anigye abrɛ wo ne afoforo.—Deuteronomium 15:7; Mmebusɛm 11:24; Filipifo 4:14-19.

Bere a Wode Afotu Rema

Sɛ wɔfrɛ yɛn sɛ yɛmfa afotu anaa nteɛso mma a, kari a yɛbɛkari pɛ na yɛanya tema no bɛma yɛn nuanom akyerɛ obu ama yɛn na yɛatumi de mmoa a ɛfata ankasa ama. Ɛnyɛ den sɛ yɛbɛma nokwasɛm ketewaa bi a ɛwɔ asɛm bi mu agye yɛn adwene, na yɛapere yɛn ho agyina ɔfã biako so abua asɛm no. Eyi bɛma afoforo abu yɛn sɛ yɛn adwene mu nnɔ anaasɛ yennim nyansa, te sɛ Yesu bere so nyamesom akannifo a, wɔnam mmara pii so bɔɔ mmɔden sɛ wɔde nnesoa duruduru begu afoforo so no. (Mateo 23:2-4) Nea ɛne eyi bɔ abira no, sɛ yɛkwati sɛ yɛbɛyɛ katee, na yɛde afotu pa a egyina Kyerɛwnsɛm mu nnyinasosɛm ahorow so ma, de suasua Yehowa trenee na afei yɛkari pɛ na yefi mmɔborohunu mu susuw nneɛma ho a, ɛbɛyɛ mmerɛw ama afoforo sɛ wobegye yɛn afotu atom na wɔde yɛn nyansahyɛ adi dwuma.

Mfe bi a atwam no, anuanom mmerante bi a wofi asafo ahorow mu kaa wɔn ho boom kodii agoru. Awerɛhosɛm ne sɛ, akansi honhom baa wɔn mu, ma ekowiee akasakasa a emu yɛ den mu. Asafo mu mpanyimfo a wɔwɔ hɔ no dii asɛm no ho dwuma dɛn? Bere a wohuu hia a ɛho hia sɛ mmerante di agoru no, wɔanhyɛ wɔ amonom hɔ ara sɛ wonnyae agodie koraa. (Efesofo 5:17; 1 Timoteo 4:8) Mmom no, wɔde kɔkɔbɔ a anibere wom na emu da hɔ mae wɔ nea akansi honhom betumi akɔfa aba no ho. Wɔde nyansahyɛ a mfaso wɔ so nso mae, te sɛ mpanyimfo a wɔn ani afi a wɔbɛma wɔaka wɔn ho. Mmerante no huu nyansa a ɛwɔ afotu no so ne kari a ɛkari pɛ no na wɔde yɛɛ adwuma. Bio nso, obu ne anisɔ a wɔwɔ ma mpanyimfo no yɛɛ kɛse.

Bɔ Mmɔden Susuw Nneɛma Ho Kɔ Akyiri

Bere a ebia entumi mma sɛ wubenya afoforo ho adwemmɔne a enni nnyinaso anaasɛ wunnim no, nneɛma ho a wubesusuw akɔ akyiri gye mmɔdenbɔ. Sɛ wusua Onyankopɔn Asɛm no a, dwennwen ho na ama woatumi ahu sɛnea Yehowa susuw ade ho na woakyerɛ ho anisɔ. (Dwom 139:17) Bɔ mmɔden sɛ wobɛte Bible mu nsɛm ne emu nnyinasosɛm ahorow no ase, na bɔ mmɔden pɛɛpɛɛ nsɛm mu sɛnea Yehowa yɛ no. Eyi ne Dawid mpaebɔ yi hyia sɛ: “[Yehowa, NW], kyerɛkyerɛ me w’akwan, na fa me fa w’atempɔn so. Ma mennantew wo nokware mu, na kyerɛkyerɛ me.”—Dwom 25:4, 5.

Sɛ wunya ntease a emu dɔ a, wubenya nhyira. Nhyira biako a ɛwɔ nneɛma ho a wosusuw kɔ akyiri so ne sɛ wubenya din pa sɛ obi a wokari pɛ na wowɔ ntease. Sɛ wode mmoa rema wɔ tebea ahorow mu a, wobɛyɛ saa wɔ ntease pii mu. Eyi nso bɛma biakoyɛ a emu yɛ den atra Kristofo nuayɛkuw no mu.

[Kratafa 12 mfonini ahorow]

Ayamye mu a wofi boa afoforo no de anigye brɛ ɔmafo no, na ɛsɔ yɛn soro Agya no ani