Asetram Nsɛm

Yɛn Bɔfo No A Yɛkae No Fi Yɛn Mmeranteberem

SƐNEA DAVID Z. HIBSHMAN KA KYERƐE

“Sɛ m’asetra reba n’awiei a, mewɔ anidaso ankasa sɛ madi nokware ama Yehowa. Mesrɛ no sɛ ɔnhwɛ David so mma me. Yehowa, meda wo ase sɛ wode no maa me, na yɛwaree. Ɛyɛ nwonwa, ɛyɛ anigye!”

SUSUW sɛnea metee nka bere a misiee me yere wɔ March 1992 mu, a mihuu asɛm a etwa to yi wɔ nhoma bi a na ɔkyerɛkyerɛw nsɛm gu mu daa no mu no ho hwɛ. Na yɛadi Helen afe a ɛtɔ so 60 wɔ bere nyinaa som adwuma no mu ma adi asram anum pɛ.

Mekae da a na Helen te me nkyɛn wɔ ɔmantam nhyiam a wɔyɛɛ no 1931 wɔ Columbus, Ohio, U.S.A. ase no yiye. Na Helen nnya nnii mfe 14, nanso n’ani gyee saa nhyiam no ho sen me mpo. Anigye a na Helen wɔ ma ɔsom adwuma no bɛdaa adi ntɛm bere a ɔne ne maame kunafo bɛyɛɛ akwampaefo, sɛnea Yehowa Adansefo frɛ bere nyinaa asɛmpakafo no. Wogyaw wɔn fie fɛfɛ no hɔ kɔkaa asɛmpa no wɔ United States anafo fam nkuraase.

Me Kristofo Apɛgyade

M’awofo ne wɔn mma nketewa baanu no tu fii Pennsylvania apuei fam kɔɔ Grove City atɔe fam wɔ 1910 mu. Wotuaa ofie bi a na ne bo nni soro pii ka wɔ hɔ na wɔbɛyɛɛ Reformed Asɔre no mufo a wɔbɔ mmɔden. Ɛno akyi bere tiaa bi no, William Evans a na ɔyɛ Bible Suani, sɛnea na wɔfrɛ Yehowa Adansefo saa bere no, bɛsraa wɔn. Saa bere no Paapa a na wadi bɛyɛ mfe 25 a na wanyin sen Maame mfe anum no tiee wɔn adamfo Walesni yi, na ɔtoo nsa frɛɛ no maa obedidii. Ankyɛ na wobegyee Bible mu nokware a wɔresua no toom.

Sɛnea ɛbɛyɛ na wabɛn asafo no, Paapa de abusua no tu kɔɔ Sharon kurow a na ɛwɔ bɛyɛ kilomita 40 no mu. Asram bi akyi no, wɔbɔɔ Maame  ne Paapa asu wɔ bɛyɛ 1911 anaa 1912 mu. Ɔwɛn Aban Asafo no titrani a odi kan, Charles Taze Russell, na ɔmaa asubɔ kasa no. Wɔwoo me December 4, 1916, bere a na m’awofo wɔ mmofra anan dedaw no. Bere a wɔwoo me no, wɔde too gua sɛ: wɔawo “Onua dɔfo foforo.” Ɛno nti na wɔde din, David a asekyerɛ ne “Dɔfo” no, too me.

Wɔde me kɔɔ ɔmantam nhyiam ase nea edi kan bere a na manya adapɛn anan. Saa bere no, na me papa ne me nuanom mmarima mpanyimfo twa akwansin pii kɔ asafo nhyiam, na Maame de me ne me nuabea afa kar. Na wɔyɛ nhyiam dwumadi no anɔpa ne awia. Nkɔmmɔ a na yɛtaa bɔ wɔ fie no fa Ɔwɛn-Aban ne The Golden Age, sɛnea na wɔfrɛ Nyan!, no ho.

Mfaso a Yenya Fi Wɔn Nhwɛso Pa no Mu

Ɔsom ho akwantufo, sɛnea na wɔfrɛ ahwɛfo akwantufo saa bere no, bɛsraa yɛn asafo no. Na wɔtaa di da koro anaa nnanu wɔ yɛn nkyɛn. Ɔkasafo biako a mekae no paa ne Walter J. Thorn, a ɔkaee ne Bɔfo Kɛse no ‘wɔ ne mmeranteberem.’ (Ɔsɛnkafo 12:1) Bere a na meyɛ abofra no, na midi Paapa akyi ma okoyi “Photo-Drama of Creation” sini a ɛwɔ afã anan a ɛka adesamma abakɔsɛm ho asɛm no kyerɛ.

Ɛwom sɛ na Onua Evans ne ne yere Miriam nni mma de, nanso wɔbɛyɛɛ honhom mu awofo ne nananom maa yɛn abusua no. Bere nyinaa na William frɛ Paapa sɛ “Me ba” na ɔne Miraim duaa asɛmpaka honhom no wɔ yɛn abusua no mu. Wɔ afeha a ɛtɔ so 20 mfiase mu no, Onua Evans san kɔɔ Wales kɔdaa Bible mu nokware no adi wɔ Swansea mpɔtam hɔ. Na ɛhɔfo frɛ no ɔsɛmpakafo a ofi America.

Wɔ 1928 mu no, Onua Evans gyaee n’adwuma, na ɔkɔkaa asɛmpa no wɔ Virginia Atɔe fam nkoko no so. Me nuanom mmarima mpanyimfo baanu, Clarence a na wadi mfe 21 ne Carl a na wadi mfe 19 kaa ne ho kɔe. Yɛn a yɛyɛ mmarimaa baanan no nyinaa de mfe pii yɛɛ bere nyinaa som adwuma no. Nokwarem no, yɛn nyinaa somee sɛ Yehowa Adansefo ahwɛfo akwantufo wɔ yɛn mmeranteberem. Ɛnkyɛe pii na yɛn Maame nuabea ketewa Mary, a seesei ɔwɔ ne mfe 90 mu no kyerɛw me krataa sɛ: “Hwɛ anigye ara a yɛn nyinaa nyae sɛ Onua Evans de nsi yɛɛ ɔsom adwuma no na ɔbaa Grove City!” Ante Mary nso yɛ obi a ɔkaee ne Bɔfo wɔ ne mmofraberem.

Yɛkɔ Ɔmantam Nhyiam Ahorow

Paapa ne Clarence nkutoo na wotumi kɔɔ ɔmantam nhyiam a agye din a wɔyɛɛ no Cedar Point Ohio no bi wɔ 1922 mu. Nanso eduu 1924 no, na yɛanya kar, enti yɛn abusua no nyinaa kɔɔ ɔmantam nhyiam a wɔyɛɛ no Columbus, Ohio no bi. Ná wɔhwɛ kwan sɛ yɛn a yɛyɛ mmofra no de sika a yɛasie no bɛtɔ yɛn ankasa aduan wɔ nnawɔtwe a wɔde yɛɛ ɔmantam nhyiam no nyinaa mu. Na m’awofo nsusuwii ne sɛ ɛsɛ sɛ abusua no mufo nyinaa sua sɛnea wɔbɛhwɛ wɔn ho. Ɛno nti yɛyɛn nkokɔ ne nnanko ne nwowa, na na yɛn a yɛyɛ mmarimaa no nyinaa tɔn atesɛm nkrataa.

Bere dui sɛ wɔbɛyɛ Toronto, Canada, ɔmantam nhyiam no wɔ 1927 mu no, na yɛwɔ onuabarima kumaa a wadi asram asia, a wɔfrɛ no, Paul. Wɔmaa me traa fie hwɛɛ Paul bere a na me sewaa boa me, na m’awofo ne mmofra a aka no kɔɔ Toronto. Wotuaa me ka dɔla du, na mede tɔɔ atade foforo. Wɔkyerɛkyerɛɛ yɛn sɛnea yebesiesie yɛn ho yiye bere nyinaa ama nhyiam no na  yɛahwɛ yɛn ntade nso so yiye.

Eduu bere a wɔyɛɛ Columbus, Ohio ɔmantam nhyiam wɔ 1931 mu no, na Clarence ne Carl aware a wɔne wɔn yerenom reyɛ akwampae adwuma. Na wɔn mu biara te ofie a esi kar so mu. Na Carl aware Claire Houston a ofi Wheeling, West Virginia, enti na metra bɛn Claire nuabea ketewa Helen, wɔ Columbus ɔmantam nhyiam ase no.

Bere Nyinaa Som Adwuma

Miwiee ntoaso sukuu wɔ 1932 mu, bere a na madi mfe 15, na afe a edi hɔ no, mede kar dedaw kɔmaa me nua Clarence a na ɔreyɛ akwampae adwuma wɔ South Carolina no. Mede me din kɔe sɛ mɛyɛ akwampae adwuma, na mifii ase ne Clarence ne ne yere boom yɛɛ adwuma. Bere a edi kan a mekyerɛw Helen no, na ɔyɛ ɔkwampaefo wɔ Hopkinsville, Kentucky. Wɔ ne krataa a ɔkyerɛw de yii me de ano mu no, obisae sɛ: “Woyɛ ɔkwampaefo anaa?”

Wɔ me krataa no mu no—Helen de me krataa no sie kosii bɛyɛ mfe 60 akyi ansa na ɔrewu—memaa no mmuae sɛ “Meyɛ bi na mewɔ awerɛhyem sɛ ebia mɛkɔ so ayɛ no bere nyinaa.” Wɔ saa krataa no mu no, mekaa sɛnea mede nhomawa The Kingdom, the Hope of the World akɔma asɔfo ne aban mpanyimfo wɔ m’asɛnka dwumadi no mu ho asɛm kyerɛɛ Helen.

Wɔ 1933 mu no Paapa yɛɛ ntamadan a esi lɔre so—a na ne tenten yɛ anammɔn awotwe, na ne kɛse yɛ anammɔn asia ne fã a wɔde ntama a emu yɛ duru agye ho na ɛwɔ mfɛnsere wɔ anim ne akyi. Na ɛno ne me dan a emu dwo a mɛtra mu wɔ mfe anan a edi m’anim wɔ akwampae adwuma no mu.

Wɔ March 1934 mu no, Clarence ne Carl, wɔn yerenom, Helen ne ne maame, Clarence yere nuabea, ne me—yɛn baawɔtwe—nyinaa kɔɔ atɔe fam ɔmantam nhyiam a wɔyɛɛ no Los Angeles, California no bi. Ebinom traa me fie a esi kar so no mu daa mu. Bere a afoforo kogyee ahɔhodan tuaa ho ka no, medaa kar no mu. Esiane sɛ yɛn kar no sɛee nti, nnansia ɔmantam nhyiam no da a ɛto so abien mu na yeduu Los Angeles. Afei de, me ne Helen tumi de nsu mu asubɔ yɛɛ yɛn ahosohyira ma Yehowa no ho sɛnkyerɛnne wɔ March 26.

Nea na ɔyɛ Ɔwɛn Aban Asafo no titrani saa bere no, Joseph F. Rutherford hyiaa akwampaefo no nyinaa wɔ nhyiam no ase. Ɔhyɛɛ yɛn nkuran kaa sɛ yɛyɛ Bible nokware no ho akofo akokodurufo. Wɔyɛɛ nsiesie saa bere no boaa akwampaefo wɔ sika fam na ama wɔakɔ so ayɛ wɔn som adwuma no.

Ɔkyerɛkyerɛ a Ɛma Nkwa

Bere a yefi Los Angeles ɔmantam nhyiam bae no, yɛn nyinaa de yɛn ho hyɛɛ Ahenni asɛnka no mu wɔ South Carolina, Virginia, West Virginia, ne Kentucky amantam no nyinaa mu. Mfe bi akyi no, Helen kyerɛw saa bere no ho asɛm sɛ: “Ná yenni asafo anaa nnamfo biara a yɛde yɛn ho bɛbɔ wɔn, efisɛ na yɛyɛ ahɔho koraa wɔ asase a yennim so so. Nanso mprempren mabehu sɛ na meresua ade. Na mereyɛ ɔdefo.”

Obisae sɛ: “Dɛn na abeawa bɛyɛ ne ho bere a ofi ne nnamfo ne n’awofo nkyɛn no? Wiɛ, na ɛnhaw adwene pii de. Menkae sɛ ɛhɔ fonoo me da. Na mekenkan ade pii. Yɛannyae yɛn Bible ho nhoma akenkan ne adesua da. Mebɛnee me maame, na misuaa sɛnea mɛhwɛ yɛn sika so, adi gua, asesa kɔba a adwo, anoa aduan, apam ade, ne sɛnea mɛkɔ asɛnka. Mannu me ho da, na sɛ merenya kwan a, anka mede anigye bɛyɛ ne nyinaa bio.”

 Ɛwom sɛ na Helen maame wɔ ofie a ɛyɛ fɛ de, nanso wɔpenee so traa dan ketewa a esi lɔre so no mu saa mfe no mu. Wɔyɛɛ Columbus, Ohio, ɔmantam nhyiam no wiei wɔ 1937 mu akyi no, Helen maame bɛyaree, na wogyee no too ayaresabea. Owui wɔ ne dwumadi a wɔde maa no wɔ Philippi, West Virginia, mu wɔ November 1937 mu.

Aware ne Ɔsom Adwuma no a Mekɔ so Yɛ

Me ne Helen hyiaa ayeforo korokorowa bi wɔ June 10, 1938 mu, wɔ ofie a wɔwoo no mu wɔ Elm Grove, a ɛbɛn Wheeling, West Virginia no mu. Yɛn Nua dɔfo Evans, a ɔkaa nokware no ho asɛm kyerɛɛ m’abusua mfe pii akyi ansa na wɔrewo me no, na ɔmaa ayeforohyia kasa no. Wɔ yɛn ayeforohyia akyi no, me ne Helen yɛɛ nhyehyɛe sɛ yɛbɛsan ayɛ akwampae adwuma no wɔ Kentucky apuei fam, nanso wɔtoo nsa frɛɛ yɛn maa yɛkɔyɛɛ dantaban adwuma ma yɛn ho dwiriw yɛn. Na saa adwuma yi hwehwɛ sɛ yɛkɔsrasra Yehowa Adansefo akuw a ɛwowɔ Kentucky atɔe fam ne Tennessee mmeae bi, na yɛboa wɔn wɔ wɔn som adwuma no mu. Saa bere no, na Ahenni adawurubɔfo bɛyɛ 75 pɛ na wɔwɔ mmeae a yɛkɔe no nyinaa.

Saa bere no na ɔmampɛ adi nnipa no pii ti, na na mehwɛ kwan sɛ ɛrenkyɛ wɔde me bɛto afiase esiane ɔfã biara a na minni sɛ Kristoni no nti. (Yesaia 2:4) Nanso esiane sɛ na nkurɔfo nim sɛ meyɛ asɛnka adwuma no nti, minyaa krataa fii baguafo a wɔpaw asraafo no nkyɛn, na ɛmaa minyaa kwan a mede bɛkɔ so ayɛ bere nyinaa som adwuma no.

Bere a yefii akwantu adwuma no ase a na yennyinii no, na ɛkame ayɛ sɛ obiara ani gye yɛn ho. Kristoni bea bi yɛɛ Helen atuu kɛse bi wɔ Hopkinsville, Kentucky, na obisae sɛ: “Wokae me?” Na Helen adi no adanse wɔ akuraase sotɔɔ bi a na ne kunu yɛ no mu wɔ 1933 mu. Na ɔkyerɛkyerɛ wɔ Mmofra asɔre, nanso bere a ɔkenkanee nhoma a Helen de maa no akyi no, ogyinaa mmofra no anim paa wɔn kyɛw sɛ wɔmfa ne mfomso mfiri no sɛ wakyerɛkyerɛ wɔn nneɛma a enni Bible no mu. Ogyaee n’asɔre akyi no, ofii ase bɔɔ Bible mu nokware no ho dawuru wɔ ne mpɔtam. Me ne Helen somee wɔ Kentucky atɔe fam mfe abiɛsa, na na onuawa no ne ne kunu taa de wɔn fie ma yɛn.

Saa bere no na yɛyɛ ɔmansin nhyiam kakraa bi, na A. H. Macmillan somee wɔ eyi mu biako ase. Na watra Helen awofo fie pɛn bere a na Helen yɛ abofra, enti wɔ ɔmantam nhyiam no mu no, ɔpaw sɛ ɔne yɛn bɛtra yɛn fie a ne tenten yɛ mita 5, a yɛde tu kwan a na mpa biako si mu kwa no mu. Ɔno nso kaee ne Bɔfo Kɛse no wɔ ne mmeranteberem, efisɛ ohyiraa ne nkwa so maa Yehowa wɔ 1900 mu, bere a na wadi mfe 23.

Wɔ November 1941 mu no, wɔmaa anuanom ahwɛfo akwantufo no gyaee wɔn adwuma no kakra, ma enti wɔmaa me dwumadi wɔ Hazard, Kentucky, sɛ ɔkwampaefo. Yɛsan ne me nua Carl ne ne yere Claire yɛɛ adwuma bio. Helen nuabarima ba, Joseph Houston, bɛkaa yɛn ho wɔ akwampae adwuma no mu wɔ ha. Ɔkɔɔ so yɛɛ bere nyinaa som adwuma no bɛyɛ sɛ mfe 50, na koma yare bi kum no mpofirim wɔ1992 bere a na ɔde nokwaredi resom wɔ Yehowa Adansefo wiase nyinaa adwumayɛbea ti wɔ Brooklyn, New York no.

Wɔmaa yɛn dwumadi wɔ Rockville, Connecticut, wɔ 1943 mu. Sɛnea na ɛte no, na eyi yɛ wiase soronko bi koraa ma me ne Helen efisɛ na yɛtaa ka asɛmpa no wɔ anafo fam. Na Helen yɛ Bible adesua bɛboro 20 dapɛn biara wɔ Rockville. Bere bi akyi no, yegyee dan korokorowa bi yɛɛ Ahenni Asa, na ɛma yɛtoo asafo ketewa bi fapem.

Bere a na yɛresom wɔ Rockville no, wɔtoo nsa frɛɛ yɛn sɛ yɛmmra Ɔwɛn Aban Bible Gilead Sukuu no adesua kuw a ɛtɔ so anum no bi wɔ South Lansing, New York. Anigyesɛm ne sɛ, yebehui sɛ na Aubrey ne Bertha Bivens, yɛn nnamfo akwampaefo a na yɛne wɔn wɔ Kentucky no bɛyɛ yɛn adesua kuw no mufo.

Sukuu no ne Yɛn Dwumadi Foforo

Ɛwom sɛ na yennyinyinii pii de, nanso na yɛn adesua kuw no mufo binom nso susua koraa. Yiw, na wɔrekae wɔn Bɔfo Kɛse no wɔ wɔn  mmeranteberem. Na yɛn adesua awiei no yɛ July 1945, aka kakraa bi ama Wiase Ko II aba n’awiei no. Bere a yɛretwɛn yɛn asɛmpatrɛw dwumadi a wɔde bɛma yɛn no, yɛne Flatbush Asafo no yɛɛ adwuma wɔ Brooklyn, New York. Awiei koraa no, wɔ October 21, 1946 mu no, me ne adesua kuw no mufo baasia a na Bivens ne ne yere ka ho, de wimhyɛn baa yɛn fie foforo, Guatemela City, a ɛwɔ Guatemela no mu. Saa bere no, na Yehowa Adansefo a wɔwɔ Central America man no nyinaa mu dodow nnuru 50.

Wɔ April 1949 mu no, yɛn asɛmpatrɛwfo no mu kakraa bi tu kɔɔ Quetzaltenango, kuropɔn kɛse a ɛtɔ so abien a edi mũ wɔ ɔman no mu. Saa kuropɔn yi wɔ soro sen po mita 2,300, na bepɔw no so mframa mu tutuw no mu tew yiye. Helen bɔ yɛn dwumadi no mua na ɔkyerɛw sɛ: “Ɛyɛ hokwan a yenyae sɛ yɛkaa asɛmpa no wɔ nkurow ne nkuraa pii ase. Na yɛsɔre bɛyɛ sɛ anɔpa nnɔnnan kɔfa bɔs (a esiane sɛ na enni mfɛnsere nti, na wɔtaa bue akyi no to hɔ) kɔ kurow bi a ne kwan ware mu. Sɛ yedu hɔ a, na yɛde nnɔnhwerew bɛyɛ sɛ awotwe ka asɛmpa no ansa na yɛasan aba anwummere.” Ɛnnɛ, asafo pii wɔ saa mmeae yi, a Quetzaltenango de asia no ka ho.

Ankyɛ na ɛho behiae sɛ asɛmpatrɛwfo kɔsom wɔ Puerto Barrios a ɛwɔ Caribbean Mpoano, kuropɔn kɛse a ɛtɔ so abiɛsa wɔ Guatemala no. Yɛn ayɔnkofo a yɛdɔ wɔn, Bivens abusua a yɛne wɔn somee mfe anum wɔ Guatemala no ka wɔn a wonyaa dwumadi foforo yi ho. Na ntetewmu no yɛ yaw yiye na ɛkaa yɛn asetra. Esiane sɛ na aka me ne Helen nkutoo nti, yefii asɛmpatrɛwfo fie hɔ kɔtraa ɔdan ketewa bi mu. Wɔ 1955 mu no, me ne Helen gyee dwumadi foforo kɔɔ Mazatenango kuropɔn mu, beae a osu tɔ na awia bɔ kɛse wɔ hɔ no. Ná me nua barima kumaa Paul ne ne yere Dolores, a wowiee wɔn Gilead adesua wɔ 1953 mu no asom wɔ hɔ bere tiaa bi ansa na yɛrekɔ hɔ.

Ebeduu 1958 mu no, na yɛwɔ Adansefo bɛboro 700, asafo horow 20, ne amansin abiɛsa wɔ Guatemala. Me ne Helen san nyaa akwantu adwuma no mu kyɛfa bio, srasraa Adansefo kuw nketewa ne asafo horow pii, a biako a na ɛwɔ Quetzaltenango no ka ho. Wɔtoo nsa frɛɛ yɛn wɔ August 1959 ma yɛsan baa Guatemala City, bɛtraa baa dwumadibea. Wɔmaa meyɛɛ adwuma wɔ baa dwumadibea hɔ, na Helen toaa asɛmpatrɛw adwuma no so mfe 16 foforo bio. Afei ɔno nso bɛyɛɛ adwuma wɔ baa dwumadibea hɔ.

Nhyira Afoforo

Mfe bi a atwam no, na ɛte sɛ nea me na misua koraa wɔ wɔn a wɔsom Yehowa no mu. Mprempren me na ɛyɛ a meyɛ panyin sen obiara, sɛnea na ɛte bere a mekɔɔ baa boayikuw mufo sukuu wɔ Patterson, New York, wɔ 1996 mu no. Sɛnea minyaa mmoa pii fii mpanyimfo hɔ wɔ me mmofraase no, ɛyɛ hokwan a manya sɛ meboa mmofra nkumaa pii a wɔpɛ sɛ wɔkae wɔn Bɔfo wɔ wɔn mmeranteberem nnansa yi.

Yehowa kɔ so hyira ne nkurɔfo a wɔwɔ Guatemala no. Wɔ 1999 mu no, na asafo a wɔboro 60 na ɛwɔ Guatemala City. Na sɛ wohwɛ apuei ne atɔe, anafo ne atifi a, wuhu asafo ahorow ne adawurubɔfo ɔpepem pii a wɔka Onyankopɔn Ahenni ho asɛmpa. Ahenni adawurubɔfo a na wɔn dodow nnuru 50 bere a yeduu hɔ wɔ bɛyɛ mfe 53 ni no akɔ anim boro 19,000!

Yɛwɔ Nneɛma Pii a Ɛsɛ sɛ Yɛkyerɛ Ho Anisɔ

Obiara nni hɔ a onhyia nsɛnnennen wɔ n’abrabɔ mu, nanso yebetumi ‘adan yɛn adesoa ato Yehowa so’ bere nyinaa. (Dwom 55:22) Mpɛn pii no ɔnam mmoa a yɛn ayɔnkofo de ma yɛn so wowaw yɛn. Sɛ nhwɛso no, mfe kakraa bi ansa na Helen rewu no, ɔde Bible mu nsɛm a  ɛwɔ Hebrifo 6:10 a wɔakyerɛw ato ahwehwɛ mu brɛɛ me: “Onyankopɔn nyɛ nea ɔnteɛ a ne werɛ befi mo adwuma ne mo dɔ mmɔden a mobɔe ne din ho, sɛ mosom ahotefo na moda so ara som wɔn.”

Nea na ɛka ne krataa no fã bi ho no kenkan sɛ: “Wo a wosom bo ma me, minni hwee a mede bɛma wo sɛ ME DƆ NYINAA . . . Saa kyerɛwsɛm yi fata wo, na mepɛ sɛ wode si wo pon so, a ɛnyɛ sɛ mede ama wo no nti, na mmom sɛ wode mfe pii na ayɛ ɔsom adwuma no.” Ɛde besi nnɛ, esi me pon so wɔ Guatemala baa dwumadibea hɔ.

Masom Yehowa fi me mmofraase, na seesei a me mfe akɔ anim yi meda Yehowa ase sɛ mewɔ akwahosan pa a mede yɛ me nnwuma a wɔde ahyɛ me nsa no. Sɛ mereyɛ me Bible akenkan a, metaa hyia kyerɛwsɛm a megye di sɛ anka me dɔfo Helen betwa ase wɔ ne Bible mu. Eyi too me bere a mesan kenkan Dwom 48:14 no, ɛse: “Saa Onyankopɔn yi yɛ yɛn Nyankopɔn daa daa, ɔbɛyɛ yɛn kwankyerɛfo de akosi wu mu.”

M’ani gye sɛ meka owusɔre anidaso, bere a nnipa a wofi aman nyinaa mu bɛma wɔn adɔfo akwaaba afi awufo mu wɔ wiase foforo no mu no ho asɛm kyerɛ afoforo. Hwɛ anidaso kɛse a eyi yɛ! Hwɛ anigye araa a yɛde bɛte nusu bere a yɛkae sɛ Yehowa yɛ Onyankopɔn a “ɔkyekye ahobrɛasefo werɛ” no!—2 Korintofo 7:6.

[Mfonini wɔ kratafa 25]

Efi atifi benkum so kɔ nifa: Maame, Paapa, Ante Eva ne onua Carl ne Clarence, 1910

[Mfonini ahorow wɔ kratafa 26]

Me ne Helen wɔ 1947 mu ne no wɔ 1992 mu