Yehia Yehowa Ahyehyɛde No

SO WOATE pɛn sɛ obi reka sɛ, “migye Nyankopɔn di nanso minnye nyamesom ahyehyɛde biara nni”? Ankorankoro binom a na anka wɔyɛ asɔrekɔfo a wɔbɔ mmɔden ada adwene horow a ɛte saa adi nanso wɔn aba mu abu esiane sɛ wɔn som ntumi nni wɔn honhom fam ahiade ahorow ho dwuma nti. Ɛwom sɛ nyamesom ahyehyɛde dodow no ara adi wɔn huammɔ de, nanso pii da so ara ka sɛ wɔpɛ sɛ wɔsom Onyankopɔn. Wogye di sɛ, ɛyɛ papa sɛ wɔbɛsom no wɔ wɔn ankasa kwan so mmom sen sɛ wɔde wɔn ho bɛbɔ asɔre anaa ahyehyɛde foforo bi.

Dɛn na Bible no ka? So Onyankopɔn pɛ sɛ Kristofo bom sɛ ahyehyɛde?

Kristofo a Wodii Kan no Nyaa Ahyehyɛde So Mfaso

Wɔ Pentekoste 33 Y.B. mu no, Yehowa amfa ne honhom kronkron no angu agyidifo kakraa bi a na wɔahwete no so, na mmom ohwie guu mmarima ne mmea a “na wɔn nyinaa ahyia faako,” wɔ abansoro dan bi mu wɔ Yerusalem, no so. (Asomafo no Nnwuma 2:1) Saa bere no na wɔhyehyɛɛ Kristofo asafo, a ɛbɛyɛɛ amanaman ntam ahyehyɛde no. Eyi bɛyɛɛ nhyira ankasa maa saa asuafo a wodi kan no. Dɛn ntia? Ade biako ne sɛ na wɔama wɔn dwumadi titiriw bi—sɛ wɔnka Onyankopɔn Ahenni no ho asɛmpa ‘wɔ asase nyinaa so.’ (Mateo 24:14) Wɔ asafo no mu no, na wɔn a wɔasakra foforo no betumi asua sɛnea wɔbɛyɛ asɛnka adwuma no afi mfɛfo gyidifo a wɔn ho akokwaw no nkyɛn.

Ankyɛ, Ahenni ho asɛmpa no trɛw Yerusalem koduu mmaa nyinaa. Wɔ afe 62 ne 64 Y.B. ntam no, ɔsomafo Petro kyerɛw ne krataa a edi kan ‘kɔmaa Kristofo a na wɔahwete kɔ Ponto, Galatia, Kapadokia, Asia, ne Bitinia,’ a ne nyinaa yɛ nnɛyi Turkey no. (1 Petro 1:1) Na gyidifo no bi nso wɔ Palestine, Lebanon, Syria, Cyprus, Greece, Crete, ne Italy. Sɛnea Paulo kyerɛw kɔmaa Kolosefo wɔ 60-61 Y.B. mu no, na ‘wɔaka asɛmpa no wɔ wiase abɔde nyinaa mu.’—Kolosefo 1:23.

Ahyehyɛde so mfaso a ɛtɔ so abien ne sɛ, na ɛbɛma Kristofo ahyehyɛ wɔn ho wɔn ho nkuran. Bere a wɔbom sɛ asafo no, na Kristofo betumi atie ɔkasa a ɛka koma, asua Kyerɛw Kronkron no, anya osuahu ahorow a ɛhyɛ gyidi den na wɔne mfɛfo gyidifo abom abɔ mpae. (1 Korintofo, ti 14) Na mmarima a wɔn ho akokwaw ‘ahwɛ Onyankopɔn nguankuw no.’—1 Petro 5:2.

Sɛ asafo no mufo no, na Kristofo tumi hu wɔn  ho wɔn ho na wonya ɔdɔ ma wɔn ho wɔn ho. Sɛ anka wɔne asafo no fekubɔ bɛyɛ adesoa ama wɔn no, ɛhyɛɛ Kristofo a wodii kan no den ma wogyinaa pintinn.—Asomafo no Nnwuma 2:42; 14:27; 1 Korintofo 14:26; Kolosefo 4:15, 16.

Ade biako a enti na wohia wiase nyinaa asafo a wɔaka abom, anaa ahyehyɛde no, ne sɛ na ɛbɛma wɔayɛ biako. Kristofo suaa sɛ ‘wɔbɛyɛ nokoro.’ (1 Korintofo 1:10) Ná eyi ho hia kɛse. Nnipa a na ɛsono wɔn mu biara nhomasua ne n’asetra kwan na na ɛwɔ asafo no mu. Ná wɔka kasa horow, na ɛda adi sɛ na ɛsono wɔn mu biara suban. (Asomafo no Nnwuma 2:1-11) Ɛnyɛ bere nyinaa na na adwempa a wokurakura no hyia. Nanso wɔboaa Kristofo ma wosiesiee wɔn ntam akasakasa wɔ asafo no mu.—Asomafo no Nnwuma 15:1, 2; Filipifo 4:2, 3.

Ná wɔde nsɛmmisa a wɔn asafo mu mpanyimfo ntumi nni ho dwuma no kɔma ahwɛfo akwantufo a wɔn ho akokwaw, te sɛ Paulo. Ná wɔde ɔsom ho nsɛm a ɛho hia kɔdan sodikuw a na ɛwɔ Yerusalem no. Mfitiase no, Yesu Kristo asuafo no na na wɔyɛ sodikuw no mufo, nanso akyiri yi wɔtrɛw mu maa mmarima mpanyimfo a na wɔwɔ Yerusalem asafo no mu bɛkaa ho. Na asafo biara gye tumi a Onyankopɔn de ama sodikuw no ne n’ananmusifo a wɔda ɔsom adwuma no ano, ne mmarima a wɔde wɔn asisi ɔsom no ano sisi gyinae ahorow wɔ nsɛm ho no tom. Sɛ sodikuw no si gyinae wɔ asɛm bi ho a, na asafo ‘no ani gye wɔn nkuranhyɛ no ho.’—Asomafo no Nnwuma 15:1, 2, 28, 30, 31.

Yiw, Yehowa de ahyehyɛde dii dwuma wɔ afeha a edi kan no mu. Na ɛnnɛ nso ɛ?

Yehia Ahyehyɛde Nnɛ

Ɛnnɛ, te sɛ wɔn ayɔnkofo a na wɔwɔ afeha a edi kan no mu no, Yehowa Adansefo bu wɔn ahyɛde a ɛne sɛ wɔnka Ahenni no ho asɛmpa no aniberesɛm. Ɔkwan biako a wɔfa so yɛ adwuma yi ne sɛ wɔkyekyɛ Bible, ne nhoma a wɔde sua Bible, na eyi hia sɛ wonya ahyehyɛde.

Ɛsɛ sɛ wɔyɛ Kristofo nhoma ahorow yiye, hwɛ hu sɛ ɛyɛ pɛpɛɛpɛ, na wotintim de kɔma asafo ahorow no. Ɛsɛ sɛ ankorankoro Kristofo nso tu wɔn ho ma de nhoma no kɔma wɔn a wɔpɛ sɛ wɔkenkan. Wɔ saa kwan yi so no, Ahenni no ho asɛm adu nnipa ɔpepem pii nkyɛn. Asɛmpa no ho adawurubɔfo bɔ mmɔden sɛ wɔbɛyɛ wɔn adwuma pɛpɛɛpɛ, na wɔhwɛ hu sɛ wɔnyɛ asasesin bi mu adwuma ntra so bere a foforo nso da hɔ kwa. Eyinom nyinaa hia ahyehyɛde.

Esiane sɛ “Onyankopɔn nhwɛ onipa anim” nti, ɛsɛ sɛ wɔkyerɛ Bible ne Bible ho nhoma ase. (Asomafo no Nnwuma 10:34) Mprempren, nsɛmma nhoma yi wɔ kasa 132 mu, na wotintim nea ɛka ho, Nyan!, no wɔ kasa 83 mu. Ɛno hia nsɛm asekyerɛfo akuw a wɔahyehyɛ wɔn yiye wɔ wiase nyinaa.

Asafo no mufo nya nkuranhyɛ denam Kristofo nhyiam nketewa ne akɛse a wɔkɔ so. Wonya kwan tie Bible mu ɔkasa ahorow a ɛhyɛ nkuran, sua Kyerɛwnsɛm no bom, nya osuahu ahorow a ɛma denhyɛ, na wɔne wɔn mfɛfo asomfo bom bɔ mpae. Ahwɛfo akwantufo a wɔwɔ ɔdɔ srasra wɔn hyɛ wɔn gyidi den te sɛ wɔn nuanom a na wɔwɔ afeha a edi kan no mu no. Ɛno nti, ɛnnɛ Kristofo bom sɛ “kuw biako, ɔhwɛfo biako.”—Yohane 10:16.

Ɛwom, Yehowa Adansefo nyɛ pɛ, te sɛ wɔn ayɔnkofo a na wɔwɔ hɔ tete no. Nanso, wɔde biakoyɛ bom yɛ adwuma. Ne saa nti, wɔreyɛ Ahenni asɛmpaka adwuma no wɔ wiase nyinaa.—Asomafo no Nnwuma 15:36-40; Efesofo 4:13.

[Mfonini wɔ kratafa 31]

Ɛnnɛ Kristofo bom sɛ “kuw biako, ɔhwɛfo biako”