Yɛyɛ Nnipa A Wɔwɔ Gyidi

Awerɛkyekyesɛm a Wɔka Kyerɛ Wɔ Italy

YEHOWA yɛ “awerɛkyekye nyinaa Nyankopɔn.” Sɛ n’asomfo suasua no a, ‘wotumi kyekye wɔn a wɔwɔ ahohia biara mu werɛ.’ (2 Korintofo 1:3, 4; Efesofo 5:1) Eyi ka botae ahorow a enti Yehowa Adansefo ka asɛm no ho.

Ɔbea Bi a Ɔwɔ Ahohia Mu a Wɔboa No

Mfe kakra a abɛsen kɔ mu titiriw no, ohia, ɔko, ne asetra pa a wɔhwehwɛ ama nnipa pii atu akɔtra aman a wodi yiye pii mu. Nanso ɔman foforo mu asetra nyɛ mmerɛw. Ná Manjola ne ne mfɛfo Albaniafo te Borgomanero. Esiane sɛ na ɔte Italy a onni tumi krataa nti, wampɛ sɛ ɔne Wanda a ɔyɛ Yehowa Adansefo mu biako no bɛkasa. Nanso, awiei koraa no, Wanda ne Manjola yɛɛ adesua ho nhyehyɛe, na ɔkyerɛɛ Onyankopɔn Asɛm sua ho anigye kɛse ntɛm, ɛmfa ho sɛ kasa no a na ɔnte no maa adesua no yɛɛ den no. Nanso, bere a Wanda kɔsraa no mpɛn kakraa bi akyi no, wanto no fie bio. Asɛm bɛn na na asi? Wanda behui sɛ ofie hɔfo biako—Manjola mpena—a na wakodi awu ma wɔrehwehwɛ no akyere no nti, na wɔn nyinaa aguan!

Asram anan akyi no, Wanda hyiaa Manjola bio. Wanda ka sɛ: “Na wafɔn ayɛ hoyaa, na ne tebea te sɛ obi a ɔwɔ ahokyere mu ankasa.” Manjola kyerɛkyerɛɛ mu sɛ nea kan no na ɔyɛ ne mpena no da afiase, na ne nnamfonom a ɔde n’ani too wɔn so no nso adi no huammɔ yayaaya. Ɔde ahoyeraw bɔɔ Onyankopɔn mpae hwehwɛɛ mmoa. Afei ɔkaee Wanda a na waka Bible mu asɛm akyerɛ no no. Hwɛ sɛnea Manjola ani gyei sɛ ohuu no bio!

Wofii Bible adesua ase bio, na ankyɛ na Manjola fii ase kɔɔ Kristofo nhyiam ahorow. Otumi nyaa tumi krataa a ɔde bɛtra Italy. Afe biako akyi no, Manjola bɛyɛɛ Ɔdansefo a wabɔ asu. Esiane Onyankopɔn bɔhyɛ ahorow mu awerɛkyekye a wanya nti, wasan kɔ Albania rekɔka Bible mu awerɛkyekyesɛm no akyerɛ ne nkurɔfo.

Atubrafo Atrae Bi Adansedi

Italy asafo ahorow pii ayɛ nhyehyɛe a ɛbɛma wɔadi atubrafo a wɔte sɛ Manjola adanse. Sɛ nhwɛso no, asafo bi a ɛwɔ Florence yɛɛ nhyehyɛe kɔsraa atubrafo atrae bi daa. Na atrae hɔfo—a  wɔn mu pii fi Europa Apuei fam, Macedonia, ne Kosovo—no wɔ ahokyere pii mu. Na ebinom nom nnubɔne anaa mmosa. Na wɔn mu pii bɔ korɔn nketenkete de hwɛ wɔn ho.

Borɔn yi so asɛnka yɛ den. Nanso, bere bi akyi no, bere nyinaa ɔsɛmpakafo bi a ne din de Paola kasa kyerɛɛ Jaklina, Macedoniani bea bi. Bere a ɔne Jaklina bɔɔ nkɔmmɔ kakraa bi no, ɔhyɛɛ n’adamfo Susanna nkuran sɛ ɔnhwehwɛ Bible no mu. Susanna nso ne n’abusuafo foforo kasae. Ankyɛ, na abusuafo no mu baanum resua Bible no daa, kɔ Kristofo nhyiam ahorow, de nea wɔresua no di dwuma. Ɛmfa ho ɔhaw a na wɔrehyia no, wonyaa Yehowa ne N’asɛm mu awerɛkyekye.

Ɔbea Kokorani Bi Nya Yehowa Mu Awerɛkyekye

Wɔ kurow Formia mu no, bere nyinaa ɔsɛmpakafo bi a ne din de Assunta ne ɔbea bi a na ontumi nnantew papa kasae. Na ɔbea no yɛ kokorani a ɔwɔ nyamesom kuw bi a wɔboa ayarefo wɔ ayaresabea ne afie mu.

Assunta ka kyerɛɛ ɔbea kokorani no sɛ: “Sɛ wo nso worehu amane? Ɛyɛ awerɛhow sɛ yɛn nyinaa wɔ ɔhaw ahorow.” Ɔkaa saa no, ɔbea kokorani no fii ase sui, na ɔkyerɛkyerɛɛ mu sɛ yare haw no ankasa. Assunta hyɛɛ no nkuran sɛ, Bible no Nyankopɔn betumi akyekye ne werɛ. Ɔbea kokorani no gyee nsɛmma nhoma a ɛka Bible mu nsɛm a Assunta de maa no no.

Wɔ wɔn nkɔmmɔbɔ a edii hɔ mu no, ɔbea kokorani no a ne din de Palmira no, gye toom sɛ ɔrehu amane yiye. Na watra ahyehyɛde bi a mmea kokorafo na wɔhwɛ so mu bere tenten. Bere a esiane yare nti ofii hɔ bere tiaa bi no, wɔamma no amma hɔ bio. Nanso, esiane ntam a na Palmira aka nti na ɔte nka sɛ ɔne Onyankopɔn wɔ abusuabɔ. Ɔkɔhwehwɛɛ “ayaresa” fii ayaresafo hɔ, nanso na osuahu a onyae no ama no ayɛ basaa. Palmira penee so sɛ obesua Bible no, na ɔkɔɔ Kristofo nhyiam ahorow afe biako. Afei otu kɔtraa baabi foforo, na Adansefo no anhu no. Mfirihyia abien twaam ansa na Assunta rehu no bio. Palmira hyiaa ɔsɔretia kɛse fii n’abusuafo ne asɔfo no hɔ. Nanso, ofii ne Bible adesua no ase bio, nyaa honhom fam nkɔso, na ɔbɔɔ asu sɛ Yehowa Adansefo no mu biako.

Yiw, “awerɛkyekye Nyankopɔn” no asɛm ahyɛ nnipa pii nkuran. (Romafo 15:4, 5) Enti, Yehowa Adansefo a wɔwɔ Italy no asi wɔn bo sɛ wɔbɛkɔ so asuasua Onyankopɔn denam n’asɛm a ɛma awerɛkyekye a wɔbɛka akyerɛ afoforo no so.