Onyankopɔn Nkɔmhyɛ Asɛm Ma Yenya Daakye Ho Anidaso

ESIANE Onyankopɔn Asɛm, Kyerɛw Kronkron Bible no nti, nokware Kristofo de gyidi, anidaso, ne adwempa na ɛhwɛ daakye kwan. Esiane sɛ wɔne Yehowa Nyankopɔn wɔ abusuabɔ pa nti, wɔhwɛ daakye kwan. Sɛnea “Onyankopɔn Nkɔmhyɛ Asɛm” Ɔmantam Nhyiam ahorow no kasa a edi kan no kyerɛkyerɛɛ mu no, Yehowa Adansefo de anidahɔ asua Bible nkɔmhyɛ ho ade mfirihyia pii. Enti, dɛn na na Yehowa wɔ ma ne nkurɔfo wɔ saa nhyiam ahorow yi ase? Esiane sɛ na atiefo no kurakura wɔn Bible nti, na wɔn nyinaa de anigye hwɛ kwan. Wɔmaa nhyiam no da biara asɛmti ketewaa soronko.

DA A EDI KAN: Nantew Wɔ Onyankopɔn Asɛm Mu Hann Mu

Ɔkasa a n’asɛmti ne “Onyankopɔn Asɛm Akyerɛ Yɛn Kwan” no kyerɛkyerɛɛ mu sɛ, Yehowa nkurɔfo te sɛ ɔbarima bi a ofi akwantu bi ase anadwo. Bere a anim ntetewee no, onhu nneɛma yiye, nanso bere a edu owigyinae no ohu ade yiye. Sɛnea wɔka siei wɔ Mmebusɛm 4:18 no, ɔkwan mu abɛda hɔ pefee ama Yehowa nkurɔfo wɔ Onyankopɔn nkɔmhyɛ asɛm mu nokware a ɛhyerɛn sɛ owia no mu. Wonnyaw wɔn wɔ honhom fam sum mu sɛ wommubu mfa so.

Nhyiam asɛmti ho ɔkasa a n’asɛmti ne “Tie Onyankopɔn Nkɔmhyɛ Asɛm No,” kaee atiefo no sɛ wɔn a wɔde wɔn ho to Yehowa so no kwati abasamtu a nkurɔfo a wodi atoro mesia ne atoro adiyifo akyi hyia no. Nea ɛne no bɔ abira no, nneɛma a ɛkyerɛ sɛ Yesu Kristo ne nokware Mesia no dɔɔso pii! Sɛ nhwɛso no, Yesu anwonwakwan so ahosakra no maa wohuu n’anuonyam sɛ Onyankopɔn Ahenni so Hene a wɔde no asi agua so no nsusuwso. Efi bere a Yesu baa N’ahenni tumi mu wɔ afe 1914 no, ɔno ankasa nso ne “adekyee nsoromma” a wɔaka ne ho asɛm wɔ 2 Petro 1:19 no. Ɔkasafo no kae sɛ: “Sɛ́ Mesia Adekyee Nsoromma no, ɔno na ɔde ɛda anaa bere foforo, a ɛreba ma adesamma asoɔmmerɛfo nyinaa no ho amanneɛbɔ ma.”

 Bere a awia dwumadi no fii ase no, ɔkasa a n’asɛmti ne “Wɔhyerɛn sɛ Akanea” no kyerɛkyerɛɛ Efesofo 5:8, baabi a ɔsomafo Paulo tu yɛn fo sɛ ‘yɛnnantew sɛ hann mma’ no mu kɔɔ akyiri. Kristofo yɛ akanea, wɔnka Onyankopɔn Asɛm nkyerɛ afoforo kɛkɛ, na mmom wɔde Bible no di dwuma wɔ wɔn asetram nso de suasua Yesu.

Sɛ yebetumi ayɛ sɛ kanea yi a, ɛsɛ sɛ ‘Yɛkyerɛ Onyankopɔn Asɛm Akenkan Ho Anigye.’ Wɔkyekyɛɛ ɔkasa yi mu abiɛsa. Bere a ɔkasafo a odi kan no faa Abraham Lincoln a ɔfrɛɛ Bible no “akyɛde a eye sen biara a Onyankopɔn de ama nnipa” no asɛm kae no, obisaa atiefo no asɛm faa anisɔ a wɔnam Yehowa Asɛm no akenkan so anya ho. Ɔhyɛɛ atiefo no nkuran sɛ wɔnkenkan Bible no yiye, na wonnye bere mfa nyɛ Kyerɛwnsɛm mu nsɛm ho mfonini wɔ wɔn adwenem, na wɔmfa nneɛma foforo a wosua no ntoto nea wonim dedaw ho.

Ɔkasa a wɔakyekyem no fã a edi hɔ no sii so dua sɛ sɛ yɛbɛte “aduan a ɛyɛ den no” ase a, ehia sɛ yesua ade, ɛnyɛ sɛ yɛbɛkenkan ade kɛkɛ. (Hebrifo 5:13, 14) Ɔkasafo no kae sɛ, sɛ yedi kan ‘siesie yɛn koma’ sɛnea Israel sɔfo Esra yɛe no a, adesua tumi hyɛ yɛn den yiye. (Esra 7:10) Nanso, dɛn nti na adesua ho hia saa? Efisɛ ɛka yɛne Yehowa ntam abusuabɔ tẽẽ. Enti, ɛmfa ho sɛ ehia sɛ yɛteɛ yɛn ho so na yɛbɔ yɛn ho mmɔden no, ɛsɛ sɛ yɛma Bible adesua som bo, ɛyɛ anigye, na ɛma yenya abotɔyam. Yɛyɛ dɛn nya bere de yɛ adesua sɛnea ɛfata? Ɔkasa a wɔakyekyem no kasafo a otwa to no kae sɛ, ɛdenam ‘bere a yɛbɛtɔ’ afi nneɛma a ɛho nhia ahe biara yɛ mu so. (Efesofo 5:16) Yiw, ade a ɛbɛma yɛanya bere ne sɛ yɛde bere a yɛwɔ bedi dwuma yiye.

Ɔkasa a n’asɛmti ne “Onyankopɔn Ma Nea Wabrɛ Tumi” no daa no adi sɛ nnipa pii abrɛ nnɛ. Enti sɛ yebetumi anya “tumi a ɛboro so” de ayɛ Kristofo som adwuma no a, ehia sɛ yɛde yɛn ho to Yehowa a “ɔma nea wabrɛ otumi” no so. (2 Korintofo 4:7; Yesaia 40:29) Nneɛma a ɛhyɛ den no bi ne Onyankopɔn Asɛm, mpaebɔ, Kristofo asafo no, ɔsom adwuma a yɛde yɛn ho bɛhyɛ mu daa, Kristofo ahwɛfo, ne nokwaredi ho nhwɛso a afoforo ayɛ no. Asɛmti a ɛne “Bere no Nti Ɛsɛ sɛ Moyɛ Akyerɛkyerɛfo” no sii hia a ɛho hia sɛ Kristofo yɛ akyerɛkyerɛfo ne asɛmpakafo, na wɔyere wɔn ho hu ‘ɔkyerɛ pa’ no so dua.—2 Timoteo 4:2.

Ɛda no kasa a etwa to a n’asɛmti ne “Wɔn a Wɔko Tia Onyankopɔn no Bedi Nkogu” no kaa mmɔden a nkurɔfo a wɔwɔ adwemmɔne abɔ nnansa yi wɔ nsase bi so sɛ wɔbɛma afoforo abu Yehowa Adansefo sɛ kuw a wɔn ho yɛ hu no ho asɛm. Nanso, ɛnsɛ sɛ yesuro, efisɛ Yesaia 54:17 ka sɛ: “Akode biara a wɔbɔ hyɛ wo renyɛ yiye, na tɛkrɛma biara a ɛbɛsɔre ne wo ayi ntɛn no, wobebu no fɔ; ɛno ne [Yehowa, NW] nkoa agyapade ne wɔn trenee a efi me no, [Yehowa, NW] asɛm ni.”

DA A ƐTO SO ABIEN: Nneɛma a Wɔnam Kyerɛwnsɛm Mu Nkɔmhyɛ so Ada no Adi

Bere a wosusuw ɛda no Bible mu asɛm ho wiei no, nhyiamfo no tiee ɔkasa a wɔakyekyem  a ɛto so abien a n’asɛmti ne “Yehowa a Yɛhyɛ No Anuonyam sɛ Hann Kurafo” no. Ɔkasa a edi kan no daa no adi sɛ Kristoni botae ne sɛ ɔbɛhyɛ Yehowa anuonyam denam asɛm no a ɔbɛka no baabiara so. Ɔfã a edi hɔ no kaa hia a ehia sɛ yɛkyerɛ anigyefo kwan ba Onyankopɔn ahyehyɛde no mu ho asɛm. Ɔkwan bɛn so? Denam simma anum anaa du a yɛde bɛkyerɛkyerɛ sɛnea Onyankopɔn ahyehyɛde no di dwuma mu wɔ ofie Bible adesua biara akyi no so. Ɔkasa a wɔakyekyem yi fã a ɛto so abiɛsa no sii hia a ehia sɛ yɛde nnwuma hyɛ Onyankopɔn anuonyam so dua.

Ɔkasa a ɛne “Dɔ Yehowa Nkaesɛm Yiye” no kaa Dwom 119 nkyekyem bi ho asɛm. Nokwasɛm ne sɛ, yehia nkaesɛm, efisɛ yɛn nyinaa werɛ taa fi ade. Ɛnde, hwɛ hia a ehia sɛ yɛdɔ Yehowa nkaesɛm, sɛnea odwontofo no yɛe no!

Afei ɔkasa titiriw—asubɔ kasa a n’asɛmti ne “Nkɔmhyɛ Asɛm no a Wotie Kowie Asubɔ Mu”—dii hɔ. Wɔkaee asubɔfo no sɛ ɛnyɛ asubɔ nko na wɔnam so suasua Kristo, na mmom n’anammɔn akyi pɛɛ a wobedi nso. (1 Petro 2:21) Hwɛ hokwan a saafo a wɔyɛ foforo yi anya sɛ wobenya Yohane 10:16, baabi a Yesu ka siei sɛ ɔbɛboaboa “nguan foforo” ano ma wɔne asuafo a wɔde honhom asra wɔn no asom no, mmamu mu kyɛfa no!

Ɔkasa a wɔde fii awia dwumadi no ase a n’asɛmti ne “Tie Nea Honhom No Ka” no kyerɛkyerɛɛ mu sɛ Yehowa honhom nam Bible, “akoa nokwafo ne ɔbadwemma no,” ne yɛn ahonim a wɔde Bible atete no no so kasa kyerɛ yɛn. (Mateo 24:45) Enti, enhia sɛ Kristofo te nne bi ankasa fi soro ansa na ama wɔahu sɛnea ɛsɛ sɛ wɔsɔ Onyankopɔn ani. Ɔkasa a edi hɔ, “Gyina Pintinn Ma Nkyerɛkyerɛ a Ɛne Onyamesom Pa Hyia,” no tuu Kristofo fo sɛ wɔnhwɛ wɔn ho yiye wɔ wiase yi nsusuwii a ɛsɛe adwene no ho. Nokwarem no, asɛmpɛ bebrebe betumi ama obi atie awaefo ne Satan adwumayɛfo nsɛm a epira no. Hwɛ sɛnea ɛyɛ papa sɛ yɛbɛkenkan Bible ne Ɔwɛn-Aban ne Nyan! mu nsɛm nyinaa.

Ɔkasa a edi hɔ a n’asɛmti ne “Kɔ So Kura Nsɛmpa no Mu” no sii hia a ehia sɛ yehu nokware a ɛwɔ Kyerɛwnsɛm no ‘nhwɛso,’ anaa nhwɛsode mu no so dua yiye. (2 Timoteo 1:13) Ɛnyɛ onyamesom pa nko na saa nhwɛso yi a yebekura mu no bɛma yɛanya, na mmom ɛbɛma yɛahu biribi a ɛne nokware no nhyia nso.

Hwɛ sɛ Yehowa bebu wo sɛ ade a ɔpɛ. Anuonyam bɛn ara ni! Na ɔkasa a ɛne “‘Ade a Wɔpɛ’ Rehyɛ Yehowa Fie Ma” a egyina Hagai nkɔmhyɛ no so no hyɛ nkuran yiye efisɛ ɛmaa atiefo no nyaa awerɛhyem sɛ “nnipakuw kɛse” no muni biara yɛ ade a Yehowa pɛ ankasa. (Adiyisɛm 7:9) Enti, Yehowa bɛbɔ wɔn ho ban wɔ ‘ɔwosow’ a etwa to a ɔrebɛwosow amanaman no wɔ “ahohiahia kɛse” a ɛreba no mu no ho. (Hagai 2:7, 21, 22; Mateo 24:21) Nanso, ansa na saa bere no bedu no, ɛsɛ sɛ Yehowa nkurɔfo wɛn wɔ honhom fam, sɛnea wɔkyerɛkyerɛɛ mu wɔ ɔfã a ɛne “Nkɔmhyɛ Asɛm Wɔ Awiei Bere no Mu” mu no. Ɔkasafo no faa Yesu nsɛm a ɛne: “Enti monwɛn, efisɛ munnim da ko a mo wura bɛba” no kaa asɛm. (Mateo 24:42) Yɛbɛyɛ dɛn ama yɛn ani akɔ so ada hɔ wɔ honhom fam? Denam yɛn ho a yɛde bɛhyɛ Yehowa som adwuma mu denneennen, akɔ so abɔ mpae, na yɛakɔ so ahwɛ Yehowa da no kwan daa, no so.

Da no kasa a etwa to no asɛmti ne “Nkɔmhyɛ Asɛm Wɔ Awiei Bere no Mu.” Yɛbɛkae mfe pii. Dɛn ntia? Efisɛ ɔkasafo no yii nhoma foforo a wɔato din—Tie Daniel Nkɔmhyɛ No!—adi. Ɔkasafo no kae sɛ: “Saa nhoma a emu mfonini yɛ fɛ a ekura nkratafa 320 yi ka Daniel nhoma no fã biara ho asɛm.” Adanse a ɛhyɛ gyidi den a ɛda adi sɛ Yehowa rema hann apue ne nkɔmhyɛ Asɛm so bɛn ara ni!

DA A ƐTO SO ABIƐSA: Onyankopɔn Nkɔmhyɛ Asɛm Nni Huammɔ Da

Ɔkasa a wɔakyekyem a na n’asɛmti ne “Nkɔmhyɛ Nsɛm Ma Bere a Wɔahyɛ No” na wɔde fii nhyiam da a etwa to no ase. Ɔkasa no afã abiɛsa no kyerɛkyerɛɛ Yehowa atemmusɛm abiɛsa a odiyifo Habakuk de too gua no mu. Na  nea edi kan no tia Yudafo asoɔdenfo, na nea ɛto so abien no tia Babilonfo a wɔyɛ nhyɛso no. Nea etwa to a ennyaa ne mmamu no fa nnipa abɔnefo nyinaa a wɔrebɛsɛe wɔn nnansa yi ara no ho. Onua a ɔrema ɔkasa a wɔakyekyem no fã a etwa to a ɛfa Harmagedon ho no de Onyankopɔn ho suro hyɛɛ n’atiefo no mu bere a ɔkae sɛ: “Nokwarem no, ɛbɛyɛ hu bere a Yehowa de ne tumi kɛse no di dwuma koraa no.”

Ná nhyiam no Bible drama a ɛka koma no asɛmti ne “Anisɔ a Yɛbɛkyerɛ Ama Yɛn Honhom Fam Agyapade.” Ɔyɛkyerɛ yi a ɛma obi hwehwɛ ne ho mu no de Yakob su wɔ honhom fam nneɛma ho totoo Esau de ho. Esau buu honhom fam agyapade animtiaa ma enti wɔde maa Yakob a ɔkyerɛɛ ho anigye no. Wobisaa nhyiamfo no sɛ: “[Honhom fam agyapade] bɛn na Yehowa de ama yɛn?” Ɔkasafo no buae sɛ: “N’asɛm Bible no mu nokwasɛm; daa nkwa ho anidaso; ne hokwan a nidi wom a ɔde ama yɛn sɛ yɛnyɛ n’ananmusifo sɛ asɛmpa no ho adawurubɔfo no.”

Ɔfã a na edi hɔ no asɛmti ne “Wubu Yɛn Agyapade a Ɛsom Bo no Dɛn?” Sɛ yɛde Yehowa som adwuma ne hokwan ahorow a yɛwɔ wɔ honhom fam no di yɛn ankasa anaa honam fam nneɛma kan a, ɛbɛma yɛada su pa adi wɔ yɛn honhom fam agyapade no ho. Saa kwan yi so no, yɛde yɛn asetra gyina yɛne Yehowa ntam abusuabɔ so, na ɛne Adam, Esau, ne Israelfo a wɔanni nokware no de bɔ abira koraa.

Baguam ɔkasa a n’asɛmti ne “Wɔyɛ Nneɛma Nyinaa Foforo—Sɛnea Wɔahyɛ No,” kaa nkɔmhyɛ atitiriw anan a ɛfa “ɔsoro foforo” ne “asase foforo” ho no bɔɔ mu kaa ho asɛm. (Yesaia 65:17-25; 66:22-24; 2 Petro 3:13; Adiyisɛm 21:1, 3-5) Ɛda adi pefee sɛ na Yehowa wɔ saa nkɔmhyɛ yi mmamu foforo ho adwene sen nea ɛbaa ne nkurɔfo a wɔsan baa wɔn asase so no so wɔ afe 537 A.Y.B. no. Yiw, na N’ahenni nniso (“ɔsoro foforo”) no ne asase sofo (“asase foforo”) no, a wɔbɛtra wiase nyinaa paradise a anigye wom no ho asɛm wɔ n’adwene mu.

Ɔkasa a ɛde nhyiam no baa awiei anigye ne ahosɛpɛw mu ne “Nea Yɛhwɛ Kwan Bere a Onyankopɔn Asɛm Kyerɛ Yɛn Kwan No.” Ɛkaee obiara sɛ ‘wɔatwa bere a aka’ ma wɔde awie Ahenni no ho dawurubɔ no ‘tiaa.’ (1 Korintofo 7:29) Yiw, yegyina bere a Yehowa atemmu a etia Satan ne ne nhyehyɛe bɔne no nyinaa bɛbam no aboboano pɛɛ. Ɛmmra sɛ yɛn nsusuwii bɛyɛ te sɛ odwontofo a ɔtoo dwom yi no de no: “Yɛn kra twɛn [Yehowa, NW], yɛn boafo ne yɛn kyɛm ne no.” (Dwom 33:20) Anidaso a ɛyɛ anigye a ɛwɔ hɔ ma wɔn a wɔn akwanhwɛ gyina Onyankopɔn nkɔmhyɛ asɛm so bɛn ara ni!

[Mfonini wɔ kratafa 7]

Drama a ɛhyɛ nkuran no maa wonyaa Yehowa asomfo honhom agyapade no ho anisɔ kɛse

[Mfonini wɔ kratafa 7]

Wɔbɔɔ nnipa pii a wotiee Onyankopɔn nkɔmhyɛ asɛm no asu