Wɔakyerɛkyerɛ Daniel Nhoma No mu!

NHYIAMFO no ani gyei sɛ wonyaa nhoma foforo a ekura nkratafa 320, Tie Daniel Nkɔmhyɛ No! a woyii no adi no bi. Wɔtee nka dɛn wɔ nhoma no ho? Susuw nea ebinom kae ho hwɛ.

“Te sɛ mmofra a wɔadu mpanyin afe so dodow no ara no, m’ani nnye tete abakɔsɛm sua ho. Enti bere a me nsa kaa me nhoma foforo, Tie Daniel Nkɔmhyɛ No!, na m’ani nnye sɛ mɛkenkan ankasa, nanso mesɔ hwɛe. Na hwɛ, sɛɛ na madi mfomso ankasa! Eyi yɛ nhoma a eye sen biara a makenkan pɛn no mu biako. Emu yɛ dɛ ankasa! Mente nka bio sɛ merekenkan nsɛm a esisii mfirihyia mpempem pii a atwam no koraa. Eyi ne bere a edi kan a mete nka sɛ metumi afa me ho sɛ meyɛ Daniel. Metumi ayɛ sɛnea wɔfa obi fi n’abusua mu de no kɔ amannɔne asase so, kɔsɔ ne gyidi hwɛ mpɛn pii no ho mfonini ankasa. Meda mo ase pii wɔ saa nhoma yi ho.”—Anya.

“Nea ɛboaa me kɛse paa ne nokwasɛm a ɛka sɛ Yehowa wɔ nsɛm a ɛba ne nkurɔfo so tumi koraa no. Ɛdenam Daniel anisoadehu ne ne dae ahorow ne nea afoforo soe a ɔkyerɛɛ ase so no, ɛda adi pefee sɛ, yɛn Nyankopɔn bɛma n’atirimpɔw abam ɔkwan biara so. Eyi hyɛ anidaso a yɛwɔ wɔ nkɔmhyɛ kwan so mfonini a ɛfa wiase foforo a ɔde reba a ɛho asɛm wɔ Bible mu no mu den.”—Chester.

“M’ani gyee ɔkwan a mokaa Daniel ho asɛm maa emu daa hɔ no ho. Sɛnea mokaa nneɛma a odwen ho ne nneɛma a ɛho hia no ho asɛm no ama mahu no yiye. Matumi ate nea enti a Yehowa ani gyee ne ho no ase yiye. Wɔ ne sɔhwɛ ne ɔtaa a ohyiae nyinaa mu no, na onnwen n’ankasa ho. Nea na odwen ho sen biara ne Yehowa ne Ne din a ɛho wɔ nyam no. Meda mo ase sɛ moasi saa nsɛm yi so dua.”—Joy.

“Eyi ne nea na yɛrehwɛ kwan! Wɔnnaa sɛnea Daniel nhoma no fa yɛn mu biara ho ankasa adi sɛ eyi da. Bere a mekenkan nhoma foforo no fã kɛse wiei da a me nsa kae anwummere no, migyae daa Yehowa ase wɔ mpaebɔ mu.”—Mark.

“Nea na yɛnhwɛ kwan ne sɛnea enyaa yɛn mma so tumi no. Wɔadi mfirihyia anum ne abiɛsa. . . . Bere a Daniel, Hanania, Misael, ne Asaria ho nsɛm a ɛwɔ Me Nhoma a Ɛka Bible Mu Nsɛm no mu ka nsɛm a wɔn ani gye ho sen biara ho bere nyinaa no, sɛnea wɔaka wɔn ho nsɛm wɔ Daniel Nkɔmhyɛ nhoma no mu no anya wɔn so tumi wɔ ɔkwan bi a na yɛnhwɛ kwan so. Ɛwom sɛ wonnyinii koraa mpo de, nanso ɛte sɛ nea wɔatumi asuasua saa mmerante atreneefo yi su no bi. Nnipa a wɔyɛ nhwɛso pa a yɛn mma betumi asuasua wɔn bɛn ara ni! Adwinnade a ɛyɛ nwonwa a mode ama yɛn bɛn ara ni! Yɛda mo ase, yɛda mo ase pii!”—Bethel.

“Metee nka te sɛ nea na me ne Hebrifo mmarimaa no gyina hɔ bere a na wɔrehyia wɔn gyidi ho sɔhwɛ no; na ɛno hyɛɛ me nkuran maa me hwehwɛɛ m’ankasa me gyidi mu. Ntĩmu adaka a wɔato din “Dɛn na Wuhui?” no ma ti ahorow no mu nsɛm du komam ankasa. Meda mo ase bio sɛ moasan ama yɛn nhoma foforo a edi mũ.”—Lydia.