Nkwatia a, Wɔwɔ Akokoduru

SƐ WO tenten yɛ sɛntimita 76 pɛ a, dɛn na wususuw sɛ Onyankopɔn Ahenni ho asɛm a wobɛka akyerɛ nnipa a wunnim wɔn no bɛyɛ? Laura betumi aka akyerɛ wo. Wadi mfirihyia 33, nanso ne tenten ne no, sɛntimita 76 pɛ. Ɔne ne nuabea, María, a ɔno nso adi mfirihyia 24 na ne tenten yɛ sɛntimita 86 no, te Quito, Ecuador. Ma wɔnka akwanside ahorow a wohyia wɔ wɔn Kristofo som adwuma mu no nkyerɛ wo.

“Nea ɛbɛyɛ na yɛadu yɛn asasesin a yɛyɛ mu asɛnka adwuma mu na yɛakɔ Kristofo nhyiam ahorow no, yɛnantew bɛyɛ kilomita fã ansa na yɛakɔforo bɔs. Sɛ yesi a, yɛnantew kilomita fã bio kɔforo bɔs a ɛto so abien. Awerɛhosɛm ne sɛ, nkraman anum bi a wɔn ho yɛ hu wɔ saa kwan yi so. Yesuro nkraman yiye efisɛ yɛn fam no, yehu wɔn akɛseakɛse te sɛ mpɔnkɔ. Sɛ ɛho hia sɛ yɛpam wɔn a, yɛfa abaa sie baabi ansa na yɛaforo bɔs no, sɛnea ɛbɛyɛ na sɛ yɛresan akɔ fie a, yebenya de adi dwuma.

“Bɔs foro yɛ den ankasa ma yɛn. Yegyina siw bi so wɔ bɔs gyinabea hɔ na ama ne foro ayɛ mmerɛw. Afirikafo no binom gyina siw no ho, nanso afoforo nyɛ saa. Sɛ ɛba saa a, nea ɔyɛ tenten no boa nea ɔyɛ tiatiaa paa no. Yetwa kwantempɔn bi a adagyew nni so koraa ansa na yɛakɔforo bɔs a ɛto so abien no—yɛn nan ntiatiaa no nti, egye mmɔdenbɔ ankasa. Esiane sɛ yɛyɛ nketenkete nti, asɛnka bag a emu yɛ duru yɛ asɛnnennen foforo ma yɛn. Nea ɛbɛyɛ na bag no mu ayɛ hare no, yɛde Bible ketewa na edi dwuma, na yɛmfa nhoma pii nso.

“Efi yɛn mmofraase nyinaa no, yɛnka yɛn ho nkɔ nnipa mu. Yɛn afipamfo nim sɛ yesuro sɛ yɛne nnipa a yennim wɔn bɛkasa. Enti sɛ wohu yɛn sɛ yɛrebɔ wɔn pon mu a, ɛyɛ wɔn nwonwa, na wɔtaa tie yɛn. Nanso, baabi a wonnim yɛn yiye no de, nkurɔfo taa bu yɛn sɛ nkwatia bi; enti, ɛnyɛ bere nyinaa na wɔfa yɛn asɛm no aniberesɛm sɛnea ɛfata. Nanso, Yehowa ho dɔ ma yenya akokoduru toa asɛmpaka adwuma no so. Mmebusɛm 3:5, 6 ho a yedwennwen no nso ma yenya akokoduru.”

Sɛnea Laura ne María da no adi no, mmɔden a yɛbɛbɔ a nipadua mu akwanside mfa ho betumi ahyɛ Onyankopɔn anuonyam. Ɔsomafo Paulo bɔɔ mpae sɛ ne ‘honam mu nsɔe,’ a ebetumi ayɛ honam fam yare, mfi ne so. Nanso, Onyankopɔn ka kyerɛɛ no sɛ: “Me dom no dɔɔ wo so, na me tumi wie pɛyɛ wɔ mmerɛwyɛ mu.” Yiw, enhia sɛ woyi honam fam mmerɛwyɛ  bi fi yɛn so ansa na yɛatumi asom Onyankopɔn. Yɛn ho a yɛde bɛto Onyankopɔn so koraa betumi aboa yɛn ma yɛayɛ nea yebetumi biara wɔ yɛn tebea no mu. Esiane sɛ Paulo buu ne ‘honam mu nsɔe’ no saa kwan yi so nti, otumi kae sɛ: “Sɛ meyɛ mmerɛw a, ɛno ansa na me ho yɛ den.” (2 Korintofo 12:7, 9, 10) Mfe bi akyi no, Paulo kyerɛwee sɛ: “Mitumi ade nyinaa yɛ, nea ɔhyɛ me den no mu.”—Filipifo 4:13.

Ɛnnɛ, Onyankopɔn nam mmarima, mmea, ne mmofra a wɔatu wɔn ho ama koraa so reyɛ adwuma kɛse bi. Wɔn mu bi wɔ nipadua mu mmerɛwyɛ ɔkwan bi so. Nanso, wɔn nyinaa wɔ anidaso sɛ wobenya ayaresa wɔ Onyankopɔn Ahenni mu, nanso wɔntwɛn sɛ Onyankopɔn beyi wɔn haw ahorow no afi wɔn so ansa na wɔayɛ biribi wɔ ne som adwuma mu.

So wowɔ nipadua mu mmerɛwyɛ bi? Ma wo bo ntɔ wo yam! Wonam wo gyidi so betumi aka wɔn a wɔte sɛ Paulo, Laura, ne María no ho. Sɛnea yɛka mmarima ne mmea gyidifo a wɔtraa ase tete ho asɛm no, yebetumi aka afa wɔn nso ho sɛ: ‘Wonyaa ahoɔmmerɛw mu ahoɔden.’—Hebrifo 11:34.

[Mfonini wɔ kratafa 8]

María

Laura

[Mfonini wɔ kratafa 9]

María boa Laura ma ɔforo bɔs

[Mfonini ahorow wɔ kratafa 9]

“Yesuro nkraman yiye efisɛ yɛn fam no, yehu wɔn akɛseakɛse te sɛ mpɔnkɔ”

Ase hɔ: Laura ne María ne wɔn a wɔne wɔn sua Bible no