So Wowɔ “Kristo Adwene”?
So Wowɔ “Kristo Adwene”?
“Na boasetɔ ne awerɛkyekye Nyankopɔn mma munnwen ade koro . . . sɛnea Kristo Yesu kwan te no.”—ROMAFO 15:5.
1. Ɔkwan bɛn so na Kristoman mufo yɛ Yesu ho mfonini, na dɛn nti na ɛnsɛ Yesu?
“WƆANHU sɛ ɔreserew da.” Saa na wɔka Yesu ho asɛm wɔ krataa bi a wodi atoro ka sɛ tete Roma panyin bi na ɔkyerɛwee no mu. Wɔkyerɛ sɛ krataa yi a wohuu no bɛyɛ afeha a ɛto so 11 mu reba no anya mfoniniyɛfo pii so nkɛntɛnso. * Wɔ mfonini ahorow pii mu no, wɔyɛ Yesu sɛ ɔwerɛhoni bi a ɔnserew da. Nanso ɛno nsɛ Yesu a wɔka ne ho asɛm wɔ Nsɛmpa no mu sɛ obi a ɔwɔ ɔdɔ, ayamye, ne tema no.
2. Yɛbɛyɛ dɛn anya ‘adwene a na Kristo Yesu kura no ara bi,’ na dɛn na eyi bɛboa yɛn ma yɛayɛ?
2 Ɛda adi pefee sɛ, sɛ yebehu sɛnea na Yesu te ankasa a, ɛsɛ sɛ yenya sɛnea na Yesu te bere a na ɔwɔ asase so ha no ho nokware nimdeɛ wɔ yɛn adwene ne yɛn komam. Ɛnde momma yɛnhwehwɛ Nsɛmpa no mu nsɛm bi a ɛma yehu “Kristo adwene”—kyerɛ sɛ, ne nkate, nsusuwii, ne n’adwene mu. (1 Korintofo 2:16) Bere a yɛyɛ saa no, momma yensusuw sɛnea yebetumi anya ‘adwene a na Kristo Yesu kura no ara bi’ ho. (Romafo 15:5) Ɛdenam saayɛ so no, yebesiesie yɛn ho yiye wɔ yɛn asetra mu, ne sɛnea yɛne afoforo di mu, na ama yɛadi nhwɛso a wayɛ ama yɛn no akyi.—Yohane 13:15.
Na Ɛnyɛ Den sɛ Afoforo Bɛbɛn No
3, 4. (a) Kyerɛwtohɔ a ɛwɔ Marko 10:13-16 no kɔɔ so dɛn? (b) Bere a Yesu asuafo no bɔɔ mmɔden sɛ wobesiw mmofra no ne nkyɛn ba kwan no, dɛn na ɔyɛe?
3 Na nkurɔfo ka kɔ Yesu ho. Nnipa a ɛsono mfe a wɔadi ne wɔn asetram tebea kɔɔ ne nkyɛn mpɛn pii a wɔansuro. Susuw asɛm a wɔayɛ ho kyerɛwtohɔ wɔ Marko 10:13-16 no ho hwɛ. Asɛm no sii bere a na aka kakra ma ɔde ne som adwuma no aba awiei, bere a etwa to a na ɔrekɔ Yerusalem akohyia ne wu yayaw no.—Marko 10:32-34.
4 Yɛ tebea no ho mfonini hwɛ. Nkurɔfo fi ase de mmofra ne nkokoaa ba Yesu nkyɛn sɛ onhyira wɔn. * Nanso, asuafo no bɔ mmɔden sɛ wobesiw mmofra no Yesu nkyɛn ba kwan. Ɛbɛyɛ sɛ na asuafo no te nka sɛ Yesu mpɛ sɛ wɔde mmofra bɛhaw n’adwene wɔ saa adapɛn titiriw yi mu. Nanso wɔredi mfomso. Bere a Yesu huu nea n’asuafo no reyɛ no, n’ani annye. Yesu frɛ mmofra no ba ne nkyɛn, na ɔka sɛ: “Momma mmofra no kwan na wɔmmra me nkyɛn, na munnsiw wɔn kwan.” (Marko 10:14) Afei ɔyɛ biribi a ɛkyerɛ sɛ odwo na ɔwɔ ɔdɔ ampa. Asɛm no ka sɛ: “Ɔyɛɛ wɔn atuu de ne nsa guu wɔn so hyiraa wɔn.” (Marko 10:16) Ɛda adi sɛ mmofra no koma tɔ wɔn yam bere a Yesu fi ɔdɔ mu yɛ wɔn atuu no.
5. Dɛn na asɛm a ɛwɔ Marko 10:13-16 no ka fa nipa ko a na Yesu yɛ ho?
5 Saa asɛm tiawa no kyerɛ yɛn nipa ko a na Yesu yɛ. Hyɛ no nsow sɛ na nkurɔfo tumi bɛn no. Ɛwom sɛ na ɔwɔ dibea a ɛkorɔn wɔ soro de, nanso na ne ho nyɛ hu, na saa ara nso na na ommu nnipa a wɔnyɛ pɛ animtiaa. (Yohane 17:5) So ɛnhyɛ nkuran nso sɛ mmofra mpo tumi kɔɔ ne nkyɛn? Akyinnye biara nni ho sɛ anka wɔrentumi nka nkɔ onipa nuonyampɛfo a ɔntew n’anim anaa ɔnserew nkyɛn! Nnipa horow nyinaa bi baa Yesu nkyɛn efisɛ wohui sɛ na ɔwɔ dɔ, odwen afoforo ho, na na wɔwɔ ahotoso sɛ ɔrempam wɔn.
6. Ɔkwan bɛn so na mpanyimfo betumi ama afoforo abɛn wɔn kɛse?
6 Bere a yɛresusuw asɛm yi ho no, yebetumi abisa yɛn ho sɛ ‘So mewɔ Kristo adwene? Afoforo tumi bɛn me?’ Wɔ saa mmere a emu yɛ den yi mu no, Onyankopɔn nguan hia nguanhwɛfo a wotumi bɛn wɔn, mmarima a wɔte sɛ “mframa ano hintabea.” (Yesaia 32:1, 2; 2 Timoteo 3:1) Mpanyimfo, sɛ mufi komam nya mo nuanom ho anigye, na munya ɔpɛ sɛ mode mo ho bɛbɔ afɔre ama wɔn a, wobehu sɛ mudwen wɔn ho. Wɔnam mo anim yɛbea, mo nne a mode kasa, ne ayamye a moda no adi so behu. Ɔdɔ mu a mubefi adwen wɔn ho no betumi abue hokwan ma afoforo, a mmofra nso ka ho, ma wɔanya mo mu ahotoso, abɛn mo. Kristoni bea bi kyerɛkyerɛ nea ɛyɛe a otumi daa ne kokoam nsɛm adi kyerɛɛ ɔpanyin bi mu: “Ɔne me kasae wɔ odwo ne mmɔborohunu so. Ɛnte saa a anka ebia merentumi nka asɛm biara. Ɔmaa metee nka sɛ mewɔ ahobammɔ.”
Osusuw Afoforo Ho
7. (a) Ɔkwan bɛn so na Yesu kyerɛe sɛ osusuw afoforo ho? (b) Dɛn nti na ɛbɛyɛ sɛ Yesu buee ɔbarima bi ani nkakrankakra?
7 Ná Yesu susuw afoforo ho. Ná ɔwɔ tema ma afoforo. Sɛ n’ani bɔ amanehunufo so a, na ɛka no ma ɔboa wɔn yi wɔn fi wɔn amanehunu mu. (Mateo 14:14) Afei nso na osusuw afoforo sintɔ ne wɔn ahiade ho. (Yohane 16:12) Bere bi, nkurɔfo de onifuraefo bi brɛɛ Yesu, na wɔsrɛɛ no sɛ ɔnsa no yare. Yesu saa ɔbarima no yare, nanso ɔyɛɛ saa nkakrankakra. Mfitiase no, na ɔbarima no nhu nnipa yiye—‘ohuu nnipa sɛ wɔnenam hɔ, nanso na wɔte sɛ nnua.’ Afei Yesu maa ohuu biribiara kann. Dɛn nti na ɔsaa ɔbarima no yare nkakrankakra? Ebetumi aba sɛ ɔyɛɛ saa sɛnea ɛbɛyɛ na obi a watra sum mu akyɛ no betumi agyina nsakrae a ɛba prɛko pɛ, a ɛne sɛ obehu owia hann ne wiase mu nneɛma bebree no ano.—Marko 8:22-26.
8, 9. (a) Bere a Yesu ne n’asuafo no hyɛnee Dekapoli mantam mu ara pɛ no, dɛn na esii? (b) Kyerɛkyerɛ sɛnea Yesu saa ɔbarima a na n’aso asi no yare no mu.
8 Afei susuw asɛm bi a esii wɔ afe 32 Y.B. Twam no akyi no ho hwɛ. Ná Yesu ne n’asuafo no ahyɛn Dekapoli mantam a ɛwɔ Galilea Po no apuei fam no mu. Woduu hɔ ara pɛ na nkurɔfo akuwakuw pii huu wɔn de ayarefo ne wɔn a wɔwɔ ahoɔmmerɛw pii brɛɛ Yesu, na ɔsaa wɔn nyinaa yare. (Mateo 15:29, 30) Anigyesɛm ne sɛ, Yesu yii ɔbarima bi fii wɔn mu sɛnea ɛbɛyɛ a obedi ɔno nkutoo ho dwuma. Asɛmpa kyerɛwfo Marko a ne nkutoo na ɔyɛɛ ho kyerɛwtohɔ no, ka nea esii.—Marko 7:31-35.
9 Ná ɔbarima no yɛ ɔsotifo a ɔpo dodow. Ɛbɛyɛ sɛ Yesu huu sɛnea ɔbarima yi suro anaa ɔfɛre ade no. Enti Yesu yɛɛ biribi a na ɔntaa nyɛ. Ɔfaa ɔbarima no fii nkurɔfokuw no mu kɔɔ nkyɛn baabi. Afei Yesu nam sɛnkyerɛnne a ɔyɛe so kyerɛɛ ɔbarima no nea ɔrebɛyɛ ama no no. Ɔde “ne nsateaa hyehyɛɛ n’asom, na ɔtoo ntasu de kaa ne tɛkrɛma.” (Marko 7:33) Nea edi hɔ ne sɛ, Yesu hwɛɛ soro, na oguu ahome. Ná ɔbarima no bɛte sɛnkyerɛnne yi ase sɛ, ‘Nea merebɛyɛ ama wo yi fi Onyankopɔn tumi mu.’ Awiei koraa no, Yesu kae sɛ: “Bue.” (Marko 7:34) Ntɛm ara na ɔbarima no aso buei, na otumi kasae.
10, 11. Ɔkwan bɛn so na yebetumi akyerɛ sɛ yesusuw afoforo ho wɔ asafo no ne abusua mu?
10 Hwɛ sɛnea Yesu susuw afoforo ho fae! Ná ɔwɔ tema ma wɔn, na saa ayamhyehye yi maa ɔyɛɛ ade de boaa wɔn yii wɔn fii wɔn ahohia mu. Sɛ́ Kristofo no, eye sɛ yebenya su a ɛte saa na yɛada Kristo adwene adi. Bible tu yɛn fo sɛ: “Mo nyinaa nnya adwenkoro, munhuhu mma mo ho, monnodɔ mo ho sɛ anuanom, mo yam nhyehye mo mmoma mo ho, munnwen ahobrɛase adwene.” (1 Petro 3:8) Akyinnye biara nni ho sɛ eyi kyerɛ yɛn sɛ ɛsɛ sɛ yɛkasa na yɛyɛ yɛn ade wɔ ɔkwan a ɛkyerɛ sɛ yesusuw afoforo nkate ho so.
11 Wɔ asafo no mu no, yebetumi asusuw afoforo nkate ho denam di a yebedi wɔn ni, na yɛne wɔn adi no sɛnea yɛbɛpɛ sɛ afoforo ne yɛn di so. (Mateo 7:12) Ɛno nso bɛhwehwɛ sɛ yɛyɛ ahwɛyiye wɔ nea yɛka ne sɛnea yɛka no ho. (Kolosefo 4:6) Kae sɛ ‘nsɛm a wɔka a wonsusuw ho tumi wɔ sɛ nkrante.’ (Mmebusɛm 12:18) Abusua no mu nso ɛ? Okunu ne ɔyere a wɔdɔ wɔn ho wɔn ho ampa no besusuw ɔfoforo no nkate ho. (Efesofo 5:33) Wɔkwati sɛ wɔbɛkeka nsɛm a ɛyɛ yaw, akasa atia wɔn ho, abɔ akutia—a ne nyinaa betumi ama obi adi yaw a ɛbɛyɛ den sɛ ne werɛ befi. Mmofra nso wɔ nkate, na awofo a wɔwɔ ɔdɔ susuw eyi ho. Sɛ ehia sɛ wɔde nteɛso ma a, awofo a wɔte saa no de ma wɔ ɔkwan a ɛma wodi wɔn mma no ni so, sɛnea ɛbɛyɛ a wɔrenhyɛ wɔn aniwu. * (Kolosefo 3:21) Enti sɛ yesusuw afoforo ho a, ɛkyerɛ sɛ yɛwɔ Kristo adwene.
Ná Ɔwɔ Ɔpɛ sɛ Obenya Afoforo Mu Ahotoso
12. Adwempa bɛn na na Yesu wɔ wɔ n’asuafo no ho?
12 Ná Yesu wɔ n’asuafo no ho adwempa. Ná onim yiye sɛ wɔnyɛ pɛ. Sɛ biribiara da nkyɛn a, na otumi hu nnipa komam. (Yohane 2:24, 25) Nanso, wanhwɛ wɔn sintɔ ahorow, na mmom wɔn suban pa. Afei nso ohuu nneɛma pa a saa mmarima yi a Yehowa apaw wɔn no betumi ayɛ. (Yohane 6:44) Adwempa a na Yesu wɔ wɔ n’asuafo ho no daa adi wɔ ɔkwan a ɔfaa so ne wɔn dii no mu. Ade biako ne sɛ, ɔkyerɛe sɛ ɔwɔ wɔn mu ahotoso.
13. Ɔkwan bɛn so na Yesu kyerɛe sɛ na ɔwɔ n’asuafo no mu ahotoso?
13 Ɔkwan bɛn so na Yesu daa saa ahotoso no adi? Bere a ofii asase so no, ɔde asɛyɛde bi a emu yɛ duru hyɛɛ n’asuafo no nsa. Ɔde N’ahenni nneɛma a wɔbɛhwɛ so wɔ wiase nyinaa no ho asɛyɛde hyɛɛ wɔn nsa. (Mateo 25:14, 15; Luka 12:42-44) Wɔ ne som adwuma mu no, ɔnam akwan nketenkete mpo so kyerɛe sɛ ɔwɔ wɔn mu ahotoso. Bere a ɔnam anwonwakwan so maa nnipakuw bi aduan no, ɔpaw n’asuafo no de aduan no kyekyɛ ho asɛyɛde hyɛɛ wɔn nsa.—Mateo 14:15-21; 15:32-37.
14. Ɔkwan bɛn so na wobɛka asɛm a ɛwɔ Marko 4:35-41 no tiawa?
14 Susuw asɛm a wɔayɛ ho kyerɛwtohɔ wɔ Marko 4:35-41 no nso ho hwɛ. Saa bere yi de, Yesu ne n’asuafo no traa korow mu twaa Galilea Po no kɔɔ apuei fam. Wosiim no, ankyɛ na Yesu kɔɔ ɔkorow no to kɔdae. Nanso, ankyɛ na “ahum kɛse bi tui.” Ná ahum a ɛte saa taa tu wɔ Galilea Po no so. Esiane sɛ ɛwɔ fam koraa (ɛda fam sen po bɛyɛ mita 200) nti, ɛso mframa no mu yɛ hyew sen mpɔtam hɔ de, ma enti wim tebea tumi sakra haw adwene. Nea ɛka eyi ho ne sɛ, mframa a ano yɛ den bɔ fi Yordan Bon no mu fi Bepɔw Hermon a ɛda atifi fam no so ba. Sɛ ahum bi gyae tu kakra a, etumi dan ahum kɛse mpofirim. Susuw eyi ho hwɛ: Akyinnye biara nni ho sɛ na Yesu nim ahum a ɛtaa tu wɔ hɔ no esiane sɛ wɔtetee no wɔ Galilea nti. Nanso ɔdae a na onsuro biribiara, a na ɔwɔ n’asuafo a na wɔyɛ apofofo no mu ahotoso sɛ wɔde no betwa.—Mateo 4:18, 19.
15. Ɔkwan bɛn so na yebetumi asuasua ɔpɛ a na Yesu wɔ sɛ obenya n’asuafo no mu ahotoso no?
15 So yebetumi asua ɔpɛ a na Yesu wɔ sɛ obenya n’asuafo no mu ahotoso no? Ɛyɛ ebinom den sɛ wɔde asɛyɛde bɛhyehyɛ afoforo nsa. Sɛnea yɛbɛka no no, wɔpɛ sɛ wodi nneɛma anim bere nyinaa. Ebia wobesusuw sɛ, ‘Sɛ mepɛ biribi yiye a, ɛsɛ sɛ m’ankasa meyɛ m’ade!’ Nanso sɛ yɛn ankasa yɛ biribiara a, asiane a ɛwom ne sɛ yɛbɛbrɛ dodo, na ebia yɛasɛe bere a anka ɛsɛ sɛ yenya ma yɛn abusua no. Afei nso, sɛ yɛamfa nnwuma ne asɛyɛde a ɛfata bi anhyehyɛ afoforo nsa a, ebetumi aba sɛ yɛremma wɔn ho nkokwaw na wɔrennya ntetee a wohia no. Ɛbɛyɛ nea nyansa wom sɛ yebenya afoforo mu ahotoso na yɛde nneɛma bi ahyehyɛ wɔn nsa. Nyansa wom sɛ yebisa yɛn ho sɛ, ‘So mewɔ Kristo adwene wɔ asɛm yi ho? So mifi me pɛ mu de nnwuma bi hyehyɛ afoforo nsa, nya wɔn mu ahotoso sɛ wɔbɛyɛ nea wobetumi biara?’
Onyaa N’asuafo no mu Gyidi
16, 17. Anadwo a etwa to wɔ Yesu asase so asetra mu no, awerɛhyem bɛn na ɔde maa n’asuafo no, ɛmfa ho sɛ na onim sɛ wobegyaw no no?
16 Yesu daa adwempa a na ɔwɔ wɔ n’asuafo no ho adi wɔ ɔkwan foforo a na ehia so. Ná ɔma wohu sɛ ogye wɔn di. Eyi daa adi pefee wɔ awerɛhyem a ɔde maa n’asomafo no anadwo a etwa to wɔ n’asase so asetra mu no mu. Hyɛ nea esii no nsow.
17 Ɛyɛ anwummere a na Yesu nni adagyew koraa. Ɔmaa n’asuafo no ahobrɛase ho asuade denam wɔn nan ho a ɔhohoroe so. Ɛno akyi no, ɔde anwummeduan a ɛbɛyɛ ne wu ho nkae no sii hɔ. Afei, asuafo no gyee akyinnye denneennen bio wɔ nea na ɔyɛ wɔn mu ɔkɛseɛ ho. Yesu a ɔto ne bo ase bere nyinaa no nka wɔn anim, na mmom ɔne wɔn susuw nsɛm ho. Ɔkaa nea ɛda wɔn anim kyerɛɛ wɔn: “Me ho bɛyɛ mo nyinaa hintidua anadwo yi. Na wɔakyerɛw sɛ: Mɛbɔ oguanhwɛfo no, na ekuw no mu nguan no abɔ apete.” (Mateo 26:31; Sakaria 13:7) Ná onim sɛ sɛ edu n’ahokyere bere mu a, ne nnamfo paa no begyaw no hɔ. Nanso, wankasa antia wɔn. Nea ɛyɛ nwonwa no, ɔka kyerɛɛ wɔn sɛ: “Mesɔre akyi no, medi mo anim makɔ Galilea.” (Mateo 26:32) Yiw, ɔmaa wɔn awerɛhyem sɛ, ɛmfa ho sɛ wobegyaw no no, ɔrennyaw wɔn. Sɛ ɔfa ahohia kɛse yi mu wie a, obehyia wɔn bio.
18. Adwuma kɛse bɛn na Yesu de hyɛɛ n’asuafo no nsa wɔ Galilea, na ɔkwan bɛn so na asomafo no dii ho dwuma?
18 Yesu dii n’asɛm so. Akyiri yi, wɔ Galilea no, Yesu a na wɔanyan no afi awufo mu no yii ne ho adi kyerɛɛ asomafo anokwafo 11 a na ɛda adi sɛ wɔne afoforo ahyiam no. (Mateo 28:16, 17; 1 Korintofo 15:6) Ɛhɔ na Yesu de adwuma kɛse bi hyɛɛ wɔn nsa: “Enti monkɔ nkɔyɛ amanaman nyinaa m’asuafo. Mommɔ wɔn asu nhyɛ Agya ne Ɔba ne Honhom Kronkron din mu, na monkyerɛkyerɛ wɔn sɛ wonni nea mahyɛ mo nyinaa so. Na hwɛ, me ne mo wɔ hɔ nna nyinaa de bɛkɔ akosi wiase awiei.” (Mateo 28:19, 20) Asomafo no Nnwuma no ma yɛn adanse pefee a ɛkyerɛ sɛ asomafo no dii ahyɛde no so. Wofi nokwaredi mu dii asɛmpaka adwuma no anim wɔ afeha a edi kan no mu.—Asomafo no Nnwuma 2:41, 42; 4:33; 5:27-32.
19. Dɛn na nneɛma a Yesu yɛe wɔ ne wusɔre akyi no kyerɛ yɛn wɔ Kristo adwene ho?
19 Dɛn na asɛm a asuade wom yi ma yehu wɔ Kristo adwene ho? Ná Yesu asomafo no ada suban bɔne koraa adi akyerɛ no, nanso “ɔdɔɔ wɔn kosii ase.” (Yohane 13:1) Ɛmfa ho wɔn sintɔ ahorow no, ɔma wohui sɛ ogye wɔn di. Hyɛ no nsow sɛ ahotoso a na Yesu wɔ wɔ wɔn mu no nyɛ nea ɛnteɛ. Akyinnye biara nni ho sɛ ahotoso ne gyidi a onyae wɔ wɔn mu no hyɛɛ wɔn den ma wofii wɔn komam sii wɔn bo sɛ wɔbɛyɛ adwuma a ɔde ahyɛ wɔn nsa no.
20, 21. Ɔkwan bɛn so na yebetumi ada no adi sɛ yɛwɔ yɛn mfɛfo gyidifo ho adwempa?
20 Ɔkwan bɛn so na yebetumi ada Kristo adwene adi wɔ eyi mu? Ɛnsɛ sɛ yenya mfɛfo gyidifo ho adwemmɔne. Sɛ wudwen bɔne a, ɔkwan biara so, w’anom nsɛm ne wo nneyɛe bɛma ada adi. (Luka 6:45) Nanso Bible ka kyerɛ yɛn sɛ ɔdɔ ‘gye ade nyinaa di.’ (1 Korintofo 13:7) Ɔdɔ nya adwempa, ɛnyɛ adwemmɔne. Ɛhyɛ den sen sɛ ɛbɛbrɛ obi ase. Ɔdɔ ne nkuranhyɛ ma nkurɔfo yɛ wɔn ade yiye sen ahunahuna. Yɛnam afoforo mu ahotoso a yɛbɛda no adi so betumi ahyɛ wɔn den na yɛahyɛ wɔn nkuran. (1 Tesalonikafo 5:11) Te sɛ Kristo no, sɛ yenya yɛn nuanom ho adwempa a, ɛbɛma yɛne wɔn adi no ɔkwan a ɛbɛhyɛ wɔn den so na ama wɔafi wɔn komam ayɛ nea wobetumi nyinaa.
21 Kristo adwene a yebenya na yɛada no adi no kɔ akyiri sen sɛ yebesuasua nneɛma bi a Yesu yɛe ara kwa. Sɛnea yɛkaa ho asɛm wɔ adesua a edi kan no mu no, sɛ yebetumi ayɛ yɛn ade te sɛ Yesu paa a, ɛsɛ sɛ yedi kan sua sɛ yebehu nneɛma sɛnea ohui no. Nsɛmpa no boa yɛn ma yehu ne nipasu no fã foforo, n’adwene ne sɛnea na ɔte nka wɔ adwuma a wɔde hyɛɛ ne nsa no ho, sɛnea adesua a edi so no bɛkyerɛkyerɛ mu no.
[Ase hɔ nsɛm]
^ nky. 1 Nea ɔbɔɔ ne tirim yɛɛ Yesu ho mfonini wɔ krataa no mu no ka sɛnea wɔkyerɛ sɛ na Yesu hwɛbea, ne ti nhwi, ne bogyesɛ, ne n’ani kɔla te ho asɛm. Bible mu nsɛm asekyerɛfo Edgar J. Goodspeed kyerɛkyerɛ mu sɛ wɔyɛɛ nnaadaasɛm yi “na ama obiara agye sɛnea mfoniniyɛfo ayɛ Yesu mfonini wɔ wɔn nhoma mu no adi.”
^ nky. 4 Ɛda adi sɛ, na ɛsono mfe a mmofra no biara adi. Wɔde asɛmfua a wɔde gyinaa hɔ maa “mmofra” no dii dwuma kaa Yairo babea a na wadi mfe 12 no ho asɛm. (Marko 5:39, 42; 10:13) Nanso, wɔ asɛm bi a ɛne no di nsɛ mu no, Luka nso de asɛmfua bi a wotumi de gyina hɔ ma nkokoaa nso dii dwuma.—Luka 1:41; 2:12; 18:15.
^ nky. 11 Hwɛ asɛm “So Wudi Wɔn Ni?” a ɛwɔ April 1, 1998 Ɔwɛn-Aban mu no.
Wubetumi Akyerɛkyerɛ Mu?
• Bere a Yesu asuafo no bɔɔ mmɔden sɛ wobesiw mmofra ne nkyɛn ba kwan no, dɛn na ɔyɛe?
• Akwan bɛn so na Yesu susuw afoforo ho?
• Ɔkwan bɛn so na yebetumi asuasua ɔpɛ a na Yesu wɔ sɛ obenya n’asuafo mu ahotoso no?
• Yɛbɛyɛ dɛn atumi asuasua ahotoso a Yesu nyae wɔ n’asomafo mu no?
[Adesua no ho Nsɛmmisa]
[Mfonini wɔ kratafa 16]
Mmofra kɔɔ Yesu nkyɛn a wɔansuro
[Mfonini wɔ kratafa 17]
Yesu yam hyehyee no maa afoforo
[Mfonini wɔ kratafa 18]
Mpanyimfo a afoforo tumi bɛn wɔn yɛ nhyira